Ua Faahanahanahia te Pŭpŭ Himene o te Fare Menemene i te Au‘a a Mama Teresa

I te hoê taime, ua parau Mama Teresa tei pohe e, « Ua pohe roa teie ao i te po‘ia eiaha râ no te maa noa area râ, i te heipuni o te fenua atoa hoi ». I te ava‘e Novema 2006 ra, ua faahanahanahia te Pŭpŭ Himene o te Fare Menemene i te hoê au‘a tei topahia te i‘oa i to’na hanahana, ma te faatura i « te mau ohipa tei ravehia e te feia o tei faanehenehe i te ao nei, te mau aua ihoa ra o te mau faaroo, te haavaraa totiare e te mau ohipa rima î ».

« Teie noa iho te pŭpŭ himene tei haaputapu i te ao atoa nei i to’na nehenehe »,o te parau ïa a Dan Paulos, ti‘a faatere no te Fare Haapiiraa St. Bernadette o tei pûpû mai i te Au‘a a Mama Teresa. « E mea rahi te mau pŭpŭ himene i roto i te ao nei area râ, aita hoê o ratou mai teie te tuiroo. E horo‘a teie na te Atua, e e mea ti‘a ia operehia i to te ao nei ».

Ua faahanahanahia te mau melo o te pŭpŭ himene i roto i te hoê oro‘a i muri mai i te haapurororaa hepetoma o te Pehe e te A‘oraa Parau i te Sabati 19 no Novema 2006. Na te Orometua o Joseph Mayor no te Fare Pureraa o Madeline i pûpû i teie nei au‘a ia Mac Christensen, peresideni no te pŭpŭ himene e ia Craig Jessop ti‘a faatere no te pehe o tei farii i te reira i te i‘oa o te pŭpŭ himene.

« Te farii popou atu nei matou i teie nei au‘a no te taato‘araa o te feia himene tamoni ore tei faatupu i ta matou nei pŭpŭ himene. Ua popou atoa matou i to matou faahanahana-raa-hia i te hoê au‘a tei topahia i te i‘oa o te hoê vahine mo‘a, o Mama Teresa », o te parau ïa a Scott L. Barrick ti‘a faatere rahi o te pŭpŭ himene.

Ua faarahi te fare haapiiraa i te talena o te au‘a « ia itehia te mau upooti‘araa o te pae varua i roto i teie ao viivii ».

E faahoho‘araa apî teie nei tii iti o Mama Teresa. Na te hoê huiraatira rahi i nomino i te feia tei rê e na te Tomiteraa o te mau Ti‘a Faatere o te Au‘a a Mama Teresa i maiti.

E 350 tane e vahine himene tamoni ore rau huru to ratou ti‘araa, to ratou mau toro‘a e to ratou mau matahiti. Ua parare e ua tui te roo o teie nei pŭpŭ himene na roto i ta’na mau haruharuraa e rave rahi, to’na mau tere faaati e na roto i te haapurororaa a te Afata teata e te mau ratio i te mau hepetoma atoa.

Te mau feia o tei faahanahanahia‘e nei o te Papa Ioane Paulo II, Maya Angelou, Nelson Mandela e o Jimmy Carter.