Ko e Founga ʻOku Tokoni ai e Temipalé
ʻOku ʻiloʻi ʻe he mātuʻa kotoa pē ʻoku ʻomi ʻe hono ʻohake ʻo e fānaú ha ngaahi faingataʻa mo ha ngaahi tāpuaki taʻeʻamanekina. Naʻá ma ʻiloʻi mo hoku husepānití ko e taimi naʻá ma fakakaukauʻi ai ʻa e ʻilo taʻengata ki he fatongia fakaemātuʻá, naʻe ʻalu fakataha pē ʻema ongoʻi mafasia lahi ʻi he mafatukituki ʻo e fatongiá mo ha ʻamanaki lelei lahi.
Ko e moʻoni, kuo foaki mai ʻe he ʻEikí ha ngaahi pale fakalaumālie ke ne fakamaʻamaʻa ʻetau ngaahi kavengá. Ko e ngaahi fakapale fakalaumālie maʻongoʻonga taha maʻa homa fāmilí ko ʻema ō ki he fale ʻo e ʻEikí ke maʻu ʻEne tokoní he kuo lalahi ʻema fānaú pea fakaʻau ke toe faingataʻa ange ʻa e moʻuí. Kuó ma ʻiloʻi ʻe lava pē ke ma ʻave e ngaahi palopalema pau ki he ʻEikí ʻi Hono temipalé.
ʻI he ʻalu hake ʻema fānaú ʻo taʻu hongofulu tupú, naʻá ma ʻiloʻi ʻe lava pē ke nau fai ha ngaahi fehālaaki lahi. Mahalo ko e meʻa naʻá ma manavasiʻi taha aí ko ʻema ʻiloʻi ko ia kuó ma fai ʻa e meʻa kotoa ne ma ʻiló, ka naʻe kei hā mai pē mei muʻa ha ngaahi fakaʻilonga fakatuʻutāmakí.
Ne ma toki ʻiloʻi leva ʻe lava ke hoko ʻa e lotu he temipalé ko ha konga mahuʻinga ia ʻi heʻema ngaahi feinga ke tokoniʻi ʻema fānaú ke nau fili ki he totonú. Kuó ma maʻu ha ivi mo ha ngaahi tāpuaki lahi mei heʻema ʻalu ki he temipalé ʻi he laumālie ʻo e ʻaukai mo e lotu maʻa ʻema fānaú. ʻOkú ma lotua ke ma ongoʻi ke teuteu fakatāutaha, ki he ngaahi fakakaukau mo e ngaahi ʻulungāanga totonu ki muʻa pea toki hū ki he temipalé. ʻOku kau ʻetau ngaahi fakalaulauloto lolotonga ʻetau ʻi he loto temipalé ki hotau fatongia ko e mātuʻá mo e ngaahi fie maʻu ʻa ha kiʻi tamasiʻi pau.
Ko e taimi ʻe niʻihi kuo vave mo mahino lelei ange hono maʻu e ngaahi talí. Mahalo ko e fuofua taimi naʻe hoko aí, naʻa tau pehē ko e hoko taimi taha pē. Ka naʻe vave pē ʻene mahino naʻá ma kau ʻi ha ngāue naʻá ne ʻohifo e ngaahi tāpuaki ʻo e langí.
Ko e taimi ʻe niʻihi naʻe maʻu e ngaahi talí ʻo fakafou mai ʻi he kakai naʻa nau takiekina e moʻui ʻa ʻema fānaú, hangē ko ha pīsope ʻofeina naʻá ne tokoniʻi ʻa ʻema taʻahine ʻi he toʻu ʻo e fānau kolisí, ʻi ha meʻa faingataʻa. Kuo faitāpuekina pehē foki mo ha fānau kehe. ʻOku takitaha maʻu pē ʻene tauʻatāina ke filí, pea mahalo te nau fili ke ʻoua naʻa nau fai ki he founga ʻoku tau ʻamanaki ki aí, ka ʻokú ma ongoʻi kuo ʻomi ʻe heʻema ngāue ʻi he temipalé ʻa e tokoni ʻa langí ʻi he moʻui ʻa ʻema fānaú.
Kuo hulu atu e ngaahi lelei kuó ma maʻu mei he lotu ʻi he temipalé ʻi hono tāpuakiʻi pē ʻema fānaú. Ne ʻi ai ha taimi ʻe taha, naʻe fehangahangai ai hoku husepānití mo ha palopalema fakangāue ne fakapuputuʻu ʻo ne fakakaukau ai ke ʻalu ki he temipalé. Naʻe tāpuakiʻi ia ʻe he ʻEikí ʻi he ʻaho ko iá, ʻo ne ongoʻi ko e tali ki heʻene fehuʻí ko ha potufolofola.
ʻI heʻene aʻu mai ki ʻapí, naʻá ne fakaava hake ʻa e folofolá, pea naʻá ne fiefia ʻi heʻene maʻu ai ʻa e tokoni ki heʻene palopalemá. Naʻe fakatupu ʻe he meʻa ko ʻeni naʻe hokó hano toe fakaʻaongaʻi ʻo e folofolá ʻi ha founga foʻou. ʻOku lava ke folofola ʻa e ʻEikí ki Heʻene fānaú ʻaki hono fakamanatu mai kiate kitautolu ʻa e ngaahi potufolofola ʻoku ʻi ai e ngaahi tali ki hotau ngaahi faingataʻaʻiá. ʻOkú ma houngaʻia ʻi he tefitoʻi moʻoni ko ʻeni ne ma ako ʻi he temipalé.
ʻI ha māmani ʻoku lahi ai ʻa e koví pea tuku atu ai ʻe Sētane hono ngaahi mālohí ke fakaʻauha e ngaahi ʻapí, ʻoku fakafiemālie ke ʻiloʻi ʻe lava ke tau ō ki he fale ʻo e ʻEikí ʻo fekumi ki ha fakahinohino. Neongo pe ko e hā e ngaahi faingataʻa ʻoku tau fehangahangai mo ia ʻi heʻetau tauhi hotau ngaahi fāmilí, ʻoku tau fiefia ʻi he taimi ʻoku tau fekumi ai ki he malu mo e fiemālie ʻo e temipalé.