Ua Faamaeaina e Taaloga Olimipeka mo Tagata e le Atoatoa le Malosi ia Taalogao o le Taumalulu i Sate Leki

O le agaga o le tauva i afeleti sa faaauauina pea a o talimalo ia le Aai o Sate Leki i Taaloga Olimipeka o le Taumalulu mo Tagata e le Atoatoa le Malosi i le aso 8–16 o Mati. E silia ma le 4,000 tagata galulue fua ma le fiaafe o tagata maimoa sa tapuaia ia taumafaiga a tagata taaalo e le atoatoa le malosi mai le lalolagi a o latou tauva ai i le faasee agai i lalo i luga o le kiona, o le hoki, ma le tautuuga faasee faataamilo i le aai.

TUUFAASOLOINA O LE SULU

O le aso 7 o Mati, sa tutulai ai le Au Peresitene Sili ma sui o le Korama a Aposetolo e Toasefululua i luma o le Ofisa o Taitai o le Ekalesia e tauaaoina le sulu o le Olimipeka a Tagata e le Atoatoa le Malosi. Sa tutulai i luga o faasitepu le Au Peresitene Sili ma faafeiloaia le sulu mai le sa ia tauaveina o Carrie Snoddy o le Park City, Iuta. Sa ia tauaaoina atu lana sulu ia Peresitene James E. Faust, le Fesoasoani Lua i le Au Peresitene Sili, o le na tauaaoina atu ia Peresitene Thomas S. Monson, le Fesoasoani Muamua i le Au Peresitene Sili, o le na ia tauaaoina atu loa ia Peresitene Gordon B. Hinckley.

Sa sii i luga e Peresitene Hinckley le sulu mo tagata maimoa uma sa i ai ina ia vaai atu i ai. “Afifio mai, maliu mai, i le Olimipeka mo Tagata e le Atoatoa le Malosi, i nei tagata taaalo o e ua matuai maoae lava!” sa ia saunoa ai. “O agai i luma! Ia manumalo i le tuuga! Ia maua le taui! Ia fiafia, ia fiafia. O loo matou faatasi uma ma outou. O loo matou tapuai uma mo outou. Matou te mananao ina ia outou manuia, ma e matou te faamoemoe o le a avea lenei faatasiga ma se faatasiga silisili mo tagata uma e auai ai. Ia avea tagata uma ma se manumalo. Ia manuia!”

Ona tauaaoina atu lea e Peresitene Hinckley le sulu ia Margaret Stocks o le Uarota Lua a Polika Iaga, o le Siteki a Brigham City Utah Box Elder, o le na tauaveina atu le sulu i lona auala.

TAGATA TAAALO NA AUAI

Sa faatasi ai i tagata taaalo e 1,000 mai atunuu e 36 o e na tauva i Taaloga Olimipeka o le Taumalulu mo Tagata e le Atoatoa le Malosi i Sate Leki ia ni tagata se toalua o le Au Paia o Aso e Gata Ai. O Lacey Heward, o se tagata e 22 tausaga le matua o le Uarota a Mount Mahogany, o le Siteki a Highland Iuta i Sasae, na faatoilaloina ona popolega ae laasia le toatele o tagata na latou tauva i le aso 11 ma le 14 o Mati, ma manumalo ai i ni pine apamemea se lua i le vaega o tamaitai e faasee i le laupapa e tasi.

O Sister Heward sa na o le 18 masina lona matua ae lavea loa i se faalavelave ma maua ai lona tino i le le atoatoa. Ae o se le atoatoa faaletino e le’i faavaivaia ai lona taumafai “ina ia mafai ona oo i le tulaga silisili e mafai ona oo i ai.”

”Sa ou matuai galue malosi ina ia ou oo i lenei tulaga,” o lana tala lea. “E ese le manaia o le faalogona ina ia taunuu mai iinei, le mauaina lea o le lagona e tauva ai, ma alu atu ma faataunuuina.”

O Keith Barney, o se tagata o le Uarota 11 a Alpine 11, o le Siteki a Alpine Iuta, na tauva i le taaloga o le taufetuliga mo le lima kilomita faapea le vaega o alii i le nofo i lalo ma faasee e lua ona vaega. O ia foi o se tasi o le au tautuu i uila vilivae o le ‘au i le Olimipeka a Tagata e le Atoatoa le Malosi a le Iunaite Setete.

O le Uso ia Barney na le mafai ona toe gaoioi ona vae ona o se faalavelave i le 14 o ona tausaga. O le taimi nei o loo galue ai o ia i le nofoaga faamalositino i le Vaega Faafomai a le Iunivesite o Iuta. O loo ia aoaoina ia tagata fou ua le atoatoa le malosi i le auala e ola atoatoa ai i ni olaga faatamaoaigaina.

TALAFOU I TAALOGA A LE OLIMIPEKA O LE TAUMALULU

I le faaopoopo atu i tagata taaalo o le Olimipeka sa vaaia i le Liahona o Iuni 2002, o Quinn Wheeler, 28 tausaga, o se tagata o le Uarota 39 a Taylorsville, o le Siteki a Taylorsville Iuta i Saute, na avea ma sui o le Motu o Virgin i le Iunaite Setete o se tasi o le latou aufaasee i le tuuga i nofoafaasee i le Olimipeka o le Taumalulu. O le Uso ia Wheeler na amata ona taalo i le nofoa faasee i le taimi o i le kolisi ma masani ai ma tagata o le au a le Motu o Virgin a o galue ai i St. Thomas i le ogatotonu o le 2000. Na auai o ia i le ‘au ina ua tulai mai se avanoa e le’i fuafuaina.