Ko Hono ʻAi ke Hoko e Temipalé ko ha Konga ʻo Hoʻo Moʻuí
Maʻá e Toʻu Tupú
Neongo ʻokú ke teuteu ke maʻu ho ngaahi ouau fakatemipalé ʻi he kahaʻú, ʻe lava ke takiekina ʻe he temipalé hoʻo moʻuí ʻi he taimí ni.
Ko e temipalé ʻa e feituʻu toputapu taha ʻi he māmaní—ko ha feituʻu ʻoku fetaulaki ai ʻa e māmaní mo langi pea ʻoku tau ongoʻi ofi ai ki heʻetau Tamai Hēvaní mo Sīsū Kalaisi. Neongo ʻokú ke teuteu ke maʻu ho ngaahi ouau fakatemipalé ʻi he kahaʻú, ʻe lava ke takiekina ʻe he temipalé hoʻo moʻuí ʻi he taimí ni. Ko ha ngaahi meʻa ʻeni ʻe niʻihi te ke lava ʻo fai ke hoko ai e temipalé ko ha konga ʻo hoʻo moʻuí lolotonga ʻokú ke kei siʻí.
Kau ʻi he Papitaiso maʻá e Kau Pekiá
ʻE lava ke ʻaʻahi ʻa e kau talavou mo e kau finemui moʻui taau taʻu 12 mo motuʻa angé ki he temipalé ke papitaiso kinautolu maʻa ʻenau ngaahi kui kuo pekia teʻeki ai ke nau papitaisó. Naʻe lea ʻa Palesiteni Tōmasi S. Monisoni ʻo kau ki he fiefia ʻoku ʻomi ʻe he ngāue ko ʻení:
“ ʻI heʻeku luelue atu ki he temipalé ʻi he pongipongi ʻe taha, ne u mamata ki ha kau finemui ne nau kau hengihengia ki he papitaiso maʻanautolu kuo pekiá ʻi he pongipongi ko iá. Naʻe viviku honau ʻulú. Naʻa nau malimali fiefia. Naʻe fonu honau lotó ʻi he fiefia. Naʻe tafoki atu ha taʻahine ʻe taha ʻo hanga ki he temipalé mo ne fakahā e ongo naʻá ne maʻú. Naʻá ne pehē, ‘Ko e ʻaho fakafiefia taha ʻeni ʻo ʻeku moʻuí.’”1
Naʻe papitaiso ʻa e taʻahine taʻu hongofulu mā tolu ko Sēsika Haani mei Tefinī, ʻAlapamá, maʻá e niʻihi ʻo ʻene ngaahi kuí ʻi he Temipale ʻAtalanitā Sōsiá. Neongo naʻe houa ʻe nima ʻa e fononga ki he temipalé, ka ʻokú ne pehē ko e meʻa fakaʻofoʻofa naʻá ne aʻusiá. Naʻá ne pehē, “Naʻá ku ongoʻi fiefia ʻaupito ʻi he lava ke u tui ha teunga hinehina maʻa pea papitaiso au maʻa ʻeku ngaahi kuí. ʻOku ou ongoʻi he taimí ni ʻoku ou ʻilo kinautolu.”
Toutou ʻalu ki he temipalé ʻi he taimi te ke lava aí. ʻE lava ke ke maʻu ai ʻa e fiefia ʻo e tokoni ki he niʻihi kehé ke nau maʻu ʻa e ngaahi tāpuaki ʻo e papitaisó.
Poupouʻi e Ngāue ʻa e Temipalé
ʻOku lahi e ngaahi founga ke poupouʻi ai e ngāue fakatemipalé, neongo he ʻikai te ke lava ʻo toutou ʻalu ki ai. Te ke lava ʻo ako kau ki hoʻo ngaahi kuí pea sio ʻoku fakahoko e ngaahi ouau fakatemipalé maʻanautolu. Te ke lava ʻo tokangaʻi e fānau īkí kae lava ke ʻalu ʻenau mātuʻá ki he temipalé. Koeʻuhí ʻoku lahi e tokanga taha ʻa e ngāue fakatemipalé ki he ngaahi fāmilí, te ke lava ʻo ngāue ke fakamālohia ho fāmilí. Pea te ke lava ʻo vahevahe mo e niʻihi kehé hoʻo fakamoʻoní ko e moʻoni ko e temipalé ko e fale ia ʻo e ʻEikí.
Moʻui Taau ke Hū he Temipalé
Koeʻuhí ko e feituʻu toputapu ʻa e temipalé, kuo fokotuʻu ai ʻe he ʻEikí ha ngaahi tuʻunga moʻui māʻolunga ke tau moʻui ʻaki ki muʻa pea toki lava ke tau hū ki loto. Naʻe fakamatala ʻa Palesiteni Tieta F. ʻUkitofa “ ʻoku tatau ʻaupito ʻa e ngaahi tuʻunga moʻui kuo fokotuʻu ʻe he ʻEikí ʻi he ngaahi fehuʻi lekomeni temipalé mo e ngaahi tuʻunga moʻui ʻoku hā ʻi he Ki Hono Fakamālohia ʻo e Toʻu Tupú. ʻE tokoniʻi koe ʻe he ngaahi tuʻunga moʻui ko ʻení mo e fakahinohino ʻa e Laumālie Māʻoniʻoní ke ke fai ʻa e ngaahi fili totonú ʻi he ngaahi taimi ʻo e nongá pea ʻi he taimi foki ʻoku lahi ai ʻa e ʻahiʻahí. … ʻE talamai ʻe he founga hoʻo moʻui ʻaki e ngaahi tuʻunga moʻui ko ʻení ha meʻa lahi fekauʻaki mo koe mo e meʻa ʻokú ke feinga ke aʻusiá.”2
Moʻui ʻaki e ngaahi tuʻunga moʻui ʻa e ʻEikí, pea te ke taau ke hū he temipalé. ʻE lava ke tokoni atu ʻi hoʻo maʻu ʻa e holi ke ke hū he temipalé ke ke tafoki ai he ʻahó ni mei he ʻahiʻahí. Naʻe pehē ʻe Māloni Luisi, taʻu 16, mei Sanilaisi, ʻi Fololitá, “ ʻOkú ne ʻoatu ʻe ia ha ʻuhinga ke ke moʻui taau ai. Ko hoʻo maʻu pē ʻa e taumuʻa ko iá, ʻokú ke fakakaukau maʻu pē koe ki he meʻa ʻokú ke faí koeʻuhí he ʻikai te ke lava ʻo hū he temipalé kapau ʻoku ʻikai te ke moʻui taau.”
Palani ki ha Mali Temipale
Naʻe pehē ʻe ʻAnikā Leimaile, taʻu 16, mei ʻOsilou, ʻi Noaué, “ ʻOku ou sio ki he temipalé peá u fakakaukau ke u mali ai ʻi ha ʻaho. ʻOku ou ʻilo ko e ngaahi palōmesi ʻokú ke fai ʻi he temipalé ko ha ngaahi palōmesi ia mo e ʻEikí. He ʻikai liliu pe mole ʻa e ngaahi meʻa naʻá ke ako aí.”
Tauhi ha fakatātā ʻo e temipalé ʻi ha feituʻu te ke toutou sio ai ki aí, peá ke hanganaki atu ki he ʻaho ʻe lava ke maʻu ai ho ngaahi ouau fakatemipalé.
ʻI he taimi naʻe taʻu 14 ai ʻa Soti Heisolopeika mei ʻAmelikani Fooki, ʻi ʻIutaá, naʻá ne ʻaʻahi ki he ʻoupeni hausí ʻo e Temipale Mauni Timipanokosi ʻIutaá. Ko ʻene manatu ʻeni ki aí, “ ʻI heʻeku lue atu ʻi he loki ʻo e taʻahine malí, ne u kiʻi tuʻu ʻo sio fakamamaʻu ki he sioʻatá. ʻI heʻeku sió, naʻe lava ke u mamata kiate au ʻi he kahaʻú, ʻoku ou tui ha kofu mali fakaʻofoʻofa pea naʻá ku malimali. Ne u ʻilo ko e feituʻu ʻeni te u mali aí, ʻi he temipalé, ʻo ofi ki heʻeku Tamai ʻi Hēvaní.