Taro kei na Kena iSau
“Au gone taudua ena vica vata na yabaki ena neitou matavuvale. Au dau vakila niu guilecavi tu mai vei iratou eratou qase cake vei au ena itaviqaravi kei na veitalanoa. Na cava au rawa ni cakava meu vakavinakataka cake kina na neitou veimaliwai?”
Na bolebole oqori e rawa ni dua na gauna vinaka me ra kila kina na tuakamu ni o vinakata mo dau vakaitavi ena veika ni nodra bula. De ratou sega tiko beka ni kila ni o dau nanuma ni ratou sa guilecavi iko tiko. E rawa talega ni o veitalanoa vata kei rau na nomu itubutubu ena vuku ni ka oqo. Ena so na vakasama vivinaka ena tu vei rau.
Vakatura vei iratou na tacimu eso na itaviqaravi e rawa ni o cakava vata kei iratou, ka vakasamataka na ulutaga eso e rawa ni o veitalanoataka vata kei iratou. Dau nanuma toka na veika era sa tuvalaka tu kei na veika era dau taleitaka ena nomu nakita na sala eso mo dau tiko kina vata kei ira. Na nomu vakarorogo kei na nomu vakaraitaka vei ira na nomu taleitaka na nodra itaviqaravi ena sega walega ni vakavinakataka na nomudou veimaliwai ia ena vukea talega na nomu vuli. Era sa sotava tiko na veika vata o na sotava ena loma ni vica na yabaki ka lako mai.
Nanuma na bibi ni matavuvale ena ituvatuva nei Tamada Vakalomalagi. Kevaka o na masuta na Nona veivuke, e rawa Vua me vakauqeti iko ena veivakasama me vakavinakataki cake kina na nomu dau veimaliwai vata kei ira na tacimu. Mo yaloqaqa ka cakacakataka na veivakauqeti e soli mai vei iko.
Veitalanoa vata kei Rau
Ena noqu matavuvale, koi au talega au gone duadua ena vica vata na yabaki, ia au qai kila ni ratou vinakata na tuakaqu me ratou kilai au me vaka ga na noqu vinakata meu kilai iratou. Eratou na marautaka sara na tuakamu kevaka o na qiriti iratou mo dou veitalanoa se sureti iratou mo dou laki vakasigalevu ena dua na gauna. Tukuna vei iratou na veika e yaco tiko ena nomu bula. Ena vakaibalebale vakalevu sara vei iratou na nomu taleitaka mo wasea vata kei iratou na nomu nanuma kei na lomamu. Dau veitalanoataka talega vata kei iratou na ulutaga vakayalo eso. Ena vukei iko mo voleka cake sega walega vei iratou ia vei Tamamu Vakalomalagi talega.
O Kelsey H., 16, Alberta, Kenada
Mo iVakaraitaki Vinaka
Au sa sotava talega e dua na mataqali gauna dredre vakaoqo. Au vakabauta ni ka vinaka duadua e rawa ni da cakava sai koya me da ivakaraitaki vei ira na tuakada. Na sala oqo ena rawa ni tiko kina vata kei keda na loloma kei na vakacegu. E dodonu me da tukuna vei ira na levu ni noda lomani ira, ka dodonu me da tovolea me da duavata vakamatavuvale. Ena dua na gauna era na qai vakila kina na levu ni noda lomani ira. Au kila ni na yaco vakaitagede na veika oqo.
O Ádám B., 16, Gyor-Moson-Sopron, e Hungary
Dou Dau Tiko Vata ena So na Gauna
Ena so na gauna e dau dredre ni da tiko vata kei ira na tuakada kei na ganeda qase ena vuku ni vuli kei na veika tale eso e dau vakayacori e veisiga. Ia ena veigauna e rawa kina vei iko, lako ga ka veitalanoa vata kei ira, tukuna vei ira na veika o dau cakava ena dua na siga, ka taroga se ra sa vakacava tiko. Kevaka o sotava tiko eso na leqa me baleta e dua na ka, e rawa ni ko taroga na nodra vakasama me ra kila ni ko dau taleitaka na nodra nanuma. Dau raici ira ena kena ivakarau o vinakata me ra dau raici iko kina. E rawa ni ko ni dau qito ka veimaliwai—ena veivuke sara vakalevu. E dodonu mo dau tukuna talega vei ira na levu ni nomu lomani ira. Ia e bibi duadua ga, na masu. Ena dau vukei iko tikoga na Tamada Vakalomalagi.
Katherine M., 14, Idaho, USA
Dau iVakarau Vakayalovinaka vei Ira
Niu gone duadua ena neitou matavuvale, au dau vakila ena vuqa na gauna niu dau guilecavi mai na nodratou itaviqaravi kei na nodratou veitalanoa na qase cake, vei au sa dau vakamosi yalo dina. Ia niu vakasamataki Jisu Karisito, au qai kila ena noqu wasea vata kei iratou na noqu matavuvale na veika au dau taleitaka, sa rawa kina ni keitou veivaqaqacotaki ka veivakayaloqaqataki. Dau yalovinaka ka vakarokorokotaki ira na tamata kecega. Dau vakaraitaka na nomu taleitaki ira, ka me ra kila ni o dau kauwaitaki ira.
O Joseph M., 16, Leyte, Philippines
Dau Marautaka na Nomudou Gauna Vata
Ena so na gauna au dau vakila niu guilecavi me vaka ni sa dui tu ga na nodratou itaviqaravi na ganequ. Ia ni sa toso na gauna, sa qai yaco meu kila ni ra lomani au kece sara, ka sega ni ra besetaka na veimaliwai vata kei au ia ni sa vagauna na ka kecega. Sa ka bibi mo dau taleitaka na veigauna kece sara e rawa kina ni o tiko vata kei ira, mo dredre, yalovinaka, dau taleitaki, kei na kena isoqoni kece sara mo vakaraitaka vei ira na nomu loloma. Sa ka bibi vei iko mo dau kerea vei Tamada me vukei iko mo dau volekati ira na tuakamu kei na ganemu. Ena rogoci iko ka vukei iko ko Koya.
O Roberto S., 18, Santiago, Chile
Dau Taura na Gauna mo Vosa Kina
Au gone duadua vei keitou na veitacini lewe vitu. Niu se gone, au dau vakila ni vaka meu guilecavi, ia au qai kila talega ni ratou lomani au, vakalevu cake sara mai na ka au nanuma. E rairai e sega beka ni rawa mo vosa vei ira ena gauna sara ga oqo, ia na noqu gauna vinaka duadua vata kei iratou na tuakaqu na gauna keitou veivosaki kina. Au kila ni ratou vakabauti au vakalevu, ka se vaka tu ga kina oqo. Me rawa niu vosa vei ira, au dau tovolea meu vukei ira ena nodra itavi, meu dau yalovinaka, levea na veicudruvi vata kei ira, ka ilala vata kei ira me rawa kina ni ra vukei au. Oqori a vukea meu wili vata kei ira ka lomani.
O Maria H., 19, Mexico City, Mexico