O Le Talalelei i O Tatou Olaga
Ua Ia aumaia mo i tatou Lana togiola, o Lana Talalelei, o Lana Ekalesia, o se tuufaatasiga o mea paia ua tatou maua ai le faamautinoaga o le tino ola pea, ma le avanoa mo le ola faavavau.
I ni nai tausaga ua mavae, sa ou fiafia ai lava i se katuni o se nusipepa, sa i ai se faifeau sa talanoa ma se ulugalii e sitaili faa-hipi, sa tietie i se pasika. “O i ma’ua o tagata lolotu,” sa fai atu ai le isi i le faifeau. “Ua tele tausaga o ma o … ae o lea ma te le’i taunuu lava i ai.”1
E toatele o tatou aiga lautele ma uo e le’i taunuu foi i le lotu. Atonu e auai mai i nisi taimi, ae o la lava latou te le’i olioli i faamanuiaga atoatoa o le auai ma le auauna atu i le ekalesia. O isi atonu o loo auai e le aunoa, ae latou te le o faia tautinoga ma sailia le toe fanaufouina patino faaleagaga e maua mai le tuuina atu o o tatou loto i le Atua. O ia ituaiga uma o tagata, o loo latou misia ni faamanuiaga tulaga ese o lenei olaga. Ma ua i ai i se tulaga matautia o le le mauaina o faamanuiaga aupito silisili ona matagofie i le olaga a sau.
Na aoao mai e Paulo, na tuuina mai e le Alii ia perofeta ma aposetolo, “ina ia faaatoatoaina ai le au paia, … le galuega a auauna, … [ma le] atinaeina o le tino o Keriso” (Efeso 4:12). O tagata e le o auai atoatoa i Le Ekalesia a Iesu Keriso o le Au Paia o Aso e Gata Ai, ma o loo sailia foi se liliuga faaleagaga faaletagata, ua latou le maua aafiaga e tatau ai i lalo o le Ata Sili o le Fiafia na faatuina mai le lagi. E taua aoaoga ma galuega a le Ekalesia, ia maua ai le ola e faavavau o le tagata (tagai Mose 1:39).
Ou te tatalo ia toatele nisi o faafofoga mai i lo’u leo, e maua se molimau faaleagaga i le taua o le misiona a le Ekalesia, e faamalamalama ai ma faaeaina le fanau a le Atua. E faapitoa la’u tatalo mo nisi e le i olioli i faamanuiaga, o le auai atoatoa i le Ekalesia, ma tautinoga, ina ia latou saili ma maua lena molimau ma faatino ai.
Pe a ma le sefulu tausaga ua mavae, a o ou i ai i se konafesi faalesiteki i le Iunaite Setete, sa faafeiloai atu au i se tagata ua tele tausaga e le o auai mai i le Ekalesia. “Aisea e tatau ai ona ou toe toaga atu i le Lotu?” o le fesili lea a le uso lea o le ekalesia. Ona ou mafaufau lea i mea uma sa faia e le Faaola mo i tatou, ma sa ou tali atu i ai, e tatau ona faigofie ona ofoina atu sina mea e auauna atu ai ia te Ia ma o tatou uso a tagata. Sa mafaufau lea faifesili i lena manatu mo sina minute, ona fai mai ai lea o lana tali maofa: “O le a se mea na Ia faia mo au?”
O lena tali maofa sa afua ai ona ou manatunatu loloto i mea o loo faamoemoe tagata e maua mai ia Iesu Keriso, mai Lana talalelei, ma le auai i Lana Ekalesia. Sa ou mafaufau i nisi ua faapea mai, ua le toe o i le Lotu aua “e le o faia e le Ekalesia mea o latou manaomia.” O a tulaga manaomia o latou faamoemoe e fai e le Ekalesia? Afai e na o ni aafiaga faafiafia o loo sailia e tagata, atonu e le fiafia i se uarota patino po o se paranesi, ona latou saili atu ai lea i isi faalapotopotoga. E tele aafiaga faafiafia faamalieloto i le tele o faalapotopotoga. Afai e na o le aoao i le talalelei o loo latou sailia, e mafai ona latou tulimataia lena sini i tusitusiga o loo maua. Ae pe o faamoemoega autu ea nei o le Ekalesia? Pe na o le pau ea nei o mea e tatau ona tatou maua mai le talalelei a Iesu Keriso?
Na fai mai se tasi tagata, o mea tatou te maua e fuafua i mea tatou te sailia. O tagata e pau le mafuaaga e auai i le Ekalesia ona ia maua ai se mea faaletino, e ono le fiafia. Sa tusi faitio le Aposetolo o Paulo e uiga i tagata o e “le auauna i lo tatou Alii o Iesu Keriso, a o o latou lava manava” (Roma 16:18). O tagata e auai i le Ekalesia ina ia mafai ai ona latou foai atu i o latou uso a tagata ma auauna atu i le Alii, e seasea ona le fiafia lea. Sa folafola mai e le Faaola, “o le e faamaumau i lona ola ona o au, e maua e ia” (Mataio 10:39).
Ua aumai e le Ekalesia ia te i tatou o avanoa e auauna atu ai i le Alii ma o tatou uso a tagata. Afai e tuuina atu i le ala sa’o ma le mafuaaga sa’o, o le a tauia i tatou i lena auaunaga e sili atu nai lo mea tatou te foai atu. E faitau miliona tagata e auauna lelei atu ma le le manatu faapito o ni taitai ma faiaoga i faalapotopotoga a le Ekalesia, ma i latou ua iloa le liliuga lea na faamatala e le perofeta sa augani mai ia i tatou ia “o mai ia ia Keriso, ina ia faaatoatoaina e ia” (Moronae 10:32).
I lo’u olaga atoa, sa faamanuiaina au i le avea ai ma se uso auai O Le Ekalesia a Iesu Keriso o le Au Paia o Aso e Gata Ai. E le mafai ona faamatala uma atu auala ua faamanuiaina ai lo’u olaga e le Ekalesia, atoa ai ma olaga o i latou e pele ia te au. Ae o le a ou ta’uina atu na o ni nai faataitaiga, ma le faamoemoe o le a faaopoopo atu i le faatauanauga patino i mataupu autu ua ou faamatalaina atu.
O le auai i le Lotu i vaiaso taitasi, e maua ai le avanoa e ‘ai ai ma inu i le faamanatuga, e pei ona poloaiina ai i tatou e le Alii (tagai MFF 59:9). Afai tatou te faatinoina ma le saunia ma uiga faaalia sa’o, o le aai ma feinu i le faamanatuga e faafouina ai le aafiaga faamama o o tatou papatisoga, ma tatou agavaa ai mo le folafolaga o le a tatou maua pea lava pea Lona agaga e faatasi ma i tatou. O se misiona a lena Agaga, le Agaga Paia, o le molimau mai lea i le Tama ma le Alo ma taitai ai i tatou i le upu moni (tagai Ioane 14:26; 2 Ni. 31:18). O le molimau ma le upumoni, o mea e taua mo lo tatou liua patino, o faamanuiaga sili ia o lenei faafouga i vaiaso taitasi o a tatou feagaiga. O faaiuga mai lea aso i lea aso o lo’u olaga, ma lo’u lava tuputupu a’e faaleagaga, ua ou olioli ai i le faataunuuga o lena folafolaga.
Talofa e pe afai e i ai se tagata o le Au Paia o Aso e Gata Ai e le malamalama i le faamanuiaga taua e maua e i latou e tausia poloaiga e avatu ai a latou faamanatuga i aso Sapati taitasi. O le a se mea o i ai i le olaga—i vaituloto po o vaitafe, o nofoaga o faafiafiaga faapisinisi po o le fale i le faitauina o le nusipepa o le Aso Sa—e mafai ona maua ai se mea e faatusatusa i nei faamanuigaga? E leai se faafiafiaga e mafai ona tutusa ma le faafouga faamama ma le taitaiga faaleagaga, ma le tuputupu a’e sa folafola mai e le Atua ia i latou e taumamafa ma le faamaoni i le faamanatuga, ma faamamalu ia te Ia i aso Sapati taitasi. Ou te faafetai i le faataunuuina o nei folafolaga i lo’u olaga, ma faamaonia atu o loo avanoa mo tagata uma.
Ina ua ou aulia le tausaga e tatau ai ma ua ou malamalama foi, ma ua ou iloa le aafiaga o le agasala a le tagata lava ia, o aoaoga a le talalelei a Iesu Keriso na ou maua ai le filemu ma le lototele e agai ai i luma, ma le malamalama e mafai ona faamagaloina a’u agasala ma e i ai pea lava pea le faamoemoe, ma le alofa mutimutivale mo i latou ua pauu.
A o ou feagai ma le maliliu o e pele ia te au, e aofia ai lo’u tama, o lo’u tina, ma lo’u toalua, sa ou maua le malosi mai faaaliga faamafanafana a le Agaga Paia, e faaauau ai. Na faamaonia mai e le Agaga e i ai le faamoemoega i mafatiaga faaletino, ma e aumaia ai le faamautinoaga o le toetu ma le moni o sootaga faaleaiga e faamauina mo le faavavau.
I lo’u olaga atoa, sa faamanuiaina au e le mataupu faavae ma aoaoga o le talalelei a Iesu Keriso. E pei ona aoao mai i tusitusiga paia ma taitai ma faiaoga o lenei Ekalesia, ua avea lava le talalelei ma se sulu i o’u ala ma faatosinaga o lo’u alualu i luma faaletino ma le faaleagaga. E pei ona sa aoao mai e Polika Iaga, o tulafono o le talalelei “ua aoao ai au ia tautala sa’o, faamaoni, amio mama, matala le mafaufau, sogasoga, faautauta ma alofa ma faia upu lelei uma ma galuega, … latou te siitia ma faatamalii le tagata, [ma] afai e usitaia atoatoa, [latou te] aumaia le soifua maloloina ma le malosi i le tino, manino le tofa, mana i le mafaufauga faapea foi le faaolataga o le agaga.”2
O se tasi o le anoano o faamanuiaga ua ou maua mai aoaoga o le talalelei, o folafolaga mo le tausiga o le Upu o le Poto. Ia te au lava ia, o nei faamanuiaga e aofia ai le soifua maloloina ma le malamalama ma le malosi e “taufetuli ai ae le vaivai, ma … savavali ae le matapogia,” ma le faataunuuina o le folafolaga “o le a laaloa ia i latou le agelu o le faafanoga, e pei o le fanauga a Isaraelu, ae le fasia i latou” (MFF 89:18–21).
Ua aoaoina i tatou e le talalelei ia totogi a tatou sefuluai ma taulaga, ma ua faamautinoa mai ai o tatou faamanuiaga pe a tatou faia. Ou te tautino atu ua faataunuuina nei folafolaga i lo’u olaga. Ua ou vaai i pupuni o le lagi o toina mai mo au e aumaia ai faamanuiaga e le mafaitaulia. O se tasi o nei faamanuiaga o le malosi lea ou te iloa ai le le taua o meatotino, faamaualuga, lauiloa, ma le malosi o lenei lalolagi pe a faatusatusa i le faavavau. E maeu lo’u faafetai ona o le filemu ma le mea sa tulimata’ia, ona o se malamalama e faavae i le talalelei e uiga i le faamoemoega o le olaga, ma lona sootaga i le faavavau!
Mai o’u uluai tausaga, ma a’u auga aoga ma le faaipoipoga seia oo i vaeluaga o le olaga ma luga atu, sa saunia e le Ekalesia mo au ni sootaga patino ma tagata e aupito sili ona lelei i le lalolagi. O faiaoga ma i latou sa matou vasega i le Aoga Sa ma le Peraimeri, o le sikauti ma isi gaoioiga a le autalavou, o gaoioiga a korama ma uarota ma siteki ua ou maua ai faataitaiga ma uo e aupito sili ona lelei. E moni, o le tatou Ekalesia, e le na o le pau lea o se nofoaga e maua ai ni tagata lelei, ae e ofoofogia lo tatou uai atu ia i latou. O a’u fegalegaleaiga ma le Ekalesia a Iesu Keriso o le Au Paia o Aso e Gata Ai, ua ou maua ai le faavae ou te iloa ai, talisapaia, ma faateleina a’u sootaga ma tagata tauagafau o isi ekalesia ma faalapotopotoga.
Ona o lo’u tama sa maliu ae le’i atoa lo’u valu tausaga, sa vave ona i ai mafuaaga ou te manatunatu ai i faamoemoega o le Alii na aveesea ai mai ia te au se sootaga sa fiafia ai isi tama ma talia e pei o se mea fua. E pei foi o le anoanoai o isi luitau o le olaga nei, o le vaaiga i le talalelei a Iesu Keriso, na suia ai lena sootaga na le toe maua ma lo’u tama. E maeu lo’u faafetai ona sa tausia lo’u uso ma lo’u tuafafine ma au, e se tina ua oti lana tane, o le sa faaaogaina lona faatuatua ma le faaipoipoga a o’u matua i le malumalu, e aumai ai pea lava pea i o matou olaga, le tama ua tuua. E le’i i ai lava se mea na matou lagona ai faapea ua leai so matou tama. Sa i ai lo matou tama, ae o loo toesea mo se vaitaimi. E i ai nai nisi mea e sili atu ona taua i lenei olaga i lo le iloa o lou tulaga i le olaga nei ma lou agavaa mo le faavavau. O faaipoipoga e faamauina mo le faavavau i se malumalu o le Alii, e saunia ai lena avanoa mo tamaiti uma ma tagata matutua foi.
Ina ua mavae le tele o tausaga, o lo’u toaga e auai i le Ekalesia, ua mafai ai ona ou maua fautuaga ma musumusuga a taitai o le Ekalesia, e uiga i mea e tatau ona ou faia o se tane ma se tama, ma se taitai i lo’u aiga. E tele taimi, i konafesi faalesiteki ma konafesi aoao, o korama a le perisitua, ma vasega o le Aoga Sa, e aoaoina ai ma musuia au e tama agalelei ma le poto masani, o tina foi, ma matua matutua. Sa ou saili e mulimuli i na aoaoga e faaleleia ai lo’u auai i na faalapotopotoga e oo i le faavavau. Ou te fia ta’ua se faataitaiga se tasi, sa aoaoina ai au i le mana o se faamanuiaga faaleperisitua—ua le na o se faamanuiaga o le faamafanafanaga ma se taitaiga, e mafai e se tama o umia le Perisitua Mekisateko ona tuu atu i tagata o lona aiga. O le aoao ma faaaogaina o lena mataupu faavae, na faamanuiaina ai au ma a’u pele, faatasi ai ma le matagofie ma le vavalalata, lea e na o le iloa o le taua o le perisitua a le Atua i se aiga e faavavau, e maua ai.
Ou te faafetai foi ona o lapataiga mai tusitusiga paia ma taitai o le Ekalesia e uiga i mea e tatau ona aloese mai ai. O le mulimuli i lena fautuaga, na mafai ai ona ou aloese mai tulaga matautia semanu e maileia ai au ma faapologaina ai. O meainu malolosi, o tapaa, fualaau faasaina, o tusi ma ata mataga, ma taaloga faitupe, ua na o nai faataitaiga iti ia o mea matautia ma faiga faataumaoi ua lapataia i tatou e aloese mai ai. Ou te faalatalata atu i tagata uma—aemaise lava o le tupulaga talavou—ia faalogo ma uai atu i upu a alii ma tamaitai ua valaauina e le Atua e fai mo o outou taitai ma faiaoga. O le a faamanuiaina outou pe afai tou te aloese mai le faia o lo outou lava poto po o mea tou te mananao ai ae le o poloaiga a lo outou Foafoa ma lapataiga a Ana auauna.
Ua ta’u mai e tusitusiga paia ia tatou ofu i le “ofutau atoatoa” mai le Atua ina ia “mafai ai ona tatou tetee atu i aso leaga.” Ua latou folafola mai “o le ufi fatafata o le amiotonu” ma le “talipupuni o le faatuatua” o le a “tineia u fanafana mu uma lava a e amioleaga” (MFF 27:15–17). Ou te uunaia outou ia usiusitai i na aoaoga ma ia maua na faamanuiaga. E aofia ai le liua faaleagaga o le tagata lava ia—o le “faaliliuina … o o matou loto” (Mosaea 5:2)—e fesoasoani ia i tatou e avea ma ituaiga tagata ua finagalo le Tama Faalelagi e avea ai i tatou.
Ua saunia taitai o lenei Ekalesia, e faapei ona fetalai le Faaola, “O la’u mataupu, e le o sa’u lava, a o lana na auina mai au. Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u” (Ioane 7:16–17).
Ua saunoa foi o outou taitai faatasi ma le Tupu o Peniamina, “O lea foi lo’u manao, ia outou mafaufau i le manuia ma le fiafia o i latou o e tausi i poloaiaga a le Atua. Aua, faauta, ua manuia i latou i mea uma, i le faaletino, atoa ma le faaleagaga, afai foi ua latou tutumau e oo i le iuga, e talia i latou i le lagi, ina ia latou mau faatasi ma le Atua i le fiafia e le iu” (Mosaea 2:41).
I faaaliga vaaia i ona po nei, sa tautino mai ai e le Alii, “Ua noatia au le Alii, pe a outou faia mea ou te fai atu ai; ae pe a outou le faia mea ou te fai atu ai, e leai sa outou folafolaga” (MFF 82:10).
O le a le mea na faia e lo tatou Faaola mo i tatou? Ua Ia aumaia mo i tatou Lana Togiola, o Lana Talalelei, o Lana Ekalesia, o se tuufaatasiga o mea paia ua tatou maua ai le faamautinoaga o le tino ola pea, ma le avanoa mo le ola faavavau. Ou te molimau atu e moni nei mea, ma ou te molimau atu o le Atua le Tama, o le pule o le fuafuaga, ma Lona Alo o Iesu Keriso, o le Toatasi na Togiolaina ma ua mafai ai nei mea uma, i le suafa o Iesu Keriso, amene.