Elder William R. Walker
O le Fitugafulu

A o laitiiti o ia i se tamai nuu o le Au Paia o Aso e Gata Ai i Raymond, Alberta, Kanata, sa masani ona asiasi atu ai ia William Walker i le fale o matua a ona matua e latalata ane. O iina, o loo tautau ai i le puipui se ata o le Au Peresitene Sili. “E mafai ona ou manatuaina pea lena ata. E tele sona aafiaga ia te a’u i na uluai tausaga. Sa ou ola a’e ma fiafia i taitai o le Ekalesia,” o lana tala lea.

Na soifua mai ia Elder William R. Walker i le aso 25 o Me 1944 i ona matua o J. Harris ma Beth Russell Walker. Ina ua maea se misiona i Iapani, sa ia auai atu loa i le Iunivesite o Polika Iaga, lea sa ia feiloa atu ai i lona faletua, o Vicki Van Wagenen. Sa faaipoipoina i la’ua i le Malumalu o Sate Leki i le aso 10 o Iuni 1968 ma o ni matua o se fanau e toalima.

Ina ua mae’a lona faauuga, sa siitia atu loa le aiga o Walker i Vancouver, British Columbia, Kanata, lea na ia amataina ai lana galuega i se pisinisi faaputu tupe i le avea ai ma se faufautua. Sa nonofo le aiga o Walker i le Aai o Sate Leki; o Concord, Kalefonia; o Dunwoody, Georgia; ma Kenilworth, Ilinoi, a o le’i toe foi mai i Iuta i le 1988. Sa avea o ia ma peresitene o se vaega o le American Express ma mulimuli ane ona umiaina ni tofiga maualuluga i nisi o faletupe tetele o le lalolagi, o le Citibank ma le Barclays Bank.

E fiafia tele ia Elder Walker e teuteu ia fugalaau ma laau aina i lona fanua. Sa maua foi e ia ma lona faletua le tele o avanoa e tausia ai le togalaau a le Alii. Sa valaauina i laua e pulefaamalumalu i le Misiona a Iapani Tokyo i Saute i le 1990, ma sa peresitene foi o ia i le Siteki a Sandy Iuta Cottonwood Creek i le taimi na valaauina ai o ia i le Korama Lona Lua a le Fitugafulu. Sa avea faalua o ia ma se epikopo, o se fautua maualuga, ma se sui o le uelefea mo le risone.

“O se vaega tele o lo’u olaga o la’u misiona lea a o o’u tama talavou,” o le saunoaga lea a Elder Walker. “E faatolu ona asiasi atu ia Peresitene Hinckley i Iapani a o o’u i ai iina. O se tasi o na asiasiga i le fale o le misiona, na ia ta’u atu ai ia te a’u ma la’u soa ina ia ma saunia e avea ma ni epikopo ma ni peresitene o siteki. O lena mea sa matuai o ma ofo ai lava. Ae ua faamanuiaina a’u i lo’u vaai ai i le faataunuuina o lena uunaiiga matagofie mai se perofeta a le Atua.”