iTokani ki na iTokani

Na Valetabu sa iSolisoli mai vua na Tamada Vakalomalagi

Mai vei Elder Yoshihiko Kikuchi

Ena Vitusagavulu

E dua na vosa mai na koniferedi raraba ni Epereli 2007.

Era sa rawata na matanitu vakalomalagi ko ira na gonelalai era a mate, ni ra sa bera ni yacova na yabaki walu” (V&V 137:10).

Elder Yoshihiko Kikuchi

Au a lesi meu lako ki na dua na koniferedi ni iteki mai Kalivonia, ena vica na yabaki sa oti. E a dabe toka e yasaqu e dua na marama totoka rauta ni yabaki 70, ena gauna ni vuka lesu mai ki Utah. Na yacana o Patti, ka sa rui karaki vosa.

Tukuna vei au o Patti baleta na nona matavuvale—baleta na turaga watina kei na luvena tagane ka rau sa mate. Toso tiko na neirau veitalanoa me yacova ni keirau sa vakarau kele. Au kaya, “Patti o sa vosa tikoga mai ena gauna taucoko ni vuka. Ni bera ni daru kele yani ki Salt Lake, au vinakata meu tarogi iko mada ena vica na taro.”

Au tarogi koya yani vakadodonu, “Patti, ko kila tiko li ni ko na sotavi watimu tale?”

Kaya mai o koya, “Oi, ena rawa beka?”

Au qai taroga, “Ko kila tiko li ni ko na sotavi Matt tale na luvemu tagane, ka a se mate ni se gone lailai?”

Sa tonawanawa mai na matana, ka sa mamakeukeu cake mai vakamalua. Sa tarai koya na Yalo ni Turaga. Sa galili sara ga ni rau sa yali.

Au masu lo ka taroga, “Patti, ko kila tiko li ni tiko e dua na Tamada Vakalomalagi dauloloma ka lomani iko sara vakalevu?”

Kaya mai o koya, “E dinataki li?”

Au taroga, “Patti, Ko kila tiko li ni tiko e dua na ituvatuva ni Tamada Vakalomalagi me baleti iko ka na rawa ni tawamudu na nomu matavuvale?”

“E rawa li?” taroga lesu mai o koya.

“Ko sa bau rogoca mada ena dua na gauna na yavu o ya?” Au taroga.

Kaya mai o koya, “Sega.”

Au taroga yani ena yaloqu taucoko, “Ko na vinakata beka mo kila?”

“Io, au vinakata sara ga.”

Sa tarai koya sara vakabibi na Yalo ni Turaga

Sa ra qai vakavulici Patti na daukaulotu. Ni oti e tolu na macawa ka se tiko voli ga e Utah, a qiriti au mai o Patti ka kaya, “Baraca Kikuchi, qo o Patti. Au sa na papitaiso. E rawa beka ni ko na lako mai ki na soqoni ni noqu papitaiso?”

Keirau mani lako kina kei watiqu. Levu sara na lewenilotu era sa qai dau vakaitokanitaki koya voli. Au na sega ni guilecava rawa na kena rairai vinaka ni sa cabe mai na wai ni papaitaiso.

Au na sega ni guilecava na totoka ni kena irairai ena icabocabo ni isoro ena valetabu e Salt Lake ni oti e dua na yabaki. Au nanuma sara na irairai serau kei na yalovakacegu ka laurai vua ni sa vauci vei watina kei luvena tagane vakakina vei luvena yalewa, ka sa lewena oti tu na Lotu.

Sa mai kunea na Turaga o Jisu Karisito o Patti na noqu itokani. Sa mai kila qo o koya ni sa na tawamudu na nona matavuvale baleta na valetabu.

Dua na Gonetagane Vinaka

O Elder Kikuchi e a sucu ka tubucake ga e Japani. Ena veimataka ni se gone, e dau yadra ga mai sa vakaisulu sara. Sa qai dau cuva vei tamana ka kaya, “Yadra Tamaqu. Au na gone vinaka.” Sa qai dau karoni koya e ligana o tamana ka kaya, “Au lomani iko.” Dau kadruvi koya na kumi tamana, ia e kila tu ga o koya ni lomani koya o tamana.

Mate o tamai Elder Kikuchi ena iKarua ni iValu Levu A tea o tinana e dua na iteitei me vukea na nodratou kana na matavuvale. E a tei pateta, papukeni, baigani, kareti kei na kaveti.

Na gauna e yabaki 14 kina o Elder Kikuchi, sa laki cakacaka sara ena dua na kabani caka tofu ena siga ka lako ivuli ena bogi. Dua na siga erau sa tukituki ena katuba e rua na cauravou vakaisala, vakaivava-rapa, ka vakote balavu. Erau daukaulotu. E vakila o Elder Kikuchi na Yalotabu ena nodrau vakavulici koya tiko na daukaulotu. A papitaiso ni oti ga e 14 na siga.

Oti e vica na yabaki sa laki vuli ki na koliji ka qeretueti mai kina.

O Elder Kikuchi e a imatai ni Vakaitutu Raraba mai Japani.

Droini mai vei Dilleen Marsh; itaba ena lomasoli ni matavuvale na Kikuchi, vakavo kevaka me volai tu; veitaba ni kerot © Getty Images; mai dakuna: veitaba o Welden C. Andersen

Elder Kikuchi ni daramaka tu e dua na kimono ena nona ikarua ni siganisucu. Rawa mo raica na ka ni vakatatalo e ligana?

Elder Kikuchi (ena imawi e liu) ni yabaki 13, kei ira nona icaba kei na qasenivuli.