Ko e Ako mei he Palōfita ko Siosefá
Sue Barrett, Ngaahi Makasini ʻa e Siasí
Ko e taha ʻo e ngaahi efiafi fakafāmili ʻi ʻapi ne mau saiʻia taha aí ko hono fakatātaaʻi e talanoa kia Siosefa Sāmitá mo e ʻUluaki Mata-Meʻa-Hā-Maí. Ne u fai e talanoá; hili iá pea fakatātaaʻi leva ʻe hoku makapuná ʻa e kau faifekaú mo Siosefa Sāmita. Naʻá ku tā ha ʻuluʻakau ʻi ha pepa ke fakafofongaʻi e vaoʻakaú pea fakapipiki kinautolu he holisí ʻi he tuliki ʻo e lokí, tohiʻi e “Faifekau” ʻi ha ngaahi laʻipepa maʻá e kau faifekaú, pea ʻai mo ha sea mo e Tohi Tapu ke lau mei ai ʻa “Siosefa.”
Naʻe takitaha pehē ange ʻe he kau faifekaú kia Siosefa, “Ko hoku siasí ʻoku moʻoní. Siosefa, kau mai ki hoku siasí.” Pea taliange ʻe Siosefa, “Heiʻilo,” pe, “ʻOku fie maʻu ke u fakakaukau ki ai.” Hili e lea kotoa ʻa e kau faifekaú kia Siosefá, naʻá ne tangutu ʻi he seá ʻo lau leʻolahi ʻa e Sēmisi 1:5. Hili iá naʻá ne ʻalu ki he “vaoʻakaú” pea tūʻulutui ʻo lotu. Naʻe ʻikai ke fakatātaaʻi ʻe ha taha ʻa e Tamai Hēvaní pe ko Sīsū Kalaisi, pea naʻa mau ʻapasia hono kotoa ʻi he taimi takitaha naʻe ʻalu ai ʻa “Siosefa” ki he vaoʻakaú ʻo lotú. Naʻe ʻi ai e faingamālie ʻo e kiʻi tamasiʻi takitaha ke fakatātaaʻi ha faifekau pe ko Siosefa.
Ne mau talanoa leva ki he meʻa naʻe ako ʻe Siosefa Sāmita ʻi he ʻUluaki Mata-Meʻa-Hā-Maí, ʻa e founga ʻoku maʻu ai e tali ki heʻetau ngaahi lotú neongo ʻoku ʻikai ke tau mata-meʻa-hā-mai, pea mo e founga ʻoku lava ke fakahinohinoʻi ai kitautolu ʻe he folofolá.