Te Mau Faahauraa no te Mau Mana‘o no te Taime Horo‘araa, Eperera 2007

I muri nei, o te mau faahauraa ïa no te mau mana‘o tauturu na te feia faatere o te Paraimere ia faaohipahia i roto i te Taime Horo‘araa tei nene‘ihia i roto i te Liahona o te ava‘e Eperera 2007. No te haapiiraa, no te mau haamaramaramaraa e no te ohiparaa e au e teie mau mana‘o, a hi‘o « Te Ora Nei Oia! » i te mau api F4 e F5 i roto i te tuhaa na te mau tamarii o teie nei ve‘a.

1. A papa‘i i te parau hape i ni‘a i te tabula ereere. A parau i te mau tamarii e, ia tatarahapa ana‘e ratou e huri ïa ratou i te parau hape i roto i te maitai. A ani i te mau tamarii ia tauturu ia outou ia huri i te parau hape i roto i te maitai na roto i te faahoho‘araa i te mea o ta ratou e rave ia tatarahapa. A faaohipa e toru faahoho‘araa (a hi‘o « Faahoho‘araa », i roto i te buka Haapiiraa Aore e Piiraa Teitei Atu [1999], 161-62) no te faaite i te mau tamarii eaha te taime e ti‘a ia ratou ia tatarahapa. I muri mai i te toru o te faahoho‘araa, a himene i te hoê himene no ni‘a i te faaoreraa hara e a faaite e titauhia tatou ia faaore ia vetahi ê o tei tatarahapa. A tuma i te parau hape i ni‘a i te tabula ereere, e a papa‘i i te parau maitai. A tai‘o mai roto mai i te buka Ta‘u Faito Teitei no te Evanelia, « E maiti au i te maitai. Ua ite au e nehenehe au ia tatarahapa ia rave au i te hape ». A faaite i to outou iteraa papu no ni‘a i te tatarahapa e i te Taraehara a Iesu Mesia.

2. A faaite e te mau nei to tatou peropheta ora i te mau taviri atoa o te autahu‘araa e i te mana i roto i te Ekalesia i teie mahana. A faaite i te hoê hoho‘a no te peropheta. A faaite e, e te arata‘i nei oia i te Ekalesia i raro a‘e i te arata‘iraa a te hoê taata. A ui i te mau tamarii o vai ïa teie nei taata (Iesu Mesia). A faaite i te hoho‘a o Iesu Mesia, e a tuu i te reira i ni‘a i te hoho‘a o te peropheta, faaiteraa e, te ohipa nei te peropheta i raro a‘e i Ta’na arata‘iraa. A faaite i te mau tamarii i te hoê nene‘iraa o te Liahona apî roa. A faaite e, ia a‘o ana‘e mai to tatou peropheta ia tatou i roto i te amuiraa rahi, te haapii maira ïa oia ia tatou i te mea o ta Iesu Mesia e hinaaro ra ia tatou ia faaroo e ia rave. A maiti maite e maha irava no roto iho nei i te parau poro‘i a te peropheta e a ani i te mau tamarii paari a‘e ia tai‘o i te reira ia ratou iho. A tabula e maha mea e nehenehe i te mau tamarii ia rave no te peeraa i te mau parau a te peropheta. Hi‘oraa, e tabula paha outou « aufau i te tuhaa ahuru », « ia faaore i te hapa » e aore râ, « a tai‘o i te mau papa‘iraa mo‘a ». A ani i te mau tamarii ia papa‘i i te hoê hoho‘a o te hoê o te mau mana‘o o ta ratou e hinaaro ia ohipa maitai atu i ni‘a i te peeraa i te peropheta (a hi‘o « Te mau Ohipa Reniraa », Haapiiraa, Aore e Piiraa Teitei Atu, 166-167). A maiti i te hoê himene e tano i na parau tumu e maha o tei a‘ohia mai nei e te peropheta. A ani i te mau tamarii ia papa‘i i te mau hoho‘a no taua parau tumu ra ia ti‘a i mua i te piha haapiiraa e ia afa‘i faateitei i ta ratou mau hoho‘a a himene ai te Paraimere i taua himene ra. A faaite i to outou iteraa papu no ni‘a i te faufaa rahi o te autahu‘araa.

3. Faaiteiteraa himene: « Ua Tae mai te Hoê Melahi ia Iosepha Semita » (i roto i teie nei ve‘a, api F13). Hou a haapii ai i teie himene, a haapii i te tereraa o te himene. E taui te toparaa mai te 3/4 i te 2/4 no te hoê faaito i ni‘a i te reni tata‘itahi.

   A faaite i te mau parau i muri nei ma te apapa i roto i to ratou mau ana‘iraa tano – « Moroni », « Aivi Cumorah », « Te Ati Nephi », e « Te Buka a Moromona ». A faaite i te mau tamarii e, ua papa‘ihia teie himene no teie na tumu e maha. A ani ia ratou ia tauturu ia outou i te apaparaa i teie mau parau i roto i to ratou mau ana‘iraa mau i parauhia i roto i teie himene. A himene i teie himene no ratou, e i muri iho a ui ia ratou eaha te parau matamua. No te mea te paratarafa matamua o « te hoê melahi tei tae mai ia Iosepha Semita », te parau tano ra, o « Moroni ïa ». A faahimene i te mau tamarii i teie paratarafa e o outou. A himene faahou e toru a‘e taime, ma te apapa maite i te mau parau tano. A faite e ua iriti mai Iosepha Semita i te mau api auro mai roto mai i te Aivi o Cumorah, e e mau tuatapaparaa teie mau papaa parau no te Ati Nephi, e taua buka faahiahia ra o te Buka a Moromona ïa. No te mea e mea poto roa teie himene, a himene faaoti roa i teie himene a ui ai outou i te hoê uiraa. E tauturu te reira i te mau tamarii ia ite i te mau parau e i teie nei himene. A faaitoito i te mau tamarii ia faaite i te aamu o te Buka a Moromona i to ratou utuafare na roto i te himeneraa i teie himene. A faaite i to outou iteraa papu e te aamu i faahitihia i roto i teie himene e parau mau ïa.