Haere mai e faaroo i te reo o te hoê peropheta
E tae mai te oaoa i te po‘ipo‘i
E rave rahi mau matahiti i mairi a‘enei, ua nene‘i te mau ve‘a no te Oire no Roto Miti i te hoê parau faaite no te poheraa o te hoê hoa piri roa i te taime maitai o to’na nei oraraa. Ua haere atu vau i te fare hunaraa e ua amui atu i te naho‘a taata tei tairuru mai no te faaite i te aroha i te tane faaipoipo e te mau tamarii e metua vahine ore. Ua ite ta‘ue te tamarii hopea, o Kelly, ia‘u e ua tuu i to‘u rima i roto i to’na. Ua parau mai oia « A haere mai na muri ia‘u » e ua aratai oia ia‘u i te afata ma’i i reira te tino o to’na ra metua vahine here e tarava ra. Ua parau oia, « Aita vau e ta‘i nei, eiaha atoa oe. E rave rahi taime to to‘u mama parauraa mai no ni‘a i te pohe e te oraraa i pihaiho i te Metua i te Ao ra. No to‘u mama e to‘u papa vau. E amui faahou â matou » Ua puta maira te mau parau a te Salamo i roto i to‘u nei feruriraa : « Na roto i te vaha o te mau tamarii e te mau aiû… i faatupu na oe i te puai » (Salamo 8:2).
Ua ite au na roto i te mau mata tei rari i te roimata i te mata ataata nehenehe e tei î i te faaroo o to‘u nei hoa apî . No’na, ma to’na rima na‘ina‘i e tapea ra i to‘u nei rima, aita roa ïa e mahana ti‘aturiraa ore. Ma te turuhia e to’na iteraa papû aueue ore, e te iteraa e e tamau noa te oraraa i tera’tu pae o te menema, e nehenehe ta’na, ta to’na metua tane, to’na mau taeae, to’na mau tuahine e oia mau ta te mau taata atoa o tei mau i teie iteraa no te parau mau hanahana e parau i to te ao nei : « Ia tapae noa mai te oto i te ahiahi, e riro râ i te oaoa ia poipoi » (Salamo 30:5).
Ma te puai atoa o to‘u nei varua, te faaite papû nei au e te ora nei te Atua, e Ta’na Tamaiti Herehia o te oho matamua ïa no te Ti‘a-faahou-raa, e te evanelia a Iesu Mesia o taua mararamarama puai ïa o te faariro i te mau mahana oto ei poipoi oaoa.
Na roto mai i te hoê a‘oraa i te amuiraa rahi i te ava‘e Eperera 1976.
Te mau mea ia feruri
-
Aita e mea hape ia ta‘i ia pohe ana‘e te hoê taata tei herehia e tatou. Oia mau, e nehenehe te reira e tauturu. Aita râ o Kelly i hinaaro i te ta‘i. No teaha ?
-
I to outou feruriraa no teaha te mama o Kelly i parau pinepine ai ia Kelly no ni‘a i te oraraa i muri a‘e i te poheraa ?
-
Nahea Iesu i riro ai ei oho matamua no te Ti‘a-faahou-raa (a hi‘o 1 Korinetia 15:23 ; 2 Nephi 2:8–9) ?