Lagonaina o le Alofa o le Alii
O le mea e tasi ou te manao ia tupu i tamaitai taitoatasi i totonu o le Ekalesia, ia latou lagonaina le alofa o le Alii i o latou olaga.
Uso e, ma tuagane, e i ai se upu faapenei: “Afai e te fia tuputupuae faaleagaga ma faalemafaufau, talia soo se avanoa e taitaiina atu ai oe i mea e te lei faia muamua i lou olaga.” Ma ou te mautinoa o le a ou tuputupuae ai. Ou te fia faailoa atu lou agaga faafetai tele ia Sister Smoot, Sister Dew, ma Sister Jensen mo auaunaga maoae sa latou tuuina mai mo i tatou uma o tagata o le Ekalesia. Ou te fia faailoa atu foi le loto faafetai i ou fesoasoani o Kathy ma Anne, mo lo laua naunau e auauna atu. O i latou o ni tamaitai o le faatuatua.
Ou te matuai faafetai tele foi i lou tina ma lou tama, mo aoaoga sa laua tuuina mai ia te au, mo lo laua alolofa, mo le aoaoina o au i le galue. Ua ou iloa galue. Ou te faafetai i lou toalua. O Jim o se soa sili ona lelei. Ou te alofa ia te ia, ma ou te faafetai mo lona lagolagoina o au. O ia o se alii faamaoni. Ou te faafetai foi i ou atalii ma o la taitoalua, o a la fesoasoaniga ua avea ai i laua ma ni alii sili atu ona lelei. Ou te faafetai i fanau a lau fanau. I le tasi afiafi ao matou tietie atu agai i le fale o le isi alii o la ma fanau, e tau i ai e uiga i lenei tofiga. Ua uma ona faamomoe tamaiti. Sa ou fai atu ia Brett ma Angie, “Ua valaauina au e avea ma peresitene aoao o le Aualofa.” Sa faapea mai Brett, “O oe? Le peresitene o le Aualofa i le Ekalesia aoao?” E lelei tele lau fanau a? Ua ia tauina mai le mea sa ou lagonaina lava i vaiaso ua mavae.
Ina ua matou taunuu mai i le fale ananafi. Na ou mauaina ai se meli mai lou atalii o David ma lona toalua o Jennifer, i Peleseuma. Sa faapea mai David, “Tina, ou te iloa e mafai ona e faia. Atonu e te le manatuaina, ae sa masani ona e tuuina se mau i luga o le pusaaisa faapea, ‘A o au nei ma lou aiga, matou te auauna ia Ieova’ (Iosua. 24:15).” Sa ia toe faapea mai, “Sa masani ona ou oo atu i le pusaaisa i le tele o taimi, ma sa ou iloa sa oulua mulimuli ai ma tama i lena mau. Ou te matuai faafetai tele i la maua fanau.
Ou te faafetai tele atu foi i tamaitai uma o le Ekalesia o e sa faufautua ia te au, o e sa alolofa ia te au, o e sa aoaoina au, o e na talitonuina au. Ou te faafetai i faifeautalai i totonu o le misiona a Egelani Lonetona i Saute, mo lo latou amiolelei, i le ala o latou tausia ai a latou feagaiga. Ou te faafetai i le Au Paia i Peretania sa alolofa ia te au ma fesoasoani ia avea au ma se vaega o lena atunuu maoae.
O lea uso e, ma tuagane, ou te le mailoa le mafuaaga ua valaauina ai au, ae peitai, ua ou iloa sa valaauina au. Ou te folafola atu ia te outou lou alofa, la’u lagolago, ma ou te talosaga atu ia outou onosai a o ou aoao i lo’u valaauga fou.
Ou te valaaulia tamaitai talavou nofofua uma o le Ekalesia, po o fea lava o outou i ai, ina ia outou tagai atu i le Aualofa ma iloa o loo manaomia ai outou, matou te alolofa ia te outou, ma o le a tatou maua se taimi fiafia faatasi. Faamolemole o mai tatou faatasi.
E pei ona tusia e Wallace Stegner e uiga i tagata Mamona, “O o latou tamaitai e tulaga ese.” Ma o loo faapena i le aso. Ou te iloa e alofa le Alii i tamaitai o le Ekalesia. O le mea e tasi ou te manao ia tupu i tamaitai taitoatasi i totonu o lenei Ekalesia, ia latou lagonaina le alofa o le Alii i aso uma o o latou olaga. Ua ou lagonaina le alofa o le Alii i lou olaga, ma ou te matuai faafetai tele mo lena mea. Ou te faafetai mo le toafilemu ua ou lagonaina.
Ou te molimau i lou Faaola o Iesu Keriso. Ou te iloa o loo soifua o Ia. Ua ou lagonaina lona alofa; ua ou lagonaina lana faamagaloga. Ou te mafaufau i se tamaitai faifeautalai ao ia tuua le misiona. I lana molimau faaiu, sa ia faapea ai, “Sa ou sau i le misiona e faailoa atu i lou Tama Faalelagi ou te alofa ia te ia, e faailoa atu lou talisapaia o Ia, ma ou toe totogi atu ia te ia,” ma ia toe faapea mai, “Ua sili le tele o mea ua ou faaopoopo i la’u aitalafu ia te Ia nai lo le taimi na ou sau ai.”
Ou te tuuina atu lau molimau i le mana o le perofeta a le Atua, Peresitene Gordon B. Hinckley, ma ou te faafetai ia te ia mo lona alofa ma perofeta uma ua i ai lo latou faatuatuaga ia te au. Ou te molimau atu ai i nei mea uma i le suafa o Iesu Keriso, amene.