Faamamaluina le Aufaipese a le Tapeneko i le Taui a le Tina ia Terisa

Na saunoa Tina Terisa lea ua maliu e faapea, “Ua le gata ina galala le lalolagi mo meaai, ae faapena foi i le matagofie.” O Novema 2006, na tauaaoina ai e le Aufaipese a le Tapeneko se taui na faaigoa ia te ia [Tina Terisa], e talisapaia ai “taumafaiga a i latou e faamatagofieina le lalolagi, aemaise lava i tapuaiga, faamasinoga faalauaitele, ma faatufugaga.”

“Na o le pau lenei o le aufaipese ua pai atu i le lalolagi atoa i lona matagofie,” o le tala lea a Dan Paulos, o le faatonu o le St. Bernadette Institute of Sacred Art, lea na tauaaoina atu le Taui a Tina Terisa. “E tele lava aufaipese o loo i ai, ae leai se aufaipese e sili atu ona mataina. O se meaalofa a le Atua, ma e tatau ona faasoa atu i le lalolagi.”

Na faamamaluina tagata o le aufaipese i se sauniga faatauvaa i le maea ai o le faasalalauga faalevaiaso o Musika ma Afioga Tulei i le Aso Sa, 19 Novema, 2006. O le Faifeau o Joseph Mayor, o le Faafeagaiga o le Falesa o Madeline, na tauaaoina atu le taui ia Mac Christensen, o le peresitene o le aufaipese, ma Craig Jessop, o le taitai musika, o e na taliaina e fai ma sui o le aufaipese.

“Ua faamamaluina lava i matou i le mauaina o lenei taui e fai ma sui o volenitia uma lava o le matou aufaipese. E faamamaluina foi i matou i le manatuaina lea e ala i se taui ua faaigoaina i lenei tamaitai amioatua, o Tina Terisa,” o le tala lea a Scott L. Barrick, o le pule sili o le aufaipese.

Na faatuina e le faalapotopotoga le polokalama o taui ina ia “faailoa tonu ai ia ausiga faaleagaga i lenei lalolagi faaletino.”

O le faatagata o se faatusa i ona po nei o Tina Teresa. O i latou e mauaina le taui faatuina e tagata lautele ae filifilia e le Aufono o Faatonu o Taui o Tina Teresa.

O le aufaipese o tagata volenitia uma e aofia ai alii ma tamaitai e 350 e eseese uma siosiomaga, galuega, ma le matutua. Ua lauiloa le aufaipese i le lalolagi atoa e ala i le tele o polokalama na pueina, malaga taamilo, ma faasalalauga faalevaiaso i le televise ma le leitio.

O i latou na mauaina muamua lea faamamaluga i le taui e aofia ai Pope Ioane Paulo II, Maya Angelou, Nelson Mandela, ma Jimmy Carter.