Tala Faamamai o le Talalelei
O Le Faamanatuga—ma le Taulaga
Na soifua mai David B. Haight i le aso 2 o Setema, 1906, i Oakley, Idaho, ia Hector C. ma Clara Tuttle Haight. Na faaipoipo o ia ia Ruby Olson i le Malumalu o Sate Leki i le aso 4 o Setema, 1930. A o lei valaauina o ia o se Pulega Aoao, na i ai o ia i se galuega faamanuiaina i le fefaatauaiga o oloa; na auauna atu o se pulenuu o Palo Alto, Kalefonia; ma pulefaamalumalu i le Misiona i Sikotilani. Na faauuina o ia o se Aposetolo i le aso 8 o Ianuari, 1976. Na maliu o ia i le aso 31 o Iulai, 2004, i le 97 o ona tausaga.
I le ono masina talu ai i le konafesi aoao ia Aperila, na ou faanoi ai ou te le lauga ona sa ou le malosi lelei mai so’u taotoga faigata. Na faasaoina lo’u ola, ma o lenei ua ia te a’u le avanoa matagofie e faailoa atu ai faamanuiaga, faamafanafanaga, ma fesoasoaniga vave saunia a la’u Usoga i le Au Peresitene Sili ma le Korama a le Toasefululua ma isi uo lelei ma e masani o e ua tele naua lo’u nofo aitalafu i ai ma e na siomia si o’u toalua pele, o Ruby, ma lo’u aiga i o latou taimi, manatu, ma tatalo… .
O le afiafi na tupu ai le faafitauli i lo’u ola maloloina, na ou iloaina sa tupu se mea matua matautia ia te a’u. Na vave lava le tutupu o ia mea—le oo mai o le tiga matua malosi, o le telefoni atu o la’u pele o Ruby i le fomai ma lo matou aiga, ma na ou tootuli ma faalagolago i le tapu taele mo se lagolago ma sina faamafanafanaga ma le faamoemoe i se vasa’i o le tiga. Na ou augani atu i lo’u Tama Faalelagi ina ia faasaoina lo’u ola ia umi atu ina ia ou maua ai se isi taimi faaopoopo e faia ai Lana galuega, pe afai o Lona finagalo lea.
A o ou tatalo ai, na amata ona ou le iloaina se mea. O le leo o le sailini o le taavale a le falemai le mea mulimuli lava na ou manatuaina ae lofia loa a’u e le pouliuli atoa, lea na ou i ai mo ni nai aso na sosoo ai.
Na leai se tiga matautia ma le vevesi o tagata. Na ou i ai nei i se nofoaga to’a, ma le filemu; o mea uma sa le gaoia ma leai se pisa. Na ou iloa mamao atu ni tagata se toalua i luga o se mapuepue, o le tasi na maualuga teisi atu lona tulaga nai lo le isi. Sa le manino lelei mai foliga. O le tagata na maualuga atu lona tulaga na tusi lona aao i se mea e lei mafai ona ou iloa atu.
Ou te lei faalogo i ni leo ae na ou iloa lo’u i ai i luma o ni tagata paia ma se siosiomaga paia. I itula ma aso na sosoo ai, na faamalamalamaina ai pea lava pea i lo’u mafaufau le misiona faavavau ma le tulaga faaeaina o le Atalii o le Tagata. Ou te molimau atu ia te outou o Ia o Iesu le Keriso, le Alo o le Atua, le Faaola o tagata uma, le Togiola o tagata uma, o Le Foai o le alofa tunoa, alofa mutimutivale, ma le loto faamagalo, o le Malamalama ma le Ola o le lalolagi. Na ou iloa muamua lenei upumonite lei masalosalo lava pe tau mafaufau i ai. Ae o lenei ua ou iloa, ona o uunaiga a le Agaga i lo’u loto ma lo’u agaga, ia nei upumoni paia i se auala sili ona tulaga ese.
Na faaali mai ia te a’u se vaaiga atoa o Lana galuega i le lalolagi: o Lona papatisoga, Ana aoaoga, o Lona faamaloloina o e mamai ma e pipili, le faamasinoga faalumaina, Lona Faasatauroga, Lona Toetu ma Afio Ae i le lagi. Ona sosoo mai ai lea o vaaiga i Lana galuega i le lalolagi i lo’u mafaufau i auiliiliga musuia, ma faamaonia ai molimau vaaia faaletusitusiga paia. Na aoaoina au, ma na faapupulaina ai mata o lo’u loto e le Agaga Paia o le Atua ina ia ou vaai i mea e tele.
O le vaaiga muamua i le Faaola ma Ana Aposetolo o le afeafe aupitoaluga i le afiafi a o lumanai Lona faalataina. Sosoo ai ma le taumafataga o le Paseka, na Ia aoao atu ai ma saunia le faamanatuga o le Tausamiga a le Alii mo Ana uo pele o se faamanatu o Lana taulaga o le a oo mai. Na matua manino lava ona faaali mai ia te a’u—le alofa maoae o le Faaola mo i tatou taitoatasi. Na ou molimauina Lona popolega loloto mo faamatalaga taua—o le mulumuluina o vae pefua o Aposetolo taitoatasi, o Lona vaevaeina ma le faamanuiaina o le areto e le faafefeteina ma faamanuiaina le uaina, ona oo mai lea i Lona faaalia matautia o lē o le a faalataina o Ia.
Na ia faamalamalamaina le toesea o Iuta ma ta’u atu i isi mea o le a lata ona tutupu.
Ona mulimuli mai ai lea o le faaaliga taua a le Faaola ina ua Ia fetalai atu i le Toasefulutasi: “Ua ou fai atu nei mea ia te outou, ina ia outou maua le manuia ia te au. E maua foi outou e le puapuaga i le lalolagi, a ia outou loto tetele; ua ou manumalo i le lalolagi” (Ioane 16:33).
Na tatalo lo tatou Faaola i Lona Tama ma faailoa atu o le Tama o le pogai o Lana pule ma le mana—e oo lava i le tuuina atu o le ola e faavavau i e uma e agavaa.
Na tatalo o Ia, “O le ola e faavavau foi lenei, ia latou iloa oe le Atua moni e toatasi, ma le na e auina mai, o Iesu Keriso lea.”
Ma le ava tele na toe fetalai atu ai Iesu:
“Ua ou tuu atu ia viiga ia te oe i le lalolagi: ua ou faaumaina le galuega na e tuuina mai ia te a’u ou te faia.
“O lenei foi, lo’u Tama e, ia e tuu mai ia te au le manuia faatasi ma oe o le manuia lava sa ia te i taua ma oe a o lei faia le lalolagi” (Ioane 17:3–5).
Na Ia aioi atu e le gata mo le au soo na valaauina mai le lalolagi o e na faamaoni i a latou molimau ia te Ia, “a o i latou foi e faatuatua ia te au ona o la latou upu” (Ioane 17:20).
Ina ua uma ona latou lagiina se viiga, na afio atu Iesu ma le Toasefulutasi i le Mauga o Olive. O iina, i le faatoaga, i se auala tatou te le malamalama i ai, na tauave ai e le Faaola i Ona luga le avega o agasala a tagata uma mai ia Atamu e oo i le iuga o le lalolagi. O Lona puapuaga i le faatoaga, o loo tau mai e Luka ia i tatou, na matua matautia tele “o lona afu foi ua pei … o alualu toto ua pau ifo i le eleele” (Luka 22:44). Na tigaina o Ia i se puapuaga ma se avega o se mea e le mafai e se tagata ola ona tauaveina. I lena itula o mafatiaga na faatoilaloina ai e lo tatou Faaola mana uma o Satani.
O le Alii faamamaluina na faaalia ia Iosefa Samita lenei apoapoaiga i tagata uma:
“O le mea lea ou te poloai atu ai ia te oe ia salamo… .
“Aua … o a’u, le Atua, … na puapuagatia … mo tagata uma, ina ia latou le puapuagatia pe afai latou te salamo; …
“O le tiga lea na faagateteina ai a’u lava, o le Atua, le silisili ese i mea uma, ona o le tiga, ma na maligi ai le toto mai pu laiti uma lava o le tino, …
“O le mea lea, ou te toe poloai atu ai ia e salamo, nei ou faamaulaloina oe i lo’u mana silisili ese; ma ia e ta’uta’u atu au agasala, ina nei puapuagatia oe i nei faasalaga ua ou fai atu ai” (MFF 19: 15–16, 18, 20).
I na aso na ou le iloa ai se mea, na tuuina mai ia te a’u, e ala i le meaalofa ma le mana o le Agaga Paia, se malamalama sili ona atoatoa o Lana misiona. Na tuuina mai foi ia te a’u se malamalamaaga sili ona atoatoa i le uiga o le faaaogaina, i Lona suafa, o le pule e tatalaina ai mea lilo o le malo o le lagi mo le faaolataga o i latou uma o e faamaoni. Na aoaoina pea lava pea lo’u agaga i mea na tutupu i le faalataina, le faamasinoga faalumaina, o le faamanu’aina o le tino o se tasi o le Aigaatua. Na ou molimauina Lana tauiviga agai i luga o le mauga i Lona tulaga vaivai o loo tauaveina le satauro ma Lona tino na faataatia ai luga a o taatia i luga o le eleele, ina ia mafai ona tuituia Ona aao ma tapulima i fao i se samala ina ia faamausali ai Lona tino a o tautau i le satauro mo se faaaliga i le lautele.
Faasatauroga—o le maliu matautia ma le tiga lea na Ia mafatia ai—na filifilia mai le amataga. E ala i lena maliu ona matautia le tiga, na Ia afio i lalo ifo o mea uma, e pei ona faamaumauina, e ala i Lona Toetu o le a Ia alu ae i luga o mea uma lava (tagai MFF 88:6).
Na maliu Iesu Keriso i se tulaga moni o le a faapea ona tatou oti uma ai lava. Na taatia lona tino i le tuugamau. O le agaga faavavau o Iesu, na filifilia o le Faaola o tagata, na oo atu i le toatele o agaga o e na tuua le ola faaletino ma tulaga eseese o le amiotonu i tulafono a le Atua. Na Ia aoaoina i latou i “tala mamalu o le faaolataga mai le noanoataga o le oti, ma le faaolataga folafolaina … [lea na avea ma] vaega o le auaunaga muai tofia ma faapitoa a lo [tatou] Faaola i le aiga o le tagata.”1
E le mafai ona amata ona ou faailoa atu ia te outou le loloto o le aafiaga na faamautuina e nei vaaiga i lo’u agaga. Na ou lagonaina lo latou uiga faavavau ma iloa ai e “leai se mea e tasi i le ata atoa o le faaolataga e faatusatusa i se isi lava tulaga i le taua o lena mea matua silisili ona maoae na tupu, o le taulaga togiola a lo tatou Alii. O le mea e tasi e sili ona taua ua tupu i le talafaasolopito atoa o mea ua foafoaina; o le faavae mautu lea o loo faavae ai le talalelei ma isi mea uma lava,”2 e pei ona folafolaina mai.
Na aoao e Tama Liae lona atalii o Iakopo ma i tatou i aso nei:
“O lea, e oo mai ai le togiola talu le Mesia Paia; aua ua tumu o ia i le alofa tunoa ma le upu moni.
“Faauta, e avae o ia e ia lava e fai ma taulaga ona o agasala, e faaatoatoa ai iuga o le tulafono ia te i latou uma o e o i ai le loto momomo ma le agaga salamo, a e leai se tasi e mafaia ona faaatoatoaina ai iuga o le tulafono.
“O lea, e sili ai le aoga o le faailoa atu o ia mea i tagata o le lalolagi, ina ia iloa e i latou e le mafai ona nonofo faatasi tagata ma le Atua, sei iloga o le taui ma le alofa mutimutivale ma le alofa tunoa o le Mesia Paia, o Le ua avatu lona soifua i la le tino ma toe maua i le mana o le Agaga, ina ia faataunuu e ia le toe tu mai nai e ua oti, ina ua muamua i e toe tu mai.
“O le mea lea, e avea ai o ia ma faapolopolo i le Atua, ona ua fautua o ia mo le fanauga uma a tagata, ma i latou o e faatuatua ia te ia, e faaolaina i latou” (2 Nifae 2:6–9).
O lo tatou aafiaga faatapuaiga sili ona taua i le sauniga faamanatuga o le sauniga paia o le faamanatuga, aua e maua ai le avanoa e tulimatai atu ai o tatou mafaufau ma loto i le Faaola ma Lana taulaga.
Na lapataia e le Aposetolo o Paulo le Au Paia anamua i le aai i lenei areto ma le inu i lenei ipu a le Alii ma le faaletatau (tagai 1 Korinito 11:27–30).
Na aoao atu lo tatou Faaola Lava Ia ia sa Nifae, “Aua ai se ai ma inu i lo’u tino ma lo’u toto ma le faaletatau [e aumaia] le faasala i lona agaga ” (3 Nifae 18:29).
O e fetagofi ma le tatau i le faamanatuga ua lotogatasi ma le Alii ma tuuina atu i latou lava i lalo o le feagaiga faatasi ma Ia ina ia manatua pea Lana taulaga mo agasala a le lalolagi, e ave i o latou luga le suafa o Keriso, ma ia manatua pea o Ia, ma ia tausi i Ana poloaiga. Na osifeagaiga le Faaola e faapea o i tatou o e faia faapea, o le a maua Lona Agaga e faatasi ma i tatou, ma afai e faamaoni seia oo i le iuga, e mafai ona tatou maua le ola e faavavau.
Na faaalia atu e lo tatou Alii ia Iosefa Samita e faapea “e leai se tasi mea foai fua e sili atu i lo le mea foai fua o le faaolataga” (MFF 6:13), o lea fuafuaga e aofia ai i le sauniga o le faamanatuga o se faamanatu faifaipea o le taulaga togiola a le Faaola. Na ia tuuina mai aoaoga e faapea “e tatau ona potopoto soo le ekalesia e fetagofi i le areto ma le uaina i le faamanatuga o le Alii o Iesu” (MFF 20:75).
E oo mai le tino ola pea ia i tatou uma o se meaalofa foai fua e ala i le alofa tunoa o le Atua lava ia, e aunoa ma ni galuega o le amiotonu. Ae peitai, o le ola e faavavau, o le taui o le usiusitai i tulafono ma sauniga o Lana talalelei.
Ou te molimau atu ia te outou uma e tali mai lo tatou Tama Faalelagi i a tatou olega amiotonu. O le malamalama faaopoopo lea ua oo mai ia te a’u ua na aumaia se aafiaga maoae i lo’u olaga. O le meaalofa o le Agaga Paia o se meatotino taua ma e tatalaina ai faitotoa i lo tatou malamalama faifai pea e uiga i le Atua ma le olioli faavavau.
Mai se lauga i le konafesi aoao ia Oketopa 1989; faafouina mataitusi tetele ma faailoga.