Te ora atoa nei ta‘u tamaiti
Ua haapii mai te hoê vahine i roto i ta‘u nei paroita i te hoê haapiiraa faufaa rahi no ni‘a i te hau maitai e tae mai na roto mai i te hoê faaroo papû ia Iesu Mesia e i Ta’na ra Taraehara.
Ua fafau te haamaitairaa patereareha a teie vahine ia’na i te oaoaraa no te hoê metua vahine. E rave rahi râ mau matahiti tei mairi a pure e a ti‘a’i noa’i oia e ta’na ra tane faaipoipo no te mau tamarii ia tae mai. I te pae hopea, ua pahonohia ta raua mau pure. Ua î roa to raua nei oraraa i te faaineineraa oaoa i roto i na ava‘e e iva. Ua peni raua i te hoê piha taa ê ; ua hoo mai i te ro‘i, te mau ahu e te tahi atu tauihaa no te aiû ; e ua pûpû atu e rave rahi mau pure. Ua parau te taote eita roa’tu e noaa faahou ia’na te tahi atu aiû i muri a‘e i teie, no reira tei roto i teie nei tamarii to’na mau moemoearaa.
Ua tae i te mahana e fanau ai teie tuahine e ua faaroohia te ta‘i o ta’na aiû.
« E tamaiti iti nehenehe teie », ua parau maira te tuati ma’i.
Ua tapiri a‘era te metua vahine i to’na ra mata e ua pûpû ihora i te hoê pure haamauruuru. E maha minuti i muri iho, ua pohe te aiû.
Ua ite au ia’na i te pureraa oro‘a e piti hebedoma i muri mai. Ei vahine arata‘i himene, ua haere oia i mua i te fare pureraa e ua parahi ihora i to’na ra parahiraa i pihaiho i te hamonia. I raro a‘e i ta’na ra aratairaa ua himene matou « Ua ite Au te Ora nei To‘u Fatu » (Te mau Himene, no. 69). Ua ti‘a afaro e etaeta noa oia, ua anaana to’na hoho‘a mata, ua anaana to’na iteraa papû. I te tahi mau taime e mea fifi roa te mau parau i te haere mai no’na. Ua momi oia e ua tapiri oia i to’na ra utu. I muri iho ua faaea oia i te himene, aita râ to’na rima i faaeae i te hauti, no te arata‘i a himene ai matou.
I muri iho, ma te mau roimata e tahe ra na ni‘a i to’na na paparia, ua faaite teie nei tuahine i to’na iteraa papû na roto i teie mau parau ohie : « Ua ite au e te ora nei to‘u Faaora. Ua ite au e e taata ti‘a oia e te here nei Oia ia tatou. E no te mea te ora nei Oia, te ora atoa nei ta‘u tamaiti ».
Ua ite au i roto i to’na faaroo i te hoê haapapûraa no te oraraa mau o to tatou Faaora, e na ta’na Taraehara i noaa’i ia tatou te tahuti ore e te ora mure ore. Ua rave-ê-hia’tu ta’na ra tamaiti, ua ite râ oia e e faaho‘ihia mai oia ia’na ra i te hoê mahana.