Elder Gerald N. Lund
O le Fitugafulu

“‘E le olegiaina e le Atua se tasi ma e leai se tasi e olegiaina le Atua,’ o le tala lea e masani ai lava ona tautala i ai lo’u tama. E masani foi ona ia ta’u mai ia i matou, ‘O le Atua e ese le lotofoai ma na te tuuina mai ia i tatou le anoanoai o faamanuiaga,’” o le saunoaga lea a Elder Gerald N. Lund, o se uso fou faatoa valaauina o le Fitugafulu.

“Sa matou ola a’e i lea manatu,” na ia faaauau ai, “ma o loo faauigaina ai pea lava le auala ou te lagonaina e uiga i le auauna atu. O le faatele lava ona ou taumafai e faafetai i le Atua, o le faatele foi lena ona foliga mai Na te faamanuiaina a’u, lea ou te matuai lagonaina ai le loloto o lo’u nofo aitalafu ia te Ia. E le mafai ona e mauaina o Ia.”

Ina ua taliu mai ia Gerald Lund mai le auaunaga faafaifeautalai, na ia fuafua ai o le a sili atu ona alu e faigaluega nai lo le alu i le kolisi.

“Sa ou alu ou te faigaluega i galuega fau fale,” na ia faamatala mai ai. “Ina ua mavae se vaiaso e tasi o le fufuluina o poloka sa faamalo ai le sima i se pulumu mamafa, sa ou iloaina ai e le o le auala lenei ou te manao e faaalu ai lo’u olaga.”

Na vave lava ona tusia lona igoa i le Iunivesite a Polika Iaga, lea na ia faamaeaina ai ona faailoga (bachelor) ma le (master). O lana faaiuga e alu i le kolisi sa le gata ina suia ai lona olaga ae na taunuu atu foi i le tele o tausaga i le aoaoina atu o le talalelei i le anoanoai o le Au Paia o Aso e Gata Ai.

Na amata faiaoga ia Gerald Lund i le seminare i le Aai o Sate Leki i le 1965, na amata ai se galuega e 34 tausaga ma le Ofisa o Aoga a le Ekalesia. I le faaopoopo atu i ona uluai tausaga e faiaoga ai i le seminare, sa ia faiaoga foi i le inisitituti, avea o se faatonu o le inisitituti, galue o se tusitala o mataupu aoaoina, ma faataunuuina le tele o tofiga faaletaitai. O ia foi o se tusitala o le tele o tusi ma tala lauiloa.

Na soifua mai ia Elder Lund i Fountain Green, i Sanpete County, Iuta, i ona matua o Jewell ma Evelyn Lund i le aso 12 o Setema 1939. Na siitia atu le aiga i le Aai o Sate Leki ina ua tasi le tausaga o lona matua ma mulimuli ane ai i Murray, Utah, lea sa tele ina faaaluina ai tausaga o lona tuputupua’e.

O le 1963 na ia faaipoipo atu ai ia Retta Lynn Stanard, mai Great Falls, i Montana. E toa 7 le la fanau ae toa 17 le fanau a le la fanau. O le Tuafafine ia Lund o se tagata musika lelei tele ma e tele foi ni ana fatuga ua faasalalauina. Sa galulue faatasi ia le aiga o Lund i nisi o faaaliga o le Kerisimasi ma le Eseta.

Sa galue ia Elder Lund o se peresitene o le paranesi, epikopo, ma se fesoasoani i le epikopo. O le taimi o lona valaauga i le Korama Lona Lua a Fitugafulu, o loo avea ia Elder Lund ma peresitene o le Siteki 14 a le Iunivesite a Polika Iaga.