A Taetae Nakoira
TE RIBOOTI I BUKIIA ATAEI N TE EKARETIA MAN ANA KA 172 NI MAUNGATABU NI KABUTA N TE NUKA N RIRIKI, 5–6 OKITOBWA 2002
Beretitenti Gordon B. Hinckley: Iangoa Kamiimina.
Aio ana Ekaretia Iesu Kristo ae manga kaokaki. Ngaira ngkai aomata aika Itiaki Ni Boong Aika Kaitira. Ti kakoaua bwa e a tia ni kaukaki karawa, ao e a urenako te keeten, ao e taetae te Atua, bwa Iesu Kristo e a tia ni Kaitiakia, n rimwiiaki ni katabuaki man te kariaia mai karawa.
Iesu Kristo bon atibun te koona n te mwakuri aio, ao e kateaki i aon te “boto mai rouiia … . abotoro ao burabeti” (I-Ebeto 2:20).
Te Beretitenti ae Thomas S. Monson, te Moan Kauntira n te Moan Beretitentii: Inanon rooro n taai aika a tia n nako, te rongorongo mairoun Iesu bon titebo. Nakon Betero ao Anterea i aon biken naman Kariraia ae moan te tamaroa, E taku, “Iriirai.” Nakon Biribi are e roko weteana ngkoa, “Iriirai.”… Ao nakoim ao nakoiu, ngkana ti bon kakauongo, e na roko te aeka ni kakao aei, “Iriirai.”
Beretitenti James E. Faust, Kauoman ni Kauntira n te Moan Beretitentii: Au kantaninga bwa ti bia riki bwa aekan “Te Intin ae Uarereke Ae Konabwai.” E bon aki rangi ni bubura, ao n ti kamanenaaki n onei mwiin kaa, ao man tuai n roko i aon maunga, ma e kataia. Te intin ae uarereke aei e kanimwaki ao ni kabaeaki ma te turein, e butirake nako aon taubukin te maunga, ao ni butirikaaki man te maunga, man taku, “I bon iangoia ae I kona.” Ngaira aikai ti riai ni kataia n tamwarakea te maunga ae ti tuai man tamwarakeia imwaina.
Te Unimwaane ae David B. Haight man te Kooram n te Tengaun ma Uoman n Abotoro: E maiu te Atua. Bon Tamara. I kakoaua nakoimi bwa Iesu bon te Kristo, Natin te Atua ae maiu, ao Iotebwa Timiti bon ana burabeti ibukin te Ekaretia ao te Euangkerio. Beretitenti Hinckley bon ara tia kairiiri maiuroun te Tamnei ibukin te Ekaretia aei ni katobibia te aonnaba. Kakabwaiaa nanona i bukin bwaai ni kabane ake e karaoi ao ibukin ana buoka te Tamnei ao te kaotioti ao te mii ni burabeti are bon ana bwai ngkai e tabe ni kawaka rake te mwakuri. I katika te kakoaua aei ma ngkami n aran Iesu Kristo, amen.
Te Unimwaane ae Neal A. Maxwell man te Kooram n te Tengaun ma Uoman n Abotoro: Taariu ao mwaneu, maekara n taai ni kakamwakuri, ti kona n tei n taabo aika a tabu ma n aki bwerengaki (tara D&C 45:32; 87:8). E ngae ngkai ti maiu n taai ni kakiriwe, ti kona ni karekea te rau inanora are e riaon ana atatai (tara I-Biribi 4:7). Bwaai aika a kaminoa te iango a bon ririki, ma, n aron Nibwaai, ti kona n ataia bwa te Atua e tangiriira… .
Ekoaua, ae ti aki kona n oota raoi ni bwaai ni kabane ngkai naba! E koaua ae ti aki kona n atai raoi bwaai ni kabane ngkai naba. Ma ti kona n ataia, ngkai naba, bwa E tangirira n tatabeman nako te Atua!
Te Unimwaane ae Robert D. Hales man te Kooram n te Tengaun ma Uoman n Abotoro: N aekaia baeania, ongeabaia nakon kabwakaan kabwianibwai aika e kakorakorai aia onimaki, ao e kamatoaia inanon tain kataakia, angibuaka, ao rawawataia ni mwanangaia ni kawaia ni maiuia.
Te Unimwaane ae Dieter F. Uchtdorf man te Beretitentii n te Itingaun: Bon akea au bakatibu i buakoia te ka 19 n tienture ni bwaeaniia. Ma e ngae n anne, ni moan bongin au tai ni kaaina te Ekaretia, bon moan te kinaia ngai te koraki aika kaain te bwaeaniia kanga aron ae au koraki ake a ririanna rinanon rereua. Bon au bakatibua aika a tituaraoi maiuiia, ngkai a bon anga ngaiia i bukin temanna ae kaain te Ekaretia, n akea te nano n aba, te taetae, ke te katei. A aki ti katea aia tabo ae tan i Maeao ma a katea naba aan aia tituaraoi i bukin katean abanuean te Atua i aon aaba nikabane n te aonnaba.
Te Unimwaane ae Robert K. Dellenbach man te Itingaun: E tuangira te Uea bwa ti na kaokoroa te Tabati teuana n te namwakaina n aki mamatam ibukin uoua te tai n amwarake. Ti tuangaki bwa ti na angamwane man boon taai n amwarake ake uoua, e kona ni buokiia te koraki ake a kainnano.