Pōpoaki ʻa e Faiako ʻAʻahí
Tauhi, Tokangaʻi, mo Maluʻi ʻa e Fāmilí
Akoʻi ʻa e ngaahi potufolofola mo e ngaahi fakamatala te ne fai tāpuekina e kau fefine ʻokú ke ʻaʻahi ki aí. Fakamoʻoni ʻo kau ki he tokāteliné. Fakaafeʻi ʻa kinautolu ʻokú ke akoʻí ke nau fakamatala atu ha meʻa ne nau ongoʻi pe ako.
Ko e Hā Kuo Pau Ke u Taukaveʻi ai ʻa e Tokāteline ʻo e Fāmilí?
Ko e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá: “Ko e fāmilí ko e tuʻutuʻuni ia ʻa e ʻOtuá. ʻOku mahuʻinga ʻa e mali ʻa e tangatá mo e fefiné ki Heʻene palani taʻengatá. ʻOku maʻu ai ʻe he fānaú ha totonu ke fanauʻi kinautolu ʻi he ngaahi haʻi ʻo e nofo malí, pea ke ohi hake kinautolu ʻe ha tamai mo ha faʻē ʻokú na tauhi ʻa e ngaahi fuakava ʻo e malí ʻi he fai tōnunga kakato” (“Ko e Fāmilí: Ko ha Fanongonongo ki Māmani,” Liahona, ʻOkatopa 2004, 49; Ensign, Nov. 1995, 102).
Suli B. Peki, palesiteni lahi ʻo e Fineʻofá: “ʻI he hoko ʻa e fefine kotoa pē ʻi he Siasí ni ko ha ākonga ʻa Sīsū Kalaisi, ʻoku foaki ai kiate ia ʻa e fatongia ke ne tauhi, tokangaʻi mo maluʻi ʻa e fāmilí. Naʻe foaki ki he kakai fefiné ha ngaahi ngāue tukupau ki muʻa pea ʻai e tuʻunga ʻo māmaní. Pea ʻi hoʻo hoko ko ha fefine Siasi tauhi fuakavá, ʻokú ke ʻiloʻi ai ʻoku mahuʻinga ke ke lea ʻo taukaveʻi ʻa e tokāteline ʻo e fāmilí ki hono fakamālohia e ngaahi fāmilí ʻi he funga ʻo e māmaní” (“Ko e Meʻa ʻOku Fakahoko Lelei Taha ʻe he Kau Fafine ʻo e Siasí: Tuʻu Mālohi mo Taʻeueʻia,” Liahona mo e Ensign, Nōv. 2007, 110).
Te u Taukaveʻi Fēfē ʻa e Fāmilí?
T&F 88:119: “Fokotuʻu ha fale, ʻio ko ha fale ʻo e lotu, ko ha fale ʻo e ʻaukai, ko ha fale ʻo e tui, ko ha fale ʻo e ako, ko ha fale ʻo e nāunau, ko ha fale ʻo e maau, ko ha fale ʻo e ʻOtua.”
Palesiteni Sipenisā W. Kimipolo (1895–1985): “Ko e ʻapí ko ha taulanga ū mei he ngaahi matangi pea mo e ngaahi faingataʻa ʻo e moʻuí. ʻOku kamata pea paotoloaki ʻa e anga fakalaumālié ʻe he lotu fakaʻahó, ako folofolá, ngaahi fealēleaʻaki mo e ngaahi ʻekitivitī ʻi ʻapi fekauʻaki mo e ongoongoleleí, efiafi fakafāmili ʻi ʻapí, fakataha alēlea fakafāmilí, ngāue mo vaʻinga fakatahá, fetauhiʻakí, mo e vahevahe ʻo e ongoongoleleí mo kinautolu ʻoku tau feohí. ʻOku paotoloaki foki ʻa e anga fakalaumālié ʻi heʻetau ngaahi ngāue ʻi he faʻa kātakí, angaʻofá, mo ʻetau fefakamolemoleʻakí pea ʻi heʻetau moʻui ʻaki e ngaahi tefitoʻi moʻoni ʻo e ongoongoleleí ʻi hotau ngaahi fāmilí” (“Therefore I Was Taught,” Tambuli, Aug. 1982, 2; Ensign, Jan. 1982, 3).
ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku ou kole atu he ʻahó ni ki he kāingalotu ʻo e Siasí pea mo e ngaahi mātuʻa faivelenga, ngaahi kui, mo e kāinga ofi ʻi he feituʻu kotoa pē, ke mou piki maʻu ki he fanongonongo [ki he fāmilí], ke hoko ia ko ha fuka ʻoku tatau mo e Tohi ‘fakaʻilonga ʻo e tauʻatāina’ ʻa e ʻEikitau ko Molonaí, pea tau fakapapau ke moʻui ʻaki hono ngaahi akonakí. …
“ʻI he māmani ʻo e ʻaho ní, ʻa ia ʻoku fuʻu mālohi hono ʻohofi ʻe Sētane ʻa e fāmilí, kuo pau ke fakahoko ʻe he ngaahi mātuʻá ʻa e meʻa kotoa te nau lavá ke fakamālohia mo maluʻi honau ngaahi fāmilí. Ka he ʻikai feʻunga ʻa ʻenau ngaahi ngāué pē. ʻOku fuʻu fie maʻu lahi ʻe hotau faʻunga fakafāmilí ʻa e tokoni mo e poupou ʻa e kāinga ofí pea mo e ngaahi kautaha ʻoku nau ʻātakaiʻi kitautolú” (“Ko e Meʻa Mahuʻinga Tahá ʻA ia ʻOku Tolonga Tahá,” Liahona mo e Ensign, Nōvema 2005, 42–43).
ʻEletā Lōpeti S. Uti ʻo e Kau Fitungofulú: “Ki he kakai tokolahi, ʻoku hangē e fatongiá ia kiate kinautolú ko ha meʻa fakatupu loto hohaʻa mo fakahela. Ka ‘oku siʻisiʻi ha meʻa ʻe lava ʻi he lea taʻe ngāué. ʻOku fie maʻu ke tau kau atu ki he ngaahi meʻa ʻoku hoko ʻi he māmaní. Kapau ʻoku ʻikai ke taau hotau ngaahi ʻapiakó pe fakatupu ʻauha honau ngaahi tuʻunga ʻulungāanga maʻá, kuo pau ke tau ngāue mo hotau kāingalotu he koló ke fakahoko ha liliu. Kapau ʻoku ʻikai malu pe moʻui lelei hotau ngaahi kaungāʻapí, kuo pau ke tau kaungā ngāue mo kinautolu ʻoku nau tokangaʻi e koló mo ʻenau ngaahi fie maʻú ke faʻufaʻu ha ngaahi founga ke fakaleleiʻi ʻaki. Kapau ʻoku ʻuliʻi hotau ngaahi tūkuikoló, ʻo ʻikai ʻe he ngaahi kasa fakatuʻutāmakí pē ka ʻe he ngaahi meʻa ʻoku fakalielia mo fakaʻauha e laumālié, kuo pau ke tau ngāue ke maʻu ha ngaahi founga fakalao ke fakamaʻa ʻaki e faʻahinga ʻuli pehení. … Ko hotau fatongia ia ke hoko ko ha tāpuaki ki he niʻihi kehé, ki hotau fonuá, ki māmani” (“On the Responsible Self,” Ensign, Mar. 2002, 30–31).
Taá naʻe fai ʻe Craig Dimond; ʻata mei muí naʻe faitaaʻi ʻe Shannon Gygi Christensen