Upu ma le Upu

Sefuluai ma Isi Taulaga

E te manao e faia se eseesega i le lalolagi ae e te le iloa pe faapefea? O le tali e latalata atu e pei o lau teutusi sefuluai. O se vaaiga lenei i le auala e fesoasoani ai lau tupe e te tuuina i totonu o se tamai teutusi i le fausiaina o le malo o le Alii i le lalolagi atoa—faapea foi i totonu o lau lava uarota po o lau paranesi.

Igoa

Atonu e foliga e iloa lelei lava, ae ia mautinoa e faatumuina lenei laina ia tutusa i taimi uma taitasi. O le tulaga lena e le tau mateina ai e le failautusi a le uarota po o le paranesi po o K. Anderson ma Kim Anderson o le tagata lava e tasi.

Sefuluai

O lau 10 pasene e auina atu i le laumua o le Ekalesia i le Aai i Sate Leki, Iuta, o loo fuafua ai ma le faaeteete e taitai o le Ekalesia po o fea le mea e sili ona manaomia ai—atonu e fesoasoani e fausia ai se falelotu fou i se mea i le lalolagi.

Taulaga anapogi

I Aso Sa anapogi uma lava, e maua ai e le Au Paia o Aso e Gata Ai le avanoa e foai atu ai tupe o taulaga anapogi. Muamua, e faaaoga e le epikopo po o le peresitene o le paranesi lenei tupe e fesoasoani ai i tagata i totonu o la outou lava uarota po o paranesi o e manaomia tupe e faatau ai meaai pe totogi ai o latou fale. Ma, afai e i ai se tupe e totoe, ona faasolo atu lea o taulaga anapogi e fesoasoani ai i isi tagata le tagolima i isi eria.

Faifeautalai a le uarota

Foai i le vaega lea e fesoasoani ai e lagolago faifeautalai mai lau lava uarota po o le paranesi.

Faifeautalai lautele

Foai i le vaega lea e lagolago ai faifeautalai ma le galuega faafaifeautalai a le Ekalesia atoa.

Tusi a Mamona

Afai e te manao e fesoasoani e totogi mo kopi o le Tusi a Mamona, ia e mafai ona fesoasoani e faaliliu mai ai tagata i le lalolagi atoa, foai i le vaega lea.

Fesoasoani alofa

Soo se taimi lava e i ai se mafatiaga faanatura ogaoga i le lalolagi, ua i ai iina le Ekalesia, e fesoasoani e avatu sapalai mo faalavelave faafuasei. O le Tupe mo Fesoasoani Alofa e auina atu ai foi meaai i tagata o loo puapuagatia mai le le lava o meaai paleni ma le matelaina faapea pusa meaaoga mo tamaiti le tagolima. Mo se faataitaiga, na fesoasoani i se taimi lata mai nei le Tupe o Fesoasoani Alofa e faia tui puipui o le miliona o tamaiti Aferika e puipuia ai mai le misela.

Fausiaina o malumalu

Afai e te fia fesoasoani i le fausiaina o malumalu i le lalolagi atoa, foai i le vaega lea.

Faaagaga mo aoga

I le tele o vaega o le lalolagi, o aoaoga i luga atu o le aoga maualuga e faigata ona maua e le toatele o le autalavou matutua a le Au Paia o Aso e Gata Ai. O le Tupe Faaagaga mo Aoga e tuuina atu ai nonogatupe mo aoga e fesoasoani ia maua ai se lumanai manuia mo tamaiti aoga mai le tele o atunuu.

Isi

E manaomia ona totogi pili mo tolauapiga a le Sikauti, tolauapiga a Tamaitai Talavou, po o se isi lava gaoioiga e lagolagoina e le Ekalesia? Tusi i lalo nei tupe i le vaega “Isi.” E ui lava o nei tupe e le o ni foai, o lenei vaega e mafai ai e taitai o le uarota po o le paranesi ona teu se faamaumauga o le tupe ma tuuina atu ia te oe se lisiti.

“Sa talatalanoa nisi o tamaloloa ma le Perofeta o Iosefa Samita i se tasi aso, ae oo atu le tala faapea ua susunuina le fale o se uso mativa… . Sa faaalia e tagata uma le faanoanoa mo le mea ua tupu. Na faalogo le Perofeta mo sina taimi, ona ‘tuu lea o lona lima i totonu o lana taga, ma toese i fafo le lima tala ma faapea atu, “Ou te alofa i lenei uso i le aofaiga e lima tala; o le a se tele o lo outou alofa uma mo ia?”’ … I le tausaga na tea nei e faitau miliona outou o e na tali atu i faanoanoaga o isi, e ala i mea ua outou maua, o loto alolofa, ma lima fesoasoani. Faafetai atu ia te outou mo le fuataga maoae o le loto foai.”

Epikopo H. David Burton, Epikopo Pulefaamalumalu, “Loto Alolofa ma Lima Fesoasoani,” Liahona, Me 2006, 8.