Pagkinabuhi ingon nga Panig-ingnan sa mga Magtutuo
Full-time nga mga misyonaryo man o mga miyembro, kinahanglan nga kitang tanan mahimo nga maayong mga panig-ingnan sa mga magtutuo ni Jesukristo.
Akong minahal nga mga kaigsoonan, karong gabhiona nagkatigum kita sa daghang mga dapit sa tibuok kalibutan. Ang talagsaong full-time nga mga misyonaryo anaa taliwala kanato. Akong dapiton ang tanang full-time nga mga misyonaryo sa pagbarug. Bisan asa man kamo, mga elder ug mga kapangulohan sa misyon, palihug barug. Mapasalamaton kami alang kaninyo! Nagpasalamat kami kaninyo! Nahigugma kami kaninyo! Mahimo na kamong molingkod.
Matag karon ug unya kinahanglan natong pahinumduman ang atong kaugalingon kon nganong kita adunay mga misyonaryo. Kini tungod sa usa ka sugo gikan sa Ginoo, kinsa miingon:
“Busa panglakaw kamo, ug himoa ninyong tinun-an ang tanang kanasuran, sa pagpamautismo kanila sa ngalan sa Amahan, ug sa Anak, ug sa Espiritu Santo:
“Nga magatudlo kanila sa pagtuman sa tanan nga akong gisugo kaninyo: ug, tan-awa, ako magauban kaninyo sa kanunay, hangtud sa katapusan sa kapanahonan.”1
Kini nga sugo usa sa daghan nga gibag-o tungod kay ang ebanghelyo ni Jesukristo gipahiuli sa kahingpitan niini. Ang mga misyonaryo nagserbisyo karon sama sa ilang gibuhat sa kapanahonan sa Bag-ong Tugon. Ang basahon sa Mga Buhat naghulagway sa unang misyonaryo nga mga paningkamot sa mga Apostoles ug uban nga mga disipulo human sa mortal nga pangalagad sa Ginoo. Diha atong mabasa ang mahitungod sa talagsaon nga pagkakabig ug pagbunyag ni Saulo sa Tarsus,2 kinsa sa una “nagpangusmo pa gihapog mga hulga sa pagpamatay batok sa mga tinun-an sa Ginoo”3 ug gipanglutos ang mga miyembro sa bag-o pa lang natukod nga Simbahan. Sa ingon nga mga sinugdanan, si Saulo nahimong kinabig nga Pablo, usa sa labing bantugan nga misyonaryo sa Ginoo. Ang katapusang 15 ka mga kapitulo sa basahon sa Mga Buhat nagsaysay sa misyonaryo nga mga paningkamot ni Pablo ug sa iyang mga kauban.
Sa usa ka sulat ngadto sa usa sa iyang labing gisaligan nga kauban, si Pablo misulat ngadto sa batan-ong si Timoteo, “Ayaw itugot nga adunay magatamay kanimo tungod sa imong kabatan-on; hinonoa alang sa mga magtutuo, pagkinabuhi ingon nga panig-ingnan, sa sinultihan ug sa paggawi, sa gugma, sa pagtuo, sa kaputli.”4 Kana nga tambag atong magamit karon sa samang paagi nga kini nagamit kaniadto. Kini magamit sa atong full-time nga mga misyonaryo; kini magamit ingon man usab sa matag miyembro sa Simbahan. Full-time nga mga misyonaryo man o mga miyembro, kinahanglan nga kitang tanan mahimo nga maayong mga panig-ingnan sa mga magtutuo ni Jesukristo.
Full-Time nga mga Misyonaryo
Ang full-time nga mga misyonaryo, mga 52,000 ug sobra pa, nagserbisyo sa 340 ka mga misyon sa tibuok kalibutan. Sila mga magtutuo ug maunungon nga mga sulugoon sa Ginoo. Ang ilang katuyoan mao ang “pag-imbitar sa uban sa pagduol ngadto kang Kristo pinaagi sa pagtabang kanila nga makadawat sa gipahiuli nga ebanghelyo pinaagi sa pagbaton og hugot nga pagtuo kang Jesukristo ug sa Iyang Pag-ula, paghinulsol, pagbunyag, pagdawat sa gasa sa Espiritu Santo, ug paglahutay hangtud sa katapusan.”5
Sama ni Timoteo, kasagaran sa full-time nga mga misyonaryo mga batan-ong lalaki. Ang uban mga sister; ang uban senior nga mga misyonaryo. Among gihigugma ang matag usa! Ang mga misyonaryo nagserbisyo aron sa paghimo sa kinabuhi nga mas maayo alang sa mga anak sa Dios. Ang Langitnong Amahan nahigugma sa tanan Niya nga mga anak. Siyempre, Siya ang ilang Amahan. Siya gusto nga mopanalangin kanila sa Iyang labing mahinungdanon nga gasa, nga mao ang kinabuhing dayon.6 Ang mga misyonaryo nagtudlo niining mga butanga bisan asa man sila nagserbisyo. Nagtabang sila sa mga tawo sa pagpalambo sa hugot nga pagtuo diha sa Ginoo, paghinulsol, pagbunyag, pagdawat sa Espiritu Santo, pagdawat sa mga ordinansa sa templo, ug matinud-anon nga molahutay ngadto sa katapusan. Ang buhat ug himaya sa Dios—“ang pagpahinabo sa pagka-imortal ug sa kinabuhi nga dayon sa tawo,”7—mao usab ang sagrado nga buhat ug himaya sa matag misyonaryo.
Nagkinahanglan kita og daghan pa nga mga misyonaryo—daghan pa nga takus nga mga misyonaryo. Atol sa Iyang pangalagad dinhi sa yuta, ang Ginoo miingon sa Iyang mga disipulo, “Daghan unta ang anihon, apan diyutay ra ang mamumuo: busa pangamuyo kamo sa Ginoo sa anihon, nga makapadala unta siyag mga mamumuo ngadto sa iyang anihon.”8
Sa sesyon ganihang buntag sa kinatibuk-ang komperensya, ang atong pinalanggang si Presidente Thomas S. Monson mihangyo sa batan-ong mga lalaki niini nga Simbahan sa pag-andam sa misyonaryo nga pagserbisyo. Nanghinaut ako nga ang iyang mensahe dunggon sa matag panimalay sa Simbahan.
Ngadto sa maalamong tambag ni Presidente Monson, akong idugang ang akong pagsaksi. Sa akong pamilya, akong naobserbahan ang mga panalangin nga moabut ngadto sa matag misyonaryo. Sa pagkakaron, ang gidaghanon sa among mga anak, mga apo, ug ilang mga kapikas nga gitawag sa pagserbisyo isip full-time nga mga misyonaryo 49 ka buok, ug kana nga gidaghanon mopadayon sa pagtubo. Sa matag kahimtang, akong nakita ang pagtubo sa kaalam, kahingkod sa paghukom, ug pagdako sa pagtuo nga napalambo diha sa matag misyonaryo. Sila, sama sa daghang henerasyon nga nag-una kanila, miapil sa pagserbisyo sa Dios sa “pag-alagad kaniya sa tibuok [nila] nga kasingkasing, gahum, hunahuna ug kusog.”9 Ang misyonaryo nga pagserbisyo nakatabang sa pag-ugmad sa ilang balaanon nga kapalaran.
Miyembro nga mga Misyonaryo
Ang tambag ni Pablo, “Pagkinabuhi ingon nga panig-ingnan sa mga magtutuo,” magamit usab sa mga miyembro. Kadaghanan wala makasulay ug tingali dili gayud mahimong full-time nga mga misyonaryo. Apan ang tanan mahimong miyembro nga mga misyonaryo. Kana nga pamahayag nagpahinumdom kanako sa usa ka balita mahitungod sa kataw-anan nga panghitabo. Diha sa dakong luna nga dulaanan sa missionary training center, usa ka karatula ang gibutang. Kini mabasa, “Para lang sa mga misyonaryo!” Ang mga tawo nga gusto usab nga modula niana nga luna mibutang og ilang bag-ong karatula. Ang ilang karatula mabasa, “Matag Miyembro usa ka Misyonaryo!”
Matag miyembro mahimong usa ka panig-ingnan sa mga magtutuo. Mga kaigsoonan, isip mga sumusunod ni Jesukristo, matag usa kaninyo makapuyo pinasubay sa Iyang mga pagtulun-an. Makabaton kamo og “usa ka putli nga kasingkasing ug limpyo nga mga kamot;” makabaton kamo sa “hitsura sa Dios nga gikulit sa inyong [panagway].”10 Ang inyong maayong binuhatan makita sa uban.11 Ang kahayag sa Ginoo mahimong modan-ag gikan sa inyong mga mata.12 Uban niana nga kahayag, makapangandam kamo sa pagtubag sa mga pangutana. Si Apostol Pedro mitambag, “Kinahanglan nga andam kamo kanunay sa pagtubag kang bisan kinsa nga mangutana sa hinungdan sa paglaum nga anaa kaninyo.”13
Himoa nga ang inyong tubag mainiton ug puno sa kalipay. Ug himoa nga ang inyong tubag may kapuslanan ngadto niana nga indibidwal. Hinumdumi, siya anak usab sa Dios, niana gayud nga Dios kinsa gusto gayud nga kanang tawhana mahimong sarang alang sa kinabuhing dayon ug mobalik ngadto Kaniya usa ka adlaw. Basin kamo gayud ang moabli sa pultahan sa kaluwasan nianang tawhana ug sa ilang panabut sa doktrina ni Kristo.14
Human sa inyong unang tubag, pangandam sa paghimo sa sunod nga lakang. Mahimo ninyong dapiton ang inyong higala sa pagtambong sa simbahan kauban ninyo. Daghan sa atong mga higala ang wala mahibalo nga welcome sila sa atong mga building sa Simbahan. “Umari kamo ug makita ninyo” mao ang pagdapit sa Manluluwas niadtong kinsa nagtinguha nga makat-on pa og dugang mahitungod Kaniya.15 Ang pagdapit nga motambong sa miting sa Dominggo uban ninyo o moapil sa usa ka kalihokan sa Simbahan sa pagpakighugoy-hugoy o pagserbisyo makatabang sa pagwagtang sa sayop nga mga hunahuna ug makapahimo sa mga bisita nga mas komportable taliwala kanato.
Isip miyembro sa Simbahan, duola kadtong kinsa dili ninyo kaila ug mainiton nga moabi-abi kanila. Matag Dominggo itunol ang inyong kamot sa pakigdait ngadto sa labing minus usa ka tawo nga dili ninyo kaila sa una. Matag adlaw sa inyong kinabuhi, paningkamot sa pagpalambo sa gidaghanon sa inyong mga higala.
Makadapit kamo og usa ka higala sa pagbasa sa Basahon ni Mormon. Ipasabut nga kini dili usa ka nobela o basahon sa kasaysayan. Kini mao ang laing tugon ni Jesukristo. Ang katuyoan gayud niini mao ang “pagpamatuod ngadto sa Judeo ug sa Hentil nga si Jesus mao ang Kristo, ang Dios sa Kahangturan, nagpaila sa iyang kaugalingon ngadto sa tanan nga mga nasud.”16 Adunay gahum niini nga basahon nga makatandog sa kasingkasing ug makapabayaw sa kinabuhi sa matinuoron nga nangita sa kamatuoran. Dapita ang inyong higala sa pagbasa sa basahon sa mainampoong paagi.
Si Propeta Joseph Smith miingon “nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon.”17 Ang Basahon ni Mormon nagtudlo mahitungod sa Pag-ula ni Jesukristo ug mao ang instrumento diin pagatumanon sa Dios ang Iyang saad kaniadto sa pagpundok sa nagkatibulaag nga Israel niining ulahing mga adlaw.18
Daghang mga tuig na ang milabay, ang duha nako ka kauban sa trabaho—usa ka nurse ug ang iyang bana nga doktor—nangutana kanako kon nganong nagpakabuhi ko sa pamaagi nga ingon niini. Mitubag ko, “Tungod kay nasayud ko nga ang Basahon ni Mormon tinuod.” Gipahulam nako sila sa akong kopya sa basahon, gidapit nako sila sa pagbasa niini. Milabay ang usa ka semana gibalik nila ang akong basahon nga may matinahuron nga “daghang salamat.”
Mitubag ko, “Unsay inyong buot ipasabut sa, daghang salamat? Dili gayud kana ang tukmang tubag sa usa ka tawo nga nakabasa niini nga basahon. Wala kini ninyo basaha, dili ba! Palihug dad-a kini og balik ug basaha kini; dayon kuhaon nako og balik ang akong basahon.”
Miangkon nga gipakli-pakli lang nila ang mga pahina niini, gidawat nila ang akong pagdapit. Sa ilang pag-uli, nagluha sila nga miingon, “Among nabasa ang Basahon ni Mormon. Nasayud kami nga kini tinuod! Gusto namo nga makat-on pa og dugang.” Nakakat-on sila og dugang, ug kadto akong pribilehiyo nga mobunyag nilang duha.
Laing paagi nga kamo makapakigbahin sa ebanghelyo mao ang pagdapit sa mga higala sa pagpakighimamat sa full-time nga mga misyonaryo diha sa inyong panimalay. Kadto nga mga misyonaryo gitawag ug andam nga motudlo sa ebanghelyo. Ang inyong mga higala, sa kakomportable diha sa inyong panimalay ug uban sa inyong kanunay nga pagsuporta, makasugod sa ilang panaw paingon sa kaluwasan ug kahimayaan. Ang Ginoo miingon, “Kamo gitawag sa pagpahinabo sa pagpundok sa akong pinili; kay ang akong pinili maminaw sa akong tingog ug dili magpatig-a sa ilang mga kasingkasing.”19
Ang kasulatan nagpahayag kanato nga “aduna pay daghan sa ibabaw sa yuta … kinsa natago gikan sa kamatuoran tungod kay sila wala masayud asa kini pangitaa.”20 Dili ba kana inyong oportunidad? Kamo mahimong disipulo kinsa nagtabang kanila nga madiskobrihan ang kamatuoran!
Karon niining panahon sa Internet, adunay bag-o ug makapahinam nga mga paagi nga kamo makahimo sa misyonaryo nga buhat. Makadapit kamo og mga higala ug mga silingan sa pagbisita sa bag-ong Website nga mormon.org. Kon kamo adunay mga blog ug mga social network sa internet, mahimo ninyong i-link ang inyong mga site ngadto sa mormon.org. Ug didto makahimo kamo og kaugalingon ninyo nga personal profile. Matag profile naglakip sa pamahayag mahitungod sa tinuohan, kasinatian, ug pagpamatuod. Tungod kay kini bag-o pa lang nga feature, kasagaran sa mga profile niini anaa sa Iningles. Ang mga profile sa laing mga pinulongan mosunod ra.
Kini nga mga profile mahimong adunay bug-at nga impluwensya alang sa kaayohan. Duha ka bulan na ang milabay, usa ka batan-ong lalaki nga ginganlan og Zach—anaa sa unang tuig sa kolehiyo—nakakita og usa ka pahibalo alang sa mormon.org sa telebisyon didto sa Baton Rouge, Louisiana. Siya mibisita sa Website ug naintriga sa mga profile sa mga miyembro sa Simbahan. Sa atong Website nakita niya ang link nga nagpahibalo kaniya kon asa siya makatambong sa simbahan. Pagkasunod Dominggo, nagsul-ob og puti nga sinina ug nagkurbata, mitambong siya sa simbahan, gipaila-ila ngadto sa mga miyembro sa ward, ug nalingaw sa tanang tulo ka oras nga mga miting. Gidapit siya sa balay sa usa ka miyembro alang sa panihapon, nga gisundan sa iyang unang misyonaryo nga leksyon. Wala kaabti og duha ka semana, nabunyagan ug nakumpirmahan siya isip usa ka miyembro sa Simbahan.21 Welcome, Zach! (Siya namati.)
Matag sulundon nga sumusunod ni Jesukristo mahimong usa ka epektibo nga miyembro nga misyonaryo. Ang mga miyembro ug full-time nga mga misyonaryo mahimong magtinabangay sa pagdala sa mga panalangin sa ebanghelyo ngadto sa minahal nga mga higala ug mga silingan. Daghan kanila iya ni Israel, nga karon gipundok ingon sa gisaad. Kini kabahin sa pagpangandam alang sa Ikaduhang Pag-anhi sa Ginoo.22 Gusto Niya nga ang matag usa kanato mahimong tinuoray nga panig-ingnan sa mga magtutuo.
Nasayud ko nga ang Dios buhi. Si Jesus mao ang Kristo. Kini mao ang Iyang Simbahan. Ang Basahon ni Mormon tinuod. Si Joseph Smith mao ang tighubad ug propeta niining katapusan nga dispensasyon. Si Presidente Thomas S. Monson mao ang propeta sa Dios karon. Ako nagpamatuod sa ingon sa sagradong pangalan ni Jesukristo, amen.