“DOU SA KAYA SE KO CEI KOI AU?”

Sa taroga na iVakabula vei ira na Nona tisaipeli na taro oqo, qai sauma o Pita, “Sa qai vosa ko Saimoni Pita ka kaya, Oi kemuni na Karisito na Luve ni Kalou Bula” (raica Maciu 16:15–16). Oqo na ivakarau era dau sauma kina na taro vata oqo ko ira na itabagone kei ira na cauravou kei na goneyalewa e vuravura raraba:

Sa vakayacora e vuqa na ka me baleti au ko Jisu Karisito. Sa solia vei au na noqu matavuvale kei na kosipeli. Sa vukei au ena noqu vuli. Au sa ciqoma oti e vica na sikolasivi, kau vakabauta ni oqo na Nona veivakalougatataki. Kevaka a sega ni lako mai me vakaraitaka vei keda na ivakarau me da bula kina, ena sega ni rawa ni da lesu tale vua na Tamada Vakalomalagi.

Bryan N., 13, mai Honduras

Au kila ni ena nona vakararawataki, mate, kei na Veisorovaki na iVakabula, sa rawa kina ni da tucaketale ka rawa ni da sereki vakayalo ka vakayago talega. Ena vuku ni vakabauta kei na veivutuni, au sa vulica ni rawa ni da vosoti ena noda ivalavala ca.

Joan O., 19, mai Philippines

Ena dua na gauna balavu sa oti a mai bula voli kina e vuravura e dua na tamata, a tara e milioni vakamilioni na bula na nona ivakarau kei na nona ivosavosa na tamata oqo—e okati kina na noqu. Oqori ko Jisu Karisito. Sa dau vakauqeta tiko na noqu bula ena veisiga na Nona solibula veisorovaki. Sa dua na ka veivakurabuitaki me da kila ni ena Nona mavoa, sa rawa kina me vakabulai na noda koi keda. Ena noqu kila ni Karisito ko Jisu, au sa vakavakarau tiko kina meu laki kaulotu ka vakatetea na Nona kosipeli vei ira na kai vuravura era se bera tu ni vakila na Nona loloma sega ni vakaiyalayala. O Koya na iVakabula ka Dauveivueti ni yaloqu.

Kristian M., 24, mai Croatia

Sa vakayacora ena vukuda ko Jisu Karisito na veika e sega tale ni dua e rawa ni vakayacora. Vei au, na noqu ciqoma na Matabete i Eroni sa dua na gauna vakasakiti baleta niu kila ni sai koya oqori na ka e vinakata na Turaga meu cakava. Au a muria tikoga na nona ivakaraitaki. Au kila ni na tomana tikoga na nona tuberi au ka vakavuvulitaka vei au na sala.

Limhi G., 17, mai Mexico

Ni sa takali yani na marama na tinaqu, sa tekivu me bibi sara na icolacola ni bula. Au qai gole vua na noqu bisopi ena taro ivakasala. Au a sega ni namaka na veika e tukuna vei au, ia a veisautaka na noqu bula. A sureti au meu vakararavi vua na Tamada Vakalomalagi ena noqu dau masu, wilika na ivolanikalou, ka vakabauta tiko ni na dau tu e yasaqu na iVakabula—meu vakabauti Koya sara vakalevu kau na vakila ni sa mamada mai na noqu icolacola. Ni oti e rua veimama na yabaki, au sa vakila ni sa tu me noda na vakacegu tudei ena vukuna na iVakabula kei na veika sa mai vakayacora me baleti keda.

Whitney W., 19, mai Arizona, Amerika

Au kila ni bula tiko ko Jisu Karisito. E lomani au, ka a solia na Nona bula ena vukuqu. O Koya na noqu itokani. Ena Nona ivakavuvuli, au sa vulica na sala e rawa niu yaco kina me vakataki Koya. E tamata dodonu, yalovinaka, uasivi sara, ka dauloloma ko Koya. A kune rarawa mai Kecisemani me baleti keda kece. Au kila ni sai koya na Karisito Bula, na noqu iVakabula, na noqu Uluvatu, ka noqu Turaga.

Claudia R., 25, mai Mexico

Niu tubu cake ena Lotu ka dau lakova na Lalai, au sa vulica kina na veika e baleti Jisu Karisito mai na gauna au se goneyalewa lailai kina. Ka sa tubu me kaukauwa cake na noqu ivakadinadina mai na gauna ko ya. Ia oqo niu sa kaulotu tiko, au taleitaka na veigauna vivinaka e dau soli vei au meu wasea kina na kosipeli ka vakadinadinataki Jisu Karisito e veisiga.

Niu vakasamataka na iVakabula kei na veika kece sa vakayacora ena vukuqu, au vinakata meu voleka cake Vua. Au sa vakavotukanataka tiko na veika au a vulica ena noqu gauna ni gone. Au taleitaka ni rawa meu vukei ira eso tale na tamata me ra vakila na Nona loloma na noda iVakabula ko Jisu Karisito. Na ivakadinadina oqo e sega ni dua walega na ka au tukuna—e lako mai vu ni yaloqu.

Susana V., 21, mai Toga