Kukuva na Wakana Kaukauwa

Melsida Hakobyan, Armenia

Niu se gonevuli voli mai Rusia, au a wilika e dua na italanoa vakarerevaki me baleta e rua na cauravou ka rau a sotava e dua na pera ena dua na loma ni veikau. Ena vica na yabaki ki muri, niu sa qasenivuli voli, era a kerei au eso na itokani meu lako vata kei ira ki caka karou (mushroom). Au se dau rerevaka voli ga na veikau, ia au a vakadonuya meu lako vata kei ira.

Niu curuma yani na veikau au taura e dua na kau me rawa niu taqomaki au kina deu sotava e dua na pera. Sega ni dede era sa kunea na noqu itokani na karou dravudravu vinaka era vakasaqara tiko. Ko au, au vaqara tiko na karou e damudamu kata na qolona, au sa mani gole kina ki na yasana kadua. Sega ni dede au sa tu duadua.

Niu vaqaqara tiko, au a sisi ka lutu. A vuka ki macawa na noqu basikete karou (mushroom), ia au taura matua toka ga na noqu kau. Niu via tucake mai, au qai kila ni soso ka kabikabi sara na qele. Ena vuka ni yaloqu, au qai kila niu sa lakova yani e dua na veidabibi! Sa sinai ena wai na noqu ivava rapa, ka sa tekivu meu luvu. Au tovolea meu yavalata na yavaqu, ia au sega ni vagalalataki au rawa, kau sa qai lutu ga yani vakatitobu. Ni sa yaco ki dibiqu na soso, sa ologi au na rere levu.

Au kaila yani vei iratou na noqu itokani, ia na kena isau ga au rogoca na domo ni lagowai kei na tagi ni boto. Ni tekivu meu tagi, e vakasauri na noqu nanumi buqu. Ena veigauna kecega e tu kina ena dua na itutu ca, e a masu. E dau sureti au vakavuqa meu masu, ia au dau bese ena veigauna, kau kaya ni, “Sega na Kalou.”

Ia ena noqu vanua waiwaiya ka sa voleka oqo me noqu ibulubulu, sa sega tale ni dua na ka au rawa ni cakava ia meu sa na masuta ga na Kalou me vukei au. “Kevaka O bula tiko, yalovinaka vukei au!” Au tagicaka yani.

E voleka ni gauna vata ga o ya, au rogoca e dua na domo malumu ni tukuna mai, “Vakabauta ka kakua ni rere. Kukuva na waka ni kau kaukauwa.”

Niu veiraiyaki, au raica e dua na waka ni vunikau levu e dakuqu. Ena noqu vakayagataka na noqu kau, a rawa meu dolele yani kina. E dua na ka e qai solia vei au na kaukauwa meu dreti au tani mai na dabibi.

Niu solegi tu ena soso, au a bale ki na qele ka vakavinavinaka vua na Kalou ena nona sauma na noqu masu. Au sa vakabauta ena gauna oqo ni bula tiko o Koya. Au sa vakila na Kena iserau ka rogoca na Domona, ka sa solia vei au ko Koya na kaukauwa meu dreti au tani mai kina.

Ena dua na gauna lekaleka ki muri, ena nodrau vakavulici au na daukaulotu ni a saumi na nona masu na Parofita ko Josefa Simici ena Veikau Tabu, au a vakabauta. Baleta, ni a sauma na Kalou na noqu masu ena loma ni dua na veikau. Au a dolele yani ki na wakatu kaukauwa ni kosipeli, a papitaiso ni oti ga vakalailai na gauna ko ya, kau sa veiqaravi tiko nikua ena Tabana ko Gyumri e Amenia.

Au kila ni lomani ira kece sara na Luvena na Tamada Vakalomalagi, kau vakavinavinaka niu lewena na Lotu i Jisu Karisito ni Yalododonu Edaidai. Au sa vakavinavinaka talega ena levu ni veivakalougatataki au sa ciqoma mai vua na Tamada Vakalomalagi, vakauasivi ena Nona sauma na nona masu e dua ka sega ni vakabauta na Kalou ena loma ni veikau ena vuqa na yabaki sa oti.

Ni sa yaco ki dibiqu na soso, sa ologi au e dua na rere levu. Au kaila yani vei iratou na noqu itokani, ia na kena isau ga au rogoca na domo ni lagowai kei na tagi ni boto.