Ug sa Uban Pagbaton og Kalooy, Maghimo og Kalainan
Ang nakanindot sa visiting teaching mao ang pagtan-aw sa mga kinabuhi nga nausab, mga luha nga napahiran, mga pagpamatuod nga nagtubo, mga tawo nga gihigugma, mga pamilya nga nalig-on.
Akong minahal nga mga sister, usa ka panalangin nga makauban kamo aron mabati ang inyong kalig-on ug gugma alang sa Ginoo. Salamat sa inyong gugma ug kalooy nga inyong gipakigbahin sa uban sa matag adlaw.
Sa unang mga adlaw sa Relief Society sa Nauvoo, nasayud kita ng ang mga sister moadto sa kada balay, mangalagad sa usag usa, motino sa mga panginahanglan, magdala og pagkaon, moatiman sa masakiton, ug magpakita og kapuangod alang sa kada babaye ug sa iyang pamilya.1 Kini makapahinumdom sa kasulatan sa Judas: “Ug sa uban pagbaton og kalooy, maghimo og kalainan.”2 Samtang namalandong ko niini nga kasulatan ug sa kahulugan niini, akong nahunahunaan ang Manluluwas ug sa daghang mga higayon nga ang mga kasulatan naghisgot mahitungod sa gugma ug kapuangod ni Kristo alang sa tanan.
Diha sa Bag-ong Tugon kita nakabasa kadaghan nga si Kristo “nalooy”3 sa mga tawo samtang Siya mitubag sa ilang mga panginahanglan. Nalooy Siya sa dihang Iyang nakita nga sila gigutom ug Siya mipakaon kanila, o sa dihang sila nasakit ug Siya miayo kanila, o sa dihang sila nagkinahanglan og espirituhanon nga kalig-on ug Siya mitudlo kanila.
Ang kalooy nagpasabut sa pagbati og paghigugma ug kalooy ngadto sa laing tawo. Kini nagpasabut nga pagbaton og simpatiya ug tinguha sa paghupay sa pag-antus sa uban. Kini nagpasabut sa pagpakita og kamabination ug kalumo ngadto sa uban.
Ang Manluluwas mihangyo nato sa pagbuhat sa mga butang nga Iyang gibuhat,4 sa pagtambayayong sa usag usa, sa paghupay sa nagkinahanglan sa kahupayan, sa pagbangutan uban niadtong nagbangutan,5 sa pagpakaon sa gigutom, pagduaw sa masakiton,6 sa pagtabang sa maluyahon, ipataas ang mga kamot sa nawad-an og paglaum,7 ug sa “pagtudlo sa usag usa sa doktrina sa gingharian.”8 Alang nako kini nga mga pulong ug mga aksyon naghulagway sa visiting teachers—kadtong nangalagad sa uban.
Ang visiting teaching nakahatag sa kababayen-an og oportunidad sa pagbantay, paglig-on, ug pagtudlo sa usag usa. Ingon nga ang teacher diha sa Aaronic Priesthood gisangunan sa responsibilidad sa “pagbantay diha sa simbahan sa kanunay” ug [sa] pagpaduol ug paglig-on kanila,”9 ang usa ka visiting teacher nagpakita sa iyang gugma pinaagi sa mainampoong paghunahuna sa tawag sa pagserbisyo sa matag babaye.
Si Sister Julie Beck mipahinumdom kanato, “Tungod kay kita nagsunod sa ehemplo ug mga pagtulun-an ni Jesukristo, atong gimahal kini nga sagrado nga buluhaton sa paghigugma, pagkahibalo, pagserbisyo, pagsabut, pagtudlo ug pagpangalagad alang Kaniya.”10
Karon, gusto nakong hisgutan ang duha ka mga butang:
-
Ang mga panalangin nga inyong mahatag ngadto sa uban sa inyong pagserbisyo isip visiting teacher
-
Ang mga panalangin nga inyong madawat sa inyong pagserbisyo sa uban.
Ang mga Panalangin nga Inyong Mahatag Ngadto sa Uban sa Inyong Pagserbisyo Isip Visiting Teacher
Dili pa lang dugay mibisita ko sa usa ka grupo sa mga babaye didto sa Anchorage, Alaska. Adunay 12 ka babaye diha sa kwarto ug laing 6 ang miapil pinaagi sa speakerphone gikan sa mga siyudad ug mga lungsod sa tanang dapit sa Alaska. Daghan niining mga babaye nagpuyo gatusan ka milya ang gilay-on gikan sa building sa Simbahan. Kini nga mga babaye mitudlo kanako mahitungod sa visiting teaching.
Ang paghimo og tagsa-tagsa nga pagbisita ngadto sa tanang mga sister magkinahanglan og pagsakay sa eroplano, pagbiyahe pinaagi sa barko, o pagbiyahe og layo kaayo pinaagi sa sakyanan. Klaro gayud, ang panahon ug gasto nakapahimo sa pagbisita sa mga balay nga imposible. Apan, kini nga mga sister mibati nga suod kaayo tungod kay nag-ampo sila og maayo alang sa usag usa ug nagtinguha sa giya sa Balaang Espiritu aron masayud kon unsay gikinahanglan sa ilang mga sister, bisan kon dili sila personal nga makaadto kanunay. Makakontak gihapon sila pinaagi sa telepono, pinaagi sa Internet, ug pinaagi sa sulat. Nagserbisyo sila uban sa gugma tungod kay nakahimo sila og mga pakigsaad ngadto sa Dios ug nagtinguha sa pagpanalangin ug paglig-on sa ilang mga sister.
Laing mapahinunguron nga pares sa mga visiting teacher didto sa Democratic Republic of Congo naglakaw og layo kaayo aron sa pagbisita sa usa ka babaye ug sa iyang gamayng anak. Kini nga mga sister mainampoong nag-andam og mensahe ug gusto nga masayud kon sa unsang paagi sila makahimo og kalainan sa kinabuhi sa pinalangga nga babaye nga ilang gibisitahan. Ang babaye naghinamhinam sa ilang pagbisita. Alang kaniya ang ilang pagbisita usa ka mensahe gikan sa langit nga gihatag alang lamang kaniya. Samtang ang mga visiting teacher miabut sa iyang kabus nga panimalay, ang sister, ang iyang pamilya, ug ang mga visiting teacher ang tanan nadasig ug napanalanginan. Ang layo nga paglakaw daw dili na usa ka sakripisyo. Kini nga mga visiting teacher adunay kalooy, naghimo og kalainan alang sa kaayohan, ug nagpanalangin sa kinabuhi niini nga babaye.
Ang gilay-on, gasto, ug mga isyu sa kasiguroan nakapahimo sa personal, binuwan nga pakigkita nga imposible sa pipila ka mga dapit sa Simbahan, apan pinaagi sa gahum sa personal nga pagpadayag, ang mga sister nga tinuoray gayud nga nagtinguha sa paghigugma sa usag usa ug nagbantay ug naglig-on sa usag usa, makakita og makahuluganong mga paagi sa pagtuman niini nga tawag gikan sa Ginoo.
Ang dinasig nga mga presidente sa Relief Society makigtambag sa ilang bishop ug mainampoon nga mohimo sa mga buluhaton sa visiting teaching aron sa pagtabang kaniya sa pagbantay ug pag-amuma sa matag babaye diha sa ward. Kon atong masabtan kini nga proseso sa pakigtambag ug pagpadayag, mas masabtan nato ang atong importante nga responsibilidad sa pagpangalagad ug mas makasalig og maayo sa Espiritu sa paggiya sa atong mga paningkamot.
Usa ko nga nakabisita og pipila ka mga babaye matag bulan ug dayon mapagarbuhon nga mamahayag nga adunay gaan nga pamati, “Nahuman na gayud ang akong visiting teaching!” Hinoon, ang bahin nga ako moreport tingali nahuman na, apan kon kana lamang ang hinungdan nganong gibuhat ko kini, kamakauulaw.
Ang nakanindot sa visiting teaching dili ang pagtan-aw og 100 porsinto sa binulan nga report; ang nakanindot sa visiting teaching mao ang pagtan-aw sa mga kinabuhi nga nausab, mga luha nga napahiran, mga pagpamatuod nga nagtubo, mga tawo nga gihigugma, mga pamilya nga nalig-on, mga tawo nga nadasig, mga gigutom nga napakaon, mga masakiton nga naduaw, ug kadtong kinsa nagbangutan, nahupay. Sa tinuoray, ang visiting teaching wala pa gayud mahuman tungod kay kita nagbantay ug naglig-on sa kanunay.
Ang laing panalangin sa visiting teaching mao ang pagpalambo sa panaghiusa ug gugma. Ang mga kasulatan nagtambag kanato kon unsaon nato sa pag-angkon niini: “Ug siya misugo kanila nga sila … kinahanglan molantaw sa unahan uban sa nagkahiusa nga panan-aw, may usa ka hugot nga pagtuo ug usa ka bunyag, diin ang ilang mga kasingkasing nabugkos diha sa pagkahiusa ug diha sa gugma sa usag usa.”11
Daghang mga babaye ang mireport nga ang hinungdan sa ilang pagbalik ngadto sa pagkaaktibo sa Simbahan tungod kay ang usa ka matinud-anon nga visiting teacher miduaw matag bulan ug nangalagad ngadto kanila, miluwas kanila, naghigugma kanila, nagpanalangin kanila.
Usahay ang mensahe mao ang labing importante nga butang nga inyong mapakigbahin diha sa usa ka piho nga pagbisita. Ang uban nga mga babaye adunay gamay lang nga espirituhanon nga pagpalig-on sa ilang kinabuhi gawas sa mensahe nga inyong pagadad-on. Ang mga Mensahe sa Visiting Teaching sa Liahona mga mensahe sa ebanghelyo nga makatabang sa kada babaye sa pagdugang sa iyang pagtuo, paglig-on sa pamilya, pagpasabut sa pagkamanggihatagon.
Usahay ang labing importante nga panalangin sa inyong pagbisita mao lamang ang pagpaminaw. Ang pagpaminaw makahatag og kahupayan, pagsabut, ug pag-ayo. Sa gihapon sa laing higayon tingali nagkinahanglan kamo nga molihok ug motrabaho sa panimalay o motabang sa pagpahilum sa naghilak nga bata.
Ang mga Panalangin nga Inyong Madawat sa Inyong Pagserbisyo sa Uban.
Ang mga panalangin nga inyong madawat sa inyong pagserbisyo sa uban daghan. Usahay nakasulti ko, “Ah, kinahanglan nakong mahuman ang akong visiting teaching!” (Mao kadto ang mga panahon nga akong nakalimtan nga ako nagbisita ug nagtudlo sa mga babaye. Mao kadto ang mga panahon nga ako nagtan-aw niini isip usa ka palas-anon imbis nga usa ka panalangin.) Matinuoron ako nga makasulti nga kon ako mag-visiting teaching, kanunay gayud akong mobati og mas nindot. Ako gidasig, gihigugma ug gipanalanginan, kasagaran mas labaw pa kay sa sister nga akong gibisitahan. Ang akong gugma milambo. Ang akong tinguha sa pagserbisyo milambo. Ug akong makita kon unsa kanindot ang paagi nga giplano sa Langitnong Amahan alang kanato sa pagbantay ug pag-amuma sa usag usa.
Ang uban nga mga panalangin sa pagkahimong usa ka visiting teacher mao nga kita makaila ug mahimong managhigala niadtong dili unta nato makaila og maayo sa laing paagi. Usahay magtugot kini nga mahimo kita nga tubag sa mga pag-ampo sa usa ka tawo. Usab, ang personal nga pagpadayag ug espirituhanon nga mga kasinatian may kalabutan gayud sa visiting teaching.
Nakasinati ko og pipila ka makadasig, makalipay, ug espirituhanon nga mga kasinatian sa akong kinabuhi samtang naglingkod ko sa mga panimalay sa mga babaye sa akong kaugalingong ward ug sa tibuok kalibutan. Kami nagtudlo sa usag usa sa ebanghelyo. Kami naghinilakay, nangatawa, nagsulbad sa mga problema, ug ako nadasig ug napanalanginan.
Usa ka gabii, hapit na ang katapusan sa bulan, nangandam ko sa pagbiyahe ug wala pa gihapon nakabisita sa usa sa akong mga sister. Gabii na kaayo kadto. Wala koy lakaw. Wala ko manawag. Wala koy kauban. Apan nakahukom ko nga importante nga bisitahan nako ang akong higala nga si Julie. Ang anak nga babaye ni Julie si Ashley natawo nga adunay sakit sa bukog. Bisan kon si Ashley hapit na mag-sais anyos, gamay kaayo siya ug dili kaayo makahimo og bisan unsa gawas sa paglihok sa iyang mga bukton ug pagsulti. Naghigda siya sa nuog nga panit sa karnero sa tibuok adlaw, matag adlaw. Si Ashley usa ka malipayon, madasigon nga bata ug ganahan ko nga anaa uban kaniya.
Niining piho nga kagabhion sa pag-abut nako sa balay, gipasulod ko ni Julie ug mitawag si Ashley nga aduna siyay gusto nga ipakita kanako. Misulod ko ug miluhod sa salog sa kilid ni Ashley, ug ang iyang inahan sa pikas kilid. Si Ashley miingon, “Tan-awa kon unsay akong mahimo!” Dayon uban sa gamayng tabang sa iyang inahan, si Ashley makatakilid ug makabalik na usab. Migahin siya og hapit unom ka tuig aron makab-ot kining talagsaon nga tumong. Samtang namakpak kami ug nagdasig ug nangatawa ug nanghilak og dungan niining espesyal nga okasyon, akong gipasalamatan ang Langitnong Amahan nga nag-visiting teaching ko ug wala masal-angi kining maanindot nga panghitabo. Bisan kon kana nga pagbisita dugay na kaayo ug ang buotan nga si Ashley dugay na nga namatay, mahangturon ko nga mapasalamaton nga ako aduna nianang espesyal nga kasinatian uban kaniya.
Ang akong kaugalingong minahal nga inahan usa ka talagsaon ug mapahinunguron nga visiting teacher sulod sa daghang katuigan. Kanunay siyang naghunahuna og mga paagi nga makapanalangin siya sa mga pamilya nga iyang gibisitahan. Gihatagan niya og piho nga pagtagad ang mga anak sa mga babaye nga iyang gibisitahan, naglaum sa pagpalig-on sa mga pamilya. Akong mahinumduman ang usa ka singko anyos nga nagdagan paingon sa akong inahan diha sa Simbahan nga nagpahayag, “Ikaw ang akong visiting teacher. Gihigugma ko ikaw!” Ang pagkahimong kabahin sa kinabuhi sa talagsaon nga mga babaye ug sa ilang mga pamilya usa ka panalangin ngadto sa akong inahan.
Dili tanan nga mga kasinatian nga may kalabutan sa visiting teaching mga nindot ug talagsaon. Usahay lisud kini, sama sa pagbisita sa usa ka panimalay diin dili gayud ka abi-abihon o kon lisud ang pakigkita sa usa ka sister nga may busy kaayo nga iskedyul. Mahimong modangat kini og dugay-dugay nga panahon aron sa pag-ugmad og maayo nga relasyon sa uban nga mga sister. Apan kon kita tinuoray nga nagtinguha sa paghigugma, pag-amuma, ug pag-ampo alang sa sister, ang Espiritu Santo motabang kanato sa pagpangita og paagi sa pagbantay ug paglig-on kaniya.
Si Presidente Thomas S. Monson usa ka bantugan sa pagpangalagad sama sa gibuhat sa Manluluwas. Kanunay siya nga makita nga nagbisita ug nagtabang sa uban. Miingon siya: “Gilibutan kita niadtong nanginahanglan sa atong pagtagad, sa atong pagdasig, sa atong suporta, sa atong paghupay, sa atong kamabination … Kita ang mga kamot sa Ginoo dinhi sa yuta, uban sa mando nga moserbisyo ug motabang sa Iyang mga anak. Nagdepende Siya sa matag usa kanato.”12
“Ug walay bisan usa nga makatabang niini nga buhat gawas kon [siya] magpaubos ug puno sa gugma, adunay hugot nga pagtuo, paglaum, ug gugma nga putli, kasarangan sa tanan nga mga butang, bisan unsa ang itugyan ngadto sa [iyang] pag-amuma.”13
Ang mga babaye nga atong bisitahan sa pagtudlo gisalig nato nga atong amumahan. Magbaton kita og gugma ug kalooy ug sa ingon makahimo og kalainan sa kinabuhi niadtong kinsa gitugyan nga atong amumahan.
Mga sister, gihigugma ko kamo. Ako nag-ampo nga kamo mobati sa gugma sa atong Langitnong Amahan ug sa atong Manluluwas nga si Jesukristo. Ako mopamatuod kaninyo nga ang Manluluwas buhi, sa pangalan ni Jesukristo, amen.