Te Faaue e ua na ni‘a iho i te Faaue

Te tuhaa ahuru e te tahi atu mau ô

Te hinaaro ra i te faatupu i te hoê huru-ê-raa i te ao nei aita i ite e nahea ? E mea piri roa te pahonoraa mai te vehi rata no te tuhaa ahuru. Teie te hoê hi‘oraa e nahea te moni ta outou e tuu atu i roto i taua vehi rata na‘ina‘i ra e tauturu ai i te paturaa i te basileia a te Fatu na te ao taatoa nei—e i roto i to outou iho paroita aore râ amaa.

Te i‘oa

Ua ite ihoa ïa outou i te reira, a faaî i teie reni mai te reira te huru i te mau taime atoa. Ia ore te papa’i parau no ta outou paroita aore râ amaa ia imi haere noa mai te mea o K. Anderson e o Kim Anderson hoê ana‘e ïa taata.

Tuhaa ahuru

E haponohia ta outou ahururaa i te Pû Faatere o te Ekalesia i Roto Miti, Utah, i reira te feia faatere no te Ekalesia e faaoti maite ai i hea e hinaaro-mau-hia ai te reira—penei a‘e no te tauturu i te patu i te hoê fare pureraa apî i te tahi vahi i te ao nei.

Moni haapaeraa maa

I te mau Sabati haapaeraa maa atoa, e farii te Feia Mo‘a i te mau Mahana Hopea nei i te haamaitairaa ia horo‘a no te moni haapaeraa maa. A tahi, e faaohipa te episekopo aore râ te peresideni amaa i teie moni no te tauturu i te feia i roto i ta outou iho paroita aore râ amaa tei hinaaro i te moni no te hoo i te maa aore râ no te aufau i te tarahu fare. I muri iho, mai te mea e toe mai te moni, e horo‘ahia’i te moni haapaeraa maa no te tauturu i te feia nava’i ore i roto i te tahi atu mau fenua.

Misionare paroita

A horo‘a i ô nei no te tauturu i te tururaa i te mau misionare no to outou iho paroita aore râ amaa.

Misionare na te ao nei

A horo‘a i ô nei no te tururaa i te mau misionare e te ohipa misionare i te mau vahi atoa o te Ekalesia.

Buka a Moromona

Mai te mea ua hinaaro outou i te tauturu i te aufaaraa i te nene‘iraa i te mau Buka a Moromona, o te nehenehe e faafariu i te mau taata na te ao taatoa nei, a horo‘a i ô nei.

Tautururaa i te ao nei

Te mau taime atoa te vai nei te hoê ati rahi na te ao nei, tei reira te Ekalesia no te tautururaa i te horo‘a i te mau tauihaa rû. E haapono atoa te Afata Tautururaa i te ao nei i te maa na te mau taata e fifi nei i te pae maa e te pohe nei i te poia e te mau tauihaa haapiiraa no te mau tamarii nava’i ore. Ei hi‘oraa, ua tauturu iho nei te Afata Tautururaa i te ao nei no te patia e rave rahi mau milioni tamarii no Afirika no te paruru ia ratou i te ma’i puupuu.

Paturaa hiero

Mai te mea e hinaaro outou i te tauturu i te aufauraa i te paturaa i te mau hiero na te ao taatoa nei, a horo‘a i ô nei.

Haapiiraa tamau

I roto i te mau tuhaa e rave rahi o te ao nei, eita e noaa i te feia apî paari no te Ekalesia te hoê haapiiraa i muri a‘e i te haapiiraa tuatahi. E horo‘a te Afata no te Haapiiraa Tamau i te moni tarahu no te haapiiraa ia maitai a‘e te oraraa o te mau piha‘i i roto i te mau fenua e rave rahi.

Te tahi atu

Hinaaro i te aufau i te moni no te Puhaparaa a te mau Scout, te Puhaparaa a te Feia Apî Tamahine, aore râ te tahi ê atu faaoaoaraa na te Ekalesia ? A papa’i i teie mau moni i roto i te tuhaa « Te tahi atu ». Noa’tu e e ere teie mau afata e mau horo‘araa, e faatia teie afata i te mau faatere no te paroita aore râ amaa ia tapa‘ohia teie moni e ia horo‘a’tu ia outou te hoê parau peeraa.

« Te paraparau ra te hoê pŭpŭ taata e te peropheta Iosepha Semita i te hoê mahana a tae mai ai te parau apî e ua paapaa roa te fare o te hoê taeae vĕvĕ… i te auahi. Ua faaite te mau taata atoa i te oto no te ohipa tei tupu. Ua faaroo te peropheta i te tahi maa taime, e ‘tuu a‘era to’na rima i roto i to’na pute, tatara ihora e pae tara e parau atura, « Te oto nei au no teie taeae no te faito e pae tara ; eaha to outou paatoa otoraa »’?… i te matahiti i mairi a‘enei, e rave rahi milioni o outou tei pahono i te oto o vetahi ê na roto i ta outou mau ravea, to outou aau here, e to outou mau rima tauturu. Mauruuru no to outou faito faahiahia no te aroha ».

Te Episekopo H. David Burton, te Episekopo Faatere, « Aau here e te Rima Tauturu », Liahona, Me 2006, 8.