Ma Avea Mou Lelei
O o tatou puapuaga, e mafai ona tatou sailia ai lo tatou manumalo silisili, ma atonu o le a oo mai le aso e ala mai i o tatou luitau o le a tatou malamalama ai i nei upu masani, “ma avea mou lelei.”
I se taimi ua tuanai atu sa ou maua ai se tusi e leiloa le tagata na tusia, mai se tina ua nutimomoia lona loto ma sa faaalia mai ai lona mafatia ma le tiga ona o sana tama tama ua ia faia ni solitulafono matuia, ua faatiga ai e pele ma taumamaina.
Talu mai lana tusi ia te au, ma lo’u lagonaina o lona faanoanoa, o lea sa i ai lou naunauga malosi e faailoa atu lou alofa ia te ia ma isi o loo i ai foi i tulaga faapea, ma ou taumafai ai e tuuina atu se faamafanafanaga ma se faamoemoega mo i latou e le mailoa po o ai i latou ma o loo latou tauaveina pea avega mamafa e na o i latou lava, ma e masani na o i latou lava ma se Tama Faalelagi alofa latou te silafiaina.
Ou te iloa, Tuafafine Lemailoa, o le mea o le a ou tautalagia, o le a na o se faamanatu, ae o se tasi foi o molimau i mea ua uma ona e silafia.
A o puapuagatia le Perofeta o Iosefa Samita, i se tasi o taimi sili ona faigata ia te ia, a o tuulafoaiina i le lua o le Falepuipui o Liperate, sa ia tagi ai “Le Atua e, o i fea ea oe?” (MFF 121:1), sa faamafanafana mai le Alii ia te ia i upu nei: “Ia e iloa ai, lou atalii e, e tuuina atu ia te oe le poto masani, ona o ia mea uma, ma avea mou lelei” (MFF 122:7). E matuai faigata tele ma tiga le mauaina o se mea lelei mai faalavelave ma puapuaga faaletagata lava ia. Matuai ese le tulai mai o lea faaupuga “ma avea mou lelei.”
Peitai ane, o se malamalamaaga i le fuafuaga o le faaolataga a le Faaola, ua fesoasoani i le faatulagaina o nei puapuaga ma mafatiaga i tulaga e tatau ona i ai. I lo tatou tulaga i le muai olaga, sa faailoa mai e lo tatou Tama Faalelagi lana fuafuaga mo le olaga faaletino, e pei ona faamatalaina e Alema o le “ala sili o le fiafia” (Alema 42:8). Ou te talitonu ua tatou malamalama uma ina ua tatou o mai i le lalolagi, o le a tatou oo atu ai i aafiaga uma o le ola faaletino, e aofia ai tofotofoga faale-lelei o le tiga, mafatiaga, leai o se faamoemoe, agasala, ma le oti. O le a i ai le faafeagai ma mea faigata. Pe ana fai na o le pau lea o mea tatou te iloa e uiga i le fuafuaga, ailoga e i ai se tasi o tatou e taliaina ma faapea ane ma le fiafia, “O le mea tonu lava lea sa ou manao i ai—tiga, mafataiaga, leai o se faamoemoe, agasala ma le oti.” Peitai, na faaali manino mai lava ma na taliaina ai ma le moomia, ina ua tulai mai le Uso Matua ma ofo mai o le a ia sau i lalo nei ma faaleleia mea uma. Mai tiga ma mafatiaga, o le a Ia aumaia ai le filemu. Mai le leai o se faamoemoe o le a Ia aumaia ai le faamoemoe. Mai solitulafono o le a Ia aumaia ai le salamo ma le faamagaloga. Mai le oti, o le a Ia aumaia ai le toetu o le ola. Faatasi ai ma lena faamalamalamaga ma se talosaga alofa, sa tatou autasi uma loa i lena faaiuga, “E mafai ona ou faia le mea lena. O se tulaga matautia lena e taua.” Ma o lea, sa tatou filifilia ai.
O le maoae tele o le faasafua atu o le alofa mutimutivale o Keriso ma Lana Togiola o loo faamatala mai e Amoleka i le mataupu e 34 a Alema i le Tusi a Mamona. O loo faamalamalama mai e Amoleka e tatau ona i ai le “taulaga sili ma le taulaga faaiu” (Alema 34:10). Ona ia faamanino mai lea e le o se taulaga o se manu vaefa po o manu felelei e tali tutusa ma mea ua iloa e tagata. O le taulaga lava o se Atua—Iesu Keriso. A e ao ina i ai le taulaga e le mafuatia ma le faavavau. Ma o lea na faia ai le taulaga, ma ona o le faatuatua ua tatou o mai ai i lenei malaga ua tatou taua o le olaga faaletino. E faanoanoa o tatou loto i le aveesea o se tamaitiiti e aunoa ma se faamatalaga po o le oo faafuasei mai o mai po o mai tumau o le tino i se pele. O matua nofo toatasi o loo tauivi mo le sailia o fesoasoani tautupe ma le faamautinoaina o aafiaga o le talalelei i totonu o o latou aiga. Ae masalo o le tulaga sili ona faigata i nei mea uma o aafiaga tiga o le vaai atu ma le faanoanoa i mafatiaga o se pele ona o agasala ma soligatulafono.
E toaitiiti i tatou, pe afai e i ai, e le savalia le afi a le tunu auro o faaosoosoga ma le leai o se faamoemoe, o nisi taimi e iloa e nisi, ae mo le toatele e natia ma le filemu ma onosaia lava na o ia. O le tele o le loto nutimomoia, tiga ma mafatiaga o le a tatou le filifilia i le aso, peitai sa tatou filifilia. Sa tatou filifilia ina ua tatou iloa le fuafuaga atoa. Sa tatou filifilia ina ua tatou maua le faaaliga manino o le laveaiina e le Faaola o i tatou. Pe ana fai o le manino lea o lo tatou faatuatua ma lo tatou malamalama ua i ai nei, i le taimi muamua sa tatou faia ai lea filifiliga, ou te talitonu o le a tatou toe filifili ai. O le mea lea, masalo o le luitau o le maua lea o le ituaiga faatuatua i taimi o faigata e pei ona tatou faaaogaina i la tatou uluai filifiliga. O lea ituaiga faatuatua e liliuina ai le fesiligia ma le ita i le faailoaina mai o le mana, faamanuiaga, ma le faamoemoe lea e mafai ona oo mai ia te Ia, o le pogai o le mana, faamanuiaga, ma le faamoemoe . O lea ituaiga faatuatua e aumaia ai le malamalama ma le mautinoa o mea uma ua tatou oo i ai o se vaega o le fuafuaga o le talalelei ma e amiotonu, o mea uma e foliga ua sese, o le a i ai le taimi e faasa’o ai. O lea filemu ma le malamalama e onosaia ai ma le mamalu ma le manino o le faamoemoega, e mafai ona avea o se taui suamalie. E mafai ona fesoasoani lea ituaiga faatuatua ia i tatou e iloa ai mea lelei, e tusa pe ua foliga mai le auala o le olaga o ni mea matuitui ma talatala ma ni maamaa maamaai.
Ao savavali ane Iesu ma Ona soo ma tau atu i se alii sa tauaso talu lona fanau mai, sa fesili Ona soo, “Rapi e, po o ai ea na agasala, po o ia nei, po o ona matua, ina ua fanau mai o ia o tauaso? Ua tali atu Iesu, E le i agasala lenei tagata, po o ona matua, peitai ina ia faaalia ai o galuega a le Atua ia te ia” (Ioane 9:2–3).
Ou te le talitonu ua pogai mai i le Tama Faalelagi ia faalavelave ma loto ua nutimomoia i o tatou olaga. Ae peitai e pei ona faaalia “galuega a le Atua” i le faamaloloina o le tagata tauaso, ma o le ala foi tatou te faafetaiaia ai tofotofoga faale tagata e ono faaalia ai “galuega a le Atua.”
Mai o tatou faanoanoaga tatou te ono maua ai le suamalie ma le lelei lea e masani ona fegalegaleai faatasi ma le tulaga uigaese o o tatou luitau. E mafai ona tatou saili mea sili ona taua lea e masani ona natia e le tiga ma le faanoanoa. Tatou te maua le toafilemu i lo tatou aapa atu i isi, i le faaaogaina o o tatou aafiaga e aumaia ai le faamoemoe ma le faamafanafanaga. Ma o le a mafai ona tatou manatuaina i taimi uma ma le amiotonu tele ma le loto faafetai Le na puapuagatia i mea e tele ina ia faaleleia mea uma mo i tatou. O le faia ai faapea, o le a faamalolosia ai i tatou e tauave a tatou avega i le filemu. Ona faaalia ai lea o “galuega a le Atua.”
I le tautalagia o le Faaolataga a Keriso, ou te fiafia i le faamatalaina e le lomifefiloi o le upu “le gata”ma le “faavavau” aua ou te talitonu o loo faamatalaina mai ai le uiga moni o le Atua.
“Le gata: e leai ni ona tuaoi po o se gataaga.” A o le uiga o le faavavau: “o le leai o se amataga po o se faaiuga” (The American Heritage Dictionary of the English Language 4th ed. [2000], 898, 611).
Ua e tagai la, Tuafafine Lemailoa? O lona uiga, o le Faaolataga sa saunia mo oe i ou mafatiaga. O se mea e patino, e pei ona Ia silafia lelei ou tofotofoga ma mafatiaga aua ua maea ona Ia puapuagatia ai. O lona uiga o loo i ai se faamoemoega ma se lumanai mo lau tama. O lona uiga o loo i ai se amataga fou mo i tatou taitoatasi—e oo foi i se atalii ua faia se solitulafono matuia. O lona uiga, a o tatou agai atu i luma i tofotofoga ma faaosoosoga o le olaga, ma le mamafatu o lagona o le leai o se faamoemoe, tatou te le taulai atu i mea sa tatou i ai, ae o le mea o loo tatou agai atu i ai. Tatou te le taulai atu i mea sa i ai, ae o le mea e mafai ona i ai.
E ta’u atu pea, o le toatele o i tatou e sili ai pe ana tatou aoaoina lesona faigata o le olaga i nofoaga saogalemu o potuaoga ia o le Aoga Sa po o le mafanafana o se nofoaga e tafu ai le afi ao faia se afiafi faaleaiga. Ae, sei ou tau atu le mea lenei, na ala mai i tulimanu malulu ma le pogisa o le Falepuipui o Liperate ona oo mai nisi o tusitusiga paia matagofie ma le mafanafana ua tuuina mai i tagata pei ona faaiuina i upu ia, “e tuuina atu ia te oe le poto masani ona o ia mea uma, ma avea mou lelei.” E faapena foi, o o tatou puapuaga, e mafai ona tatou sailia ai lo tatou manumalo silisili, ma atonu o le a oo mai le aso e ala mai i o tatou luitau o le a tatou malamalama ai i nei upu masani, “ma avea mou lelei.”
Mai tusitusiga paia ua tatou aoao ai, ina ua alu atu le Faaola i le Faatoaga o Ketesemane e totogi le sala o a tatou solitulafono ma o tatou mafatiaga, sa puna mai Lona toto i pu laiti uma o le tino (tagai MFF19). Ou te talitonu, Tuafafine Lemailoa, o Ona tiga le mafaatusalia, sa maligi ai lona toto mo oe. Sa maligi lona toto mo lau tama, ma sa maligi lona toto mo au.
Ou te talitonu i le tatalo. Ou te talitonu i le faatuatua. Ou te talitonu i le salamo. Ou te talitonu i le mana o le Faaolataga. Ioe, Tuafafine Lemailoa, ou te talitonu ia te oe. Ma e faapena foi se Tama alofa i le Lagi. I le suafa o Iesu Keriso, amene.