Gauna ni Veiwasei

Keimami Vakabauta ni Matavuvale sa Vakatabuya na Kalou

“Na matavuvale sa iusutu ni nona yavu na Dauniveibuli me baleta na nodra rawata na bula tawamudu o ira na Luvena” (“Na Matavuvale: Ai Vakaro ki Vuravura Raraba”).

A tamata ca ko Amalikaia. E a yalataka vei ira na Nifai e levu na ka kevaka me ra digitaki koya me tui. Lewe levu na tamata era sa tokoni koya ka vuki tani mai na ivalavala dodonu.

E a turaga ni valu tu ni Nifai o Moronai. A tamata yalododonu ka vakabauti Jisu Karisito. Ni sa rogoca o Moronai ni lewe levu na tamata era sa muri Amalikaia sa cudru sara vakalevu. E kila ni levu na tamata era sa na vakayalia na nodra galala.

E a dresuka e dua na tiki ni nona kote ka vola kina, “Me ivakananumi ni noda Kalou, na noda lotu, na noda galala kei na noda veisaututaki, io me baleti ira na watida kei ira na luveda” (Alama 46:12). Sa qai vesuka ena mua ni dua na kau balavu ka vakatoka me yavu ni bula galala. Sa qai masulaki ira na tamata ka sikovi ira yani, ka vakarewataka tiko na yavu ni bula galala ka sureti ira na Nifai me ra muri koya ka taqomaka na nodra galala. E a dresuka e dua na tiki ni nona kote ka vola kina, “Me ivakananumi ni noda Kalou, na noda lotu, na noda galala kei na noda veisaututaki, io me baleti ira na watida kei ira na luveda” (Alama 46:12).

Ko ni sa bula tiko ena dua na gauna era sa basika kina eso na tamata vakataki Amalekaia ka ra vinakata mo ni kakua ni muria na yavu ni Tamada Vakalomalagi. E dua na tikina bibi ni yavu ko ya sa ikoya na matavuvale.

Vinakata na Tamada Vakalomalagi me ra kila na lewenilotu na Nona yavu baleta na matavuvale. Eratou vola na Mataveiliutaki Taumada kei na Kuoramu ni iApositolo Le Tinikarua “Na Matavuvale: Ai Vakaro ki Vuravura Raraba” me tukuni kina na ka eda vakabauta baleta na matavuvale. Me vaka na yavu ni bula galala, na ivakaro ena rawa ni vakauqeti keda meda nanuma ka vakamacalataka na ka eda vakabauta.

iTaviqaravi

Basuka na tabana e F4, ka vakabira ki na pepa vavaku. Vakaliliga na ivakaro ena dua na vanua e rawa ni ra raica kina na lewe ni matavuvale ka vakasamataka na bibi ni veivaqaqacotaki vakaikeda.

Vakasama ni Gauna ni Veiwasei

“Na Matavuvale: Ai Vakaro ki Vuravura Raraba” sa ivakatakila ni gauna oqo. Me ra rogoca na gone na nodra na cavuqaqataka vata tiko na ikaciwa ni yavu ni vakabauta se na cavuti vakavica na “ivakatakila” se “vakatakilai.” Vakatavuvulitaka ni Kalou e se vakatakila tikoga na Lomana vei ira na Luvena. Na sala ni veitaratara vakaoqo e vakatokai me ivakatakila. Solia e yadua na ilavelave ni, “Na Matavuvale: Ai Vakaro ko Vuiravura Raraba” vei ira na gone, ka vakamacalataka ni ivakaro sa ivakatakila ka soli mai ena gauna oqo vua na tamata digitaki ni Kalou. Solia vei ira na lewe ni kalasi e dua na iyatuvosa se malanivosa mai na ivakaro ka sega ni volai tu kina eso na kena vosa. Me ra na qai cakacaka vata ka vakacuruma ena vanua lala na kena vosa dodonu. Kena ivakaraitaki: “Na sa ni nona na Dauveibuli me baleta na nodra rawata na bulatawamudu o ira na luvena.” Sureti ira na lewe ni kalasi me ra tucake ka wilika na veika era sa vakacuruma ki na iyatuvosa. Lagata na imatai ni qaqa ni sere “Na Matavuvale Vakalou” (Liaona, Okot. 2008, F12–F13). Vakabibitaka ni ivakaro baleta na matavuvale sa ivakatakila mai vua na Kalou ka sa dodonu meda kila ka talairawarawa ki na kena ivakavuvuli. Soqona vata na ilavelave ni ivakaro; ni ko na vakayagataka tale ena ikatolu ni macawa.
“Na Matavuvale: Ai Vakaro ki Vuravura Raraba” e vakatavuvulitaka na bibi ni bula-vakawati. Sureta eso na lewe ni tabanalevu se tabana ka me vakadonuya na bisopi se peresitedi ni tabana me ra vakaitavi ena dua na veitalanoa me baleta na bibi ni bula vakawati (raica “Panel Discussions,” Na Veituberi, Me iLutua ni Noda Bula [1999], 175–76). Solia rawa vei ira na taro ko na taroga ni bera na kalasi. iVakaraitaki: Sa vakalougatataki iko kei na watimu vakacava na Tamada Vakalomalagi? E rawa beka mo wasea e dua na italanoa vakosipeli ka sa vukei iko kei na watimu yalewa (se tagane)? Na cava e rawa ni ra sa cakava tiko qo na gone me ra vakavakarau ki na bula vakawati? Sa rawa ni ko vakatututaka me ra raica lesu na lewe ni kalasi na “Na Matavuvale: Ai Vakaro Raraba ki Vuravura.” Me ra vakaitavi yadudua na gone me ra digitaka na wiliki ni dua na taro? Me ra wilika yadua na lewe ni mataveitalanoa na nodra isau ni taro. Vakadinadinataka na bibi ni bula vakawati ena yavu ni Tamada Vakalomalagi.

iVakaraitaki ni itaba mai vei Mathew Reier