Lipoti a le Matagaluega Suetusi a le Ekalesia
I Le Au Peresitene Sili O Le Ekalesia a Iesu Keriso o le Au Paia o Aso e Gata Ai
Uso Pele: O loo i ai i le Ekalesia a Iesu Keriso o le Au Paia o Aso e Gata Ai se matagaluega suetusi, e tuma’oti le faatinoga o ana galuega mai isi matagaluega uma ma galuega a le Ekalesia. O le pule faatonusili o le Matagaluega Suetusi a le Ekalesia, e lipoti sa’o atu e le aunoa i le Au Peresitene Sili. O le aufaigaluega a le Matagaluega Suetusi a le Ekalesia, e aofia ai tausitusi faamaonia mai fafo, o suetusi faamaonia mai totonu, ma isi polofesa agavaa ua faamaonia.
Ua i ai i le Matagaluega Suetusi a le Ekalesia le pule e sue ai tusi a matagaluega uma ma galuega a le Ekalesia i le lalolagi atoa, i lalo o le taitaiga a le Au Peresitene Sili. Ua i ai i le Matagaluega Suetusi a le Ekalesia faamaumauga uma, o tagata, o meatotino, ma mea e faaaoga e sue ai saofaga a le Ekalesia, o tupe faaalu, ma punaoa. O le tulaga autu lava o loo taialaina ai le filifiliga ma faatinoga o suegatusi o le tulaga e ono tulai mai ai ni tupe e leiloloa.
O tupe faaalu a le Ekalesia i le 2001, sa faamaonia e le Aufono i le Faatulagaga o le Sefuluai. O le Aufono lenei e aofia ai le Au Peresitene Sili, o le Korama a Aposetolo e Toasefululua, ma le Au Epikopo Pulefaamalumalu, e pei ona faatonuina ai i le faaaliga. O tupe faaalu e vaaia e Matagaluega o Paketi ma Mea Tau Tupe i lalo o le taitaiga a Komiti Faafoe ma Paketi. O le puleaina o paketi faamaonia ua maea ona sue ma lipoti mai.
Ua manatu le Matagaluega Suetusi a le Ekalesia, e faavae i galuega sa faatinoina i la latou suegatusi, o le tulaga o galuega faaletino uma, o saofaga sa maua mai ma tupe faaalu i le tausaga na faaiuina i le 2001, sa pulea ma taulimaina e tusa ai ma taiala o paketi ua faatagaina, faapea foi aiaiga ma faagasologa o mea fai a le Ekalesia.
O gaoioiga o mea tau tupe a faalapotopotoga a le Ekalesia, ia e faagaoioia ese mai le Ekalesia, e le’i sueina e le Matagaluega Suetusi a le Ekalesia i le 2001. O nei faalapotopotoga e aofia ai le Deseret Management Corporation ma ona lala, faapea foi Iunivesite a Polika Iaga ma isi aoga maualuluga. Peitai, o gaoioiga tau tupe a nei faalapotopotoga, sa sueina e ni kamupani suetusi tutoatasi mai fafo. E le gata i lea, sa faamaonia e le Matagaluega Suetusi a le Ekalesia, o lipoti talafeagai o nei suegatusi sa faia lea e komiti suetusi a faalapotopotoga taitasi.
E tuuina atu ma le faaaloalo lava e le,
MATAGALUEGA SUETUSI
Wesley L. Jones
Pule Faatonusili
1 Aperila, 2002