Ang Espiritu Santo ug ang Pagpadayag

Ni Elder Jay E. Jensen

Sa Kapangulohan sa Seventy

Ang Espiritu Santo mao ang ikatulo nga sakop sa Dios nga Kapangulohan, ug uban sa Amahan ug sa Anak, Siya nasayud sa tanang mga butang.

Isip usa ka batan-ong elder didto ako sa natad sa misyon mga usa ka tuig ug samtang nagbasa sa mga kasulatan ug sa mga pulong sa mga apostoles sa ulahing mga adlaw mahitungod sa pagpadayag ug sa Espiritu Santo, ako adunay makapakurat nga pagkahigmata. Ako mismo walay akong kaugalingon nga pagpamatuod, ilabi na mahitungod sa Amahan ug sa Anak. Miadto ko sa misyon nga nagsalig sa hinulaman nga kahayag gikan sa akong talagsaon nga mga ginikanan. Wala gayud magduhaduha sa ilang mga pulong, wala ko maghunahuna mahitungod sa pagtinguha sa akong kaugalingong espirituhanon nga pagsaksi. Usa ka gabii sa Pebrero didto sa San Antonio, Texas, niadtong 1962, nahibalo ko nga kinahanglan kong masayud sa akong kaugalingon mismo. Sa among gamay nga apartment nakakita ko og dapit diin makahimo ko sa pag-ampo og kusog, mangamuyo, “Langitnong Amahan, anaa ba Ikaw diha? Kinahanglan kong masayud sa akong kaugalingon mismo!”

Pagkataudtaud nianang gabhiona, ako nasayud sa akong kaugalingon mismo sa unang higayon sa akong kinabuhi nga ang Dios ug si Jesus matuod. Wala ko makadungog og mga tingog ni makakita og langitnong binuhat. Ako nasayud sa samang paagi nga kamo, usab, mahimong masayud—nga mao ang pinaagi sa “dili mahulagway nga gasa sa Espiritu Santo” (D&P 121:26) ug ang espiritu sa pagpadayag (tan-awa sa D&P 8:1–3) nga nagsulti og kalinaw ngari sa akong hunahuna (tan-awa sa D&P 6:23) ug mga kasigurohan ngari sa akong kasingkasing (tan-awa sa Alma 58:11).

Gikan niana nga kasinatian, akong nasaksihan ang tambag ni Alma nga “mopukaw ug modasig sa [akong] mga galamhan … bisan ngadto sa [pagsulay] sa [Iyang] mga pulong” (Alma 32:27). Kini nga mga pulong o mga liso mitubo ngadto sa pagka kahoy, gani higante nga mga kahoy sa pagpamatuod. Ang proseso nagpadayon uban sa dugang nga mga pag-eksperimento sa pulong nga miresulta sa dugang nga mga kahoy sa pagpamatuod, karon usa na ka tinuod nga kakahoyan nga gibase sa pagpadayag pinaagi sa Espiritu Santo.

Ang Espiritu Santo usa ka Gitinguha nga Gasa

Sa dihang ang Manluluwas mibisita sa Amerika mitawag Siya og napulog duha ka mga disipulo. Usa sa Iyang mga mensahe ngadto kanila ug sa mga katawhan mao ang mahitungod sa Espiritu Santo. Human sa pagtudlo kanila, ang Manluluwas mibiya ug misaad nga mobalik sa pagkasunod adlaw. Ang mga tawo tibuok gabii nga mitrabaho aron sa pagpundok og ingon ka daghan kutob sa ilang mahimo aron maminaw Kaniya.

Ang mga disipulo mipundok sa mga katawhan ngadto sa dose ka grupo aron sa pagtudlo kanila sa unsay gitudlo sa Manluluwas kanila. Nag-una sa ilang mga gipangtudlo mao ang kaimportante sa Espiritu Santo. (Tan-awa sa 3 Nephi 11–18.) Dayon ang mga katawhan nangluhod ug nag-ampo. Ang ilang kinasingkasing nga tinguha mao ang mahatagan sa Espiritu Santo (tan-awa sa 3 Nephi 19:8–9).

Ang Manluluwas mipakita ngadto kanila ug mipasabut og maayo sa kaimportante sa Espiritu Santo sa dihang nag-ampo Siya sa Amahan:

“Amahan, Ako nagpasalamat kanimo nga ikaw mitugyan sa Espiritu Santo ngadto kanila kinsa Ako mipili; …

“Amahan, Ako mag-ampo kanimo nga ikaw motugyan sa Espiritu Santo ngadto kanilang tanan nga motuo diha sa ilang mga pulong” (3 Nephi 19:20–21).

Basi sa panghitabo niining Basahon ni Mormon, mas nasabtan nako kon ngano nga si Presidente Wilford Woodruff miingon “nga ang gasa sa Espiritu Santo mao ang pinaka-importante nga gasa nga ikatugyan diha sa tawo. …

“[Kini] dili lang para sa mga lalaki, ni sa mga apostoles o sa mga propeta; alang kini sa tanang matinud-anong lalaki ug babaye, ug ngadto sa tanang bata kinsa adunay igong pangidaron nga modawat sa ebanghelyo ni Kristo” (Mga Pagtulun-an sa mga Presidente sa Simbahan: Wilford Woodruff (2004), 54–55).

Ang Pagpadayag Naghatag og mga Tubag sa mga Panahon sa Panginahanglan

Ang Espiritu Santo mao ang ikatulo nga sakop sa Dios nga Kapangulohan, ug uban sa Amahan ug sa Anak, Siya nasayud sa tanang mga butang (tan-awa sa D&P 35:19; 42:17). Siya adunay pipila ka importante nga mga tahas, nag-una niini mao ang pagtudlo ug ang pagpamatuod sa Amahan ug sa Anak (tan-awa sa 3 Nephi 28:11). Ang ubang mga tahas mao nga Siya nagpadayag sa kamatuoran sa tanang mga butang (tan-awa sa Moroni 10:5), ug Siya nagtultol sa pagbuhat og maayo (tan-awa sa (D&P 11:12)).

Si Presidente Monson nagpakita niining importante nga tahas sa pagkaginiyahan sa pagbuhat og maayo. Siya nagsunod sa ehemplo sa Manluluwas “kinsa nagpangadto-ngadto sa paghimog mga kaayohan” (Mga Buhat 10:38). Iyang gitudlo ang kaimportante sa dili pagbaliwala sa espirituhanon nga pag-aghat gikan sa Espiritu Santo, sa pagbisita og usa ka tawo ug sa pagpangalagad ngadto kaniya ug sa pagluwas sa usa ka tawo.

Apan usahay walay usa nga pareha ni Presidente Monson, walay home teacher, walay mapinanggaong sister nga anaa aron sa pagpangalagad panahon sa panginahanglan. Niadto nga mga sitwasyon, nakakita ko og kahupayan ug paggiya gikan sa Maghuhupay, laing tahas sa Espiritu Santo (tan-awa sa D&P 36:2).

Ang among apong lalaki nga si Quinton gipanganak nga may daghang depekto sa pagkatawo ug nabuhi tulo ka semana sa wala pa mag-usa ka tuig, diin nianang panahona sulod-gawas siya sa ospital. Si Sister Jensen ug ako nagpuyo sa Argentina nianang higayuna. Gusto gayud namo nga moadto didto aron makauban ang among mga anak aron sa paghupay kanila ug mahupay usab tungod nila. Mao kadto ang among apo nga gihigugma namo ug gusto namo nga mapaduol kaniya. Pag-ampo ra ang among mahimo, ug matinguhaon kaming mihimo niini!

Si Sister Jensen ug ako nag-mission tour sa dihang nadawat namo ang balita nga si Quinton namatay. Nagbarug kami sa hallway sa meetinghouse ug naggakos ug mihupay sa usag usa. Ako mosaksi nganha kaninyo nga ang mga kasigurohan miabut kanamo gikan sa Espiritu Santo, usa ka kalinaw nga lapaw pa sa tanang pagpanabut ug nagpadayon hangtud niining adlawa (tan-awa sa Mga Taga-Filipos 4:7). Nasaksihan usab namo ang dili matukib nga gasa sa Espiritu Santo diha sa kinabuhi sa among anak nga lalaki ug umagad nga babaye ug sa ilang mga anak kinsa hangtud niining adlawa makasulti mahitungod nianang panahona uban sa ingon nga hugot nga pagtuo, kalinaw, ug kahupayan.

Ang Pagpadayag ug ang Basahon ni Mormon

Kadtong sama nga gasa sa pagpadayag nakaimpluwensya sa akong pagpamatuod mahitungod sa Basahon ni Mormon. Akong nabasa, natun-an, nasiksik ug balik-balik nga nagpakabusog niini. Ang Espiritu Santo mipadayag kanako sa kamatuoran ug kabalaan niini.

Si Presidente Gordon B. Hinckley mitawag sa Basahon ni Mormon nga usa sa upat ka mahinungdanon nga mga bato sa pamag-ang sa Simbahan, ang uban mao ang Unang Panan-awon ni Joseph Smith, ang pagpahiuli sa priesthood, ug siyempre ang atong pagpamatuod kang Jesukristo, ang ulohang bato sa pamag-ang (tan-awa sa Mga Taga-Efeso 2:19–21). “Kining upat ka mahinungdanong mga gasa nga hinatag sa Dios,” siya mipasabut, “mao ang dili matarug nga mga bato sa pamag-ang nga nagpalig-on sa Ang Simbahan ni Jesukristo sa mga Santos sa Ulahing mga Adlaw, ingon man usab sa tagsa-tagsa nga mga pagpamatuod ug mga konbiksyon sa mga miyembro niini” (“Four Cornerstones of Faith,” Liahona, Peb. 2004, 7).

Kining upat ka mga gasa nga hinatag sa Dios nahimong mga angkla sa akong hugot nga pagtuo ug pagpamatuod, matag usa mipamatuod ngari kanako pinaagi sa pagpadayag sa Espiritu Santo. Hinoon, sulod sa pipila ka mga minutos, gusto ko nga mo-focus kabahin sa duha niining mga gasa nga mga bato sa pamag-ang—sa Unang Panan-awon ug sa Basahon ni Mormon. Mahinungdanon kini nga ang matag usa nagsugod diha sa usa ka kahimtang sa pamilya, diin ang mga anak natawo sa matarung nga mga ginikanan ug natudloan nila og maayo (tan-awa sa 1 Nephi 1:1). Ang mga panghitabo sa kinabuhi nila ni Lehi ug Joseph Smith adunay pagkasusama sa usag usa (tan-awa sa 1 Nephi 1 ug sa Joseph Smith—Kasaysayan 1):

Ang matag usa adunay piho nga panginahanglan. Ang kang Lehi mao ang pagluwas sa iyang kaugalingon ug sa iyang pamilya gikan sa umaabut nga pagkagun-ob sa Jerusalem ug ang kang Joseph Smith mao ang pagkasayud kon hain nga simbahan ang tinuod.
Ang matag usa nag-ampo.
Ang matag usa adunay usa ka panan-awon sa Amahan ug sa Anak.
Ang matag usa gihatagan og basahon.
Ang duha nagsangyaw.
Ang matag usa nakadawat og pagpadayag gikan sa Espiritu Santo ug pinaagi sa mga panan-awon ug mga damgo.
Sa katapusan, ang dautan nga mga tawo mihulga kanila. Si Lehi ug ang iyang pamilya naka-eskapo ug naluwas. Si Joseph gipatay.

Ikatingala ba nga ang mga misyonaryo modapit sa sinsero nga mga nangita sa kamatuoran nga sugdan ang ilang pagtuon sa Basahon ni Mormon diha sa 1 Nephi? Kini nga basahon puno sa Espiritu sa Ginoo. Niining nag-una nga mga kapitulo adunay usa ka klaro nga mensahe nga ang pagpadayag ug ang Espiritu Santo ihatag dili lamang ngadto sa mga propeta apan ngadto sa mga amahan ug mga inahan ug mga anak.

Ang mensahe mahitungod sa pagpadayag ug sa Espiritu Santo nagpadayon sa tibuok Basahon ni Mormon. Kini nga mga kamatuoran gi-summarize ni propeta Joseph Smith, “Kuhaa ang Basahon ni Mormon ug ang mga pagpadayag ug asa na man ang atong relihiyon? Wala na” (Mga Pagtulun-an sa mga Presidente sa Simbahan: Joseph Smith [2007], 233).

Isip mga Santos sa Ulahing mga Adlaw, ang atong mga pagpamatuod sa Basahon ni Mormon nga gihatag kanato pinaagi sa pagpadayag, makapaniguro kanato nga kini nga relihiyon ug ang mga doktrina niini tinuod (tan-awa sa pasiuna sa Basahon ni Mormon).

Ang mga butang sa Espiritu sagrado ug lisud ipahayag. Kita, sama kang Ammon, mamahayag, “Tan-awa, ako moingon nganha kaninyo, ako dili makasulti sa kinagamyan nga bahin sa akong gibati” (Alma 26:16).

Hinoon, ako mosaksi nga ang Espiritu Santo tinuod ug Siya mao ang tigpamatuod, tigpadayag, maghuhupay, giya, ug langitnong magtutudlo.

Ako mapainubsanon nga mohatag sa akong pagsaksi nga kining tinuod ug buhi nga Simbahan, kini nga relihiyon, anaa ibabaw niining upat ka mga bato sa pamag-ang. Ako mopamatuod nga si Jesukristo mao gayud ang ulohang bato sa pamag-ang (tan-awa sa Mga Taga-Efeso 2:19–21). Si Presidente Thomas S. Monson mao ang propeta sa Ginoo ug kining 15 ka mga lalaki nga naglingkod sa akong luyo mga propeta, mga manalagna, mga apostoles, ug mga tigpadayag. Gihuptan nila ang balaan nga priesthood ug ang mga yawe sa gingharian. Ako naghigugma, nagtahud ug nagpaluyo kanila. Sa pangalan ni Jesukristo, amen.