Bonnie D. Parkin
Peresitene Aoao o le Aualofa

“O le tele o mea e lelei i lo’u olaga e tutupu ona e mafua mai i le Aualofa,” o le saunoaga lea a Bonnie D. Parkin. “Ou te talitonu i le lelei o tamaitai e fetausiai ai i ni auala e uunaiina ai e le tasi le isi.”

Na soifua mai i le aso 4 o Aokuso 1940 i ona matua o Jesse H. ma Ruth Butikofer Dansie. O Sister Parkin o le lona tolu i totonu o se aiga e toalima le fanau. Na ola a’e o ia i Herriman, Iuta, i le vaega i saute i sisifo o le Vanu o Sate Leki, lea na faato’aina e le tama matua o lona tama i le faatonuga a Peresitene Polika Iaga. O matua o lona tina o ni tagata liliu mai i Suiselani o e sa nonofo e latalata i Idaho Falls, i Idaho.

O le 1962 na faauuina ai ia Sister Parkin ma se faailoga (bachelor) mai le Iunivesite o le Setete a Iuta ma e le’i leva ae amata ona faiaoga i le vasega tolu i Bountiful, Iuta. O Fepuari 1963 sa ia feiloai atu ai ia James L. Parkin, o le taimi lea faatoa tausaga muamua o ia i le aoga faafomai i le Iunivesite o Iuta. Sa faaipoipoina i la’ua i le aso 1 o Iulai, 1963 i totonu o le Malumalu o Sate Leki.

O le taimi nei o i laua o ni matua o se fanau e toa 4 ma ni fanau a fanau e 14, e fiafia tele le aiga o Parkin i tafaoga faaleaiga i le Lake Powell po o le faasee i le kiona i luga o mauga. E fiafia foi Sister Parkin i le fai togalaau, tenisi, ma le savali i taeao po.

“Pe a ou toe tepa i tua i lo’u olaga, soo se valaauga lava na faamalosia ai a’u,” o lana saunoaga lea. “O le valaauina e avea ma se peresitene o le Aualofa a o avea a’u ma se tasi o tina pito i laitiiti i la’u uarota o se luitau lea, ae o se lagona filemu na oo mai a o taliaina a’u e tamaitai o le uarota. O lena valaauga na faamanuiaina ai lo’u olaga ma sa fesoasoani ai ia te a’u ina ia ou alualu i luma.”

Sa auauna atu ia Sister Parkin i le fono faatonu aoao a le Aualofa mai le 1990 seia oo i le 1994, ina ua valaauina o ia e avea ma fesoasoani lua i le au peresitene aoao o Tamaitai Talavou. Ae o le 1997 na valaauina ai o ia ma lana tane e auauna atu mo le tolu tausaga e avea ma peresitene o le Misiona aEgelani Lonetona i Saute.

“O le faamanuiaga o le auauna atu i se misiona faatasi ma la’u tane na matuai faamalosia ai lava a’u,” o lana saunoaga lea. “Ma te fiafia tele i le Au Paia i Peretania, e faapena foi i alii ma tamaitai faifeautalai, ma e tele foi ni mea na ma aoaoina mai ia i latou.”

O le naunau ina ia uunaiina tamaitai talavou ina ia mauaina ia olioliga a le Aualofa e faapea foi mo uso o le Aualofa ina ia aapa atu i tamaitai talavou, na saunoa ai Sister Parkin, “Mo uso uma lava, o le Aualofa o se nofoaga lea e mafai ona fesoasoani ia i tatou ina ia omai ia Keriso.”