Uo i le Uo
O Uunaiga a se Tina
“Aua foi e te tuulafoaiina le upu a lou tina” (Faataoto 1:8).
O lo’u tina o se tamaitai faapitoa. O a’u o le ulumatua o tama e toavalu, ma o’u tuafafine e toafitu. Faatasi ai ma se aiga toatele, na i ai tiutetauave e tele o lo’u tina. O le mea sili na faia e lo’u tina mo i matou o lona papatiso lea i Le Ekalesia a Iesu Keriso o le Au Paia o Aso e Gata Ai. Na ia tuuina mai le avanoa matou te aoao ai e uiga i le talalelei. O lenei avanoa na suia ai o matou olaga.
Ou te manatua le aso na matou taliaina ai faifeautalai. E tusa o le 10 pe 11 o’u tausaga. Na faasoa mai ai e faifeautalai se savali e uiga i le Uluai Faaaliga. Na faalogo loa i ai lo’u tina, na liua ai lava o ia. Na talitonu o ia na vaai Iosefa Samita i le Tama ma le Alo.
Na amata ona matou auai i le lotu. Ou te lei manao e taliaina le talalelei i le amataga, ae na uunaia a’u e faifeautalai ou te suesue auiliili i ai ma iloa ai. Ina ua ou faia lea mea, na matuai ou fiafia i ai. Ou te matua faafetai mo lo’u tina. Na maua lava e ia se molimau i le asiasiga muamua a faifeautalai. Mai lona papatisoga seia oo mai i le aso, e lei misi lava ona auai i sauniga a le Ekalesia.
Na matua maoae le lagolago a lo’u tina ia i matou. Na faamama e ia o matou ofutino papae i aso Toonai ina ia saunia e faaaoga i Aso Sa. Matou te faaiilaina o matou seevae ma seevae o o matou uso ma tuafafine laiti. Na matou nonofo i se vaiaai matitiva i Guatemala, ma na toē o matou tuaoi ia i matou i Aso Sa pe a ofu o matou ofu papae ma fusiua i le lotu.
Na faamalosiau mai lava lo matou tina ia i matou i taimi uma e fai le mea tonu. Ona o lana uunaiga, na matou matua toaaga ai i le Lotu. Na ou manatua se tasi taimi, na avea ai lo’u tama ma peresitene o le Aoga Sa, avea lo’u tuafafine matua ma peresitene o le Peraimeri, avea lo’u tina ma peresitene o le Aualofa, ae toafa o o’u uso na tufa, saunia, ma faamanuiaina le faamanatuga.
Ona o o matou manaoga tautupe, na faamoemoe ai lo’u tama ou te fesoasoani e saili tupe mo le aiga. Na ou manao e faia se misiona, ae ina ua 19 o’u tausaga, na fai mai o ia ou te faatali mo se tausaga e fai ai la’u misiona ina ia faaauau pea ona ou galue e fesoasoani i lo’u aiga. Ina ua 20 o’u tausaga, na toe fai mai foi ou te faatali mo se isi tausaga.
Ae ua toeitiiti lava atoa lo’u 21, na manao o ia e talosaga mai ou te faatali mo se isi tausaga. Ae na fai i ai lo’u tina, “Tuu o ia e alu e auauna, ma o le a faamanuiaina i tatou.” O le mea tonu lava lea na tupu. A o lei amataina la’u misiona, na o ma’ua ma so’u uso e laitiiti ifo na faigaluega e tausi le aiga. Na ou alu loa i la’u misiona, na amata ona faigaluega isi o’u uso e toatolu ma o’u tuafafine matutua, o lea la na sili atu ai le tulaga tautupe o lo’u aiga.
O faamanuiaga ma valaauga uma lava ua ou mauaina i le Ekalesia ua taitaia a’u e saafi atili ai i lo’u tina. I vaega uma lava o lo’u olaga, ou te manatuaina ana uunaiga ma faataitaiga sili ona maoae. Sa na o se faavae faaleaoaoga lava na maua e lo’u tina, ae o lona malamalama i upumoni o le talalelei ma lona poto faatino ma lona malamalamaaga o le olaga na matua sili ona maoae.
Na fiafia lo’u olaga tuputupu a’e aua na i ai lo’u tina i le fale i taimi uma e tausia a’u. Na fiafia o ia e tausua, ma e maua e ia i taimi uma auala e faia ai ni mea malie. Na faaalu e ia le tele ma tele o itula e faasoa mai ia i matou tala e uiga i lona tuputupu a’e ma e uiga i lo’u tina matua ma ona uso ma ona tuagane ma la latou mafutaga.
Ou te talitonu i le poloaiga ia ava i o tatou matua. O mea uma lava ou te faia, e oo lava i le aso, e mafua mai i le uunaiga a lo’u tina.