Manatu Faaopoopo mo Taimi o Fetufaaiga, Aperila 2007

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Aperila 2007. Mo le lesona, faatonuga, ma le gaoioiga e o faatasi ma nei manatu, tagai i le “O Loo Soifua o Ia!” i itulau U4 ma le U5 i le vaega o tamaiti o le lomiga lenei.

Tusi le upu sese i luga o le laupapa. Tau atu i tamaiti a latou salamo, latou te suia le sese i le sao. Fai atu i tamaiti e fesoasoani ia te oe e sui le upu sese i le upu sao, e ala i le sueina po o le a le mea e mafai ona latou faia e salamo ai. Faaaoga ni tulaga faatusa e aoao ai se tolu (tagai “Tulaga Faatusa e Aoao Ai,” O Le Aoao Atu e Leai se Isi Valaauga e Sili Ai [1999], 170) e tuu atu ai ni tulaga lea e manaomia ai e tamaiti ona salamo. A uma le tulaga faatusa e aoao ai muamua, usu se pese po o se viiga e faatatau i le salamo, ma faamatala atu o le salamo o le mataupu faavae lona lua lea o le talalelei. A uma le tulaga faatusa e aoao ai lona lua, usu se pese po o se viiga e uiga i le salamo. A uma le tulaga faatusa e aoao ai lona tolu, usu se pese po o se viiga e uiga i le faamagalo atu ma faamatala atu e manaomia ona tatou faamagalo atu i isi o e ua salamo. Tape ese le upu sese mai le laupapa, ma tusi ai le upu sao. Faitau mai le O Ou Tulaga FaaTalalelei, “O le a ou filifili le mea sao. Ou te iloa e mafai ona ou salamo pe a ou sese.” Tuu atu lau molimau e uiga i le salamo ma le Togiola a Iesu Keriso.
Ia faamatala atu o lo tatou perofeta soifua na te umiaina uma ki o le perisitua ma le pule i le Ekalesia i aso nei. Tuu i luga se ata o le perofeta. Ae ia faamatala atu, na te taitaia le Ekalesia i lalo o le taitaiga a se isi tagata. Fesili atu i tamaiti po o ai lena tagata (Iesu Keriso). Tuu i luga se ata o Iesu Keriso, ma tuu i luga ae o le ata o le perofeta, e tau mai ai o le perofeta e galuega i lalo o Lana taitaiga. Faaali atu i tamaiti le lomiga o le Liahona aupito lata mai nei o le konafesi. Ia faamalamalama atu, a saunoa mai lo tatou perofeta ia i tatou i le konafesi aoao, o loo ia aoaoina mai i tatou i mea e finagalo Iesu Keriso ia tatou faalogo ma fai. Ia filifili ma le totoa ni fuaiupu se fa mai le savali aupito lata mai nei a le perofeta, ma ia valaaulia tamaiti matutua e faitau i ai. Lisi ni mea se fa e mafai ona fai e tamaiti e mulimuli ai i upu a le perofeta. Mo se faataitaiga, atonu e te lisiina le “totogi le sefuluai,” “ia sili atu ona faamagalo atu,” po o le “faitau tusitusiga paia.” Ia valaaulia tamaiti e tusi se ata o se tasi o manatu latou te mananao e galulue i ai ina ia mulimuli lelei ai i le perofeta (tagai “Gaoioiga Tusiata,” O Le Aoao Atu, E Leai se Isi Valaauga e Sili Ai, 175–76). Filifili se pese po o se viiga e o faatasi ma mataupu faavae taitasi lea na saunoa ai le perofeta lata mai nei. Ia valaaulia tamaiti na tusia ata o le mataupu faavae faapitoa e tu i luma o le potu ma uu i luga a latou ata, a o usuina e le Peraimeri lena pese. Tuu atu lau molimau e uiga i le taua o le perisitua.
Aoaoina o le pese: “O Se Agelu Na Oo Mai Ia Iosefa Samita” (i le lomiga lenei, i. U13). A o lei aoaoina le pese lenei, faataitai le taimiina o le fati tulaga ese. E sui le taimiga mai le 3/4 i le 2/4 mo le pao e tasi i laina taitasi.

Faapipii ia upu nei i soo se faasologa—“Moronae,” “Mauga o Kumora,” “Sa Nifae,” ma le “Tusi a Mamona.” Tau atu i tamaiti o lenei pese e faatatau i nei mea e fa. Fai atu ia i latou e fesoasoani atu ia te oe e tuu ia upu i le faasologa o loo i ai i le pese. Usu le pese mo i latou, ona fesili atu lea po o le fea le upu e tatau ona muamua. Talu ai o le fasifuaitau muamua o le “na oo mai se agelu ia Iosefa Samita,” o le upu sao o le “Moronae.” Tuu atu i tamaiti tou te usu faatasi i le fasifuaitau lena. Toe usu faatolu le pese, ma tuu ai upu i na taimi taitasi. Ia tau atu na aumai e Iosefa Samita ia papatusi auro mai le Mauga o Kumora, ma o papatusi o se faamaumauga a sa Nifae, ma o le tusi faapelepele, ma paia o le Tusi a Mamona. Talu ai ona e puupuu le pese, usu uma le pese i taimi uma e te fesili atu ai. O le a fesoasoani lenei mea i tamaiti e masani ai i upu ma le fati manaia. Ia uunai tamaiti e faamatala le tala o le Tusi a Mamona i o latou aiga e ala i le usuina o lenei pese. Tuu atu le molimau o le tala o loo faamatalaina i le pese e moni.