Vahe 36
Laka Atu Ki Muʻa
Naʻe mālōlō fiemālie ʻa Palesiteni Kōtoni B. Hingikelī ʻi he efiafi ko hono 27 ʻo Sānuali 2008. Lolotonga e puke taimi nounou fakaʻosi ʻa e palōfitá, naʻe tangutu takatakai e fāmilí mo e ngaahi kaungāmeʻá ʻi hono veʻe mohengá ʻi Sōleki Siti. Naʻe ʻaʻahi atu ʻa Palesiteni Tōmasi S. Monisoni, ʻa ia naʻá na ngāue ʻi he Kau Palesitenisī ʻUluakí ʻi ha taʻu ʻe uofulu tupu, kiate ia ʻi ha ngaahi houa siʻi kimuʻa peá ne pekiá ʻo ne tuku hano tāpuaki.
Hili ha ʻaho ʻe ono mei ai, ne fakataha mai ha kakai ʻe toko tahamano onoafe ki he Senitā Konifelenisí ʻo tēngihia ʻa e meʻafakaʻeiki ʻo e palōfitá. Naʻe ʻi ai mo e niʻihi kehe taʻefaʻalaua naʻa nau mamata he meʻafakaʻeikí ʻi he BYU TV, uepisaiti ʻa e Siasí, mo e ngaahi ʻapisiasi ʻi he funga ʻo e māmaní.
Lolotonga e meʻafakaʻeikí, naʻe lea ʻa Palesiteni Monisoni ki he founga naʻá ne vahevahe ai mo Palesiteni Hingikelī ha fiefia lahi, kakata, mo e mamahi lahi ʻi he fakalau ʻa e taʻú. Naʻe manatu ʻa Palesiteni Monisoni ʻo pehē, “Ko ha tokotaha ia naʻe nonga pē ʻi he uhouhonga ʻo e faingataʻá. Naʻá ne fakafiemālieʻi mo fakanonga kimautolu ʻi he taimi naʻe fakamanavahē ai ʻa e ngaahi tūkunga ʻo e māmaní. Naʻá ne tataki hangatonu kitautolu ʻi he hala ʻe taki ai kitautolu ke tau foki ki heʻetau Tamai Hēvaní.”
Naʻe manatua ʻe he Kāingalotú ʻa Palesiteni Hingikelī ko ha palōfita naʻá ne folaua ʻa e māmaní mo langa e ngaahi temipalé. Kuó ne fononga ʻi ha maile ʻe laumiliona ke ʻaʻahi ki he Kāingalotu he funga ʻo e māmaní—ʻo laka ange ia ʻi ha toe palesiteni ʻo e Siasí. Naʻá ne fakalahi foki hono fakaʻaongaʻi ʻo e tekinolosia fakasatelaité mo fakaʻilekitulōniká ke aʻutaki ki he Kāingalotú ʻi ha feituʻu pē naʻa nau nofo ai. ʻI he taimi ní ʻoku fakamafola ʻe he Siasí ʻa e konifelenisi lahí ʻi ha lea fakafonua ʻe valungofulu. ʻI he 2003, naʻá ne kamataʻi e ngaahi fakamafola fakatakimuʻa fakaemāmani lahí, ʻo fakaʻatā ai e kau taki ʻo e Siasí ke nau akoʻi ha Kāingalotu tokolahi mei ha feituʻu pē ʻe taha. Kuo hoko ʻa e tekinolosia tatau pē ke malava ai ʻo fakahoko ʻa e ngaahi konifelenisi fakavahe mo fakafonua lalahí, ko e ngaahi konifelenisi ʻe niʻihi ne kau ki ai ha ngaahi siteiki ʻe valungofulu tupu he taimi pē ʻe taha.
Lolotonga ʻene palesitení, naʻe laka hake he liunga uá ʻa e fika ʻo e ngaahi temipale naʻe lolotonga ngāué, mei he 47 ki he 124. Naʻe kau ʻi he ngaahi temipale naʻá ne fakatapuí hano toe langa foʻou ʻo e Temipale Nāvuú, ʻa ia naʻe fakaʻauha ʻi ha ngaahi taʻu siʻi hili hono fakatapui ʻi he 1846.
Naʻe ʻomi ʻe he ngaahi temipale foʻou ko ʻení ʻa e ngaahi ouau mo e ngaahi fuakava toputapú ke toe ofi ange ki ha kakai tokolahi ʻo laka ange ʻi ha toe taimi kimuʻa. Hangē ko ʻení, ʻi ʻAokosi 2005, naʻe fononga ha Kāingalotu ʻe toko fāngofulu mā ua mei he fonua ʻAfilika lotoloto ko Kemaluní, ʻi ha maile ʻe nimangeau ke nau ō ki ha temipale ne toki fakatapui ʻi ʻApa, Naisīlia. Naʻe hoko e ʻuhoʻuha ne toki toó ke pelepela ai ʻa e ngaahi hala teʻeki valitaá, ka naʻe hoko atu pē fononga ʻa e Kāingalotú, ʻo aʻu ki he taimi naʻe pau ke nau teke ʻenau ʻū meʻalele totongí ʻi he pelepela matolú. Neongo naʻe faʻa faingataʻa ʻa e fononga tuaí, ka naʻe nounou mo maʻamaʻa ange ia ʻi ha fononga ki he ngaahi temipale ʻi Kana mo Saute ʻAfiliká. Pea naʻe fiefia ʻa e Kāingalotu Kemaluní ʻi heʻenau maʻu honau ʻenitaumení mo e ngaahi tāpuaki ʻo e silá.
Naʻe houngaʻia ʻa Palesiteni Hingikelī ke kau ki hono fakamafola e ngaahi tāpuaki ʻo e fale ʻo e ʻEikí ki ha kakai tokolahi ʻaupito. Naʻá ne tui naʻe fakahoko ʻe he ngaahi temipalé ha taumuʻa makehe. Naʻá ne akonaki, “ʻOku tau tūʻulutui ʻi honau ngaahi ʻōlitá ʻi he ʻao ʻo e ʻOtuá ko hotau Tupuʻangá pea ʻoku foaki mai ai ha talaʻofa ʻo ʻEne ngaahi tāpuaki taʻengatá. ʻOku tau fakataufolofola mo Ia mo fakaukauloto ki Hono ʻAló, ʻa hotau Fakamoʻuí mo e Huhuʻí, ʻa e ʻEiki ko Sīsū kalaisí, ʻa ia naʻe hoko ko hotau fakafofonga ʻi ha feilaulau fakafofonga maʻatautolu.”
Talu e ngāue fakafaifekau ʻa Palesiteni Hingikelī ki ʻIngilani ʻi he 1930 tupú, mo ʻene maʻu ha ʻofa lahi ki he Kāingalotu ʻIulopé. Pea naʻe fakamamahi kiate ia ʻi he ngaahi taʻu kimuí ke vakai ki he ʻikai toe maʻulotu ʻa e kakai ʻIulopé. Ke fai ha tokoní, naʻá ne poupouʻi hono fokotuʻu e “ngaahi senitā tokoni” ʻa ia ʻe lava ai e kau taautaha kei talavoú ʻo fakataha mai ki ai ke feohi mo vahevahe ʻenau tui kia Sīsū Kalaisí. ʻI he vahaʻa ʻo e 2003 mo e 2007, ne fakaava ha ngaahi senitā pehē ʻe fitungofulu tupu ʻi ʻIulope kotoa, ʻo iku ai ki ha kau papi ului foʻou tokolahi, toe mālohi mai e kau māmālohi tokolahi, mo e tokolahi ʻa e mali temipalé.
Naʻe liliu foki ʻe Palesiteni Hingikelī ʻa e ngaahi vā fetuʻutaki ʻa e Siasí mo e kakaí. ʻI heʻene tatakí, naʻe kamata e uepisaiti ʻa e Siasí, ʻo fakafonu ʻaki e ngaahi pōpoaki mo e naunau ako ne fakatefito ʻia Kalaisi, pea ʻi ai mo ha loki ongoongo he ʻinitanetí ʻe lava ai he kau faiongoongó mo e niʻihi kehé ʻo hū ki ai ke maʻu ha fakamatala tonu fekauʻaki mo e tuí.
Naʻá ne ʻasi foki ʻi ha mītia lahi ange, ʻo tali ha ngaahi ʻinitaviu he televīsoné mo ha kau faiongoongo ʻiloa mo faʻu ha ʻū tohi ki ha ngaahi fale pulusi lalahi. ʻI he 2001, naʻá ne kamataʻi e Poloseki ʻŪ Tohi ʻa Siosefa Sāmitá (Joseph Smith Papers Project), ʻa ia naʻe taumuʻa ke pulusi kotoa ai e ʻū tohi ʻa e palōfitá he ʻinitanetí pea ʻi ha ʻū voliume fakaako ʻe lava ʻo maʻu ʻi he ngaahi laipeli he funga ʻo e māmaní.
ʻI he kotoa e ngaahi ngāue lahi ne kamata ʻe Palesiteni Hingikelií, naʻe ongoʻi ʻe Palesiteni Monisoni ʻe faitāpuekina ʻe he Paʻanga Tokoni Fakaako Tuʻumaʻú ha kakai tokolahi ʻo laka ange ia ʻi ha toe meʻa. Naʻe ʻosi ʻaonga ia ki ha kau ako ʻe meimei toko tolumano ʻi ha ngaahi fonua ʻe fāngofulu.
Naʻe tohi ʻe Palesiteni Monisoni ʻi heʻene tohinoá ʻo pehē, “Ko ha mana moʻoni ʻeni ʻi hono hiki hake e kakai kei talavoú mei he masivesivá mo tokoniʻi kinautolu ke maʻu ha ngāué. ʻOku ope atu e lavameʻa aí ʻi he meʻa ʻoku tau fakaʻānaua ki aí pea ko ha tokoni matuʻaki mahuʻinga ia kiate kinautolu ʻoku fie hoko atu e akó ʻi he ngaahi tapa kehekehe ʻo e māmaní ʻa ia ʻoku ʻikai lava ai ʻa e masivá ʻo akó.”
ʻI he ʻaho hili e meʻafakaʻeikí, naʻe hanga ʻe Poiti K. Peeka, ko e ʻaposetolo pule hono hokó, ʻo fakanofo mo vaheʻi ʻa Palesiteni Monisoni ko e palesiteni foʻou ʻo e Siasí. Naʻe uiuiʻi ʻe Palesiteni Monisoni ʻa Henelī B. ʻAealingi, naʻe tokoni ua kimuʻa kia Palesiteni Hingikelī, ke hoko ko hono tokoni ʻuluaki, mo Tieta F. ʻUkitofa, ko ha ʻaposetolo mei Siamane, ke hoko ko hono tokoni ua.
Naʻe tokangaʻi ʻe he kau palesitenisī foʻoú ʻa e ngaahi ngāue langa ne lolotonga lele ʻi he taimi ne pekia ai ʻa Palesiteni Hingikelií, kau ai ha ngaahi temipale lahi pea mo ha ʻū ʻapisiasi ʻe tolungeau nai. Naʻe langa foki ʻe he Siasí ha fale nofoʻanga maʻá e kau faifekau ʻi he temipale ʻi Nāvuú, ʻo langa ha Laipeli Hisitōlia foʻou ʻa e Siasí mo ha fuʻu fale lahi ke tokoni ke tokangaʻi e ngaahi tokoni ʻofá, mo langa e ngaahi feituʻu nofoʻanga mo fakakomēsiale ʻi he kauhala ʻe tahá mei he Temipale Sikueá.
Ka ʻi he kamata e pule ʻa Palesiteni Monisoní, naʻe hoko ha ngaahi palopalema lalahi. Naʻe tokolahi ha kau maʻu ʻapi ʻi he ʻIunaiteti Siteití naʻe kamata ke nau taʻetotongi ʻenau mōkesí, pea ko e ngaahi pangikē ko ia ne fakamoʻua mei ai e ngaahi mōkesi ne ʻikai lava ʻo totongí naʻa nau mate ʻi he lahi faufaua e moʻuá. Ne ʻikai fuoloa mei ai, naʻe tō ʻa e ʻIunaiteti Siteití ki he palopalema fakaʻekonōmika kovi taha talu mei he Tōlalo Lahi Fakaʻekonōmiká, ʻo fakatupu ai ha tailiili ki he tuʻunga fakapaʻangá pea fakautuutu e taʻemaʻu ngāué ʻi he funga ʻo e māmaní.
Naʻe tohi ʻa Palesiteni Monisoni ʻi heʻene tohinoá ʻo pehē, “ʻOku ʻi ha tuʻunga fakatuʻutāmaki e ngaahi māketi fakapaʻangá. ʻOku fefaʻuhi hotau kakaí, fakataha mo ha niʻihi kehe ʻi hotau puleʻangá pea mo e māmaní, ke totongi fakafoki honau moʻuá.”
ʻI he fakaʻau ke kovi ange ʻa e palopalemá, naʻe pau ke fakakaukau ai e Kau Palesitenisī ʻUluakí ke taʻofi e ngaahi polōseki langa kehekehe ʻa e Siasí. Koeʻuhí ne foua ʻe Palesiteni Monisoni ʻa e Tōlalo Lahi Fakaʻekonōmiká, naʻe mahino kiate ia ʻa e ngaahi fakatuʻutāmaki ʻo e ope atu mei he ngaahi fakangatangatá. Ka naʻá ne vakai foki kapau ʻe taʻofi e langá, ʻe ʻuhinga ia he ʻikai toe ʻi ai ha ngāue ʻa ha kau ngāue ʻe laungeau hangē ko e kau tufungá mo e kau ngāue fakaʻuhilá. Naʻe fakaʻau ke taʻofi e pisinisi langá, pea naʻe faingataʻa ke maʻu ha ngāue.
Ko e Kau Pīsopeliki Pulé, ʻa ia ʻoku nau tokangaʻi e ngaahi ngāue langa mo e tokoni ʻofa fakaetangata ʻa e Siasí, naʻa nau fakataha mo e Kau Palesitenisī ʻUluakí he Falaite kotoa ke toe vakaiʻi e tuʻunga ʻo e ngaahi polōsekí. ʻI ha ʻaho Falaite ʻe taha ʻi he konga kimuʻa ʻo e 2008, naʻe fehuʻi ʻe he kau pīsopelikí kia Palesiteni Monisoni pe ko e hā e meʻa ʻoku totonu ke faí.
Naʻe pehē ʻe he kau pīsopelikí, “ʻOku lolotonga lele kotoa e ngaahi polōseki langa ko ʻení, ʻi ha ngaahi siteiti kehekehe. Ko e hā ho lotó?”
Naʻe loto-fakapapau ʻa Palesiteni Monisoni. Naʻá ne pehē ange, “Laka atu ki muʻa.”
ʻI he taimi ko ʻení, naʻe foki ʻa Peleiki Makiuni ki he Matātahi Ponitī ʻi Seneé ke kau ki ha toe ako fakahaofi moʻui he faʻahitaʻu māfaná kae hulu ʻe he meʻafaitā TV. Naʻe hoko ʻene ʻasi ʻi he filimi hono ua ʻo e Bondi Rescue ke ne ʻiloa fakalotofonua ai ʻi ʻAositelēlia. Ko e taimi ʻe niʻihi, lolotonga haʻane fakatau ʻi hono kolo tupuʻangá pe heka lēlue ki he ngāué, te ne fakatokangaʻi hono siofi ia ʻe he kakaí mo tuhu fakafufū ange ki aí. Naʻe kiʻi fakatupuʻita hono faʻa siofi iá, ka naʻe ʻikai ke ne lāunga ai. Naʻá ne saiʻia hono totongiʻi ia ke ne feohi ʻi he matātahí he ʻaho kotoa pē mo hono ngaahi kaungāmeʻá. Naʻá ne fifili, “Ko e hā nai ha meʻa ʻi he moʻuí ʻe toe lelei ange heni?”
Ka naʻe hohaʻa ʻene ongomātuʻá. Naʻe liliu nai ʻene ngaahi taumuʻá ʻi heʻene ongoongoa he televīsoné? Naʻe maʻu ʻe Peleiki e ngāue fakahaofi moʻuí ʻi ha taʻu ʻe taha kimuʻa ke tānaki ha paʻanga lolotonga ʻene tatali ke ngāue fakafaifekau taimi kakató. Ko ʻeni kuo ʻosi fuoloa e hoko hono taʻu hongofulu mā hivá.
Naʻe fehuʻi ange ʻe heʻene faʻeé ki heʻenau pīsopé he ʻaho ʻe taha, “Ko e hā e meʻa te u faí? Ko e hā e meʻa ʻe hoko ki [heʻene ngāue fakafaifekaú]?”
Naʻe tali ange ʻe he pīsopé ʻi heʻene loto-hohaʻa foki mo iá, “ʻOku ʻikai ke u ʻilo. Naʻá ne failelei ʻaupito.”
Naʻe feinga ʻa Peleiki ke fakafiemālieʻi ʻene ongomātuʻá. Naʻá ne talaange naʻá ne lotu ke ʻiloʻi e taimi totonu ke ngāue aí. Naʻe ʻikai ke ne ongoʻi kuo hokosia ʻa e taimí. Naʻá ne talaange, “Ko e meʻa ʻoku mahuʻingá ko ʻeku ʻalú, kae ʻikai ko e taimi te u ʻalu aí,” ʻo toe fakaongo ai ha meʻa naʻe talaange maʻu pē ʻe heʻene tamaí.
ʻI hili iá, naʻe ʻosi mai hono taʻokete ko Uaté mei heʻene ngāue fakafaifekau ki Siapaní. Naʻe sio ʻa Uate ki he hohaʻa ʻene ongomātuʻá peá ne talanoa kia Peleiki. Naʻe ongo moʻoni kia Peleiki ʻa e ngaahi lea ʻa Uaté pea kamata ke ne fakakaukau fakamātoato ange ki he ʻalu ʻo ngāue fakafaifekaú. Naʻá ne pehē loto, “Kapau ʻoku moʻoni ʻa e Siasí, tā ʻoku fiemaʻu ke u ʻalu ʻo ngāue fakafaifekau.”
Naʻá ne fakakaukau ki heʻene fakamoʻoní pea mo e Siasí. ʻI heʻene tupu haké, naʻá ne kau ki he TFY, ko e konifelenisi ʻa e toʻu tupú ʻi ʻAositelēlia ne lau ʻaho, ʻa ia ne mafola ki he ngaahi fonua ʻi ʻAmelika Tonga mo ʻIulope ʻi he 2006 pea naʻe ui ko e Especially for Youth. Naʻá ne faivelenga foki he maʻu kalasi semineli pongipongí mo e ngaahi ʻekitivitī kehe ʻa e Siasí. Mahalo naʻe ʻikai ke ne fiefia maʻu pē ke ʻalu, ka naʻá ne feinga ke tauhi e ngaahi fekaú mo fai e meʻa naʻe totonú. Pea naʻá ne maʻu ha tui kia Sīsū Kalaisi pea ki he moʻoni ʻo e ongoongolelei kuo fakafoki maí. Ko ha ʻuhinga feʻunga ia ke ne ngāue ai.
Naʻe fakahū leva ʻe Peleiki ʻene foomu kole ngāue fakafaifekaú. Ko ha momeniti ia ʻo e ngaahi faingamālie makehe ki he ngāue fakafaifekaú. ʻI he ngaahi taʻu kimui maí, naʻe hanga ʻe he kau taki ʻo e Siasí ʻo “hiki ʻa e tuʻunga” ki he ngāue fakafaifekaú, ʻo fakamamafaʻi e fiemaʻu ha kau ʻeletā mo e kau sisitā moʻui mateaki pea ʻoku nau maʻu ha ngaahi tuʻunga ʻulungaanga māʻolunga ʻa ia ʻoku nau ʻiloʻi e founga ke fanongo mo muimui ai ki he Laumālie Māʻoniʻoní. Naʻe fakafeʻiloaki foki ʻe he Siasí ʻa e ngāue fakafaifekau tokoní ki he kakai kei talavou ʻoku ʻi ai honau ngaahi tūkunga pau fakaemoʻui leleí pe ki ha taha naʻe ʻikai feʻunga mo e ngāue fakafaifekau malanga angamahení.
ʻI hono maʻu e uiuiʻi ʻo Peleikí, naʻe vahe ia ke ngāue taimi kakato ʻi ha misiona malanga ʻi he Misiona Philippines Baguio, ko e taha ʻo e ngaahi misiona ʻe hongofulu mā nima ʻi he fonuá. Ko e meʻa pē naʻe toé ke ne talaange ki hono kaungāngāue ʻi he fakahaofi moʻuí.
Hili ha taimi nounou mei ai, lolotonga hono huluʻi ʻo e Bondi Rescue, naʻe lea ʻa Peleiki ki he meʻafaitaá fekauʻaki mo ʻene tuí. Naʻá ne pehē, “ʻI heʻeku tupu haké, kuó u hoko maʻu pē ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ou ʻalu ki he lotú he Sāpate kotoa. Te u pehē ʻoku ʻi ai ha ngaahi tuʻunga moʻui pau ange ʻoku ou moʻui ʻaki, ka ko ha tokotaha angamaheni pē au.”
ʻI he tuku e ngāue ʻa Peleikí, naʻe ʻai ʻe he kau faʻu faivá ke ne tui ha suti mo ha hēkesi. Naʻá ne lue atu leva ki he taua lahi ʻo e kau fakahaofi moʻuí ʻo tukituki ʻi he matapaá. Naʻá ne lea ki he meʻafaitaá mo pehē ange, “ʻOku ou tui kuo pau ke fakaangaanga hoku nimá ki ai.”
Naʻe fakafeʻiloaki mai e kau fakahaofi moʻuí kiate ia mo nau kakata. Naʻá ne fehuʻi ange mo fakaʻaliʻali ange hono sutí, “ʻOku mou saiʻia ai? Ko au ia he taʻu ʻe ua ka hoko maí.”
Ne ʻeke ange ʻe ha taha ʻo e kau fakahaofi moʻuí, “ʻOkú ke ʻalu ki fē?”
Naʻe talaange ʻe Peleiki, “Ki Filipaini. Te u ngāue fakafaifekau maʻa hoku siasí.”
Ne pehē ʻe ha tokotaha fakahaofi moʻui ʻe taha, “ʻOkú ke Māmonga?”
Naʻe talaange ʻe Peleiki, “ʻIo. ʻOku ou tui ʻoku ou maʻu e meʻa lelei tahá ʻi heʻeku moʻuí, ko e hā ka u ka taʻe-vahevahe ai ia mo e niʻihi kehé?”
Naʻe fakamatala ange ʻe Peleiki ʻe vavé ni pē haʻane mavahe ki he ʻIunaiteti Siteití ke ako fakafaifekau mo ako e lea faka-Takaloká. Te ne ʻalu leva mei ai ki he malaʻe ʻo e ngāue fakafaifekaú kuo vahe ia ki aí. Naʻá ne pehē, “Te mau tukituki maʻu pē ʻi he ngaahi matapaá mo feinga ke akoʻi ki he kakaí fekauʻaki mo Sīsū Kalaisi.”
Naʻe pehē ange ʻe ha tokotaha fakahaofi moʻui, “Masiʻi, talamonū atu,” peá ne lulululu mo Peleiki mo puke mai ia ʻo na fāʻofua. Naʻe loto-mamahi ʻa Peleiki ʻi heʻene mavahe mei he matātahí, pea naʻá ne ʻiloʻi te ne ʻofa ki hono ngaahi kaungāmeʻá. Ka naʻá ne vēkeveke ke kamata ʻene ngāue fakafaifekaú mo fakahoko ha lelei ʻi he māmaní.
ʻI he foki ʻa Peleiki ki ʻapí, naʻá ne talanoa ange kia Uate e meʻa naʻe hokó. Naʻe talaange ʻe Uate, “Ko e pole ʻi heʻeku kei faifekaú ko e feinga ke lea ki ha kakai ʻe toko hongofulu ʻi he ʻaho ʻi Siapani. Kuó ke fakahoko ia ki ha kakai ʻe toko hongofulu miliona ʻi ha taimi pē ʻe taha.”
ʻI Sune 2008, naʻe heka pasi ʻa Uili mo Lili Pinene mo ʻena fānau ʻe toko tolú ki he malaʻe vakapuna ʻi ʻImipusi-Maí, ʻoku maile nai ʻe teau ki he fakatokelau honau ʻapí ʻi Luputa, Lepupelika Fakatemokālati ʻo Kongokoú. Naʻa nau puna mei ai ki Kinisasa, ʻo mohe ʻi he koló, pea nau puna leva ki Saute ʻAfilika. Naʻe lōloa ʻa e fonongá, ka naʻe fiefia ʻa e fānaú ʻi heʻenau folaú. Naʻe fononga ʻa e fāmilí ki he Temipale Sōhanesipokí ke silaʻi fakataha kinautolu ki he nofo taʻengatá.
Naʻe ʻosi ha taʻu ʻe ua mei hono uiuiʻi ʻo Uili ko e palesiteni ʻo e Vahefonua Luputá pea naʻe hoko ia ke toe fakataha ai honau fāmilí. Hili e foki ʻa Lili ki Luputá, naʻá ne fokotuʻu ha ʻapiako tokamuʻa. Naʻe ola lelei ʻaupito ia, pea ʻikai fuoloa mei ai, naʻá ne fakalahi ia ki ha ʻapiako lautohi. Naʻe fakatatali ʻe Uili ʻene fakaʻānaua ke hoko ko ha ʻenisinia fakaʻuhilá kae kamata ʻene ako ngāue ko ha neesi ʻi ha falemahaki fakalotofonua. Naʻá ne vahevahe tatau e ngāué ni mo e ngaahi fiemaʻu ʻo hono uiuiʻí, peá ne fakafalala ki he tokoni ʻa hono ongo tokoni ʻi he kau palesitenisī fakavahefonuá ʻi heʻenau ako honau ngaahi fatongia foʻoú, akoʻi e kau taki fakalotofonuá, mo ʻaʻahi ki he Kāingalotú.
Naʻe fakahoko kimuí ni ʻe he kau palesitenisií ha toe ngaahi ngafa lahi ange ke tokoni ki ha poloseki taʻu tolu ne fakapaʻanga ʻe he Siasí ke taki mai ha vai maʻa ki Luputa. Naʻe fuoloa e fakafalala ʻa e kakai ʻo e koló ki ha ngaahi anovai, matavai, mo e ngaahi fakatafenga vai ke maʻu ha vai. ʻE lue ʻa e houʻeiki fafiné mo e fānaú tuʻo ua he ʻaho, ʻi ha maile ʻe taha pe lahi ange ki ha taha ʻo e ngaahi feituʻu ko ʻení, ʻutu e vaí ʻi ha ʻaiʻanga vai pē naʻa nau maʻu, pea nau fata ia ki ʻapi. Naʻe fonu e ngaahi maʻuʻanga vai ko ʻení ʻi he fanga kiʻi siemu fakatuʻutāmakí, pea naʻe meimei ke ʻilo ʻe he tokotaha kotoa ha taha—ko e lahi tahá ko ha kiʻi leka—naʻe mate mei he ʻuli ʻa e vaí. Pea taimi ʻe niʻihi naʻe pāʻusiʻi e houʻeiki fafiné ʻi heʻenau lue mo foki mei he ʻutu vaí.
Naʻe lauitaʻu e loto ʻa e ADIR, ko ha kautaha ʻofa fakaetangata ʻi he DRC, ke ʻomi ha vai maʻa ki he kakai ʻe toko 260,000 ʻi Luputá. Ka ko e maʻuʻanga vai lelei tahá ko ha ngaahi matavai ʻi ha tafa moʻungá ne maile ʻe uofulu mā taha hono mamaʻó, pea naʻe ʻikai maʻu ʻe he ADIR ʻa e $2.6 miliona ke taki ʻaki ʻa e pamu vaí. Naʻe fanongo leva e talēkita pule ʻo e kautahá ʻi he Ngaahi Kautaha Tokoni ʻOfa ʻa e Siasí peá ne fetuʻutaki ki he kau faifekau tokoni ʻofa fakaetangata fakalotofonuá fekauʻaki mo ha fengāueʻaki ʻi he polōsekí.
Naʻe fokotuʻu e Ngaahi Kautaha Tokoni ʻOfa ʻa e Siasí ʻi he 1996 ʻi he fakahinohino ʻa e Kau Palesitenisī ʻUluakí, pea naʻe faitokonia ai ha ngaahi polōseki tokoni ʻofa fakaetangata ʻe laungeau ʻa e Siasí ʻi he funga ʻo e māmaní he taʻu kotoa. Neongo naʻe kehekehe ʻa e ngaahi ngāue tokoní ʻo fakatatau ki he fiemaʻú, ka ko hono ngaahi tefitoʻi taumuʻa kimuí ni maí ko e huhu maluʻi, ʻū saliote teketeke, tokoni ki he matá, tokangaʻi e fānau valevalé, mo e vai maʻá. ʻI he ongona mai ʻa e fiemaʻu ke taki ha laine vai ʻi Luputá, naʻe foaki ʻe he Ngaahi Kautaha Tokoni ʻOfa ʻa e Siasí ʻa e paʻanga naʻe fiemaʻú, pea naʻe loto-lelei ha kau ngāue fie tokoni mei Luputa mo e tūkui kolo ofi aí ke tokoni ʻi he ngāué.
ʻI he hoko ʻa Uili mo hono ongo tokoní ko ha kau palesitenisī fakavahefonuá, naʻa nau ngāue mo e ADIR pea mo Taniela Kasati, ko ha mēmipa fakalotofonua ʻo e Siasí ne totongi ke ne tokangaʻi e ngāué. Naʻa nau loto foki ke nau ngāue taʻetotongi mo kinautolu.
ʻI he tūʻuta ko ʻeni ʻa e fāmili Pinené ʻi Sōhanesipokí, naʻa nau lava ʻo tuku fakatatali ʻenau moʻui femoʻuekiná kae tokanga taha pē ki he fale ʻo e ʻEikí. Naʻe fakafeʻiloaki kiate kinautolu ʻi he malaʻe vakapuná, ha fāmili pea nau fakaʻuli ki he fale nofoʻanga maʻá e pataloní ʻoku tuʻu ʻi he temipalé. Naʻe ʻalu ʻa Uili mo Lili kimui ange ki he temipalé, tuku ʻena fānaú ʻi he feituʻu ne tokangaʻi ai e fānaú ne fakalele ʻe he Siasí, peá na fetongi ki he teunga hiná.
Kimuʻa pea mavahe e fāmili Pinené mei Luputá, naʻa nau ako e tohi lēsoni ʻa e Siasí ki he teuteu ki he temipalé ko e, Fakakoloaʻi mei ʻOlunga, mo nau lau e fakamatala e ʻaposetolo ko Sēmisi E. Talamesí, The House of the Lord [Ko e Fale ʻo e ʻEikí]. Ka ʻi heʻena aʻu ki he temipalé, naʻá na kiʻi puputuʻu koeʻuhí naʻe foʻou e meʻa kotoa pea naʻe ʻikai ke poto ha taha ia ʻi he lea faka-Falaniseé . Ka ʻi heʻena talanoa tuhutuhu pē, naʻá na ʻilo ai e feituʻu ke ʻalu ki aí mo e meʻa ke faí.
Kimui ange ʻi he loki silá, naʻá na fiefia ke toe fetaulaki mo ʻena fānau ʻe toko tolú. Naʻa nau hangē ha kau ʻāngeló ʻi heʻenau hū mai ki he lokí kuo nau teunga hiná. Naʻe ongoʻi ʻe Uili naʻe tuʻutuʻukina hono ongo nimá. Ne hangē ia naʻe ʻikai ke ne toe ʻi he māmaní mo hono fāmilí. Ne hangē ia naʻa nau ʻi he ʻao ʻo e ʻOtuá.
Naʻá ne pehē, “Fakaofo.”
Naʻe ongoʻi foki ʻe Lili hangē naʻa nau ʻi hēvaní. ʻI hono ʻiloʻi ko ia naʻe haʻi fakataha kinautolu ki he nofo taʻengatá, hangē naʻe toe fakalahi ange ai e feʻofaʻaki ʻa e fāmilí. Naʻe ʻikai ke nau toe māvahevahe he taimí ni. Naʻa mo e maté he ʻikai ke ne lava ʻo vaetuʻua kinautolu.
ʻI he konga kimuʻa ʻo e 2009, naʻe nofo ʻa ʻEniselā Pitasoni ʻi ʻIutā mo hono husepāniti ko Sione Falenitiné. Naʻá ne fetaulaki mo Sione ʻi ha uooti ʻa e kau taautaha lalahí ʻi Sōleki Siti hili pē ha taimi nounou e mavahe ʻa ʻEniselā mei heʻene ngāue femoʻuekina ʻi Uāsingatoni DC. Naʻe haʻu ʻa Sione mei he fakahihifo ʻo e ʻIunaiteti Siteití, pea naʻá ne nofo foki mo ngāue ʻi ha kiʻi taimi ʻi Uāsingatoni. Naʻá ne motuʻa ange ʻia ʻEniselā pea kiʻi natula mā, ka naʻe vave ʻena hoko ko ha ongo kaungāmeʻa mamae. ʻI Nōvema 2007, naʻá na sila ʻi he Temipale Mahu ʻIutaá.
Ko e taimi ko ʻení naʻe mateuteu ʻa e ongo Falenitiné ki ha fonongaʻanga foʻou. Hili hono maʻu ʻe Sione ha ngofua mei heʻene pule ngāué ke ngāue pē mei ha feituʻu pē, naʻe fakamāʻopoʻopo ʻe he ongomeʻá ʻena ngaʻotoʻotá peá na hiki ki he Motu Fakatokelau ʻo Nuʻu Silá. Naʻá na ʻosi fakatou ʻalu ki ai kimuʻa, peá na pehē ko e feituʻu fakaʻofoʻofa taha ia ʻi he māmaní.
Naʻe toki fakamanatua pē ʻe he Kāingalotu Nuʻu Silá ʻa e taʻu 150 ʻo e tūʻuta ʻa e Siasí ki honau fonuá, mo e taʻu ʻe nimangofulu talu mei hono fakatapui ʻo e Temipale Nuʻu Silá. ʻI he taimi ko iá, naʻe ʻi ai ha kāingalotu ʻo e Siasí ʻe toko tahamano fituafe nai ʻi he fonuá pea teʻeki ke ʻi ai ha uooti pe siteiki. Ko e taimi ní, naʻe ʻi ai ha Kāingalotu ofi ki he tahakilu tupú nenau mafola ʻi ha ngaahi siteiki ʻe 25, uooti ʻe 150, mo e ngaahi kolo ʻo e Siasí ʻe 54.
Naʻe nofo ʻa e ongo Falenitiné ʻi Teimesi, ko ha kolo ʻi he matāfanga ʻo e Peninisula Kolomanitelá, pea ʻikai fuoloa ne kamata ke na tokoni ʻi honau kiʻi koló. Ko e tokolahi taha e kau mēmipa ʻi honau koló mo e siteikí ko e kau Mauli, pea naʻe fiefia ʻa ʻEniselā ke maheni mo kinautolu. Naʻá ne fua fatongia ʻi he Kau Finemuí lolotonga iá naʻe tokoni ʻa Sione, lolotonga ʻene hoko ko ha faiako Lautohi Faka-Sāpaté, ki he palesiteni fakakoló ʻi he kau talavoú. Naʻe hoko foki ʻa ʻEniselā mo Sione ko ha ongo faifekau fakakolo peá na ngāue ouau ʻi he temipalé ʻi Hemilitoni, naʻe meimei houa ʻe ua e fakaʻuli ki aí.
Ka neongo ia, naʻe fakaʻau ke loto-hohaʻa ʻa e ongomeʻá ʻi ʻapi. ʻI hono kotoa e moʻui ʻa ʻEniselaá, naʻá ne fakaʻamu ke hoko ko ha faʻē. Ka ko e aʻu mai ki he taimi ko ʻení, naʻe teʻeki ke na lava mo Sione ʻo maʻu ha fānau. Naʻá na sio ki ha toketā ʻi ʻAokalani pea fakahoko mo ha ngaahi sivi kehekehe ke sio pe ko e hā ha meʻa ʻe lava ʻo fakahoko. ʻI he maʻu mai e ngaahi olá, naʻe ʻilo ai ʻe ʻEniselā mo Sione naʻá na fakatou feʻao mo ha ngaahi palopalema lahi ʻo e taʻefanaú. Naʻa mo e tokoni ʻa e kau toketaá mo e kau mataotaó, naʻe siʻisiʻi ʻaupito ha faingamālie ke feitama ai ʻa ʻEniselā.
Naʻe fakamamahi ‘a e ongoongó. Ko e ʻaho kotoa pē, naʻe lue ʻa ʻEniselā ʻo fakalaka atu ʻi ha tatau ʻo e fanongonongo ki he fāmilí naʻe fakaʻesia ʻo tuku ʻi hona ʻapí. Naʻe fakatupu ʻe hono pōpoakí ha fehuʻi fakatupu puputuʻu ʻi hono ʻatamaí. Kapau naʻe tuʻutuʻuni ʻe he ʻOtuá ʻa e fāmilí, ko e hā nai naʻe ʻikai ke ne lava ai mo Sione ʻo maʻu ha fānaú?
Naʻá ne ongoʻi puputuʻu mo hē—ka naʻá ne kei fakatuʻamelie pē ʻe tali mai ʻe he ʻOtuá ʻa ʻena ngaahi lotu mo Sioné.
ʻI ʻaho 9 ʻo ʻAokosi 2009, naʻe fakataha ʻa Palesiteni Tōmasi S. Monisoni mo e ngaahi kaungāmeʻa Katolika Lomá ʻi he Falelotu Katolika ʻo Metelainé ʻi Sōleki Sití. Naʻe taʻu teau ʻa e fuʻu falelotu masaní, pea naʻe haʻu ʻa Palesiteni Monisoni mo ha kau taki fakalotu kehe mo ha kau taki fakapuleʻanga ke fakamanatua.
Naʻe fakaʻaongaʻi ʻe Palesiteni Monisoni e polokalamá ke lea ki he founga kuo tuku ai ʻe he Katoliká mo e Kāingalotu ʻo e Siasí honau ngaahi faikehekehe fakalotú kae tokangaekina e kakai ʻoku faingataʻaʻiá. Ko e polokalama “Samēlia Lelei” ʻi he falelotú naʻe foaki ai ha meʻatokoni hoʻatā fakaʻaho ki he fiekaiá, mo e mā mo ha meʻakai kehe naʻe foaki ʻe he Ngaahi Tokoni Uelofea ʻa e Siasí. ʻI he founga tatau pē, ne fakalele ʻe he Katoliká ha fale fakalotofonua ki he kau maʻu faitoʻo konatapú, ʻa ia naʻe fakafonu ʻe he Siasí ʻaki ha meʻakai. Naʻe fengāueʻaki foki ʻa e ongo siasí ke tokoniʻi e kau kumi hūfanga ʻoku tūʻuta ki Sōleki Sití ke maʻu ha naunau fakahaisini feʻunga mo ha naunau fale.
Naʻe ope atu e vā fengāueʻaki ko ʻení ʻi Sōleki Siti. ʻI he ngaahi taʻu kimui maí, naʻe tokoni e ngaahi kautaha tokoni ʻofa ʻa e Katoliká ki he Siasí ke tufa ha tokoni ʻofa fakaetangata ne laka hake he $11 milioná ʻi he funga ʻo e māmaní, ʻo fakapapauʻi naʻe foaki e tokoní kiate kinautolu naʻa nau fiemaʻu lahi taha iá.
Naʻe talaange ʻe Palesiteni Monisoni ki he haʻofangá, “ʻI he taimi ʻoku tau maʻu ai ʻa e mata ke mamatá, telinga ke fanongó, mo e loto ke ʻiloʻi mo ongoʻí, te tau ʻiloʻi ʻa e ngaahi fiemaʻu lolotonga ʻa hotau kāinga ʻoku kole tokoní.”
Lolotonga e taʻu ʻe taha mo e konga kuohilí, naʻe muimuiʻi ofi ʻe Palesiteni Monisoni e ngaahi polōseki lahi ki he langá mo e tokoni ʻofa fakaetangata ʻa e Siasí. Naʻe aʻu ki he tuʻu maʻu e tuʻunga fakaʻekonōmika ʻo e ʻIunaiteti Siteití mo e māʻolunga e taʻemaʻu ngāué, naʻá ne vakai ki ha ngaahi lelei taʻeʻamanekina ke hokohoko atu ʻa e ngaahi ngāue ko ʻení. Naʻe siʻisiʻi e fiemaʻu ki he ngāue langá, ka naʻe lava e Siasí ʻo foaki ha ngaahi ngāue ki ha kau ngāue taukei tokolahi ki he ʻū polōsekí.
Naʻe tapou foki ʻa Palesiteni Monisoni ki he kau taki fakalotofonuá ke holoki e ngaahi fakamolé ʻi he feituʻu ʻe malava aí. Naʻá ne kole ki he kau taki fakamisioná ke akoʻi e kau faifekaú ke nau fakapotopoto. Naʻá ne fakangofua ha palani ne toki fokotuʻu ʻe he Kau Pīsopeliki Pulé ke holoki e lahi ʻo e ngaahi siteiki senitā foʻoú ʻaki ha vahe fā ʻe taha. He ʻikai ke langa ha ʻū fale lalahi mo fakamole ange ʻe hao kotoa ki ai e kau mēmipa ʻo e siteikí, ka ʻe lava e ngaahi siteikí ʻo fakataha ʻi ha ngaahi falelotu ʻo e uooti kehekehe pea mamata ʻi he ngaahi konifelenisi fakasiteikí ʻo fakafou ʻi ha fakamafola fakatekinolosia. Naʻe fakaʻatā heni e Kāingalotú ke holoki foki mo e ngaahi fakamole ki he fefonongaʻakí.
Lolotonga e tōlalo fakaʻekonōmiká, naʻe faʻa fakakaukau ʻa Palesiteni Monisoni ki he kakai faingataʻaʻiá—tautautefito ki he kau uitoú. Naʻe hiki hake e ngaahi kole ki he foaki ʻaukaí, pea naʻá ne loto ke ʻoua naʻa ngalo ha taha. ʻI he kei talavou ʻa Palesiteni Monisoní, naʻá ne hoko ko ha pīsope ʻi ha uooti Sōleki Siti ne ʻi ai ha kakai ʻe toko tahaafe tupu. Ko e toko valungofulu mā nima ai ko e kau uitou. Kuo fuoloa taʻu eni mei he taimi ne hoko ai ʻa Palesiteni Monisoni ko ha pīsope ʻi ha taʻu ʻe nimá, ka naʻá ne kei hokohoko atu pē ke ʻaʻahi ki he kau uitou ko ʻení, ʻo ʻave ha ʻū meʻaʻofa mo ha pōpoaki fakafiefia. ʻI heʻene hoko ko e palesiteni ʻo e Siasí, naʻá ne ʻaʻahi maʻu pē ki he tuenoá mo e tukuhāusiá.
Naʻá ne akoʻi ki he Kāingalotū, “Ko e ngāue tokoni ko ia kuo ui kitautolu ki aí, ko e ngāue tokoni ia ʻa e ʻEiki ko Sīsū Kalaisí. ʻI Heʻene ui kitautolu ki Heʻene ngāué, ʻokú Ne fakaafeʻi kitautolu ke tau ʻunu ke ofi kiate Ia. ʻOkú Ne folofola mai kiate koe mo au.”
ʻI he 2003, naʻe fokotuʻu ʻe he Siasí ha uepisaiti foʻou ko e www.providentliving.org, ʻa ia ne akoʻi ai ha ngaahi tefitoʻi moʻoni fakauelofea. Kimuʻa ʻi he tōlalo fakaʻekonōmiká, naʻe laka he milioná ʻa e niʻihi naʻa nau vakaiʻi e uepisaití he māhina kotoa. Ko ʻeni, ke tokoni ke fakamamafaʻi e ngaahi moʻoni mahuʻinga ko ʻení, naʻe teuteuʻi ʻe he Kau Pīsopeliki Pulé ha kiʻi tohi foʻou mo e DVD ko e, Basic Principles of Welfare and Self-Reliance. Naʻe poupouʻi e Kāingalotú ke totongi ʻenau vahehongofulú mo e ngaahi foaki kehé, moʻui ʻi loto ʻi ha patiseti, fakaʻehiʻehi mei he fakamoʻuá, fakasiʻisiʻi e kai falekaí, pea tānaki ha meʻatokoni talifaki.
Naʻe fakamoʻoni ʻa Palesiteni Monisoni ʻo pehē, “ʻOku ou fakahā ko e palani uelofea ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ne ueʻi fakalaumālie ia ʻe he ʻOtua Māfimafí. Ko hono moʻoní, ko e ʻEiki ko Sīsū Kalaisí ʻokú Ne fokotuʻutuʻú.”
ʻI ha ngaahi taʻu lahi, naʻe fakamatalaʻi ʻe he kau taki ʻo e Siasí ʻa e misiona ʻo e Siasí ʻo kau ai ha ngaahi meʻa ʻe tolu: ko hono fakahaohaoaʻi ʻo e Kāingalotú, malanga ʻaki ʻo e ongoongoleleí, mo e huhuʻi ʻo e kau pekiá. Ko e taimi ko ʻení naʻe ongoʻi ʻe Palesiteni Monisoni ʻoku totonu ke hoko ʻa e uelofeá ko e “meʻa hono faá.” ʻI Sepitema 2009, naʻá ne fakangofua e liliu ʻo e Tohi Tuʻutuʻuni ʻa e Siasí ki he Ngaahi Fakahinohinó ke fakakau ai hono “tokangaʻi ʻa e masivá mo e faingataʻaʻiá” ko e konga ʻo e misiona ʻa e Siasí.
Naʻá ne pehē ʻi ha ngaahi uike siʻi mei ai ʻi he konifelenisi lahí, “ʻOku ʻākilotoa kitautolu ʻe ha niʻihi ʻoku nau fiemaʻu ʻetau tokangá, fakalotolahí, poupoú, fakafiemālié, ʻetau angaʻofá. Ko e toʻukupu kitautolu ʻo e ʻEikí ʻi he funga ʻo e māmaní, kuo fekauʻi mai ke tau tokoniʻi mo hiki hake ʻEne fānaú. ʻOkú Ne fakafalala mai kiate kitautolu taki taha.”