Haʻu ʻo Fanongo ki he Leʻo ʻo e Palōfitá

Ko e Siasi Moʻoní

Fai ʻe Palesiteni Henry B. Eyring

Tokoni ʻUluaki ʻi he Kau Palesitenisī ʻUluakí

Mei ha lea ʻi he konifelenisi lahi ʻo ʻEpeleli 2008.

ʻOku fakamatala ʻa Palesiteni ʻAealingi ki he founga naʻe maʻu ai ʻene fakamoʻoni ʻoku moʻoni ʻa e Siasí.

President Henry B. Eyring

Naʻe kamata ʻeku fakamoʻoniʻi ko e Siasi moʻoní ʻení ʻi heʻeku kei siʻí. Ko e taha ʻo e ngaahi meʻa fuoloa taha ʻoku ou manatu ki aí ko ha konifelenisi. Naʻe lea ai ha tangata naʻe ʻikai ke u ʻiloʻi. Ko e meʻa pē naʻá ku ʻiló ko ha taha ia naʻe fekauʻi ange ʻi he malaʻe ʻo e ngāue fakafaifekaú ki homau kiʻi vahefonuá ʻe ha tokotaha naʻá ne maʻu e lakanga fakataulaʻeikí. ʻOku ʻikai te u ʻiloʻi e meʻa naʻá ne lea ʻakí. Ka ne u maʻu ha fakamoʻoni mālohi mo pau kimuʻa ʻi hoku taʻu valú, kimuʻa pē ia pea papitaiso aú, naʻá ku fanongo ki ha tamaioʻeiki ʻa e ʻOtuá ʻi he Siasi moʻoni ʻo Sīsū Kalaisí.

Ne u ongoʻi ʻa e mālohi ʻo e ngaahi kōlomu ʻo e lakanga fakataulaʻeikí pea mo ha pīsope ʻofa ʻi heʻeku kei taʻu hongofulu tupú. ʻOku ou kei manatuʻi pē mo lava ke u ongoʻi ʻa e ngaahi tala fakapapau naʻe fai ʻi heʻeku tangutu ʻo ofi ki ha pīsope ʻi ha kōlomu ʻo e kau taulaʻeikí peá u ʻiloʻi naʻá ne maʻu e ngaahi kī ʻa ha fakamaau moʻoni ʻi ʻIsileli.

Ne u maʻu ʻa e fakamoʻoni tatau pē ʻi heʻeku kei siʻí ʻi ha ʻaho Sāpate ʻe ua. Pea naʻe hoko ʻeni takitaha ʻi he ʻaho naʻe fokotuʻu ai ha siteiki. Hangē ne uiuiʻi ha kau tangata noa pē ne u ʻiloʻi lelei ke hoko ko ha kau palesiteni fakasiteiki. Ne u hiki hoku nimá ʻi he ongo ʻaho ko iá pea naʻe fakamoʻoniʻi kiate au kuo uiuiʻi ʻe he ʻOtuá ʻEne kau tamaioʻeikí pea ʻe tāpuakiʻi au ʻe heʻenau ngāué pea mo ʻeku poupouʻi kinautolú. Kuo tuʻo lahi ʻeku ongoʻi ʻa e mana tatau pē ʻi he Siasí.

Ne u mamata ki hono hiki hake ʻo e kau palesiteni fakasiteiki ko iá ki honau ngaahi uiuiʻí. Kuó u mamata ʻi he mana tatau pē ʻi he ngāue ʻa Palesiteni Monisoní ʻi heʻene maʻu ʻa e uiuiʻi ke taki ko e palōfita mo e Palesiteni ʻo e Siasí pea ke ne ngāue ʻaki e ngaahi kī kotoa ʻo e lakanga fakataulaʻeikí ʻi he māmaní. Naʻá ku ʻi ai ʻi he taimi naʻá ne maʻu ai ʻa e fakahā mo e ueʻi ʻa e Laumālié, pea ʻokú ne fakapapauʻi mai kiate au ʻoku fakalāngilangiʻi ʻe he ʻOtuá e ngaahi kī ko iá. ʻOku ou fakamoʻoni ki ai.

ʻOku ou fai kiate kimoutolu ʻa ʻeku fakamoʻoní ʻi he loto-mālūʻia ko e Siasi moʻoni mo moʻui ʻeni ʻo Sīsū Kalaisí. ʻE tali ʻe he Tamai Hēvaní hoʻo ngaahi lotu fakamātoato ke ke ʻiloʻi ia ʻiate koe peé.

Ngaahi Meʻa ke Tau Fakakaukau Ki Ai

1. Talanoa ʻi hoʻomou efiafi fakafāmili ʻi ʻapí ki he ngaahi meʻa kuó ke aʻusia pe aʻusia ʻe homou fāmilí ʻo tokoni ke mou ʻiloʻi ai ʻoku moʻoni ʻa e Siasí. Hili ko iá pea tā ha fakatātā ʻo e ngaahi meʻa ko ia naʻa mou aʻusiá. Fakaʻaliʻali hoʻo fakatātaá mo fai hoʻo fakamoʻoní kapau te ke loto ki ai.

2. Ko hai ha kau taki ʻo e Siasí, kau ai e kau faiako fakaʻapí mo e kau pīsopé pe palesiteni fakakoló, kuo nau tokoniʻi koe mo ho fāmilí? ʻE lava fēfē ke ke fakahā kiate kinautolu ʻa hoʻo houngaʻiá?

3. Fakakaukau ki he ongo naʻá ke maʻú ʻi he taimi naʻe fokotuʻu ai ʻa Palesiteni Tōmasi S. Monisoni ko e palōfita mo e Palesiteni ʻo e Siasí ʻi he konifelenisi lahi ʻo ʻEpeleli 2008. Hiki e ngaahi ongo naʻá ke maʻú ʻaki hano tā ha fakatātā pe hiki ʻi hoʻo tohinoá.

Tā fakatātaaʻi ʻe Kristen Yee