Ko e Hā e Taumuʻa ʻo e Ngaahi Temipalé ni?
Ko e ngaahi fale toputapu e ngaahi temipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa ia ʻoku tali ai ha ngaahi fehuʻi taʻengata.
Ko e ngaahi temipalé ko e ngaahi feituʻu ia ʻoku tali ai ʻetau ngaahi fehuʻi kau ki he moʻuí ʻaki e ngaahi tali ʻo e nofo taʻengatá.
Kuo ʻi ai nai ha tangata pe fefine kuo nofo hifo ʻi ha taimi ʻo fakalaulauloto pea ʻikai te ne fifili ki he ngaahi meʻa fakamisiteli mo molumalu ʻo e moʻuí?
Kuo teʻeki ai nai ke ne fehuʻi, “Ko ʻeku haʻú mei fē? Ko e hā ʻoku ou ʻi heni aí? Ko ʻeku ʻalú ki fē? Ko hā ʻeku fetuʻutaki mo hoku Tupuʻangá? ʻE kaihaʻasi nai ʻe mate ʻeku ngaahi fetuʻutaki mahuʻinga mo e niʻihi kehé ʻi he moʻui ní? Fēfē ʻeku ngaahi fetuʻutaki mo hoku fāmilí? ʻE ʻi ai nai ha toe moʻui hili ʻa e moʻui ko ʻení, pea kapau ʻoku ʻi ai, te tau feʻilongaki pē ai?”
ʻOku ʻikai maʻu ʻe he poto ʻo e māmaní ʻa e tali ki he ngaahi fehuʻí ni. ʻOku toki maʻu pē ia ʻi he folofola ʻa e ʻOtuá kuo fakahā maí. Ko ha ngaahi fale toputapu e ngaahi temipale ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa ia ʻoku tali ai e ngaahi fehuʻi ko ʻení mo ha toe ngaahi fehuʻi taʻengata kehe pē. ʻOku fakatapui e fale takitaha ko e fale ʻo e ʻEikí, ko ha feituʻu ʻo e māʻoniʻoni mo e melino kuo fakamavaheʻi mei māmani. ʻOku akoʻi ai e ngaahi moʻoní mo fakahoko e ngaahi ouau ʻokú ne ʻomi ʻa e ʻilo ki he ngaahi meʻa ʻoku taʻengatá pea ʻoku fakaʻaiʻai ai ʻa kinautolu ʻoku kau ki aí ke nau moʻui pea mahino kiate kinautolu hotau tofiʻa fakalangi ko e fānau ʻa e ʻOtuá pea tau ʻiloʻi ʻa e ngaahi meʻa ʻoku malava ke tau fai ʻi heʻetau hoko ko ha kakai ʻoku taʻengatá.
ʻOku taʻe-hano-tatau e taumuʻa mo e ngāue ʻa e ngaahi temipalé mei he ngaahi fale faiʻanga lotu kehé.
ʻOku taʻe-hano-tatau e taumuʻa mo e ngāue ʻa e ngaahi fale ko ʻení mei he ngaahi fale faiʻanga lotu kehe kotoa pē, ʻo kehe ia mei he ngaahi falelotu angamaheni ʻe lauiafe ʻo e Siasí ʻoku movete ʻi he funga ʻo e māmaní. ʻOku ʻikai ke peheé ko e lalahi pe fakaʻofoʻofa ʻo e ngaahi falé ni. Ka ko e ngāue ʻoku fakahoko ʻi loto he ngaahi holisi ʻo e temipalé.
ʻOku ʻikai ko ha meʻa foʻou hono fakamavaheʻi ʻo e ngaahi fale peheé ki he ngaahi ouau makehé, ʻo nau kehe ai mei he ngaahi feituʻu faiʻanga lotu angamahení. Naʻe fakahoko pē ʻeni ʻi ʻIsileli he kuonga muʻá, ʻo lotu mo hū maʻu pē e kakaí ʻi he ngaahi falelotu lahí. Ko e feituʻu ʻeni naʻe toputapu ange kiate kinautolú, ʻuluakí, ko e tāpanekalé ʻi he feituʻu maomaonganoá mo hono Potu Toputapu ʻAupitó, pea toki fakahokohoko atu leva mo e ngaahi temipale naʻe fakahoko ai e ngaahi ouau makehé, pea ko kinautolu pē naʻe taau mo e ngaahi fie maʻú naʻe lava ke nau kau ʻi he ngaahi ouau ko ʻení.
Pea ko e meʻa tatau pē ʻi he ʻahó ni. Ki muʻa pea fakatapui ha temipale, ʻe fakaafeʻi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní e kakaí ke nau hū ʻi he falé ʻo mamata ʻi he ngaahi feituʻu kehekehe ʻi lotó. Ka ʻi he taimi kuo fakatapui aí, ʻoku hoko ia ko e fale ʻo e ʻEikí, ʻoku toputapu ʻaupito hono angá pea ko e kāingalotu pē ʻo e Siasí ʻoku moʻui tāú ʻoku ngofua ke nau hū ki lotó. ʻOku ʻikai ke fakapulipuli. Ka ʻoku toputapu.
ʻOku fekauʻaki e ngāue fakatemipalé mo kitautolu takitaha ko e kau mēmipa ʻo e fāmili taʻengata ʻo e ʻOtuá
ʻOku fakafofongaʻi ʻe he ngāue ʻoku fakahoko ʻi he ngaahi fale ko ʻení ʻa e ngaahi taumuʻa taʻengata ʻa e ʻOtuá maʻá e tangatá, ko e fānau mo e fakatupu ʻa e ʻOtuá. Ko e konga lahi ʻo e ngāue fakatemipalé ʻoku fekauʻaki ia mo e fāmilí, ʻi heʻetau hoko takitaha ko e mēmipa ʻo e fāmili taʻengata ʻo e ʻOtuá mo ʻetau hoko takitaha ko e mēmipa ʻo ha ngaahi fāmili fakaemāmani. ʻOku fekauʻaki ia mo hono toputapu pea mo e natula taʻengata ʻo e fuakava ʻo e malí mo e ngaahi fetuʻutaki fakafāmilí.
ʻOkú ne fakapapauʻi mai ko e tangata mo e fefine kotoa pē ʻoku fāʻeleʻi mai ki he māmaní ko e fānau ia ʻa e ʻOtuá, kuo fakakoloa ʻaki ha konga ʻo Hono natula fakalangí. ʻOku ʻaonga mo lelei ʻa hono toutou fakahoko ʻo e ngaahi tefitoʻi akonaki ko ʻení kiate kinautolu ʻoku nau maʻu iá, he ʻi hono fakahoko mahino ʻo e tokāteliné ʻi ha lea fakaʻofoʻofa mo ongo ki he lotó, ʻe mahino ki he tokotaha ʻoku kau ki aí ta ko e tokotaha kotoa pē ko e mēmipa ia ʻo ha fāmili fakalangi koeʻuhí he ko e tangata mo e fefine kotoa pē ko ha fānau ia ʻa e Tamai Hēvaní; ko ia ai, ko e tokotaha kotoa pē ko hono tokoua pe tuofefine.
ʻI he fehuʻi ʻa e tangata tohí ki he Fakamoʻuí, “Ko e fekau fē ʻoku lahi ʻi he fonó kotoa pē?” naʻá Ne taliange, “[Ke] ke ʻofa ki [he ʻEiki] ko ho ʻOtuá ʻaki ho lotó kotoa, pea mo ho laumālié kotoa, mo ho ʻatamaí kotoa, mo ho mālohí kotoa: ko e lahi ʻeni ʻi he fekaú.
“Pea ko hono ua ʻoku tatau mo iá, Ke ke ʻofa ki ho kaungāʻapí ʻo hangē pē ko koé” (Maʻake 12:28, 30–31).
ʻOku fakamamafaʻi mālohi ʻe he ngaahi akonaki ʻoku ʻomi ʻi he ngaahi temipale ʻo onopōní ʻa e tefitoʻi fakakaukau fekauʻaki mo hotau fatongia ki hotau Tupuʻangá pea ki hotau kaungāʻapí. ʻOku fakatupulaki ʻe he ngaahi ouau toputapú ʻa e fakakaukau langaki moʻui ko ʻeni kau ki he fāmili ʻo e ʻOtuá. ʻOku nau akoʻi ʻoku taʻengata ʻa e laumālie ʻi loto ʻiate kitautolú takitaha, ʻo kehe ia mei he sinó, ʻa ia ʻoku matelie. ʻOku ʻikai ngata pē ʻi heʻenau ʻomi ʻa e mahino ki he ngaahi moʻoni maʻongoʻongá ni, ka ʻoku nau toe ueʻi ʻa e tokotaha ʻoku kau ʻi he ouaú ke ʻofa ki he ʻOtuá mo poupouʻi ia ke ne fakahā ha ʻulungāanga fakakaungāʻapi lahi ange ki he fānau kehe ʻa ʻetau Tamaí.
ʻOku tokoniʻi kitautolu ʻe heʻetau tali ʻa e fakakaukau ko ia ko e tokotaha kotoa pē ko ha fānau ia ʻa e ʻOtuá ke tau ʻiloʻi ʻoku ʻi ai ʻa e taumuʻa fakalangi ʻi he moʻui fakamatelié. ʻOku toe akoʻi ai pē heni ʻi he fale ʻo e ʻEikí ha moʻoni kuo fakahā mai. Ko e moʻui ʻi he māmaní ko e konga ia ʻo ha fononga taʻengata. Naʻa tau moʻui ko ha fānau fakalaumālie ki muʻa pea tau toki ō mai ki hení. ʻOku fakamoʻoni ki heni ʻa e folofolá. Fakatokangaʻi e folofola ʻa e ʻEikí kia Selemaiá: “Naʻá ku ʻilo koe ʻi he heʻeki ai te u fakatupu koe ʻi he fatú; pea naʻá ku fakatapuʻi koe, pea tuʻutuʻuni koe, ko e palōfita ki he ngaahi puleʻangá, ʻi he teʻeki ai te ke haʻu mei he manavá” (Selemaia 1:5).
ʻE kei hokohoko atu e ngaahi fetuʻutaki mahuʻinga ʻi he moʻui fakafāmilí ʻi he maama ka hoko maí
ʻOku tau haʻu ki he moʻuí ni ko e fānau ʻa e mātuʻa matelie pea ko e kau mēmipa ʻo ha ngaahi fāmili. ʻOku kaungā-ngāue ʻa e mātuʻá mo e ʻOtuá ʻi hono fakahoko ʻEne ngaahi taumuʻa taʻengata fekauʻaki mo ʻEne fānaú. Ko ia, ko e fāmilí ko ha faʻunga fakalangi, ko e faʻunga mahuʻinga taha ia ʻi he moʻui fakamatelié pea ʻi he nofo taʻengatá.
Ko e konga lahi ʻo e ngāue ʻoku fakahoko ʻi loto he ngaahi temipalé ʻoku fekauʻaki ia mo e fāmilí. ʻOku makatuʻunga ʻi he mahino hono ʻuhingá ʻa ʻetau ʻiloʻi ʻa e foʻi moʻoni ko ia naʻa tau moʻui ko e fānau ʻa e ʻOtuá pea toki fāʻeleʻi mai kitautolu ki he māmaní, pea ʻe kei hoko atu pē ʻetau moʻuí hili ʻa e maté, pea mo e ngaahi vā fetuʻutaki ʻi he moʻui matelié ʻoku tau mataʻikoloa ʻaki mo fakafiemālié, pea ʻe kei hokohoko atu pē ʻi he maama ka hoko maí ʻa e ngaahi fetuʻutaki fakaʻofoʻofa mo mahuʻingamālie taha ʻoku hoko ʻi he fāmilí.
ʻI he taimi ʻoku mali ai ha tangata mo ha fefine ʻi he fale ʻo e ʻEikí, ʻoku ʻikai ngata ʻi hono fakatahaʻi kinaua ki ha vahaʻataimi ʻo ʻena moʻui ʻi he māmaní ka ki hono kotoa ʻo e nofo taʻengatá. ʻOku haʻi fakataha kinaua ʻo ʻikai ʻi he mafai pē ʻo e fonuá ʻa ia ʻokú ne fakatahaʻi kinaua kae ʻoua kuó na maté, ka ʻe fakafou foki ʻi he lakanga fakataulaʻeiki taʻengata ʻo e ʻOtuá, ʻa ia ʻokú ne haʻi ʻi he langí ʻa ia ʻoku haʻi ʻi he māmaní. ʻOku fakapapauʻi ki he ongomeʻa kuó na mali ʻi he temipalé ʻi he fakahā fakalangi he ʻikai ngata ʻi he maté ʻa ʻena fetuʻutakí pea pehē ki hona vā fetuʻutaki mo ʻena fānaú ka ʻe kei hokohoko atu ai ia ki ʻitāniti, ʻo kapau te na moʻui taau mo e tāpuaki ko iá.
Kuo ʻi ai nai ha tangata naʻe ʻofa moʻoni ʻi ha fefine, pe ha fefine naʻe ʻofa moʻoni ʻi ha tangata, naʻe ʻikai te ne loto ke kei hokohoko atu pē ʻena fetuʻutakí hili ʻa e maté? Kuo telio nai ha fānau ʻe ha mātuʻa naʻe ʻikai te na fakaʻānaua ke fakapapauʻi ange te na toe maʻu pē ʻa hona ʻofaʻanga ko ʻení ʻi ha maama ka hoko mai? ʻE lava nai ke fakaveiveiua ha taha ʻoku tui ki he moʻui taʻengatá ʻe foaki ʻe he ʻOtua ʻo e langí ki Hono ngaahi fohá mo e ngaahi ʻofefiné ʻa e ʻulungāanga mahuʻinga taha ʻo e moʻuí, ʻa e ʻofa ko ia ʻoku mahuʻingamālie taha hono fakahaaʻí ʻi he ngaahi fetuʻutaki fakafāmilí? ʻIkai, koeʻuhí ko e ʻofa ʻa e ʻOtuá kiate kitautolú, ʻoku pehē ai ʻi he fakaʻuhingá ʻe kei hokohoko atu ai pē ʻa e fetuʻutaki fakafāmilí hili ʻa e maté. ʻOku holi ki ai e loto ʻo e tangatá, pea kuo ʻosi fakahā mai ʻe he ʻOtua ʻo e langí ha founga ʻe lava ke maʻu ai ia. ʻOku ʻomi ia ʻi he ngaahi ouau toputapu ʻo e fale ʻo e ʻEikí.
ʻOku ʻatā e ngaahi tāpuaki ʻo e temipalé ki he kakai kotoa pē
Ka ʻe hangē ʻoku ʻikai totonú kapau naʻe maʻu pē ʻa e ngaahi tāpuaki ʻo e ngaahi ouau ko ʻení ʻe kinautolu ʻoku lolotonga kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko hono moʻoní ʻoku ʻatā ki he kakai kotoa pē te nau tali ʻa e ongoongoleleí pea papitaiso ki he Siasí ʻa e faingamālie ke haʻu ki he temipalé ʻo ʻinasi ʻi hono ngaahi tāpuakí. Ko hono ʻuhinga ʻeni ʻoku fakahoko ai ʻe he Siasí ʻa e polokalama ngāue fakafaifekaú ʻi he konga lahi ʻo māmani pea ʻe kei hokohoko atu ai pē ʻene mafola ʻa e polokalamá ni ki he lahi taha ʻo e ngaahi feituʻu ʻe aʻu ki aí, he ko hono fatongia, ʻo fakatatau mo e fakahā fakalangí, ke akoʻi ʻa e ongoongoleleí ki he puleʻanga, faʻahinga, lea mo e kakai fulipē.
Ka ʻoku ʻi ai ha kakai taʻefaʻalaua ʻe laui miliona kuo nau moʻui ʻi he māmaní pea ʻikai ke nau maʻu ʻa e faingamālie ke fanongo ki he ongoongoleleí. ʻE taʻofi koā meiate kinautolu ʻa e ngaahi tāpuaki pehē ʻoku maʻu ʻi he ngaahi temipale ʻo e ʻEikí?
ʻOku lava ke maʻu ʻe kinautolu kuo pekiá ʻa e ngaahi ouau tatau ʻo fakafou ʻi he kau fakafofonga moʻui ʻoku nau ngāue fakafofonga maʻá e kakai kuo mavahe atu mei he moʻui matelié. ʻOku tauʻatāina leva ʻa e kakai tatau pē ko iá ʻi he maama tataliʻanga ʻo e ngaahi laumālié ke tali pe ʻikai tali ʻa e ngaahi ouau naʻe fakahoko maʻanautolu ʻi he māmaní, kau ai ʻa e papitaisó, malí, mo hono silaʻi ʻo e ngaahi vā fetuʻutaki fakafāmilí. ʻI he ngāue ʻa e ʻEikí ʻoku ʻikai fakamālohiʻi ha taha ke ne fai ha meʻa, ka kuo pau ke ʻi ai ʻa e faingamālie.
Ko e ngāue ʻi he temipalé ko ha ngāue ia ʻo e ʻofa ʻa e kakai moʻuí maʻá e kakai pekiá
ʻOku kau ʻi he ngāue fakafofonga ko ʻení ha ngāue taʻefakatataua ʻo e ʻofa ʻoku fai ʻe he kakai moʻuí maʻá e kau pekiá. ʻOku fie maʻu ai ha fekumi lahi ʻi he hisitōlia fakafāmilí ke kumi mo ʻiloʻi ʻa kinautolu ne nau moʻui ki muʻa ʻiate kitautolú. Ke tokoni ʻi he fakatotolo ko ʻení, kuo fakafekauʻaki ai ʻe he Siasí ha polokalama hisitōlia fakafāmilí mo tauhi ha ngaahi nāunau taʻe-hano-tatau ʻi māmani kotoa ke fai ai e ngaahi fakatotoló. ʻOku ʻatā e ngaahi ʻākaivi ko ʻení ki he kakaí pea kuo fakaʻaongaʻi ia ʻe ha tokolahi ʻoku ʻikai ke nau kau ki he Siasí ʻi he fekumi ki heʻenau ngaahi kuí. Kuo fakahīkihikiʻi e polokalama ko ʻení ʻe he kau tohihohoko ʻi māmaní kotoa pea kuo fakaʻaongaʻi ia ʻe he ngaahi puleʻanga lahi ke maluʻi ʻaki ʻenau ngaahi lekōtí. Ka ko hono taumuʻa ʻuluakí pē ke maʻu ai ʻe he kāingalotu ʻo e Siasí ʻa e ngaahi maʻuʻanga tokoni ko ia ʻoku fie maʻu ke ʻiloʻi ai ʻenau ngaahi kuí koeʻuhí ke fakaaʻu atu kiate kinautolu ʻa e ngaahi tāpuaki ʻoku nau fiefia aí. ʻOku hangē ia ko haʻanau pehē, “Kapau ʻoku ou ʻofa lahi ʻi hoku uaifí mo ʻeku fānaú ʻo u loto ke u maʻu kinautolu ʻi hono kotoa ʻo e nofo taʻengatá, ʻikai ʻoku totonu ke maʻu ʻe heʻeku kuí mo ʻeku kui ua kuo pekiá mo hono toe ʻo ʻeku ngaahi kuí ʻa e faingamālie ke maʻu ʻa e ngaahi tāpuaki taʻengata tatau pē ko iá?
ʻOku ʻomi ʻe he ngaahi temipalé ʻa e faingamālie ke ako e ngaahi meʻa ʻo e moʻuí ʻoku mahuʻinga moʻoní
Ko ia ʻoku fakahoko fakalongolongo pea ʻi he anga ʻapasia ha ngāue lahi ʻi he ngaahi fale toputapú ni. ʻOku nau fakamanatu mai ha konga ʻo e mata meʻa-hā-mai ʻa Sione Fakahaá ʻa ia ʻoku hiki ai ʻa e fehuʻi mo e tali ko ʻení: “Ko hai ʻa kinautolú ni ʻoku teunga ʻaki ʻa e ngaahi kofu hinehina tōtōlofá? pea ʻoku nau haʻú mei fē? …
“Ko kinautolu ʻeni naʻe haʻu mei he mamahi lahi, pea kuo nau fō ke hinehina honau kofu tōtōlofá ʻi he taʻataʻa ʻo e Lamí.
“Ko ia ai ʻoku nau ʻi he muʻa nofoʻa fakaʻeiʻeiki ʻo e ʻOtuá, ʻo tauhi ia ʻi he ʻaho mo e pō ʻi hono [temipalé]” (Fakahā 7:13–15).
ʻOku teunga hinehina ʻa kinautolu ʻoku haʻu ki he ngaahi fale māʻoniʻoni ko ʻení ʻi heʻenau ngāue ʻi lotó. ʻOku nau toki haʻu pē ʻi hano fakaongoongoleleiʻi kinautolu ʻe honau kau maʻu mafai fakalotofonuá, kuo fakamoʻoniʻi ʻenau moʻui tāú. ʻOku ʻi ai ʻa e ʻamanaki te nau fakakaukau maʻa, sino maʻa, pea teunga maʻa ke hū he temipale ʻo e ʻOtuá. ʻI heʻenau hū ki aí, ʻoku fie maʻu ke nau tuku ʻa e ngaahi meʻa ʻo māmaní ʻi tuʻa pea tokanga taha pē ki he ngaahi meʻa fakalangí.
ʻOku ʻi ai hono ngaahi lelei ʻo e ʻekitivitī ko ʻení, kapau te tau ui peheʻi ia, he ko hai ʻi he ngaahi taimi faingataʻá ni te ne taʻetali ha faingamālie ke tāpuniʻi e ngaahi meʻa ʻo māmaní ʻi tuʻa kae hū ki he fale ʻo e ʻEikí, ʻo fakalaulauloto fakalongolongo ai ki he ngaahi meʻa taʻengata ʻa e ʻOtuá? ʻOku ʻomi ʻe he ngaahi feituʻu toputapú ni ʻa e faingamālie ʻoku ʻikai toe maʻu ia ʻi ha feituʻu kehe, ke ako ai mo fakakaukau ki he ngaahi meʻa ʻo e moʻuí ʻoku mahuʻinga moʻoní—ʻa ʻetau fetuʻutaki mo e ʻOtuá pea mo ʻetau fononga taʻengata mei he maama fakalaumālié ki he moʻui ko ʻení pea hoko atu ki ha tuʻunga ʻi he kahaʻú te tau feʻilongaki mo feohi ai, kau ai hotau ngaahi ʻofaʻangá mo ʻetau ngaahi kui ne muʻa mai ʻiate kitautolú, pea kuo tau maʻu meiate kinautolu hotau tukufakaholo ʻo e ngaahi meʻa ʻo e sinó, ʻatamaí mo e laumālié.
ʻOku talaʻofa mai kiate kitautolu e ngaahi tāpuaki taʻengata ʻa e ʻOtuá ʻi he temipalé
Ko e moʻoni ʻoku makehe e ngaahi temipalé ni ʻi he ngaahi fale kotoa pē. Ko ha ngaahi fale ia ʻo e fakahinohino. Ko e ngaahi feituʻu ia ʻo e fuakava mo e talaʻofa. ʻOku tau tūʻulutui ʻi he ʻao ʻo e ʻOtua, ko hotau Tupuʻangá,ʻi hono ngaahi ʻōlitá pea ʻoku talaʻofa ʻaki kiate kitautolu ʻa ʻEne ngaahi tāpuaki taʻengatá. ʻI he ngaahi potu toputapu ʻo e temipalé ʻoku tau fetuʻutaki ai mo Ia pea fakakaukau ki Hono ʻAló, ko hotau Fakamoʻui mo e Huhuʻí, ʻa e ʻEiki ko Sīsū Kalaisí, ʻa ia naʻe hoko ko e fakafofonga maʻatautolu takitaha ʻi he feilaulau ko hotau fetongi. ʻOku tau tuku heni ki he tafaʻakí ʻetau siokitá pea ngāue maʻanautolu ʻoku ʻikai ke nau lava ʻo fai e ngāué maʻanautolú. ʻOku haʻi kitautolu heni ʻi he vā fetuʻutaki toputapu taha ʻa e faʻahinga ʻo e tangatá, ʻaki ʻa e mālohi ʻo e lakanga fakataulaʻeiki moʻoni ʻo e ʻOtuá—ko e husepāniti mo e uaifi, ko e fānau mo e mātuʻa, ko e ngaahi fāmili kuo ʻosi silaʻi pea ʻikai lava ke fakaʻauha ʻe he taimí mo maumauʻi ʻe he maté.
Naʻe aʻu pē ki hono langa ʻo e ngaahi fale toputapú ni lolotonga e ngaahi taʻu faingataʻa ko ia naʻe tuli mo fakatangaʻi ai ʻe Kāingalotú. Ne langa mo tauhi mai kinautolu ʻi he ngaahi taimi ʻo e masivesivá mo e tuʻumālié. Ne maʻu kinautolu mei he tui lahi ʻa ha tokolahi naʻa nau fakamoʻoniʻi ʻoku ʻi ai e ʻOtua moʻui, ki he ʻEiki toetuʻú, ki he kau palōfitá mo e fakahā fakalangí, pea mo e melino mo e tala fakapapau ʻo e ngaahi tāpuaki taʻengata ʻoku toki maʻu pē ʻi he fale ʻo e ʻEikí.
Faiʻanga papitaisó, Temipale Papeʻete Tahití.
Temipale Sitokiholomu Suetení. Fakatapui he ʻaho 2 ʻo Siulai, 1985.
Temipale Menitai ʻIutaá. Fakatapui he ʻaho 21 ʻo Mē, 1888. Naʻe toe fakatapui he ʻaho 14 ʻo Sune, 1985.