Na Noda Vakamau ena Valetabu sa Kilikili Kaya na Kena iSau Kecega
Sa qai tekivu meu vakataroga e lomaqu kevaka e rawa beka niu na kauti Beny na noqu itau ki na valetabu ena gauna sa lusi kina na imatai ni noqu sasaga vakabisinisi ka kama yavu ki na qele na kena ikarua. Keirau sa rogoca ni yaco e kea ena vakatovolei kina na vakabauta, ia ni keirau vakotora me neirau takete na vakamau ena valetabu, keirau a sega ni bau tadra ni na vakatovolei sara vakamatailalai na neirau vakabauta.
Keirau a sota kei Beny mai na neirau vanua e Panama ni oti na neirau kaulotu. Me vaka na lawa e Panama, o ira na veiwatini era vinakata me ra tekivuna na nodra bula vakawati ena valetabu me ra na vakamau mada vakamatanitu ka ra qai lako yani ki na valetabu voleka duadua, na Valetabu na Guatemala City Guatemala. Ena dua na ilakolako isau levu ka dredre, ia na vauci vata e dua na veivakalougatataki keirau sega ni vinaka me keirau calata tu ena neirau bula.
Ena siga au kerea kina me keirau vakamau, au sa biu kina mai na noqu cakacaka. Au sega ni via yalolailai, au mani lewa meu sa rawa ilavo ena noqu veivakasarasarataki ena basi. A ca na noqu basi ena imatai ga ni bogi. Au lomaleqa ia e dei toka ga na noqu gagadre, au sa mani nanuma tale meu volitaki siqeleti. Ena mataka meu laki kauta mai kina na siqeleti mai vua e cakava, au qai kila ni sa kama yavu vakadua ena bogi na vale o ya. E vaka ni sa cagina talega yani vata kei na kubou na noqu vakanuinui.
Sa vo walega e vica na vula ki na gauna me na lako kina na ilakolako e tarava ki na valetabu, ia me yacova mai na gauna oqo, na sasaga kece ni vaqara ilavo sa mai tini botoilevu tu. Au biuta tu na ivovo ni kama ka lako me vaqarai Beny.
“Sa sega ni dua na ka e tu vei au,” au kaya vua. “E vinaka mo sa kua ga ni vakawatitaki au.”
“Kevaka au a via vakamau me baleta na ilavo, au sa vakamau makawa,” e kaya o koya. “Ia au sega ni via vakamau me baleta na ilavo. Au via vakamautaki iko baleta niu domoni iko.”
Oqori sara ga na ilesu ni sala. Keirau vakila ni keirau sa lako sivita rawa e dua na veivakatovolei bibi. Ni keirau toso tikoga ki liu ena vakabauta, sa tekivu tatadoladola mai na katuba. Au raica e dua na cakacaka ni ta iyaya ni loma ni vale, e dina ni sega beka ni veiganiti na kena isau me sotava na neirau gagadre. Sa qai nanuma e dua na bisopi yalovinaka me sauma na neirau ivodovodo ni basi. E dina ni taleitaki na nona nanuma, ia e vaka ni sega ni donu. Na neirau inaki me keirau rawata vakataki keirau ga na neirau bula. Ia ni keirau raica na nona gadreva dina me veivuke, keirau mani kerei koya me solia vei Beny e dua na cakacaka. A mani vakakina.
Ni keirau sa rawata na ilavo me rawa kina ni keirau lako ki na valetabu, keirau a vakamau vakamatanitu ka keirau sa qai gole ki Guatemala vata kei iratou e lewe 10 tale na lewenilotu. Ia e se bera ni oti na neirau vakatovolei.
Na biu cakacaka raraba ena tabana ni veilakoyaki a vuna na neitou laki tao tu ena iyalayala kei Costa Rica. Ni oti na neitou wawa tu ena iyalayala ni vanua ena rua na siga, sa mani nanuma na neitou draiva me sa lesu tale. Ia keirau kei Beny, vata kei rau e rua na turaga kei na dua tale na veiwatini, keitou sa nanuma me keitou kakua ni soro. Ni oti na neitou sarava ni sa mua lesu na neitou basi ka biuti keitou tu mai, keitou sa taubale yani ki Costa Rica. Keitou taubale tikoga, keitou moce ena so na ivakaruru e bati ni sala, me yacova ni keitou sa yaco yani ki na iyalayala kei Nicaragua. Mai kea keitou qai vodo ena dua na tekisi ki na koro turaga, na vanua keitou laki volia kina na tikite ni basi ki na iyalayala kei Hondura. Ni oti e rua na siga—kei na rua na basi—keitou sa mani yaco yani ki na valetabu. Keitou sa duka ka oca vakalevu, ka sa sivia sara vakalevu na veika keitou a nanuma me keitou vakayagataka mai na veika keitou a tuvanaka, ia keitou sa marau ga.
Ena siga ka tarava, ni sa oti kece na neirau vakatovolei kei na itatao, keirau sa qai laki vauci me veiwatini ka tawamudu. Na neirau reki—sa kilikili kaya kei na kena cakacaka, na wawa, kei na lomaleqa—sa taucoko sara!
E sega ni tamata kece me laki vakamau ena valetabu ena sotava na bolebole vakaoqo, ia vei au kei Beny (kei iratou tale eso keitou a lako vata), na veika oqori sa ivalavala ni veivakasavasavataki. Sa dua na ka cecere meu sotava ena noqu bula.
Kevaka a baleta walega na veidomoni vakavuravura na neirau takete ni laki vakamau ena valetabu, keirau na sega beka ni yaco rawa kina. Ia baleta ni keirau vakabauta na kaukauwa ni veivauci ena matabete sa vakalesui mai ena noda gauna, keirau a sega ni guce, keirau kila ni neirau vakamau ena valetabu—me baleta na gauna oqo kei na bula tawamudu taucoko—sa kilikili kaya na solibula kecega keirau vakayacora.