O Le Sikauti Faatu Matati’a a Cape Town
Ua na o ia lava le Sikauti lona tolu i le talafaasolopito o Aferika i Saute ua avea faatolu ma Sikauti Springbok, ae o ia foi o le tagata muamua ua ausia lona Taui o le Tiute i le Atua.
Po o le a lava le atunuu e te nofo ai, e manaomia lava se taumafaiga tele e ausia ai le taui aupito maualuga i le Sikauti. Ia mafaufau la i le taumafaiga e manaomia e ausia faatolu ai le taui. O Rocco du Plessis o le Sikauti Springbok muamua lava lea i le talafaasolopito o le 26 tausaga o le Vaega Muamua a Edgemead i Aferika i Saute. O lea la, o le avea faatolu ma Sikauti Springbok o se tulaga maoae lea ua ausia.
Ae peitai, e i ai foi se isi taui na ausia e Rocco i le tausaga ua te’a e tutusa lava le taua ia te ia. “O le ausiaina o le Tiute i le Atua ua fesoasoani ia te a’u ina ia sili atu foi ona tele mea ou te ausia mo lo’u lava tuputupu ae faaletagata lava ia ma le faaleagaga,” o lana tala lea. “E faatatau lea i lau mafutaga ma lou Tama i le Lagi.”
“O le polokalama faaSikauti iinei e ese le faigata,” o le tala lea a Rocco, o se tasi o le Uarota a Panorama i le Siteki a Cape Town i Aferika i Saute. E faigata lava ona ausia le Springobk. E moni, o loo i ai taitai Sikauti e fesoasoani ia te oe. Ae e faigata lava. “Afai e te le galue malosi, afai e te le faataunuuina ou tiutetauave, e te le mauaina,” o le faaopoopo mai lea a Rocco. E tele le taimi, fuafuaga, ma taumafaiga e alu i le mauaina o taui taitasi a o e alualu i luma i le polokalama faaSikauti, lea e le faatupeina e le Ekalesia i Aferika i Saute.
Mo le Taui o le Tiute i le Atua, sa faapea mai Rocco, o le lagolago a ona matua ma ona taitai o Alii Talavou na mafai ai ona faia se eseesega tele. “Latou te mananao e te ausia lou Tiute i le Atua,” o lana tala lea, “ma o le tele o tulaga manaomia o mea lava o loo e faia i aso uma.” Ona pau lava le mea o le galulue ma ou matua ma taitai e tusi faamaumau lou alualu i luma i vaega na. “O le tele o vaega masani faaMamona i lou olaga e faataunuuina ai tulaga manaomia o le Tiute i le Atua—pe afai e te faia ia mea.” I nisi faaupuga, afai e auai se alii talavou i sauniga a le Ekalesia, tatalo i aso uma, suesue i tusitusiga paia, ma faataunuuina ona tiutetauave faaleperisitua, ua i ai o ia i le ala sa’o.
O Le Avea ma Sikauti Springbok
E tusa na o le tasi pe lua pasene o Sikauti uma lava i le atunuu atoa e mauaina le taui aupito maualuga faaSikauti i Aferika i Saute. Ma pe a na o le tasi pe lua pasene o nei Sikauti Springbok e faamaeaina le sili atu nai lo le tasi o lu’i Explorer e tolu e ono ausia. Na faamaeaina uma e Rocco taui o lu’i e tolu, ma avea ai o le lona tolu o Sikauti i le talafaasolopito o Aferika i Saute e ausia le taui.
O se Sikauti Aferika i Saute e alualu i luma i totonu o le polokalama mai le Pathfinder (Taiala) i le Adventurer (Tagata Sailiili) i le First Class [Vaega Sili] ona oo lea i le Explorer (Tagata Suesue). O le pine Tagata Suesue e vaevaeina i vaega eseese e tolu: Land Scouts (Sikauti i le Eleele), Air Scouts (Sikauti i le Ea), ma le Sea Scouts (Sikauti i le Sami). E masani lava ona filifili e se Sikauti se tasi o na vaega e tulimatai atu i ai a o ia galue agai atu i lana taumafaiga faaiu—o le Springbok. Na tulimatai atu Rocco i vaega uma e tolu.
Faatasi ai ma isi pine ma tulaga manaomia, o loo i ai pine faapitoa e manaomia i ituaiga o Tagata Suesue taitasi: O le Tagata Suesue i le Eleele e ausia ai ana pine o le Backwoodsman (Tagata o le Vao) ma le Mapping (Tusi Faafanua). O le Tagata Suesue i le Ea e ausia ana pine o le Air Navigator (Tagata Tauasa i le Ea) ma le Air Traffic Controller (Tagata e Pulea Feoaiga i le Ea). Ma o le Tagata Suesue i le Sami e ausia ai ana pine o le Helmsman (Tagata Tautai) ma le Boatsman (Tagata Alovaa) mo folauga ma le alo vaa.
Na faamalamalama e Rocco e faapea e masani lava e lua faaiuga o vaiaso [e faaaluina] i se nofoaga e ausia ai taui taitasi. E i ai pine papae—o le aoaoga i tua o le tomai. Ona i ai lea o pine lanumeamata—o faatinoga o le tomai. Mo se faataitaiga, ina ia ausia lau pine Tagata o le Vao, e muamua ona e aoaoina mea e pei o le ola i le vaomatua, feoaiga e faaaoga ai fetu, ma le faia o afi e aunoa ma ni afitusi. Ona oo mai lea o le faatinoga. E momoli oe i le togavao mo le 48 itula, ma tuu ai na o oe.
Na fai sina pisi o Rocco i mea faaSikauti mo ni nai tausaga. Mai ia Fepuari seia oo ia Tesema o le tausaga ua te’a, mo se faataitaiga, na tele faaiuga o vaiaso na toesea ai o ia. “Na foliga na ou alu e le toe sau i vasega e maua ai pine,” o lana tala lea. Ma le isi, mo le lima tausaga ua mavae, na avea ai Rocco ma taitai vaega. O lona uiga na nafa ma le faatulagaina o tolauapiga a vaega uma. Na fuafuaina e ia aiga uma, faia faatauga, fuafua fonotaga faavaega, ta pepa faataga e saini ai isi Sikauti ma o latou matua, ma vaavaai ia tolauapiga taitasi.
O se tasi o tomai taua ua aoaoina e Rocco i le ala o le maelega. “E tusa o le afa o a’u pine e lei pasi i le taimi muamua i le vasega,” o lana tala lea. “I totonu o le ono masina e mafai ona e toe foi i tua ma toe faia pe suesueina oe e se tagata matua ua ausia muamua le suega o le pine.” Mo se faataitaiga, o se tasi o tulaga manaomia mo le Fesoasoani Muamua o le fusifusia o se manua. “Na le pasia le fusiina o manua ona o se vaega o a’u nonoa na lala mai i fafo,” o le tala lea a Rocco. “O le mea lea na tatau ai ona ou toe faia le vaega o le fusifusia o manua ina ia ausia ai la’u vaega lua o le Fesoasoani Muamua.”
E faaopoopo atu i pine, o loo i ai isi galuega faatino e tatau i se Sikauti ona faamaeaina ina ia ausia ai lona Springbok. O se tasi o ia mea o se galuega faatino o le kamuta. Na filifili Rocco e fausia se alalaupapa. Na muamua lava ona ia tusia se ata ma fausia se ata faataitai o le alalaupapa. Ma, faatasi ai ma se vaega e toaono o isi Sikauti, na tatau ai ona fausia e Rocco le alalaupapa i lona tele atoa, e tusa e 20 futu le maualuga (6 m) ma le 30 futu le umi (9 m). Na toeitiiti atoa le iva itula o fausia le alalaupapa ona toe tala ai lea.
Ona i ai lea o le auauna atu i le nuu, o se vaega tele o le ausiaina o le Springbok ma le Taui o le Tiute i le Atua. O le tulaga manaomia o lana auaunaga mo le Springbok, na asia ai e Rocco le silia i le 40 fale o tagata matutua e fesoasoani ia i latou i tiute eseese ma mea e lipea. “Na pau le mea tele na tutusa o le auaunaga e 40 itula na mafai ona ou faaaogaina faatasi mo le Sikauti ma le Taui o le Tiute i le Atua,” o le tala lea a Rocco.
Mai tulaga manaomia uma lava ua faataunuuina e Rocco ina ia ausia ai ana taui eseese, na ia taua le tasi ua sili ona taua ia te ia mo lona alualu i luma faaletagata lava ia: “O le faitauina o le Tusi a Mamona,” o le tala lea a Rocco e aunoa ma le faatuai. “O le lu’i aupito sili lea ona tele ma aupito sili ona aoga.”
Avea ma se Faifeautalai
“Na o le faatasi ona ou faitauina le Tusi a Mamona muamua, po o se tausaga pe a talu ai, ae na ou faitauina tau lava ina faataunuu,” o le faamalamalamaga lea a Rocco. “Ina ua amata ona ou toe faitauina, na ou manao lava e aoao ma maua se molimau i ai.” Na ia amata ona faitauina le Tusi a Mamona i se auala e matua ese lava i le taimi lona lua. “O taimi uma lava ou te faitau ai nei, ou te tatalo muamua e talosagaina le Agaga o le Tama Faalelagi ia faatasi ma a’u a o ou faitau.”
O lea ua amataina e Rocco le isi ana galuega faatino tele e sosoo ai—ina ia tinou e faasoa atu lana molimau i isi a o sauni o ia e auauna atu i se misiona. O ona aafiaga faaSikauti ma le ausiaina o lana Taui o le Tiute i le Atua ua fesoasoani ia te ia i lona alualu i luma faaletagata lava ia ma le avea ai ma faifeautalai. “Ina ia talai atu le talalelei, na manaomia lo’u iloa o mea o loo i totonu o le Tusi a Mamona, ma na manaomia ona ou iloa e moni,” o lana tala lea. “Ina ua maea ona faitauina faalua, na ou mauaina se molimau e uiga i ai.”
E tusa lava pe ana le i ai se Taui o le Tiute i le Atua e ausia, fai mai Rocco semanu na te faataunuuina lava le tele o tulaga manaomia aua na ia manao lava e sauni mo le galuega faafaifeautalai. O le auai i le lotu, faitauina o tusitusiga paia, tatalo i aso uma, ma le tuuina atu o auaunaga ua na o nisi o vaega o le ituaiga tagata e i ai Rocco, i le avea ai ma se tagata e tatau ona i ai se [tagata o le] Au Paia o Aso e Gata Ai.
O lenei la ua maua lona valaauga e auauna atu o se faifeautalai faamisiona, o le molimau ua fausia e Elder du Plessis ua iloga ona silisili atu lona aoga nai lo le alalaupapa maea ma laau na ia fausia mo lana galuega faatino kamuta mo le Springbok. Ae peitai, o nisi o tomai o le tagata o le vao, sa ia aoaoina o se Sikauti atonu o le a aoga a o ia auauna atu ai i Zimbabwe, Zambia, ma Malawi.