O Le Liua Atoatoa e Aumaia ai le Fiafia
O lou fiafia i le taimi nei ma le faavavau, e fuafua i le tulaga o i ai lou liua ma le suiga e aumaia i lou olaga.
Ua tofu vaaia e i tatou nisi tagata e faia pea lava pea mea tonu i o latou olaga. E foliga mai e fiafia lava i latou, e sagisagi fiafia foi i le olaga. Pe a oo ina faia ni faaiuga faigata i le olaga, e foliga mai latou te faia lava e le aunoa faaiuga sa’o, tusa lava pe i ai nisi mea e faatosinaina ai i latou. Tatou te iloa e mafai ona latou gauai atu i tofotofoga, ae e foliga mai latou te le ano i ai. E faapena foi ona tatou vaaia isi e le totoa i a latou faaiuga e fai. I se siosiomaga mamana faaleagaga, latou te faia faaiuga o le a latou faia le mea e lelei atu, e suia o latou olaga, e faataatia ese uiga masani leaga. E matua faamaoni lava lo latou naunau e suia, ae e le umi ae toe foi lava i le mea lava lea na tonu ia i latou e lafoai.
O le a le mea e mafua ai le eseesega o olaga o nei ituaiga tagata e lua? E mafai faapefea ona e faia pea lava pea o faaiuga sa’o? Tatou te maua se malamalamaaga mai tusitusiga paia. Manatu ia Peteru osovale ma le naunau atu. E tolu tausaga sa auauna atu ai o se Aposetolo i tafatafa o le Matai, ma maitauina vavega, ma faalogo foi i aoaoga faaliliuloto a le Faaola ma faamalamalamaga patino o faataoto. Sa vaaia e Peteru, Iakopo ma Ioane le liliuga mamalu o Iesu Keriso, faapea foi ma le asiasiga a Mose ma Elia.1 Peitai e ui i nei mea uma, Sa silafia lava e le Faaola e le lava le tumau o Peteru. Sa silafia lelei lava o ia e le Matai e faapei foi ona Ia silafia i tatou taitoatasi. Ua tatou faitauina mai le Tusi Paia, e faapea:
“Ua fetalai atu le Alii, Simona e, Simona e, faauta, ua manao Satani ia te outou, … A ua ou faatoga mo oe, ina ne’i mavae lou faatuatua: a o oe foi, pe a liua mai oe, ona e faamalosi ai lea i ou uso.
“Ua fai mai o ia ia te ia, Le Alii e, ua ou sauni ta te o faaasi ma oe i le falepuipui, atoa ma le oti.”2
O le mea moni, e le o ni upu aveane ai nei, mai le vaaiga a Peteru. Sa matua loto i ai i le mea na ia fai atu ai, ae sa tatau ona faia e tusa ai.
Mulimuli ane i le Mauga o Olive, sa valoia ai e Iesu i Ona soo, “Tou te tausuai uma ona o au i lenei po; aua ua tusia, Ou te taia le leoleo mamoe, ona taapeape ai lea o mamoe.” Sa toe tali atu Peteru, “E ui lava ina tausuai o tagata uma, ou te le faapea lava au.” Ona fetalai manino atu ai lea o le Matai, “E moni, ou te fai atu ia te oe, O lenei aso, o le po nei lava, a o lei oo i le vivini faalua o moa, e te faafiti faatolu mai ia te au.” O lea na atili ai ona tali atu i ai Peteru ma le malosi, “Afai lava e tatau ona ta oti faatasi ma au, ou te le faafiti lava ia te oe.”3
Ia te au lava ia, o se tasi o fuaitau aupito faamomoiloto o le mau, o loo faamatala mai ai le mea na sosoo. O se faamanatu manino ia i tatou taitoatasi o le iloa o le faia o le mea sa’o, tusa lava pe matua o’oo’o le naunau e fai le mea sa’o, e le lava lea. E masani ona matua faigata tele ona faia tonu lava le mea ua tatou iloa lelei e tatau ona fai. Ua tatou faitau:
“A ua iloa atu [Peteru] e le tasi auauna teine … ma faapea ane, O lenei tagata foi sa faatasi ma ia. “A ua faafiti atu o ia … ua faapea atu, Funa e, ou te le iloa o ia.
“… na vaai mai se tasi ia te ia, ua faapea mai, O oe foi le tasi o i latou. Ona fai atu lea o Peteru, Sole, e le o a’u. Ona matua fai mai ai lea o le tasi, … E moni lava, sa ia te ia lenei tagata: … Ona fai atu lea o Peteru, Sole, ou te le iloa le mea e te fai mai na. Ona vivini loa lea o moa, a o tautala o ia. Ona faliu lea o le alii, ua silasila atu ia Peteru. Ona manatua ai lea e Peteru le fetalaiga a le Alii, … ona alu ai lea … i fafo, ua tagi lotulotu ai.”4
Atonu ai ona o le tiga tele o lena faamaoniga o le valoaga ia Peteru, na amata ai ona suia lona olaga e faavavau. Na avea o ia ma auauna ua le femoumouai, ua mausali e pei o le papa, e taua i le fuafuaga a le Tama ina ua mavae le faasatauroga ma le toetu o le Faaola. O lea foi lava fuaitau faamomoiloto, o loo faamanino mai ai le tele o le alofa o le Faaola i a Peteru. E ui lava ina sa i ai o ia i le totonugalemu o se luitau mamafatu i Lona lava soifua, ma le mamafa uma o mea sa faatietie i Ona tauau, ae sa Ia faliu atu lava ia Peteru—o se alofa o se faiaoga ua faasopolia atu i se tamaitiiti aoga faapelepele, ma avatu ai le lototele ma se malamalama i le taimi ua manaomia ai. Na amata mai iina ona tulai Peteru ma le atoatoa i lona valaauga. Sa ia aoao atu ma le mana ma le molimau e le maluelue e ui lava ina taufaamata’u, faafalepuipui, ma sauaga. Sa liua moni lava o ia.
O nisi taimi e faaaoga ai le upu liua e faamatala ai se tagata faamaoni ua filifili e papatiso. Peitai, pe a faaaoga sa’o, o le liua e sili atu i le na o lena, e le gata mo le tagata faatoa liliu mai ae faapea foi i le tagta ua leva ona lotu. Sa faamatala e Peresitene Marion G. Romney ma le manino faamataupu faavae le uiga o le liua e faapea:
“O le liua o lona uiga, o le liliu mai se tasi talitonuga po o faatinoga i se tasi. O le liua, o se suiga faaleagaga ma le lelei. O le liua, e le na o le taliaina faalemafaufau o Iesu ma ana aoaoga e aofia ai, ae e aofia ai foi ma se faatuatua faaosofia ia te ia ma lana talalelei. O se faatuatua e galueaiina ai se suiga, o se suiga moni o le malamalama o se tasi i le uiga o le olaga, ma lona faamaoni i le Atua ma lona finagalo, i mafaufauga, ma le amio. O le tagata ua matua liua atoatoa, o lona uiga ua mate moni lona manao i mea e feteenai ma le talalelei a Iesu Keriso. Ae ua suia i se alofa i le Atua, ma se naunautaiga moni tumau e tausia ana poloaiga.”
Ina ia liua, e tatau ona e manatua e faaaoga ma le filiga i lou olaga, ia upu autu “o se alofa i le Atua, ma se naunautaiga moni tumau e tausia ana poloaiga.” O lou fiafia i le taimi nei ma le faavavau, e fuafua i le tulaga o i ai lou liua ma le suiga e aumaia i lou olaga. E mafai faapefea la ona e liua moni? Na faamatala mai e Peresitene Romney laasaga nei e tatau ona e mulimuli ai:
“O le avea ma tagata o le Ekalesia ma le liua, e le tutusa. O le liua ma le i ai o se molimau , e le tutusa foi ia mea. E maua se molimau pe a aumai e le Agaga Paia i le tagata e saili ma le faamaoni se molimau i le upumoni. O se molimau faamaoni, e avea ai le faatuatua ma malosiaga mamana. O lona uiga, e uunaia ai le salamo ma le usiusitai i poloaiga. O le liua, o le fua lea po o le taui o le salamo ma le usiusitai.”5
I se faaupuga faigofie, o le liua moni o le fua lea o le faatuatua, salamo, ma le tumau i le usiusitai. O le Faatuatua, e sau mai le faalogo i le afioga a le Atua6 ma tali atu i ai. O le a e mauaina mai le Agaga Paia se molimau faamautinoa, e uiga i mea ua e taliaina i le faatuatua e ala i lou faia ma le naunautai.7 O le a taitaia oe ia e salamo i mea sese na mafua mai i mea sese ua fai, po o mea sa’o foi e le i faia. O se taunuuga la, o le a malosi atili lou tulaga e gafatia ai ona e usitai e le aunoa. O lenei faataamilosaga o le faatuatua, salamo, ma le usiusitai e le aunoa, o le a taitai atu ai oe i se liua e sili atu faatasi ai ma ona faamanuiaga e maua ai. O le liua moni, o le a malosi atili ai lou tulaga gafatia e faia ai mea e te iloa e tatau ona fai ma le taimi foi e tatau ai ona fai, tusa lava po o a tulaga o i ai.
O le faataoto o le lulu fatu sa aoao mai e Iesu, i se tulaga aoao na faamatala mai ai le ala o loo talia ai le upu a le Alii e tagata eseese e pei ona folafola mai. Manatu mo sina taimi, pe faapefea ona faatatau lea lava faataoto ia te oe i tulaga eseese o lou olaga, a o e feagai ma luitau pe fetaiai foi ma faatosinaga malolosi. O le upu, po o aoaoga a le Faaola, e mafai ona e maua i ni ala se tele: a o e maitauina isi, pe ala mai foi i au lava tatalo po o le manatunatu loloto i tusitusiga paia, po o le taitaiga foi a le Agaga Paia. A o ou toe faamatalaina atu le faamalamalamaga a Iesu na tuu atu i Ona soo e uiga i le faataoto i le tagata lulu saito, ia e suesueina faalemafaufau lou olaga. Vaai pe i ai ni vaitaimi, na i ai ni tulaga le talafeagai ia te oe na e le taliaina ai aoaoga sa’o, ma afua ai ona e le maua fua o le fiafia sa folafola mai, filemu, ma le alualu i luma.
“O le lulu saito, e lulu ia i le upu. “[O nisi] i le auala, … a latou faalogo ai, ona alu ane loa lea o Satani, ma aveeseina le upu na luluina i o latou loto.”
Mata e mafai ona tupu lena mea ia te oe, i le siosiomaga sese, ma faauoga sese?
“[O nisi] i le mea papa; o i latou ia ua faalogo i le upu, ona talia loa lea ma le fiafia;
“Ae peitai ua leai ni o latou aa, ua faaletumau i latou: mulimuli ane, pe a … tupu le puapuaga … ona latou tausuai ai lea.”
Pe i ai se taimi na ofo atu ai e se tagata se mea e le talafeagai, ae leai se mea na e faia e teena ai?
“[O nisi] na luluina i le vao tuitui; o i latou ia na faalogo i le upu, “A o le loto popole i mea a lenei lalolagi, … ma le tuinanau i nisi mea, ua oo atu i totonu o le loto, ua fetinaiina ai le upu, ona le fua mai lava lea.”
Pe na i ai ea se taimi na e matua manao ai lava i se mea, ma iu ai ina e faatagaina e oe lava ia se tuusaunoaga i ou tulaga faatonuina?
“[O nisi] na luluina i le eleele lelei; o i latou ia ua faalogo i le upu, ma latou talia [le upu ] ma fua mai e taitolugafulu i nisi, e taiono sefulu i nisi, e taiselau foi i nisi.”8
Ou te iloa o le auala lenei e te manao e te ola ai i lou olaga. O le tulaga e i ai le atoatoa o lou taliaina ma le naunautai o aoaoga a le Faaola, e fuafua ai le tele o fua, o ni faamanuiga, o le a e seleseleina i lou olaga. O lenei faataoto o loo faamanino mai ai, o le tulaga e te usiusitai ai ma le naunautai i na mea ua e iloa e tatau ona e faia, o le teena o mafuaaga faatosina e fai isi mea, o le a fuafua ai po o le a le moni o lou liua. O le mea la lea, o lenei faataoto ua faaalia ai le tulaga atoatoa e mafai ai e le Alii ona faamanuia oe.
O le liua moni e fua mai ai fua o le fiafia tumau lea e mafai ona olioli ai, tusa lava pe vevesi le lalolagi ma o le toatele o tagata e leai se fiafia o maua. O loo aoao mai le Tusi a Mamona e uiga i se vaega o tagata, sa feagai ma faigata: “Ua latou anapogi ma tatalo soo, ma ua tauau ina faamaulalo atili ai i latou, ma ua tauau ina mausali atili i le faatuatua ia Keriso, e oo i le faatumuina o o latou loto i le olioli, ma ua faamafanafanaina, ioe, e oo i le faamamaina ma le faapaiaina o o latou loto, ona ua latou tuuina atu o latou loto i le Atua.”9
Na tautino mai e Peresitene Hinckley, o le liua moni e maua ai le eseesega.10
Ina ia maua faamanuiaga ua folafola mai mai le liua moni, ia fai suiga e te iloa e manaomia i lou olaga. Ua fetalai mai le Faaola: “Pe tou te le foi mai nei ea ia te au, ma salamo i a outou agasala, ma ia faaliliuina, ina ia ou faamaloloina outou? … Afai tou te o mai ia te au, e maua e outou le ola faavavau.11
Ou te molimau atu a outou tatalo mo se taitaiga, o le a fesoasoani le Agaga Paia e faailoa atu suiga patino e tatau ona e faia ina ia e liua atoatoa ai. Ona mafai lea ona faamanuia tele oe e le Alii. O le a malosi atili foi lou faatuatua ia te Ia, o le a faateleina foi lou tulaga gafatia e salamo ai, ma o le a faamalosia atili foi oe e usitai e le aunoa. E alofa o Ia ia te oe. A e faia le mea sili e te mafaia, o le a Ia fesoasoani ia te oe. I le suafa o Iesu Keriso, amene.