Pōpoaki ʻa e Kau Palesitenisī ʻUluakí
Haʻu Kiate Ia ʻi he Lotu mo e Tui
Falala ki [he ʻEikí] ʻaki ho lotó kotoa, pea ʻoua naʻá ke faʻaki ki ho poto ʻoʻoú. Ke ke fakaongoongo kiate ia ʻi ho hala kotoa pē, pea ʻe fakatonutonu ʻe ia ʻa ho ngaahi ʻalungá.”1 Ko e lea ia ʻa e tokotaha poto ko Solomoné, ko e foha ʻo Tēvita, tuʻi ʻo ʻIsilelí.
Naʻe pehē ʻe Sēkope ko e tokoua ʻo Nīfaí, “Sio ki he ʻOtuá ʻi he ʻatamai ʻoku tuʻu maʻu, pea lotu kiate ia ʻi he fuʻu tui lahi.”2
Naʻe folofola ʻa e ʻEikí ki he Palōfita ko Siosefa Sāmitá ʻi he kuonga fakakosipeli ko ʻení ʻo pehē, “Sio pē kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē.”3
ʻOku hoko mai e fakahinohino fakalangi ko ʻení kiate kitautolu he ʻahó ni ʻo hangē ha vai ʻasinisini ʻoku lilingi ki ha kelekele pakukaá.
ʻOku tau moʻui ʻi ha kuonga faingataʻa. ʻOku fonu e ngaahi ʻōfisi ʻo e kau toketaá ʻi ha kakai ʻoku fefaʻuhi mo ha ngaahi palopalema fakaeloto mo fakaetuʻasino foki. ʻOku hake ʻa e ngaahi fakamāuʻanga vete malí koeʻuhí ko e kakai kuo teʻeki ai fakaleleiʻi ʻenau ngaahi palopalemá. ʻOku ngāue ʻa e kau pule ʻi he ngaahi maʻuʻanga tokoni maʻá e kau ngāué ʻi ha ngaahi houa lahi ko e feinga ke tokoni ki he kakaí ʻi heʻenau ngaahi palopalemá.
Naʻe fakaʻosi ʻaki ha ʻaho mātuʻaki femoʻuekina moʻoni ʻe ha ʻōfisa tokoni ʻe taha naʻe vahe ke ne tokangaʻi e fanga kiʻi palopalema īkí ʻaki haʻane fokotuʻu ʻi hono funga tesí ha kiʻi tohi, ko ha tūkuhua pē, kiate kinautolu naʻe teʻeki ai fakaleleiʻi ʻenau ngaahi palopalemá. Naʻe fakalea peheni, “Kuó ke ʻahiʻahiʻi e lotú?” Ko e meʻa naʻe ʻikai te ne ʻiló ʻe veteki ʻe he kiʻi faleʻi faingofua ko ʻení ha ngaahi palopalema lahi ange, fakafiemālieʻi ha mamahi lahi ange, taʻofi e maumaufono lahi angé, peá ne ʻomi ha melino mo ha fiemālie lahi ange ki he laumālie ʻo e tangatá he ʻikai lava ke maʻu ʻi ha toe founga.
Naʻe fehuʻi ki ha fakamaau ʻAmelika ʻiloa pe ko e hā ʻe lava ʻe he kau tangataʻifonua ʻo e ngaahi puleʻanga ʻo māmaní ʻo fai ke fakasiʻisiʻi ai ʻa e fai-hiá mo e talangataʻa ki he laó, pea ʻomi ha nonga mo ha fiemālie ki heʻetau moʻuí pea mo hotau ngaahi fonuá. Naʻá ne fakakaukau lahi peá ne tali, “Te u fokotuʻu ʻe au ke foki ki he ngaahi tōʻonga moʻui fakakuonga muʻa ʻo e lotu fakafāmilí.”
Ko e Ivi ʻOku Maʻu ʻi he Lotú
ʻIkai ʻoku hounga kiate kitautolu kakaí ko e lotu fakafāmilí ʻoku ʻikai ko ha tōʻonga moʻui kuo ʻosi hono kuongá? ʻOku ʻikai mo ha meʻa fakaʻofoʻofa ange ʻi he māmaní kotoa ka ko ʻetau vakai atu ki ha fāmili ʻoku nau lotu fakataha. ʻOku moʻoni pē ʻa e ʻuhinga ia ʻo e kupuʻi lea ʻoku faʻa taku “Ko e fāmili ʻoku lotu fakatahá ʻoku nau fāitaha.”
Naʻe fekau ʻe he ʻEikí ke tau fakahoko ʻa e lotu fakafāmilí ʻi Heʻene folofola ʻo pehē, “Ke mou lotu maʻu ai pē ʻi homou ngaahi fāmilí ki he Tamaí ʻi hoku hingoá, koeʻuhi ke tāpuakiʻi ʻa homou uaifí mo hoʻomou fānaú.”4
Tau kau fakataha muʻa mo au ʻo vakai ki ha fāmili Siasi ʻoku fai haʻanau lotu ki he [ʻOtuá]. ʻOku tūʻulutui ʻa e tamaí, faʻeé mo e kotoa ʻo e fānaú ʻo punou honau ʻulú pea kuikui mo honau matá. ʻOku ʻi ai ʻa e laumālie fakaʻofoʻofa ko ia ʻo e ʻofá, uouangatahá, pea fonu ʻa e ʻapí ʻi he nonga. ʻI he fanongo ʻa e tamaí ki he lotu ʻa hono kiʻi fohá ʻo kole ke lava ʻe heʻene tangataʻeikí ʻo fai ʻa ia ʻoku totonú, ʻoku mou pehē nai ʻe faingataʻa ki he tamai ko ʻení ke ne moʻui ʻaki ʻa e meʻa kuo kole ʻe hono kiʻi fohá ʻi he lotú? ʻI he fanongo ʻa ha ʻofefine kei finemui ki ha tautapa ʻa ʻene faʻē angaʻofá ke lava ke tataki ia ʻi ha ʻaho ʻe fili ai hano hoa, pea teuteuʻi ia ke mali ʻi he temipalé, ʻoku ʻikai nai ke mou pehē ʻe feinga ʻa e ʻofefine ko ʻení ke fakahoko ʻa e tautapa mo e kole naʻe fai ʻi he loto fakatōkilalo ʻe he faʻē ko ʻeni naʻe ʻofa aí? Ko e taimi ʻoku lotu fakamātoato ai ʻa e tamaí, faʻeé mo e fānaú kotoa ʻo kolea ke lava ʻe he ngaahi foha lelei ko ʻeni ʻi he fāmilí ʻo moʻui taau ke hoko ha ʻaho ko ha fakafofonga ʻo e ʻEikí ʻi he malaʻe ʻo e ngāue fakafaifekau ʻa e Siasí, ʻikai ʻoku kamata ke tau vakai atu ki he tupu hake ʻa e ngaahi foha ko ʻení ʻo fuʻu tangata pea mo ha holi lahi ke nau hoko ko ha kau faifekau?
ʻOku ou ʻilo fakapapau naʻe fakatupu ʻe he lotu fakafāmilí hano fai ʻo ha tohi ʻe ha taʻahine Siasi naʻe ako ʻi he akoʻanga māʻolunga ʻo Kololató ʻi he ngaahi taʻu kuo hilí. Naʻe kole ki he fānau akó ke nau teuteuʻi ha tohi ke fai ki ha tangata fisifisimuʻa te nau fili pē ʻe kinautolu. Ne fai ʻe he tokolahi ʻenau ngaahi tohí ki ha kau sipoti ʻiloa, ki ha tangata puna vavā ʻiloa, ki he palesiteni ʻo e ʻIunaiteti Siteití, pea ki ha kakai ʻiloa kehe pē. Ka ne fai ʻe he finemui ko ʻení ʻene tohí ki heʻene tamaí, pea ko e fakalea ʻeni ʻo ʻene tohí: “Siʻeku tamai, kuó u fili ke fai atu e tohí ni kiate koe, he ko e tangata fisifisimuʻa taha koe kuó u ʻiloʻi. Ko e fakaʻamu vivili ʻa hoku lotó ke u moʻui ʻi ha founga te u maʻu ai ʻa e faingamālie ke ʻi ho tafaʻakí mo e Fineʻeikí mo e kau mēmipa kehe ʻo e fāmilí ʻi he puleʻanga fakasilesitialé.” Ne teʻeki ai ke maʻu ʻe he tamai ko ʻení ha tohi ʻe fakaʻofoʻofa ange heni.
ʻI heʻetau fai ʻetau ngaahi lotu fakafāmilí mo fakatāutaha ki he ʻEikí, tau fai ia ʻi he tui mo e falala kiate Ia. Tau manatuʻi ʻa e naʻinaʻi ʻa Paula ki he kakai Hepeluú: “He ko ia ia ʻoku haʻu ki he ʻOtuá, ʻoku totonu ke ne tui ʻoku ai ia, pea ʻokú ne totongi kiate kinautolu ʻoku kumi lahi kiate iá.”5 Kapau ʻoku ʻi ai hatau niʻihi kuo fakatuotuai ke fakafanongo ki he akonaki ke lotu maʻu peé, ʻoku ʻikai mo ha taimi lelei ange ke kamata ai ka ko e taimí ni. Naʻe pehē ʻe Viliami Kaupa, “ʻOku tetetete ʻa Sētane ʻi heʻene vakai ʻoku tūʻulutui ʻa e tokotaha Māʻoniʻoni vaivai tahá ʻo lotú.”6 Ko kinautolu ʻoku nau ongoʻi ko e lotú ko ha fakaʻilonga ia ʻo ha vaivai fakaetuʻasino pe fakaʻatamai, ʻoku totonu ke nau manatuʻi ʻoku ʻikai ha taimi ʻe tuʻu māʻolunga ange ai ha tangata ka ko e taimi ʻokú ne tūʻulutui aí.
He ʻikai lava ke tau ʻiloʻi ʻa e tuí ʻo kapau kuo teʻeki ai ke tau maʻu ia, pea he ʻikai lava ke tau maʻu ia lolotonga ʻoku tau fakaʻikaiʻi ia. He ʻikai lava ke maʻu ʻa e tuí mo e veiveiuá fakatouʻosi ʻi he ʻatamai ʻe taha ʻi ha taimi tatau, he ʻokú na hōhoatamaki.
Ko Hono Tali ʻEne Fakaafé
Kapau ʻoku tau loto ke siʻaki ʻa e taʻetui kotoa pē pea fakafetongiʻaki ia ha tui pīkitai, kuo pau ke tau tali ʻa e fakaafe ko ia kuo fai mai kiate kitaua ʻi he Tohi ʻa Sēmisí:
“Ka ai hamou taha ʻoku masiva ʻi he potó, ke kole ʻe ia ki he ʻOtuá, ʻa ia ʻokú ne foaki lahi ki he kakai kotoa pē, pea ʻoku ʻikai valokiʻi; pea ʻe foaki ia kiate ia.
“Ka ʻe lelei ʻene kole ʻi he tuí, ʻo taʻefakataʻetaʻetui. He ko ia ʻoku fakataʻetaʻetuí ʻoku hangē ia ko e peau ʻo e tahí ʻoku fakateka mo felīlīaki ʻe he matangí.”7
Naʻe tupu mei he talaʻofa ko ʻení ʻa e fekumi ʻa e talavou ko Siosefa Sāmitá ki he ʻOtuá ʻi he lotu. Naʻá ne fakahā kiate kitautolu ʻi heʻene lea pē ʻaʻana:
“Naʻe faifai peá u fakakaukau kuo pau ke u … fai ʻo hangē ko e enginaki ʻa Sēmisí, ʻa ia, ko e kole ki he ʻOtuá.” Naʻe faifai peá u fakapapau hoku lotó ke ‘fehuʻi ki he ʻOtuá,’ ko ʻeku fakakaukaú kapau ʻokú ne foaki ʻa e potó kiate kinautolu ʻoku masiva ʻi he potó, mo ne foaki ʻo lahi ʻo ʻikai valokiʻi, ʻe lelei ke u ʻahiʻahi.
“Ko ia, naʻá ku fai ʻo fakatatau ki ai, pea ko ʻeku fakapapaú ke fehuʻi ki he ʻOtuá, ko ia naʻá ku ʻalu ki he vao ʻakaú ke ʻahiʻahi. … Ko ʻeku fuofua ʻahiʻahi ia ke fai ha meʻa pehē talu ʻeku tupu, he neongo ʻa e ngaahi meʻa naʻá ku lolotonga hohaʻa ki aí, naʻe teʻeki ai pē ke u ʻahiʻahi ke fai ha lotu leʻo lahi.”8
Kapau naʻa tau veiveiua ke lotu ʻi he loto fakatōkilalo ki he ʻOtua ko ʻetau Tamai Taʻengatá koeʻuhi pē he kuo teʻeki ai ke tau ʻahiʻahi ke fai ha lotu, ʻe lava ke tau maʻu ha fakalotolahi mei he sīpinga kuo tā ʻe he Palōfita ko Siosefá. Ka ke tau manatuʻi, hangē ko ia ne fai ʻe he Palōfitá, kuo pau ke fakahoko ʻetau lotú ʻi he tui, ʻo taʻefakataʻetaʻetui.
Ko e tuí, ʻo taʻefakataʻetaʻetuí, naʻe mamata ai ʻa e tokoua ʻo Sēletí ki he ala ʻa e toʻukupu ʻo e ʻOtuá ki he ngaahi foʻi maká ko e tali ki heʻene lotú.9
Ko e tuí, ʻo taʻefakataʻetaʻetuí, naʻe foʻu ai ʻe Noa ha ʻaʻake ko e talangofua ki he fekau mei he ʻOtuá.10
Ko e tuí, ʻo taʻefakataʻetaʻetuí, naʻe loto fiemālie ai ʻa ʻĒpalahame ke feilaulau ʻaki hono ʻofaʻanga ko ʻAisaké.11
Ko e tuí, ʻo taʻefakataʻetaʻetuí, naʻe taki atu ai ʻe Mōsese ʻa e fānau ʻo ʻIsilelí mei ʻIsipite ʻo nau kolosi he Tahi Kulokulá.12
Ko e tuí, ʻo taʻefakataʻetaʻetuí, naʻe holoki ʻaki ʻe Sōsiua mo ʻene kau muimuí ʻa e ngaahi ʻā ʻo Selikoó.13
Ko e tuí, ʻo taʻefakataʻetaʻetuí, naʻe mamata ai ʻa Siosefa ki he ʻOtua ko ʻetau Tamai Taʻengatá mo Hono ʻAlo ko Sīsū Kalaisí.14
Mahalo ʻe talamai ʻe he tokotaha taʻetuí ko e ngaahi fakamatala ko ʻeni kau ki he tuí naʻe hoko fuoloa, pea ʻoku kehe ʻa e taimí ni ia.
Kuo liliu moʻoni pē koā ʻa e taimí ia? ʻIkai ʻoku tau ʻofa ʻi heʻetau fānaú he ʻahó ni mo fie maʻu ke nau moʻui anga māʻoniʻoni, ʻo hangē pē ko ia ʻoku hoko maʻu peé? ʻIkai ʻoku tau fie maʻu e maluʻi fakalangi ʻa e ʻOtuá he ʻahó ni, ʻo hangē pē ko ia ʻoku tau fie maʻu maʻu peé? ʻIkai ʻoku kei hokohoko atu pē he ʻahó ni ʻo hangē ko ia ʻoku hoko maʻu peé, ʻa ʻetau ʻi Heʻene ʻaloʻofá mo ʻetau moʻua kiate Ia ʻi he moʻui kuó Ne foaki maʻatautolú?
Kuo ʻikai liliu e taimí. ʻOku kei hokohoko atu pē hono ʻomi ʻe he lotú ʻa e mālohi—ʻa e mālohi fakalaumālié. ʻOku kei hokohoko atu pē hono ʻomi ʻe he lotú ʻa e melinó—ʻa e melino fakalaumālié.
Ngāue ʻi he Tuí
Ko e fē pē ha feituʻu te tau ʻi ai, ʻe lava ke fanongo mai ʻetau Tamai Hēvaní mo tali ʻa e lotu ʻoku ʻohake ʻi he tuí. ʻOku moʻoni ʻeni pea fakatautefito ʻi he malaʻe ngāue fakafaifekaú ʻi he funga ʻo e māmaní. Lolotonga ʻeku tokangaʻi ʻa e Misiona Kānatá, ʻi he malumalu ʻo e fakahinohino ʻa Palesiteni Tēvita O. Makeí (1873–1970), ne ma maʻu ai mo Sisitā Monisoni ʻa e faingamālie ke ngāue mo ha niʻihi ʻo e kau talavou mo e finemui lelei taha ʻi he māmani ko ʻení. Naʻe hā mei he moʻui ʻa e kau faifekau kei talavoú ni ʻa e tuí mo e lotú.
ʻI he ʻaho ʻe taha ne tangutu ai ʻi hoku ʻōfisí ha faifekau foʻou ne toki tau ange. Naʻá ne ʻatamai lelei, sino mālohi, fiefia, mo houngaʻia heʻene hoko ko ha faifekaú. Naʻá ne loto vēkeveke mo maʻu ʻa e holi ke ngāue. ʻI heʻema talanoá, ne u pehē ange, “ʻEletā, ʻoku ou tui pē naʻe poupou kakato atu hoʻo tamaí mo hoʻo faʻeé ʻi ho uiuiʻi ngāue fakafaifekaú.” Ne punou hono ʻulú peá ne tali mai, “ʻIkai ke fēfē fau. Ko e meʻá Palesiteni, he ʻoku ʻikai ke Siasi ʻeku tamaí. ʻOku ʻikai te ne tui tatau mo kitautolu, ko ia ai ʻoku ʻikai lava ke ne houngaʻia kakato ʻi hono mahuʻinga ʻo ʻeku ngāué.”
Ne ʻikai te u toe tatali pea naʻe ueʻi au ʻe ha Tokotaha kehe ke u pehēange kiate ia, “ʻEletā, kapau te ke faitotonu mo tauhi faivelenga ki he ʻOtuá ʻi hono fakamafola ʻEne pōpoakí, ʻe kau hoʻo tamaí ki he Siasí ʻoku teʻeki ai ʻosi hoʻo ngāué.” Naʻá ne kuku maʻu hoku nimá, peá ne fakatē loʻimata ʻo kamata ke tafe hifo ʻi hono kouʻahé, mo ne pehē mai, “Ko e tāpuaki maʻongoʻonga taha ia kiate au ʻi heʻeku moʻuí ke u sio ʻoku tali ʻe heʻeku tamaí ʻa e moʻoní.”
Ne ʻikai nofo noa pē ʻa e talavoú ni mo e fakaʻamu ʻe fakahoko ʻa e talaʻofa ko iá, ka naʻá ne fai ki he faleʻi fakapotopoto motuʻa ko ia ʻoku pehē: “Lotu ʻo hangē ʻoku fakafalala ʻa e meʻa kotoa pē ki he ʻOtuá. Ngāue ʻo hangē ʻoku fakafalala ʻa e meʻa kotoa pē kiate koe.” Naʻe pehē ʻa e ngāue fakafaifekau ʻa e talavoú ni.
Ki muʻa e kamata ʻa e konifelenisi kotoa pē ʻa e kau faifekaú ne u kumi ia ʻo fehuʻi ange, “ ʻEletā, fēfē Tangataʻeikí?”
Ko e tali tataú ai pē, “ ʻOku ʻikai ha fakalakalaka Palesiteni, ka ʻoku ou ʻiloʻi ʻe fakahoko ʻe he ʻEikí ʻa e talaʻofa naʻe fai kiate au ʻo fakafou mai ʻiate koe ko ʻeku palesiteni fakamisioná.” Ne ʻosi atu e ngaahi ʻaho, ʻosi atu mo e ngaahi uike, hoko atu mo e ngaahi māhina, pea ʻi he uike ʻe ua kimuʻa peá ma foki mo kimaua mei he ngāué, ne u maʻu ha tohi mei he tamai ʻa e faifekaú ni. Ko e tohi ʻeni ʻene tamaí:
“ ʻAlā Siʻi Misa Monisoni:
ʻOku ou fie fakamālō lahi atu kiate koe ʻi hoʻo tokangaʻi lelei hoku fohá ʻa ia ne toki ʻosí ni mai pē ʻene ngāue fakafaifekau ʻi Kānata. Kuó ne hoko ko ha tākiekina fakalaumālie kiate kimautolu.
“Kimuʻa pea mavahe hoku fohá ki heʻene ngāue fakafaifekaú, naʻe talaʻofa kiate ia te u hoko ko ha mēmipa ʻo e Siasí kimuʻa peá ne toki foki maí. ʻOku ou tui ko e talaʻofa ʻeni naʻá ke fai kiate ia, kae ʻikai te u ʻilo ki ai.
“ ʻOku ou fiefia ke fakahā atu naʻá ku papitaiso ki he Siasí ʻi he uike ʻe taha kimuʻa pea ʻosi ʻene ngāue fakafaifekaú pea ʻoku ou lolotonga hoko ko e talēkita ʻo e MIA peá u hoko ko ha faiako.
“ ʻOku lolotonga ako hoku fohá ʻi BYU, pea naʻe toki papitaisó ni mo hilifakinima hono kiʻi tehiná ko ha mēmipa ʻo e Siasí.
“Tuku muʻa ke u toe fakamālō atu ʻi he angaʻofa mo e ʻofa naʻe fai ki hoku fohá ʻe hono ngaahi tokoua ʻi he malaʻe ʻo e ngāue fakafaifekaú lolotonga e taʻu ʻe ua kuo hilí.
“Fakaʻapaʻapa atu, ko ha tamai loto houngaʻia.”
Kuo toe tali ʻa e lotu ʻi he loto fakatōkilaló ʻi he tui.
ʻOku ʻi ai ha ʻulungāanga mahuʻinga ʻoku hā ʻi he fakamatala kotoa pē fekauʻaki mo e tuí mei he kamataʻanga pē ʻo māmaní ʻo aʻu mai ki he taimi lolotongá. Naʻe loto ʻa ʻĒpalahame, Noa, tokoua ʻo Sēletí, Palōfita ko Siosefa Sāmitá, mo ha niʻihi kehe tokolahi ke talangofua ki he finangalo ʻo e ʻOtuá. Naʻa nau maʻu ha telinga naʻe lava ke fanongo, mata naʻe lava ke mamata, mo ha loto naʻe lava ʻo ʻiloʻi mo ongoʻi.
Ne ʻikai ha taimi te nau veiveiua ai. Naʻa nau falala.
ʻE lava ke tau kolea ʻa e ivi māfimafi ʻo e ʻOtuá ke fakahaofi ʻa kitautolu ʻi he lotu fakatāutahá, ʻi he lotu fakafāmilí, ʻi heʻetau falala kiate Ia ʻi he tuí, ʻo taʻefakataʻetaʻetuí. ʻOku kei tatau pē ʻEne ui kiate kitautolú: “Haʻu kiate au.”15
Taá naʻe fai ʻe Matthew Reier; Ko e Mamata ʻa e Tokoua ʻo Sēletí ki he Toʻukupu ʻo e ʻEikí, tā ʻe Arnold Friberg, © IRI
Ko e tuí, ʻo taʻefakataʻetaʻetuí, naʻe mamata ai ʻa e tokoua ʻo Sēletí ki he ala ʻa e toʻukupu ʻo e ʻOtuá ki he ngaahi foʻi maká ko e tali ki heʻene lotú.
Toʻohemá: taá naʻe fai ʻe Craig Dimond; toʻomataʻú; taá naʻe fai ʻe David Newman
Ko Sīsū Kalaisi, tā ʻe Harry Anderson, © IRI