Ana Ekaretia te Aonnaba e Kakabwaiaaki man Bwanaaia Burabeti
Ti na kakauongo nakoia ara burabeti n boong aikai bwa a na buokiira ni katikui ara kaantaninga i aon bwaai aika a kaineti nakon ana baire te Tia Kariki Bwai.
Bon te kimarimari ao te tibwanga n aron rikira bwa mwakoron te Ekaretia n te aonnaba ao n tabekaki rake i rouiia burabeti, taan mamata, ao taan kaotioti! Te maungatabu aei e bon kanakoaki bwanaana nakon 68 aaba ao e rairaki nakon 55 taian taetae. Aio bon te Ekaretia ni koaua n te aonnaba ma kaaina aika a uamaae n aaba nako n te aonnaba. Bon ngaira natin te Atua n tangira ae maiu, Tamara are i Karawa. I kaota au tangira nakoimi, tariu ao mwaaneu aika a tangiraki.
Teniua te namwakaina n nako ao ti reitaki i aan ana kairiiri ni mii ni burabeti te Beretitenti ae Gordon B. Hinckley n tain katabuan te Tembora ae Nauvoo are e a manga moan kateaki riki. E kaoki ara iango nakon te Burabeti ae Iotebwa ao ni kaboui ara kaantaninga nakoia aika Itiaki ni boong aika a bwakanako; aia anganano, rawawataiia, ranin mataia; ma aia ungannano, onimaki, ao aia koaua i roun te Uea. Akea ara ikawai i buakoia kaain te bwaeaniia ake n te katebwi ma ruaiua n tienture. E ngae n anne, ngkoa n te moan tai ae I kaaina iai te Ekaretia ao I namakina te mwaneaki raoi i rarikiia kaain te bwaeaniia ake ngkekei ake a mwmawananga i nanon rereua. Bon au bakatibu aika a itiaki nanoia, ngkai bon ngaia taan beku i bukiia raoia ao nakoia kaain te Ekaretia, n aki tabeakinaki bwa ia abam, am taetae ke kateim. A aki katea ti aia tabo ae tan i Maeao ma bon boton aia kateitei ae tituaraoi n abanuean te Atua ni kabuta te aonnaba.
Ngkai e a tabe ni butimwaeaki ana euangkerio Iesu Kristo are e a tia ni kaokaki ni kabuta te aonnaba, bon bwaeaniia ngaira n ara tabo nako ao n aaro nako. Bon mai imwiin–Buakan te Aonnaba II i Tiaman ngke a moanna kaain au utu n ataa Ana Ekaretia Iesu Kristo Ibukiia aika Itiaki Ni Boong Aika Kaitira. George Albert Smith bon te Beretitenti n te tai anne. Bon te ataei ae uarereke ngai, ao a tia ni iri bwai ni kabane ni katoa uoua te tai i nanon ti itiua te ririki. Bon taan taenikai ngaira ma n aki koaua raoi ibukin te tai ae na roko. E ngae n anne, ma i nanon ririki aika itiua aika ti te arona akanne, ti karekea te mwaiti ae raka riki nakon are e kona kabooa te mwane. Ti kunea te tabo ni katantan ae kakannato riki, ae te tabo ni katantan man te bwara n nano—ana euangkerio Iesu Kristo ae manga kaokaki ao ana Ekaretia, are e kairaki i roun te burabeti ae e maiu.
I nanon au tai n ataei ao I tatakakaro i nanon auti ake a boomiaki ao ni ikawai rake ma kakawakin manga-kaotin te buaka are e a tia ni bua ao ataakina bwa abau e a tia ni karawaawataaki ma te maraki ae kakamaaku i aon mwakorona nako n tain te kauoua ni Buaka n te Aonnaba ae kakamaaku.
Rongorongo aika Raoiroi bwa Iesu Kristo e a tia ni karaoa te Mwakuri ni Kamaiu ae tamaroa i bukiia aomata ni kabaneia., kabooira nikabane man te mate ao n anga kaniwangan temanna n tatabemaniia nakon aia mwakuri, bon te mwaaka ae kamaiuiia aomata ao e uotiia nakon te ungannano ao te rau nakon te maiu.
Teraana nako kakaewenakoara i nanon maiura, uotara aika a rawawata a na bon kabebeteaki ngkana ti aki tii kakoaua Iesu ma bon Ana konabwai naba ao Mwakana ni kaitiaki ao n anganiira iango i bukin maiuiira ao ni butimwaea rau.are bon mai Rouna.
Beretitenti David O. Mckay bon te burabeti i nanon au ririki ni kairake. I tara n ae I rangi ni kina raoi: I kona n namakina ana tangira, akoi, ao karietaatana; e anganai kaotaau ao korakorau i nanon maiu ni kairake. E ange ngke I ikawai rake tengaa te maire raroana i Eurobe, I namakinna bwa e onimakinai, ao I aki tangiria ni kan kaunna.
Teuana riki te bwai ae kakorakoraai bon te reta are e koreaki i roun te Abotoro ae Bwauro i nanon ana tai ni kamatawarikaki, e koreaki nakon Timoteo, ana kauoman ae rangi n onimakinna ao raoraona. E korea ae kangai:
“Bwa e aki anganiira te Atua te nano ae mamaku; ma E anganira te nano ae korakora, ae tatangira, ma n marurung ana iango.
“Ko na tai maamaa n taekina am koaua ibukin ara Uea” (2 Timoteo 1:7–8).
Taeka aika taekinaki mai roun temanna ara Abotoro ni kawai ibukin ara Tia Kamaiu e kakauringai n aron kakawakina nakoiu n tain te bobo—buaka, e ngae ngkai a kakaraoia ni boong aikai. Ma ai iraman mai buakora ae a tia ni kariaia bwa e na beku i nanon te tai aei, n aroaron nako kakawakin bwaai ao tua i bukiia aika a aki tau, ao ai bon te kakaewenako nakoim.
E taetae te Atua nakoira ni bwanaana ae teimatoa. E na tabeakiniia aomata te Atua ni katitaaboiia n aron te utu. Ti na bae ni mena n te uote ae bubura ke te mwaanga ae uarereke, aron tein ao te ununiiki a na okoro, te aroaro n te katei ma taetae a bon bae ni waaki, ao karan kunira a na bon rangi n okoro. Ma te mwaaka mai karawa ao te kakabwaia man te euangkerio are e manga kaokaki a bon tatauraoi nakoira nikabane, aki karinean katei, te nano n aba, te waaki i bukin tuua, tibwauakin te rabakau, te taetae, te otabwanin ae tuakarako, ao te reirei.
N te bong aei, ti manga karekeia abotoro, taan mamata, ao taan kaotioti ake bon taian uaatiman man te auti n kataratara, taan uarongorongo, ao taan kamarurunga te koaua. E taetae te Atua nakoira rinanoia naakai. A bon rangi n ataa aron kaokoron kakawakiia ngaira aika kaain te Ekaretia ake ti maeka i nanona. A mena n te aonnaba aei, ma tiaki man te aonnaba.
Iai ara burabeti ae maiu i matan te aonnaba, ae Beretitenti Gordon B. Hinckley. E atai kakaewenakoara ao makura. Iai ana reke man kairakina. Teuana te ririki n nako ao e reieiniira man ana kawai ae mataata ao man kaunga nano. Ao E taku:
“Bon akea kainnanoan te maaku. Ti kona ni karekea te rau i nanora ao te rau i nanon mweengara. Ti kona n riki bwa taan kariiri i bukin ae raoiroi n te aonnaba aei, ngaira aikai nikabane… .
“… Aron rairan nanora man te maiu ni kewe. Korakorara e na reke man ongeabara nakon ana tua te Atua” (“The Times in Which We Live,” Liahona, Tianuare 2002, 86).
E taetae te burabeti nakoira n aran te Uea ao ni kakaokaota. Ngkai e kamatoa Ana Boki Moomon, “Bwa e anga te Uea ae te Atua te oota nakon te kaantaninga; bwa e taetae nakoia aomata n aron aia taetae, ao nakon are a na oota iai” (2 Nibwaai 31:3).
Bon tabera bwa ti na aki ti kakauongo ma ti na mwakuri n aron Ana taeka, n te aro bwa ti na kona ni bubuti kakabwaia n te otenanti ao berita man te euangkerio are e a tia ni kaokaki. “Ngai, ae te Uea, I kabaeaki ngkana kam karaoa are I tangiria; ma ngkana kam aki karaoa are I tangiria, ao a na akea ami berita” (tara D&C 82:10).
A na bon iai taai ake ti na namakina iai te nano uoua, te maraki, ke te bwara n nano ngkai ti kataia n riki bwa kaain te Ekaretia aika tamaroa. Taraia raoi, bwa a na iai te bwaa ni katoki aoraki i Gilead. Ti na kakauongo nakoia ara burabeti i nanon ara bong aikai bwa a na buokiira ni katikui ara kaantaninga i aon bwaai aika a kaineti nakon ana baire te Tia Kariki Bwai i bukin te bwai ae a kaantaninga rokona natina are akea tokina. E ataira te Uea, E tangirira, E tangiria bwa ti na tokanikai ao e kaungai nanora man taekinan ae kangai: “Ao noria bwa nikabane … bwaai a karaoaki man te wanawana ao te babaire raoi; bwa a aki kaantaningaaki [mwaane ao aine] bwa karaoa te mwakuri ae raka nakon are a kona ni karaoia… . [Ma] E riai bwa [a] na riai ni mwakuri korakora” (Motiaea 4: 27).
Ti tau ma konabwaira ni maiuakini ana tua te Atua, n aki biri riaon korakorara? Ke ti bon waeremwe ni mwakuri? Ti kabonganai ara tai, tarena, ao ni karau bwaai n aron ara kabanea n wanawana? Ti katikui ara kaantaninga i aon bwaai ake a moamoa riki? Ti ririmwiin aia marooro ni kairiiri ara burabeti?
Teuana te katooto ae e rangi ni bongana nakon aroia bon kakorakoraia kaain ara utu. Te koaua ibukin botakin te utu n te tairiki ti anganaki 1915. E kauringiia riki kaaro te Beretitenti ae McKay n te ririki 1964 bwa “akea riki te tokanikai ae kona ni katitabooa te rawawata i bukin kabwakara i nanon mweengara” (e anaaki man te J. E. McCulloch, Home: The Savior of Civilization [1924], 42; in Conference Report, Apr. 1964, 5). N te ririki 1995 ao a wetea te aonnaba nikabane burabeti bwa a na kakorakoraia aia utu bwa boton te koaua n aia tabo are a maeka iai. Ao ai tibwa teniua te ririki n nako ao e taekinna te Moan Beretitentii ao Aia Kooram Abotoro ake Tengaun ma Uoman a taekinna ma nanoia n tangira: “Ti marooro ma kaaro ao natiia bwa a na moanibwaia te tataro n te utu, te botaki n te utu n te tairiki, kamatebwaian koroboki aika tabu ao kaetieti, ao ai taian takakaro nako ni kakukurei n te utu. Ma ngaia are bwaai riki ke takakaro riki ake a tangiri aika a kakororaoa te waaki a kona naba ni karaoaki, ma a aki kariaiakaki bwa a na onea mwiin katabean te utu are e baireaki mai karawa ake a na kona ni karaoi kaaro ao kaain te utu” (“Letter from the First Presidency,” Liahona, Ritembwa 1999, 1).
Ti na uaia ni kaungaira ao n kabouii ara onimaki ni kaoti nanora ao waakin maiura ni iririia ara burabeti, taan mamata, ao taan kaotioti ni kabanea ara konaa. Ti na kakauongo ma ni kan kaetaki ao n rikirake n tamneira mairouia te koraki a tauii nikabane kingiin te abanuea. Ao ngkai ti roko ni kaea te maungatabu aei, a bia bitaki nanora, bwa e na iai te nano ae korakora ni karaoan te raoiroi (tara Aramwa 19:33), ao bwa ti na riki bwa bwaeaniia katean aan te maiu n tamnei are e na katea te Ekaretia ni mwakoron nako te aonnaba. N aran Iesu Kristo, amen.