Paglikay sa Lit-ag sa Sala
Pagmalig-on ug himoa ang maayong mga pagpili nga magtugot kaninyo sa pagkaon sa bunga sa kahoy sa kinabuhi.
Sa usa ka matahum nga sanag nga kabuntagon, akong gidapit ang hapit na mag-otso anyos nakong apo nga babaye, si Vicki, sa paglakaw kuyog kanako duol sa linaw, nga mao gayud ang punduhanan sa tubig sa among matahum nga siyudad.
Malipayon kaming naglakaw, naminaw sa maanindot nga dahunog sa tin-aw nga sapa nga nag-agos subay sa among gilaktan. Ang dalan gilinyahan og matahum og green nga mga kahoy ug humot nga mga bulak. Among mabati ang nanag-awit nga kalanggaman.
Akong gipangutana ang asul og mata, malipayon, ug inosente nakong apo nga babaye kon kumusta na ang iyang pagpangandam alang sa bunyag.
Siya mitubag pinaagi sa usa ka pangutana: “Lolo, unsa man ang sala?”
Ako hilum nga nag-ampo alang sa usa ka inspirasyon ug naningkamot sa pagtubag sa yanong paagi kutob sa akong mahimo: “Ang sala mao ang tuyo nga pagsupak sa mga sugo sa Dios. Makapasubo kini sa Langitnong Amahan, ug ang mga resulta niini mao ang mga pag-antus ug kagul-anan.”
Tataw nga may kabalaka, iya kong gipangutana, “Ug sa unsang paagi kini modani kanato?”
Ang pangutana unang nagpadayag og kaputli, apan nagpadayag usab kini og pagpakabana unsaon sa paglikay sa pagkalambigit sa sala.
Aron makasabut siya og maayo, akong gigamit ang natural nga mga elemento nga anaa sa among palibut isip paglarawan. Sa pagpadayon namo sa unahan, nakakita kami sa daplin sa barbed-wire nga koral og usa ka semento nga poste sa igong gidak-on; bug-at kadto nga istraktura nga may mga bulak, mga sagbut, ug gagmayng mga punoan sa kahoy libut niini. Sa paglabay sa panahon kini nga mga tanom modagko labaw pa sa poste mismo.
Akong nahinumduman nga sa unahan og gamay sa among giagian, kami makakita og laing poste nga nalapawan na, sa hinay-hinay, hapit dili na mamatikdan, tungod sa mga tanom nga mitubo palibut niini. Akong mahunahuna nga ang poste dili makamatikod niini, bisan pa sa kalig-on niini, kini mahimong matabunan ug maguba pinaagi sa huyang nga mga tanom. Ang poste siguro makaingon, “Walay problema. Ako lig-on ug dako, ug kining gamay nga tanom dili makadaot kanako.”
Mao nga samtang ang duol nga punoan magkadako, sa una ang poste dili makamatikod niini; dayon ang poste mosugod sa pagtagamtam sa landong nga gihatag sa kahoy. Apan ang kahoy padayon nga motubo, ug libutan niini ang poste sa duha niya ka sanga, nga sa unang higayon, ingon og mahuyang apan kana, sa paglabay sa panahon, mosapid ug mopalibot sa poste.
Sa gihapon ang poste dili makamatikod unsa ang nahitabo.
Wala madugay, sa among paglakaw, among nakita ang gihisgutan nga poste. Kini naluka gikan sa yuta. Ang akong gamay nga apo nga babaye ingon og nahingangha ug nangutana kanako, “Lolo, mao ba kini ang kahoy sa pagpakasala?”
Gipasabut ko dayon siya nga usa lamang kadto ka simbolo, o usa ka ehemplo, kon unsaon pagdani sa sala ngari kanato.
Ako wala masayud unsa ang mahimong epekto sa among panag-istoryahanay ngadto kaniya, apan kini nakapahuna-huna kanako sa daghang mga dagway sa sala ug sa unsang paagi kini mosulod sa atong mga kinabuhi kon kini atong tugutan.
Kinahanglan nga magbantay kita tungod kay ang ginagmay nga mga pagpili, makahatag og dagkong sangputanan, sama sa pagkatulog og sayo ug sa pagmata og sayo, adunay dagko nga mga sangputanan. Ang Doktrina ug mga Pakigsaad 88:124 nagtudlo kanato, “Bangon og sayo, nga ang inyong mga kalawasan ug ang inyong hunahuna mahimo nga malagsik.” Kadtong mopahulay sa higdaanan og sayo mobangon nga nakapahulay, nga nalagsik ang lawas ug hunahuna ug mapanalanginan sa Ginoo, tungod sa pagkamasulundon.
Ang makita nga ingon og dili kaayo importante, sama sa dugay nga matulog, ang dili pag-ampo sa usa ka adlaw, molaktaw sa pagpuasa, o mosupak sa Adlawng Igpapahulay—ang maong ginagmay nga mga sayop—makapawala sa atong pagkasensitibo sa hinay-hinay, magtugot kanato sa paghimo og dili maayong mga butang.
Sa dihang ako usa pa batan-on, ang akong curfew alas 10:00 sa gabii. Karon, mao kana ang oras alang sa uban nga mogawas aron mangita og kalingawan. Gani nahibalo kita nga sa gabii ang pipila ka mga dautang butang mahitabo. Atol sa ngitngit nga mga oras ang ubang mga batan-on moadto sa mga lugar nga dili maayo ang palibut, diin ang mga musika ug mga pulong niini dili motugot kanila nga makabaton sa pagpakig-uban sa Espiritu Santo. Dayon, ubos niini nga mga kahimtang, mamahimo silang sayon nga mga biktima sa sala.
Sa kasagaran, ang pagkahimong biktima sa sala magsugod sa tawo kinsa mopili og mga higala kansang mga sumbanan dili makanunayon diha sa ebanghelyo; ug aron mahimong inila o madawat sa mga higala, dayon iangin sa maong tawo ang mga baruganan ug lagda sa ebanghelyo, mopaubos sa dalan nga naghatag lamang og kasakit ug kagul-anan niini nga tawo ug sa iyang mga gimahal.
Kinahanglang magbantay kita nga dili makatubo ang sala libut kanato. Ang mga matang sa sala anaa bisan asa—gani, pananglitan, sa computer o cell phone. Kini nga mga teknolohiya magamit kaayo ug makahatag og dakong benipisyo kanato. Apan ang dili hustong paggamit niini—sama sa makausik sa oras nga mga dula, mga programa nga mohatag kaninyo og kalibutanong kalipay o mas ngil-ad pa nga mga butang sama sa pornograpiya—makalaglag. Ang pornograpiya makaguba sa pamatasan ug makahimo sa mga tiggamitan niini nga maunlod ngadto sa huyong-huyong sa pagpanglingla, diin ang usa ka tawo makalingkawas lamang inubanan sa dakong tabang.
Kining makahahadlok nga mangtas makamugna og kasakit ug pag-antus, ngadto sa tiggamitan ug sa iyang inosente nga mga anak, kapikas, amahan, ug inahan. Ang bunga sa kalibutanong kalipay mao ang kapait ug kasubo. Ang bunga sa pagkamasulundon ug sakripisyo matam-is ug mahangturong kalipay.
Ang mga desisyon kabahin sa mga sumbanan nga sundon kinahanglan nga himoon pag-una, dili sa panahon nga ning-abut na ang mga pagtintal. Ang atong giya nga mga baruganan kinahanglang mao kini:
-
Kini ang akong buhaton tungod kay kini ang matarung, kini naggikan sa Ginoo, ug kini makahatag kanako og kalipay.
-
Kini ang dili nako buhaton tungod kay kini mobira kanako palayo gikan sa kamatuoran, gikan sa Ginoo, ug gikan sa mahangturong kalipay nga Iyang gisaad ngadto sa mga matinud-anon ug masulundon.
Tungod kay ang Amahan nahibalo nga kita makahimo og sayop nga mga pagpili, Siya, sa Iyang talagsaon nga plano sa gugma, mihatag og Manluluwas sa kalibutan, aron sa pagtubos sa mga sala niadtong kinsa maghinulsol; kinsa moduol Kaniya nga mangayo og tabang, kahupayan, ug kapasayloan; ug kinsa andam nga modala diha kanila sa Iyang ngalan, si Jesukristo.
Kon kita makasala, kinahanglan nga mangayo dayon kita og tabang tungod kay kon kita lang dili kita makalingkawas sa lit-ag sa sala, sama sa gihisgutan nga poste sa koral dili makalingkawas sa iyang kaugalingon. Kinahanglan nga may motabang gayud kanato nga makapalayo sa makamatay nga paggakos.
Ang mga ginikanan makatabang, ug ang bishop gitawag sa Dios aron sa pagtabang kanato. Siya ang tawo kinsa atong kasultihan sa atong mga gibati.
Ang Doktrina ug mga Pakigsaad 58:42–43 mipasabut:
“Tan-awa, siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila.
“Pinaagi niini kamo masayud kon ang usa ka tawo naghinulsol sa iayang mga sala—tan-awa, siya mokumpisal kanila ug mobiya kanila.”
Pipila ka bulan human sa among paglakaw duol sa lanaw, ang akong apo nga babaye gi-interbyu sa iyang bishop—nga iyang amahan—alang sa pagbunyag. Human sa interbyu gikumusta nako siya. Siya mitubag, ingon og mibadlong kanako, “Lolo, ang interbyu kompidensyal. Nahibalo mo niana.”
Mga bishop, ako manghinaot nga inyong seryusohon kana nga tubag. Ingon og alang kanako ang apo nakong babaye daghan kaayo og nasabtan sa mubo kaayo nga panahon.
Sama sa kahoy nga akong gihulagway nga nakahatag og kasub-anan, kasakit, pag-antus, ug panglit-ag, laing kahoy usab ang makahatag sa kaatbang niini. Kini gihisgutan sa 1 Nephi 8:10–12:
“Ug nahinabo nga ako nakakita og usa ka kahoy, kansang bunga madanihon sa paghimo sa usa nga malipayon.
“Ug nahinabo nga ako miduol ngadto ug mikaon sa bunga niini; ug ako nakatagamtam nga kini hilabihan katam-is, labaw pa sa tanan nga ako sukad nakatilaw. Oo, ug ako nakakita nga ang bunga niini maputi, molabaw sa tanan nga kaputi nga sukad ako nakakita.
“Ug sa diha nga ako mikaon sa bunga niini kini mipuno sa akong kalag sa tuman nga hingpit nga kalipay.”
Minahal kong mga kaigsoonan, pagmalig-on ug himoa ang maayong mga pagpili nga magtugot kaninyo sa pagkaon sa bunga sa kahoy sa kinabuhi. Kon, sa bisan unsa nga rason, kamo nasayop o mibiya sa agianan, ang among mga kamot andam nga motabang ug mosulti kaninyo, “Dali. Adunay paglaum. Kami nagmahal kaninyo, ug kami gusto nga motabang kaninyo nga magmalipayon.”
Ang Langitnong Amahan dako og paghigugma kanato nga Siya mihatag sa Iyang bugtong Anak, si Jesukristo.
Si Jesukristo dako og paghigugma kanato nga Siya mihatag sa Iyang kinabuhi sa pag-ula sa atong mga sala!
Unsa may andam nato nga ihatag aron malimpyo ug makadawat niana nga kalipay?
Niini nga mga kamatuoran ako mohatag sa akong pamatuod sa sagrado nga pangalan ni Jesukristo, amen.