Mai Rogoca na Domona E Dua na Parofita

Na Loloma ni Dua na Parofita

Mai vei Peresitedi Dieter F. Uchtdorf

iKarua ni Daunivakasala ena Mataveiliutaki Taumada

Mai na vosa ena koniferedi raraba ni Epereli 2008.

President Dieter F. Uchtdorf

Ena vica na yabaki sa oti e a lako mai ki na dua na koniferedi cokovata e Hamburg, Jamani o Peresitedi Thomas S. Monson, kau mani tomani koya voli kina.

E a vakatataro o Peresitedi Monson baleti Baraca Maikeli Panisi, e dua ka a dau peresitedi tu ni iteki ka dua na painia yalodina ni Lotu e Jamani. Au tukuna vua ni o Baraca Panisi sa tauvimate bibi tu, ka sa davo tu ga vakadua ka dredre vua me tiko ena neitou bose.

Qai kereya o Peresitedi Monson de na rawa ni keitou laki sikovi koya mada.

Au sa kila tiko ni bera na veisiko mai nei Peresitedi Monson ki Hamburg, ni a sele na yavana ka dau mosi sara vua ni dau taubale. Au tukuna sara ni o Baraca Panisi e tiko ena taba lima ni dua na vale cecere sega na kena liva. Keitou na kabata cake na ikabakaba kevaka me keitou via raici koya.

A vinakata ga o Peresitedi Monson me keitou lako kina. Keitou sa mani lako.

Au nanuma sara na dredre ni nona sasaga cake ena ikabakaba o Peresitedi Monson. Vakalailai ga na nona kabata e vica na ikabakaba sa laki tu vakadua me vakacegu. Sega vakadua ni rogo mai vua e dua na vosa ni vakacauoca se me tu vakasuka. Me vaka ni sa rui rewa icake na siligi ni vale, sa yawa cake talega vakakina na ikabakaba, ia o Peresitedi Monson e vosota ga na cabe me yacova ni keitou sa tu ena katuba nei Baraca Panisi ena taba lima ni vale.

Dua na veisiko totoka keitou a vakayacora. E a matamamarau tu vua o Peresitedi Monson ena nona vakavinavinakataka na nona a veiqaravi tu mai vakadede ena nona bula. Ni bera ni keitou biubiu, a solia vua o koya e dua na veivakalougatataki ni matabete.

A rawa vei Peresitedi Monson me vakacegu ena maliwa ni bose ka ra vakayacori tiko. Ena ganita beka me a digitaka me sarava eso na vanua totoka ni Hamburg. Au se dau vakananuma voli ga ni bini tu na veivanua rairai totoka ena loma ni koro levu o ya, e a qai digitaka o koya me lako ga me laki raica e dua na lewenilotu qase ka sa malumalumu tu na nona bula.

E a lako mai ki Hamburg o Peresitedi Monson me mai vakalougatataki ira na lewe ni vanua. Ia, ena gauna vata oqori, e a vakanamata ga ki vua e duabulu.

Ena nona a tukuni Jisu o Pita na iApositolo, e kainaka ga vakaoqo: “ko [Koya] ka lako voli ka dau caka vinaka” (Cakacaka 10:38). E rawa talega ni da tukuna vaka o ya baleta na turaga eda tokona tiko me parofita ni Kalou.

Cabeti ni iKabakaba

E cabeta cake o Peresitedi Monson e levu sara na ikabakaba me laki vukei Baraca Panisi. Vakasamataka e tolu na ka ena rawa ni ko vukea kina e dua, vakabibi mai vale. Droinitaka e dua na iyaloyalo se ivola ena ikabakaba e yadua na ka o na cakava me rawa ni ko nanuma tiko kina.

Er Spricht Deutsch (“O koya e vosa vaka-Jamani”)

Sa imatai ni kai Jamani o Peresitedi Utchdorf me veiqaravi ena Mataveiliutaki Taumada. E a dau vosa vaka-Jamani tu ga ni se gone. Ena gauna oqo e dau vosa vaka-Valagi ni dau vosa ena koniferedi raraba. Raica na iyatuvosa sa koto e ra mai na dua na vosa nei Peresitedi Utchdorf ena koniferedi raraba ni Epereli 2008. Tovolea mo vakadewataka na vosa vaka-Jamani ki na nomu vosa.

“Au marautaka ni tiko vei au na dodonu meu vakatokai au meu lewe ni die Kirche Jesu Christi der Heiligen der Letzten Tage.”

“Au masu me solia vei au na Kalou na Kraft kei na Herz meu na dinata kina na itavi oqo.”

“Au sa kalougata dina niu mai cakacaka vata vakavoleka kei Präsident Monson. … O koya e Prophet Gottes.”

iMawi kei na imatau e cake: droini mai vei Beth M. Whittaker; imatau: droini mai vei Sam Lawlor