Taimi o Fetufaaiga

O Loo Soifua o Ia!

Saunia e Elizabeth Ricks

“A ua faapea lava ona alofa mai le Atua i le lalolagi, ua ia au mai ai lona Atalii pele e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16).

Na faiaoga Sister Nielson i le vasega Aveolela. Na ia tuuina i luga se ata o Iesu o loo faaali atu ai Ona manua ina ua mavae Lona toetu mai.

“O lona uiga na toe soifua o Ia ina ua mavae Lona maliu?” o le fesili lea a Heather.

Na tali mautinoa atu Jake, “Ioe, Ma o le a tatou toe ola foi!”

Na faapefea ona iloa e Jake e tolu tausaga na toetu Iesu? Na faapefea ona ia iloa e mafai foi ona toe ola o ia?

O vaiaso taitasi e faalogo ai Jake i lesona a Sister Nielson. Na ia aoao atu e uiga ia Iesu ma tuuina atu lana molimau. Na faalogo foi Jake i ona matua i taimi o afiafi faaleaiga ma isi taimi. Na laua aoao atu e uiga ia Iesu ma tuuina atu a la molimau e uiga ia te Ia. O le lagona i le loto o Jake na tau atu ia te ia e talitonu i upu a lona faiaoga ma ona matua.

Ina ua mavae le toetu o Iesu, na Ia faaali atu Ia lava i Ona soo. Sa le’i i ai Toma ma i latou. Na tau atu e isi soo ia Toma na latou vaai ia Iesu. Ae fai mai Toma, “Afai ou te le vaai atu i ona lima i mea na tutui ai fao, ma tuu lo’u lima i lona itu, ou te le talia lava” (Ioane 20:25).

O le valu o aso mulimuli ane na faaali atu ai e Iesu Ia lava ia Toma. Na tuu e Iesu Toma e tagotago i tulaga fao i Ona aao ma tuu lona lima i Lona itu. Ona fetalai atu lea o Iesu, “Toma, ua e talitonu aua ua e vaai mai ia te au: amuia o e le vaai mai, ae talitonu mai pea” (Ioane 20:29).

E pei o Jake, e mafai ona tatou talitonu ia Iesu e ui lava e le mafai ona tatou vaai ia te Ia. E tupu lo tatou faatuatua pe a tatou iloa, e aunoa ma le vaai, o Iesu o lo tatou Faaola.

Gaoioiga

Faapipii le itulau U4 i luga o se pepa malo, ona oti lea o ata o Iesu, Maria le Makatala, le Au Aposetolo, ma Toma. Gagau pito i laina motumotu ina ia mafai ona tu le ata. Faamatala i lou aiga le tala i le Ioane 20 o tagata taitoatasi na vaai i le Faaola ina ua mavae Lona Toetu.

Manatu mo Taimi o Fetufaaiga

1. Faaali atu ni pusa seevae se tolu. Ia auauai taitasi ona ave i fafo se pea seevae mai pusa taitasi. (E mafai foi ona e faaali atu ata o seevae.) Faaali se pea o seevae pa’u uumi e faailoa ai fitafita o e na leoleoina le tuugamau o Iesu. Faamatala le tala i se auala e mafai ai e tamaiti ona mafaufau o loo i ai i latou iina ina ua faataoto Iesu Keriso i le tuugamau. O le vaega e sosoo ai, faaaoga se pea o seevae nonoa e faamatala ai le tala ia Maria le Makatala. Fesili i tamaiti pe faamata o a ni lagona i le i ai i le tuugamau ae faaali mai le Faaola toetu. Mulimuli, faaali atu se pea seevae e masani ona seeina e tamaiti. Fesili atu po o a ni lagona i le avea ai ma tagata o le Ekalesia ma i ai le malamalamaaga o le a e toetu ona o le Togiola ma le Toetu o Iesu Keriso. Molimau atu na maliu ma toetu Iesu Keriso.
2. Ta’u i tamaiti o le a e fesili atu ia i latou se fesili faitogafiti. Fesili atu, “E toafia a tatou perofeta o i ai i le lalolagi i le taimi lenei?” Faamatala atu o uso taitasi o le Au Peresitene Sili ma le Korama a le Au Aposetolo e Toasefululua ua lagolagoina o se perofeta, tagata vaai, ma tali faaaliga. lona uiga la e 15 a tatou perofeta i le lalolagi! Ae peitai, ia faamatala atu o le Peresitene o le Ekalesia na o le pau lea o le tagata e mafai ona taliaina faaaliga mo le Ekalesia atoa. O se vaiaso a o lumanai le konafesi aoao, fai atu i ni tamaiti matutua e lipoti mai pe a uma le lua vaiaso ia se savali na tuuina mai e se Aposetolo i le konafesi aoao. Afai e mafai, ia faaali atu se ata o lena Aposetolo a o faamatala mai e tamaiti taitoatasi le savali.