Te mau mana‘o

Te puai i roto i te utuafare afa melo

Ua faaea vau te rahiraa o to‘u nei oraraa i roto i te hoê utuafare afa melo. E rave rahi te mau tamataraa ta‘u i faaruru a tamata ai au i te ora i te evenalia. Na te fariiraa i te mau buka faaûrûhia a te Ekalesia, te Liahona ihoa ra, e tauturu ia‘u ia tapea i te Varua.

Mauruuru rahi roa i te faahaamana‘oraa ia‘u i te mau ava‘e atoa e e taui te evanelia i te mau oraraa.

Sandra Vinocuna, Ecuador

Te reo o te peropheta

E mea faahiahia roa na‘u te Liahona ihoa ra no te ava‘e Atopa 2005. Ua mauruuru roa vau no te mau aamu atoa e vai ra i roto, te parau poro‘i ihoa ra a te Peresideni James E. Faust, « E hoê Tauasini Taura no te Here ». Te mana‘o nei au e e ti‘a i te mau taata atoa ia tai‘o i te reira. Te haamauruuru nei au i te Metua i te Ao ra no te haamaitairaa mai ia tatou e te mau peropheta no te aratai ia tatou i teie nei mau mahana hopea nei.

Elder Emenike Hope Onwuchekwa, Misioni no Nigeria Ibadan

Mauruuru no te nene‘iraa i te huru PDF

Ua riro te Liahona ei hoê faaûrûraa no to‘u nei utuafare, e e tauturu te reira ia matou a tamata ai matou i te ora e i te faaite i te evanelia. Ua haamaitai-mau-hia matou e ta matou mau tautooraa. E ere noa te mau papa’iraa i te mea puai i te pae varua e i te faatupu i te faaroo, e mea nehenehe atoa ra te huru nene‘iraa e te mau faahoho‘araa.

Ua mauruuru atoa matou no te mea te vai nei te mau ve‘a i roto i te mau reo e rave rahi i roto i te huru PDF na roto i te imere—aita e paotiraa e e haamouraa i te nene‘iraa i ni‘a i te papier ! Ia hinaaro ana‘e vau i te tapiri i te hoê faahitiraa parau aore râ te hoê hoho‘a i ni‘a i te afata faato‘eto‘eraa maa aore râ ia afa‘i atu te mau tauihaa i te taime faaiteiteraa aore râ i te pureraa pô utuafare, e nene‘i noa vau i te mea ta‘u e hinaaro. E mea faahiahia !

Christian Karlsson, mau Hau Amui no Marite

Nota : Tei ni‘a te Liahona i te imere na roto i te tahi mau reo i te www.lds.org. No te reo peretane, a pata i ni‘a i te « Gospel Library ». No te tahi atu mau reo, a pata i ni‘a i te hoho‘a fenua o te ao nei.

Te ofa‘i anaana roa‘e

Te mauruuru nei au no te mau Liahona atoa o tei nene‘ihia. Na roto i te Liahona tata‘itahi, e ite ai tatou i te hinaaro o te Fatu e e haapuaihia’i to tatou mau iteraa papû. E ofa‘i anaana mau te reira i teie nei mau mahana hopea nei.

Te turai nei te mau parau poro‘i a te Peresideniraa Matamua ia tatou ia ora mai te Faaora e te haapii nei ia tatou te evanelia porao ore a to tatou ra Fatu ia Iesu Mesia. E mau taere huru ê paha to tatou, e hoê ana‘e râ ta tatou nei fâ. Te î nei au i te oaoa i te iteraa e i rapae au i to‘u nei iho oti‘a fenua, e i te tahi atu pae o te moana rahi, te vai nei te hoê Feia Mo‘a i te mau Mahana Hopea nei o te tai‘o ra i te hoê â ve‘a.

José Ramirez, Fenua Venezuela

To‘u iho reo

No Ukraine vau, e vau râ ava‘e i mairi a‘enei, ua haere atu maua ta‘u tane faaipoipo i Idaho (i te Fenua Marite). Aita vau e parau maitai roa i te reo peretane, e te tahi mau taime, aita vau e taa mau ra i te mea ta‘u e faaroo i te fare pureraa i te mahana Sabati. Te ite noa ra vau i te Varua Maitai i te mau pureraa, i teie nei râ te mauruuru nei au no te ravea ia tai‘o i te mau parau a to tatou feia faatere i roto i to‘u nei reo ai‘a. No‘u nei, te afa‘i mau mai nei te Liahona ia tatou i te mau papa’iraa mo‘a.

Lena Cantor, mau Hau Amui no Marite

Mauruuru noa

Ua riro te Liahona ei hoa e e tauturu rahi no‘u. Te vai nei ta‘u mau tamataraa i roto i te oraraa i te mau ava‘e atoa, e rave rahi râ mau ava‘e i teie nei, ua ite au e ua papa’ihia te Liahona no‘u noa e ta‘u mau tamataraa. Ua ite au e te hinaaro nei te Atua ia oaoa tatou na roto i te haapa‘oraa i te mau faaueraa.

Georgia Adolpho Pahulaya, Fenua Philippino