Na iVola Vou ni iYaloyalo Vakosipeli

Mai vei Michael G. Madsen

Vakatorocaketaki ni Lewenivuli ni Lotu

E dua na ivola sau rawarawa vauci ena waya sa solia tiko oqo vei ira na Yalododonu Edaidai e 137 na iyaloyalo rokataki me ra vakayagataka ena vulici kei na vakavulici ni kosipeli.

Ena loma ni valenivolavola nei Peresitedi Thomas S. Monson e lili tu kina e dua na iyaloyalo ni iVakabula mai vua na daudroini o Heinrich Hofman. E kaya na parofita ni iyaloyalo oqo e vakadreti koya me cakava na ka e gadreva na iVakabula me cakava. Na iyaloyalo e rava me kaukauwa nona vakayarayarataki keda vakayadua, me vaka e cakava na iyaloyalo oqo kivei Peresitedi Monson.

Mai na dua na gagadre me vakarautaki na iyaloyalo sau rawarawa baleti ira na lewenilotu me ra vakayagataka ena kalasi ni Lotu ka vakakina ena noda veivale, sa vakarawarawataka na Lotu na iVola ni iYaloyalo Vakospeli ka tu kina e 137 na iyaloyalo kei na itaba. Na iyaloyalo oqo e rawa me tokona na lesoni e vakatavulici ena dua ga na vanua tekivu mai na iVunau ni Kosipeli ki na gauna ni veiwasei ni Lalai. Sa rawa talega me ra vakayagataki ena lotu vakamatavuvale, vulica yadua ni ivolanikalou, cakacaka ni daukaulotu, kei na dauveituberi se veisiko.

Na droini yadua ena ivola oqo e vakatara e dua na gauna ni veivakavulici—na madigi ni talanoataki ni dua na itukunl ena ivolanikalou ka vakakina na vakatavulici ni dua na ivakavuvuli. Me vukei keda, na iVola ni iYaloyalo Vakosipeli okati kina e dua na ituvatuva ka semati ira na iyaloyalo ki na kedra itukutuku ena ivolanikalou. Na vakasaqarai ni ivolanikalou oqo ena vakatitobutaka noda kila ena veika kei na ivakavuvuli vakosipeli e vakaraitaki tu ena iyaloyalo yadua.

Oqo e tolu na sala ka rawa kina ki na iVola ni iYaloyalo Vakosipeli me vakayagataki ena vakatavulici ni dua na lesoni

1. Vakasamataka mo sureta na tamata yadua me vakasaqara na ivolanikalou ka semati ki na dua sara ga na iyaloyalo. Kerei ira me ra wilika e cake na ivolanikalou se me vakalekalekataki ena nomuni veivosakitaka vata tiko na iyaloyalo.

2. Tovolea mo kerei ira vakayadua me ra vakamacalataka na cava era raica ena dua na iyaloyalo. Na ivakavuvuli vakosipeli cava e vakavulica tiko na iyaloyalo? E rawa vakacava meda vakayagataka na ivakavuvuli oqori ena noda bula nikua?

3. Ni oti na kena vakatavulici e dua na ivakavuvuli vakosipeli, sureti ira eso me ra vakasaqara na iVola ni iYaloyalo Vakosipeli, ka vakasaqara na iyaloyalo e vakaraitaka tiko na ivakavuvuli o ya. Tarogi ira vakayadua se cava era vakila ena nodra sa raica oqo na iyaloyalo, me vaka ni ra sa veivosakitaka oti na kena ibalebale.

Ena noda vuli kei na veivakavulici taucoko ni kosipeli, me da vakasaqara ena yalo masumasu na veivakauqeti (raica V&V 42:14–17). Ni da vakayacora vakakina, ena kauta mai na Yalo Tabu eso tale na vakanananu ena noda vakasama me semati ka sota vata kei na nodra gagadre o ira eda vakatavulica. Na iVola vou ni iYaloyalo Vakosipeli sa ikoya e dua na iyaragi bibi ka rawa me vukei keda ena noda veivukevukei ena noda lako vei Karisito ka ciqoma na veivakalougatataki ni bula tawamudu.

Kaukauwa ni Veivuke Vakaiyaloyalo

“O ira na qasenivuli era gadreva me ra vakalevutaka na kena rawa vei ira era vuli me ra kila ka vuli era na rawa talega ni vakayagataka na iyaloyalo. E levu sara na tamata era na vulica vakavinaka cake ka nanuma vakabalavu cake ena nomu vakaraitaka na vakasama ena kena vakayagataki na iyaloyalo, mape, iwasewase ni vosa, se so tale na iyaloyalo mai na kedra tukuni tu ga.”

Veituberi, Me iLutua ni Noda Bula (1999), 205.

E Rawa Vakacava Meu Vakayagataka na iVola ni iYaloyalo Vakosipeli ?

1. Ko na rawa ni kunea ena initaneti ena dua ena www.gospelart.lds.org

2. E rawa mo volia na iVola ni iYaloyalo Vakosipeli (naba ni ivola 06048) ena nomu sitoa ni lotu.

3. E Amerika kei Kenada, e rawa mo otataka na ivola ena initaneti www.ldscatalog.com se qiri ki na 1-800-537-5971.

Mai na imawi: iTaba kei Karisito, mai vei Heinrich Hofmann, lolomataki mai vei C. Harrison Conroy Co.; ivakaraitaki ni itaba mai vei Matthew Reier, Hyun-Gyu Lee, kei Christina Smith