Savali a le Au Peresitene Sili
Faaoaina o Lau Faaipoipoga
I le tele o tausaga talu ai a o ou galue faaloia, na talanoa mai ai ia te a’u se tamaitai o le na manao e tete’a ma lana tane ona o ni mafuaaga, i lo’u manatu, na talafeagai. Ina ua maea ona tatala le faaipoipoga, ou te lei toe vaai lava ia te ia mo le tele o tausaga. I se ma feiloaiga faafuasei i le auala, na ou matauina ai faailoga o le tele o tausaga o le tuua toatasi ma le lotovaivai lea na iloa lelei i ona foliga lalelei na i ai i aso ua te’a.
Ina ua maea a ma faafeiloaiga, sa vave ona ia faapea mai, sa le tele ni mea lelei ma tauia o le olaga mo ia, ma ua lelava foi faafeagai toatasi ma le tauiviga. Ona ia faateia lea o a’u i lona faapea mai, “E ui lava i tulaga faaletonu na i ai, ae ana faapea ou te toe foi i tua e toe amata mai, ma ana ou iloaina i lena taimi mea ua ou iloa nei, semanu ou te le sailia le tete’aga. Ua sili atu ona leaga lenei [tulaga ua ou i ai].”
O le faitauga faafuainumera, e faigata ona aloese mai le tete’a. Ua valoia e le au atamamai e faapea, e tusa o le afa o tamaitai i le Iunaite Setete o le a faamutaina a latou faaipoipoga i se taimi o o latou olaga. O loo faateleina foi le tatala o faaipoipoga i le tele o isi atunuu. A le faaitiitia le televave o le faateleina o tete’aga i le taimi lenei, o le a faateleina pea faaipoipoga o le a i’u leaga i le faanoanoa.
O tulaga e seasea ona tupu mai na o le pau lea o le taimi e mafai ai ona faamaonia tete’aga. I lo’u manatu, o “mafuaaga tonu” mo se tete’aga ia le o se mea e itiiti lona ogaoga nai lo se mafutaga faaumiumi ma e manino lava e le mafai ona toe togafitia, ma e faatamaia ai le tulaga mamalu o se tagata i le avea ai ma se tagata soifua. O le tete’a e masani ona faaleagaina ai olaga o tagata ma faaumatia ai le fiafia faaleaiga. E masani lava i se tete’aga e sili atu mea e aveesea mai tagata nai lo mea latou te maua.
O le aafiaga tiga lea e oo i ai se tasi i le tete’aga e foliga mai e le malamalama lelei i ai ma atonu foi e le taliagofie lelei. E moni lava, e sili atu ona manaomia le faaali atu o le tigaalofa ma le agaga malamalama i e ua aafia i lenei mafatiaga matautia ma ua le mafai ai ona toe suia [o latou olaga] i le tulaga sa latou i ai. Ae mo i latou o e ua tete’a, o loo tele pea mea e mafai ona faamoemoe i ai i le faataunuuina ma le fiafia i le olaga, ae maise lava i le faagaloina lea o le tagata lava ia ae tuuina atu le auaunaga i isi.
Fesili Faigata
Aisea e matua maaleale ai ma puupuu le fiafia o faaipoipoga mo isi ae matua tele lava mo isi? Aisea e matua umi ai le taunuuga o le lototiga ma mafatiaga, ma toatele tagata taumamaina e aafia ai?
O a elemene faatamaoaiga o loo misi mai le tele o faaipoipoga na faapea ona amataina i le fiafia tele ma le anoano o faamoemoega maualuluga?
Ua leva ona ou mafaufau loloto i nei fesili faigata. Toeitiiti o le taimi atoa o le olaga o ou taulimaina aafiaga o tagata, ua i ai sina ou masani i faafitauli o faaipoipoga le fiafia, o tete’aga, ma aiga loto nutimomoia. E mafai foi ona ou tautala e uiga i le fiafia sili aua, faafetai i la’u pele o Ruta, ua ou maua ai i le faaipoipoga le faataunuuga sili ona faaoaina i le olaga o le tagata.
Mafuaaga o Tete’aga
E leai ni tali faatauvaa ma faigofie i fesili luitauina ma faigata e uiga i le fiafia i faaipoipoga. Faatasi ai ma le tele o mafuaaga ua talitonuina mo tete’aga o faafitauli ogaoga ia o le manatu faapito, manatu faatamaitiiti, leai o se tautinoga, le lelei o le fesootaiga, ma le le faamaoni.
I o’u aafiaga o loo i ai se isi mafuaaga mo le toilalo o faaipoipoga lea e foliga e le iloa lelei atu, ae e muamua atu ma o se vaega o isi mafuaaga uma. O le leai o se faaoaina faifaipea o le faaipoipoga, o le le i ai lea o lena mea faaopoopo lea e mafua ai ona pele, faapitoa, ma matagofie ma a aunoa ma lea, e avea le faaipoipoga ma avega mamafa pe faigata pe oo lava ina matua le manaia.
Faaoaina o se Faaipoipoga
Atonu e te manatu, “E faapefea ona faaoaina pea lava pea se faaipoipoga?” Tatou te fausia a tatou faaipoipoga i se faigauo e le muta, talitonuga, ma le amio sao ma faapea foi i le galue mo, ma le lagolagoina e le tasi o le isi i o tatou faigata. Na saunoa Atamu e faatatau ia Eva, e faapea, “O le ivi lava lenei o o’u ivi, ma le aano o o’u aano” (Kenese 2:23). O loo i ai ni nai fesili faigofie ma taua e tatau ona fesiligia faamaoni e tagata taitoatasi ua faaipoipo pe o loo faamoemoe i se faaipoipoga, i se taumafaiga e avea ma “tino e tasi.” O nei fesili o:
Muamua, e mafai ea ona ou mafaufau muamua i le manuia o la’u faaipoipoga ma lou toalua ae ou te lei mafaufau i o’u lava manaoga?
Lona lua, o le a le loloto o la’u tautinoga i la’u soa, e ese mai i isi mea ou te fiafia i ai?
Lona tolu, po o ia ea o la’u uo sili?
Lona fa, e i ai ea so’u faaaloalo mo le tulaga paia o lo’u toalua o se tagata faapelepele ma taua?
Lona lima, ma te finau ea i tupe? O le tupe lava ia, e le mo le faafiafiaina o se ulugalii, pe o le leai [o se tupe] e faafaanoanoa ai i laua. O se finauga e uiga i tupe o se faailoga masani lea o le manatu faapito.
Lona ono, o i ai ea se fusi mama faaleagaga i lo ma va?
Fausiaina o Alalaupapa o le Faaoaina
O ni nai faiga masani taua e mafai ona saofaga i le faaoaina o se faaipoipoga.
Tatalo. O mafutaga faafaaipoipoga e mafai ona faaoaina e ala i fesootaiga e sili ona lelei. O se tasi o auala o le tatalo faatasi. O lenei mea o le a foia ai le tele o feeseeseaiga, pe afai e i ai, i le va o le ulugalii a o lei momoe i laua. Ou te le manatu ina e soona faamamafa feeseeseaiga, ae o ni tulaga moni ma e tulaga ese ai foi mea uma. Ou te talitonu o o tatou feeseeseaiga o ni luutaga laiti o le masima lea e mafai ona faamanaia ai le tofo o le faaipoipoga.
Tatou te fesootai i le faitau afe o auala, e pei o se ataata, o le pai atu i le lauulu, o se pa’i malu atu. E tatau ona tatou manatua i aso uma e faapea atu, “Ou te alofa ia te oe.” O le tane e tatau ona faapea atu i lana ava, “E ese lou lalelei.” O nisi upu taua mo le tane ma le ava e faia, pe a talafeagai ai o le, “Ou te faamalie atu.” O le faalogo o se tasi foi o ituaiga fesootaiga sili atu ona lelei.
Faatuatuaga. O le faatuatuaina atoa e le tasi o le isi, o se tasi lea o vaega sili ona faaoaina ai se faaipoipoga. E leai se mea na te faaleagaina le faavae o le faatuatuaga autasi e manaomia e faatumauina ai se mafutaga faamalieina e pei o le le faamaoni. E matua leai lava se mafuaaga tatau mo le mulilua. E ui lava la i lenei aafiaga faatamai, e i ai lava taimi e laveaiina ai faaipoipoga ma faasaoina ai aiga. Ina ia faia lenei tulaga e manaomia ai le tagata na faatiga e le isi ina ia mafai ona tuuina atu le alofa le faatuaoia ia sili atu e mafai ai ona faamagalo ma faagalo. E manaomia ai le tagata na sese ina ia matuai naunau e salamo ma ia lafoai moni le leaga.
O lo tatou faamaoni i a tatou soa e faavavau e le tatau ona avea na o le faaletino, ae o le mafaufau foi ma le faaleagaga. Talu ai e leai ni faiga faatosina e lelei ma e leai foi se nofoaga mo le fuā pe a mae’a ona faaipoipo, e sili ai lava le aloese mai foliga o le tiapolo e ala lea i le tetee atu i soo se ituaiga fesootaiga masalomia ma se isi tagata tatou te le o faaipoipo i ai.
Amio Mama. O le amio mama o le vaega lena e fusia ai le faaipoipoga. Na fetalai mai le Alii, “Ia e alofa atu i lau ava ma lou loto atoa, ma pipii atu ia te ia a e le o se isi” (MFF 42:22).
Mafutaga faalelagi. Mai mea uma e mafai ona faamanuiaina ai faaipoipoga, o loo i ai se elemene faaoaina faapitoa e sili i lo mea uma, o le a fesoasoani e faatasia ai se alii ma se tamaitai i se lagona faaleagaga moni, ma paia. O le i ai lea o le mafutaga faalelagi i le faaipoipoga. Na faapea mai Shakespeare, e ala ia Masiofo Isapela i le tala o le King Henry the Fifth, “O le Atua, o le faifaaipoipoga sili o faaipoipoga uma, / E fusia faatasi o oulua loto ia tasi” (vaega 5, vaaiga 2, laina 67–68). O le Atua foi o le tausi faaipoipoga sili.
E tele mea e fesoasoani i le faaoaina o se faaipoipoga, ae o nisi e foliga e le taua i le mafutaga. O le i ai o le mafutaga faalesoa ma le fiafia i fua o se mafutaga paia faalelagi e avea ma totonugalemu o le fiafia sili i le faaipoipoga. O le lotogatasi faaleagaga o le taula lea. O faafitauli faaleagaga laiti i le tulaga paia o le faaipoipoga e masani ona avea ma mafuaaga e faaletonu ai faaipoipoga.
Ou te talitonu ua faateleina tete’aga ona o le tele lava o tulaga, e le o maua e faaipoipoga na faamanuiaga faapaiaina ia e oo mai i le tausia o poloaiga a le Atua. E mafai ona toilalo se faaipoipoga ona o le leai o se tausiga faaleagaga.
Sefuluai. Na ou aoao mai le toeitiiti 20 tausaga o avea au ma se epikopo ma se peresitene o le siteki e faapea, o se auala sili e aloese ai mai le tete’aga o le totogiina lea o le sefuluai. O le totogiina o le sefuluai e foliga e fesoasoani i le faatumauina o lo tatou tulaga faaleagaga ina ia mafai ona taulimaina le taimi tatou te vaivai ai faaleagaga.
E leai se musika e sili atu pe maoae e mafai ona faatupuina pea le lotogatasi o se alofa maoae. O le musika aupito sili ona lelei o se tuufaatasiga lea o leo e lua i se pese faaleagaga se tasi. O le faaipoipoga o le auala ua saunia e le Atua mo le faataunuuina o tulaga manaomia silisili faaletagata, e faavaeina i le faaaloalo autasi, faatagata matua, le manatu faapito, amiolelei, tautinoga, ma le faamaoni. O le fiafia i le faaipoipoga ma le avea ma matua e sili faaafe atu nai lo se isi lava fiafiaga.
Avea ma Matua. O le faavae o le faaipoipoga e sili ona faaoaina ma o le faagasologa faaleagaga o le tuputupu ae e faamalosia tele pe a avea se ulugalii ma ni matua. Mo ulugalii e mafai ona maua fanau, o le avea ma matua e tatau ona aumaia ai le fiafia sili. E tuputupu ae alii aua o le avea ai ma tama e tatau ona latou tausia o latou aiga. E tuputupu ae tamaitai aua o le avea ai ma tina e tatau ai ona faagalo i latou lava. Tatou te malamalama lelei i le uiga atoa o le alofa pe a avea i tatou ma matua. Ae peitai, a le oo mai ni fanau, o ulugalii o e, e ui i lea tulaga ua saunia e mauaina i latou i le alofa o le a faamamaluina ma faamanuiaina e le Alii mo lo latou faamaoni. O o tatou aiga e tatau ona avea ma nofoaga i le lalolagi e sili ona paia.
I le faaoaina o le faaipoipoga, o mea tetele o mea laiti ia. E tatau ona i ai le agaga talisapaia faifaipea e le tasi mo le isi ma le faatinoina i le agaga magafagafa o le agaga faafetai. E tatau i se ulugalii ona faamalosiau ma fesoasoani le tasi i le isi ia alualu i luma. O le faaipoipoga o se tausinioga aufaatasi mo le lelei, matagofie, ma le faaleatua.
Na fetalai mai le Faaola, “Faauta, ou te tu atu i le puipui ma tuitui atu: ai se tasi e faalogo mai i lo’u leo, ma tatala mai le puipui, ou te ulufale atu ia te ia, ma te talisua foi ma ia, o ia foi ma a’u” (Faaaliga 3:20).
Tau ina ia avea le faatasi mai o le Atua e faaoaina ma faamanuiaina ai faaipoipoga uma ma aiga, aemaise lava i latou o Lana Au Paia, o se vaega o Lana fuafuaga e faavavau.
Manatu mo faiaoga o aiga
A uma ona suesue ma le agaga tatalo lenei savali, ona fetufaai atu lea e faaaoga ai se metotia e uunaia ai le auai o tagata o loo e aoaoina. O ni nai faataitaiga nei:
-
Mili ni kelei lanueseese se lua i ni polo. Faamatala atu o lanu taitasi ua faatusaina i se paaga faaipoipo. Mili faatasi polo e lua ia avea ma se polo e tasi. Fai atu i se tasi o le aiga e taumafai e tuueseese lanu e lua. Ia talanoaina fesili e ono a Peresitene Faust e tatau i se tagata ona fesili ai pe a faaipoipo po o faamoemoe foi e faaipoipo. Molimau atu e uiga i le taua o le lotogatasi i le faaipoipoga.
-
Valaaulia le aiga e tutu i se lio. Ia avea tagata taitoatasi ma se ki o faiga masani o le faaoaina o le faaipoipoga. A o outou talanoaina le faiga masani ua faatusa i ai i latou, ia lave o latou lima pe uulima ma le tagata i o latou tafatafa. Faamatala atu e motusia le sooga pe afai o le a aveesea se tasi o le aiga mai le lio. Molimau atu i le taua o le faatumauina o le malosi o faaipoipoga.
-
Aumai se fagumasima. Faamatala le auala e faamanaia ai e le masima le tofo o meaai. Faitau le fuaiupu lea e faatusatusa ai e Peresitene Faust ia eseesega o se faaipoipoga i nai luutaga o le masima, ma ia talanoaina auala e faaleleia ai eseesega i faaipoipoga. Afai o loo aoaoina se ulugalii faaipoipo, fesili atu i ai po o a ni mea ua la faia e faateleina ai le talisapaia e le tasi o le isi.