Te mau mana‘o tauturu no te pô utuafare

E nehenehe teie mau mana‘o e faaohipahia i roto i te piha haapiiraa e i roto atoa i te utuafare.

« Te Oro‘a—e te Tusia », api 10 : Ia tapiri te melo tata‘itahi o te utuafare i to’na na mata. A ani i te mau melo no te utuafare ia faahoho‘a i to ratou oro‘a bapetizoraa i roto i to ratou feruriraa, to ratou raveraa i te oro‘a, e te hoê hoho‘a no roto mai i te oraraa o te Faaora. Nahea teie nei mau oro‘a e tuati ai ? I muri a‘e i te faaiteraa eaha ta Elder David B. Haight i haapii a vai noa ai oia ma te ite ore i te mau mea e tupu nei, a ani i te mau melo no te utuafare ia tatara e nahea te oro‘a e tuati ai i te tusia a te Mesia. A tabula i te mau rave‘a no te haamana‘o i te Faaora ia rave ana‘e i te oro‘a.

« E toru na Parau Poro‘i i te Feia Apî Paari », api 26 : Ia nana‘o mai te mau melo no te utuafare i te hoê hoho‘a no to ratou mau oraraa e 20 matahiti i mua’tu. Ia faahoho‘a ratou i te reira e ia tuatapapa ratou i te mau mea ta ratou e ti‘aturi i te rave. A tai‘o i te a‘oraa a Elder Earl C. Tingey o te tauturu ia ratou ia opua no te oaoa.

« Te ti‘amaraa ia Ori », api 32 : A ani i te mau melo no te utuafare ia papa’i i te mau fâ ta ratou e hinaaro i te rave faaoti. A ani ia ratou ia faaite mai i te mau mana‘o e nahea i te faatupu i ta ratou mau hinaaro. A tai‘o e a tuatapapa i te mau maitiraa ta Mavi e rave ra no te faatupu i ta’na ra fâ. A haapapû e e mea faufaa rahi te mau huru e te mau ohipa parau-ti‘a no te faatupuraa i ta tatou mau fâ.

« Te mau haamaramarama no te ra‘i », api 40 : Ia afa‘i mai te mau melo no te utuafare i te mau tao‘a faufaa rahi no ratou e ia faaite mai no teaha ratou e haafaufaa ai i te reira. A faaite i te aamu no na vahine e maha i te fenua Inidia. Nahea ta tatou tuhaa ahuru e riro ai ei mea faufaa no te Fatu ? A faaite i te aamu no te haamo‘araahia te fare pureraa i te fenua Inidia. Nahea te mau taata e haamaitaihia’i na roto i te aufauraa i te tuhaa ahuru ? A imi e a tuatapapa i te mau fafauraa ta Elder H. Bryan Richards i rave no te aufau-tamau-noaraa i te tuhaa ahuru.

« Te hi‘oraa maitai o te hoê metua vahine » api H14 : A faaite i te hoê hoho‘a o te utuafare. A tuatapapa e nahea te hoê metua vahine e horo‘a ai i te arata‘iraa i te melo tata‘itahi no te utuafare. A faaite e nahea ta te metua vahine o Elder Carlos H. Amado arata‘iraa ia’na ia bapetizohia e ia tavini i te hoê tau misioni. Ia hamani te mau melo no te utuafare i te mau hoho‘a parau na to ratou metua vahine, ma te haamauruuru ia’na no to’na huru maitai i ni‘a ia ratou.