Ko e Fokotuʻutuʻu Fefie ʻi Kuopió
ʻI he konga kimui ʻo e faʻahitaʻu māfana ʻo e 1968, ne u ʻaʻahi ai mo hoku hoa faifekau ko ʻEletā Keni Hītoní ki ha fāmili ʻi Kuopio ʻi Finilani ʻa ia ko e konga pē naʻe kau ki he Siasí. Naʻe kau ʻa e faʻeé mo e ʻofefiné ki he Siasí, ka naʻe ʻikai ke kau e tamaí.
Naʻe kole mai ʻa e uaifí peá ma akoʻi ki ai mo hono ʻofefiné ʻa e ngaahi lēsoní—ʻo ma fakahoko leʻolahi feʻunga ʻeni ke fanongo mai ki ai hono husepānití mei he loki hoko maí. Naʻa mau feinga ke haʻu ke mau fakataha, ka ne talamai ʻe ia ʻoku ʻikai hano taimi. ʻI he taimi ʻe taha ko ʻene kumi ʻuhingá ko e ʻi ai ha fokotuʻunga fefie ʻi he tafaʻaki ʻi muí naʻe fie maʻu ke fahi pea fokotuʻutuʻu ki he taimi momokó.
“Kapau ʻe fahi kotoa e fefié ʻo fokotuʻutuʻu, te ke loto ke ma akoʻi koe?” ko ʻemau fehuʻí ia.
Naʻá ne talimai, “ʻIo.” Ka naʻá ne toe talamai ʻoku fuʻu lahi e fefié ia pea ʻe fuoloa pea toki lava ke ʻosi.
Hili mei ai ha ngaahi ʻaho lahi, ne ma foki mai mo hoku hoá ki honau ʻapí hili ia ʻema tatali ke ʻalu e tamaí ki he ngāué. Naʻe fakangofua kimaua ʻe hono uaifí, peá ma nofo hifo he ʻahó kakato ʻo fahi mo fokotuʻutuʻu e fefié. Naʻe ʻosi ʻeni he 5:00 efiafí, kimuʻa siʻi pē peá ne foki mai ki ʻapí. Naʻe ʻikai ke ma faʻa tatali ke sio ki hono matá, ka naʻá ma hola fakavave naʻá ne ʻiloʻi kimaua. Hili ʻema ʻaka pasikala ki ʻapi ʻo kaukaú, naʻá ma toe ʻaka mai ki honau ʻapí he taimi 7:00 efiafí nai.
“Ko ʻena kuo ʻosi fahi e fefié!” ko ʻema talaangé ia. “Te ke loto ā ke ma akoʻi koe?”
Naʻá ne malimali pē, kamo hono ʻulú, pea ʻalu ange ʻo mau kau fakataha he loki ʻi muʻá. Hili ha ngaahi uike lahi mei he fanongo ʻa e tangata lelei ko ʻení ki he ngaahi lēsoni ʻa e kau faifekaú, naʻá ne papitaiso pea hilifakinima.
“Kuo ʻosi fahi kotoa ʻe fefié!” ko ʻema talaangé ia. “Te ke loto ā ke ma akoʻi koe?”