Ia Outou Tumau i Mea Paia
O le tumau i mea paia o lona uiga, ia teine lelei ma fai le mea sa’o tusa pe na o oe, pe o i ai foi ma nisi.
O le po o le Aso Tofi, o le po lea e masani ona galulue ai Mama ma Papa i le Malumalu o Cardston. O le taimi o lo’u talavou, pei o outou tamaitai talavou. E le i i ai foi lo’u tinamatua lea sa matou nonofo, o lea sa na o au ai le fale. Ina ua o o’u matua, sa fusi au e lo’u tama ma faapea mai, “Sharon, teine lelei ma fai le mea sa’o.”
Sa ou mafaufau, “O le a lona manatu? Na te le o iloa o le a na o au?” Ona ou iloa ai lea—o le mea tonu lava lena o loo mafaufau i ai.
O le tumau i mea paia o lona uiga, ia teine lelei ma fai le mea sa’o tusa pe na o oe, pe o i ai foi ma nisi. O le i ai o le Agaga Paia ma o tatou soa—pe tuua na o oe pe o i ai foi ma nisi tagata. Pe a tatou fuafua i o tatou lava loto, o le a tatou pulea o tatou mafaufauga ma a tatou taga, ma fai le mea sili tatou te mafaia, e mafai ona tatou faia le mea sili i le olaga.
O se nofoaga paia o se nofoaga lea tatou te lagona ai lo tatou saogalemu, malupuipuia, alofagia ma le mafanafana. O le tulaga lena sa i ai i lo tatou aiga faalelagi. O le tumau i nofoaga paia ma faia le mea sa’o e toe manatua ai lagona e uiga i lena aiga sa tatou tuua, o le aiga e foliga mai e ese le mamao i nisi taimi.
E lua ma le afa tausaga talu ona faatulaga le Ekalesia, sa lapataia ai e le Alii ia Iosefa Samita e uiga i taua ma oge ma faama’i o le a oo mai ona o le amioleaga. Ona Ia ta’u mai ai lea ia i tatou o le ala e mafai ai ona saogalemu i lea ituaiga o lalolagi: “Ia outou tumau ai i mea paia ma aua le liliu ese, seia oo mai le aso o le Alii” (MFF 87:8).
O nofoaga paia, e puipuia ai i tatou mai faafatiatamai ua toetoe a lofituina ai le lalolagi. E mafai ona avea agelu ma a tatou soa ma fesoasoani (tagai MFF 84:88). Sa siomia le perofeta o Moronae i le amioleaga ma le au Sa Lamana sa faatalitali e fasioti soo se mea sa latou vaai i ai. Sa toeitiiti atoa le 20 tausaga sa lafi ai na o ia. Sei manatu la i lena ituaiga o tuulafoaiina! Peitai, o lana molimau matagofie ma lana apoapoaiga i mataupu mulimuli o le Tusi a Mamona, o loo ta’u mai ai sa latou mafuta ma agelu ma le Agaga Paia. Sa le’i tuua na o ia. E mafai e le Agaga Paia ona aveesea lagona tiga o le tuulafoaiina po o le faaesea po o le teena, ae faatumulia i tatou i le filemu. Ua ta’ua o ia o le Fesoasoani—ma o Ia o lena fesoasoani!
E mafai ona avea taimi e siomia ai i tatou e tagata, e oo lava i uo e faia filifiliga sese, ma taimi e aupito sili ona tuulafoaiina ai i tatou, ma tatau ai ona tatou tutu na o i tatou. E i ai ni nofoaga e le saogalemu ona outou o i ai e oo lava i se fesoasoani mo se tasi o loo manaomia. Ua fetalai mai le Alii ia tumau i mea paia. E i ai nofoaga o le a le mafai lava ona i ai le Agaga. Ua outou iloa na nofoaga. Aua tou te o i ai. Aua tou te uunaia se tulaga o le fiailoa, ua tatau nei ona tuu. Ia nofouta i ou lagona ina ia e iloa le taimi e te le mautinoa ai pe faaletonu ai foi.
Sa faamatala mai e Heather se taimi sa valaaulia ai o ia i se pati ma ni tagata “lauiloa” ole aoga. A o savali atu i le faitotoa, sa lagona le aafia o lona agaga i musika sa leoleoa i le fale. Sa ia lagona le inoino. Sa amata ona mou atu uo i potu pogisa. Fai mai Heather, “O le pati na vave ai ona ou iloa ua tatau ona fai sa’u filifiliga: pe o tagata nei po o o’u tulaga faatonuina. Sa le mafai ona ou i ai i mea uma e lua. Sa ou iloa ou te le’i manao i upu sa ou faalogo ai, po o vaaiga faaata tifaga e faaleaga ai o’u mafaufauga, tusa lava pe o le a le lauiloa o nei tagata. Sa ou iloa e le o se nofoaga lea e tatau mo au. A o ou faatalitali mo lo’u tina e sau e piki au, sa ou tilotilo atu i fafo i le faamalama i le po pogisa, sa susulu mai i luga o le mauga e pei o se faailoilo le malumalu. Sa pei o faamautinoa mai ia te au e le Alii, ua ou faia le mea sao” (faaaoga ina ua faatagaina, ae ua suia le igoa).
O le tumau i mea paia e fesoasoani ai e avea i tatou ma tagata paia, peitai, o se uigaatua lena e manaomia ai le faataitai i ai. Faataitai ona faalogo i le Agaga ma ia usiusitai. Faataitai ona mama atoatoa. Faataitai ona faaaloalo i mea paia. Ua tau mai e le Alii ia te i tatou e faalatalata mai ia te Ia ona Ia faapaiaina ai lea o i tatou (tagai MFF 60:7). Tuu atu ia te Ia e siomia oe i le alofa ma le loto faamagalo ma le filemu. Tusa lava pe o a mea o tutupu i lou siosiomaga, e mafai ona e faataitai e fausia sou lava siosiomaga, e faatumulia i le Agaga o le Alii.
Nai lo lou fesili atu i se isi tagata pe o le a le pupuu po o le fufusi, po o le valavala e mafai ona i ai ou lavalava, o oe lava ua i ai le matafaioi ma ia e fesili ifo foi ia te oe lava, “O le a so’u ofu e mafai ona fai? O a ou foliga ma a’u taga e tatau ona fai ina ia mafai ai ona ma mafuta ma le Agaga Paia ma faamanuia ai au e le Tama Faalelagi?”
E faigata ona koleni ou faanaunauga ia manao i le lelei ma le matagofie, pe afai o lua faafeagai pea ma le tuufaafeagai ma e foliga mai e sili atu ona faatosina ma malie ma manaomia tele.
Ina ua papatisoina outou, sa outou osi feagaiga e tausi i poloaiga. O na feagaiga ma faamanuiaga o le i ai pea lava pea o le Agaga o le Alii faatasi ma outou, e faafouina i taimi uma tou te aai ai ma feinu ma le agavaa i le faamanatuga. O le a faamalolosia ai outou pe a outou fetaiai ma tofotofoga.
Sa aumai e la’u tama teine ni meaai e faana ai lana tama tama e tolu tausaga i le faamanatuga. Ina ua pasi mai faatusa paia o le faamanatuga i le matou atunofoa, sa musumusu mai Jake e tolu tausaga, “Fai i ai tatou te le manaomia lena falaoa. O lea na aumai a tatou lava meaai.” I se tamaitiiti e tolu tausaga, na pau lava le mea na ia vaai i ai, o fasi falaoa ma sa ia mafaufau o loo i ai ni ana mea e sili atu. O le iloa o le mea e paia ma le aoaoina o o tatou faanaunauga mo na mea, e matua taua mo lo tatou fiafia. O se lagoto matagofie po o se lagi ua faatumulia i fetu, o se rosa matagofie ua ufitia i le sau o le taeao, po o se tamaipusi—e toe faamanatu mai e nei mea uma ia i tatou e paia mea a le Atua.
E mafai ona i ai nofoaga paia i soo se mea lava e te i ai—pe na o oe, po o se tumutumu o tagata, faatasi ma tagata ese, ma uo. Sa matua matautia ma ‘alofia le ala i Ieriko. Sa lalafi tagata faomea i pupuvao ma laau e faatalitali ai e osofa’ia soo se tagata faimalaga. O se Samaria lototoa na suia lena auala mai se nofoaga taufaamatau i se nofoaga paia. E i ai mea e mafai ona e faia e aumaia ai le paia i nofoaga masani: pe a e faaaluina se afiafi e vaai ai tamaiti laiti ina ia mafai ona sei fai si malologa a se tina vaivai, pe a e fufuluina ipu mo lou tuagane tusa lava pe o ia lea ua oo i ai le faasologa, pe a e tapenaina le fale o se uo loomatua—o ia mea e maua ai lagona o le le manatu faapito ma taulaga ma le paia.
O le a i ai taimi o le a musumusu atu ai le Agaga e mafai ona e faaleleia le nofoa o loo e i ai. O le taulaga Lusia o Omasaki i Saiperia, sa foliga mai ia te au e malulu ma naumati, seia oo ina ou faalogoina se vaega o alii ma tamaitai talavou o lagiina le “Ua Sili Oe” (Viiga, Nu. 46) i la latou gagana. Sa faafuasei ona avea le lalolagi atoa—po o lo’u lalolagi—ma se nofoaga paia, e mafanafana ma i ai le alofa ma le olioli.
E anoanoai le tamaoaiga o le atamai ma le taitaiga ma le saogalemu o loo i ai mo outou e ala lea i tatalo masani, ‘anoa ma le suesue i tusitusiga paia. O mea na e faatumauina ai o outou mafaufau i nofoaga paia pe a outou i ai i aoga pe fai foi a outou faatauga o ofu, pe faasee foi i le Initoneti. Na saunoa mai Peresitene James E. Faust, “Ou te talitonu o le faitauina o tusitusiga paia o le masini tamea aupito sili lea mo mafaufauga le mama po o mafaufauga le pulea” (“O Le Mana o le Loto Pulea,” Liahona, Iulai 2000, itulau 52).
O le paia e filemu ma tauagafau, e faigofie ona le i loa pe tatou le nofouta i ai. Sa savalia e le Alii le auala i Emau, faatasi ma ni alii se toalua sa matua atugalu i mea na tutupu i Lona faasatauroga ma le toetu, ma sa la’ua le iloaina o le Alii lava Ia lea sa latou savavali.
I le tele o tausaga ua mavae, sa matou usuina faatasi ai ma se vaega o tagata mai nisi faatuatuaga le fatuga a Handel o le “Mesia”. E ui lava ina sa eseese o matou talitonuga, ae sa matou pepese uma lava i le Mesia e tasi, o lo tatou lava Faaola. Ua tele taimi sa ou usuina ai lea fatuga, ae i se tasi faataitaiga patino, sa ta’u mai ai e le Agaga, ua le gata ina ou usuina nota, ae o la ou te usuina la’u molimau: “E moni, ua na tauave o tatou tiga, ma na tauave o tatou faanoanoa” (Isaia 53:4) Sa ou iloaina ma lo’u agaga atoa, sa Ia faia lena mo au. E le’i umi ae avea na siufofoga e 300 ma isi foi siufofoga ma se musumusu ma sa ou lagonaina e pei ua na o au lava ma le Alii. Sa ou lagonaina Lona alofa ma lana faamautinoaga na Ia tauave tiga ma faanoanoaga o lo’u loto talavou, ma afai ou te usiusitai, o le a ma savavali faatasi pea ma Ia i aso uma o totoe o lo’u ola.
O le mauaina o lena faamanuiaga ma le faamafanafanaga ma le alofa mai le Alii, e sili atu nai lo se isi lava tau. E te iloaina loa po o a nofoaga paia, ona e iloa ai lea le mea e tatau ona e i ai. Atonu e manaomia ai ona taulagaina o tatou manaoga faalelalolagi po o le tulaga lauiloa. Atonu e manaomia ai le lotomaualalo ma le loto faamagalo po o le salamo atoatoa foi. E manaomia ai “lima mama ma le loto mama” (Salamo 24:4). Fai soo se mea e tatau ona e faia ina ia mafai ai ona e tumau i nofoaga paia ma aua lava le liliu ese ai, ia tutu atu mo le upumoni ma le amiotonu, tusa lava po o a faatosinaga ma mea leaga a tagata faatupu leaga (MFF 89:4) ma faasalalauga. I saunoaga tulei a Peresitene Hinckley, “Ia tutu maualuga atu teisi ma ia faasusulu atu a outou aga faatamalii i o [outou] olaga” (“O Se Taimi o Amataga Fou,” Liahona, Iulai 2000, 107). Tamaitai talavou pele, valaaulia le Alii tou te savavali faatasi. Ia avea o Ia ma au soa i lou olaga atoa, i aso uma o lou ola, ina ia mafai ai ona e toe foi atu i lena aiga o loo e moomoo i ai, o le nofoaga e aupito sili ona paia i lo nofoaga uma.
E faauma atu la’u tautalaga i se pese o loo ta’u atu ai la’u tatalo mo outou ma au:
Faapaia mai a’u, …
Ia taumafai pea,
Onosa’i i tiga,
Faanoanoa i sese,
Ia faatuatua,
I le Faaola,
Fiafia e auauna
Tatalo aoga.
(Fa’apa’ia Mai A’u,” Viiga, nu. 70).
I le suafa o Iesu Keriso, amene.