No teaha te Varua i parau mai ai ia‘u ?
I te tau ve‘ave‘a no te matahiti 1980, ua fatata vau i te hopea no ta‘u tau misioni i roto i te Misioni no Massuchetts Boston. I te hoê pô te vai nei ta maua hoê haapiiraa i te hoê piahi maitai mau no te fare haapiiraa teitei no ni‘a i te faanahoraa no te faaoraraa.
E rave rahi mau taime i roto i te haapiira, ua fatata vau i te ninahia a faaite tamau mai ai te Varua Maitai ia‘u e e parau mau te mau haapiiraa ta maua e haapii ra. Te haamana‘o nei au i te pure puairaa : « Ua ite a‘ena vau i te reira. Ua haapii au i teie haapiiraa e rave rahi mau taime i roto i na matahiti e piti i mairi a‘enei. Ua mauruuru vau i te iteraa i To oe Varua, a faaite atoa na i te reira i to matou nei mau hoa ! »
Te hoê taime poto noa i muri a‘e i taua pô ra, ua farerei au i to‘u peresideni misioni, e ua faaite mai oia ia‘u e ua pohe to‘u metua vahine i roto i te hoê ati pereoo uira. I te reira ihoa taime i te peeraa o te mau mana‘o i taua taime ra e ua horo‘ahia mai ia‘u te taime no te feruri- hohonu-raa, ua haamana‘o vau ma te papû maitai i te faaiteraa puai a te Varua ta‘u i farii i roto i taua haapiiraa ra no ni‘a i te faanahoraa no te faaoraraa. Ua ite au e ohipa teie a te hoê Metua here i te Ao ra no te faaineine ia‘u no te ere ta‘u e fatata i te farii.
Te mihi nei au i te mau mahana atoa i te haapiiraa e te hoaraa a to‘u metua vahine. Eita vau e vaiiho i te hoê mahana ma te ore vau e haamana‘o e nahea te hoê Metua here i te Ao i faaineine ai ia‘u no te ere o te tae mai.