Duha ka Linya sa Komunikasyon
Ato gayud nga gamiton ang personal nga linya ug ang linya sa priesthood, sa husto nga pagbalanse. Aron makab-ut ang pag-uswag nga mao ang katuyoan sa mortal nga kinabuhi.
Ang Ginoo mihatag sa Iyang mga anak og duha ka linya sa komunikasyon uban kaniya―ang gitawag nato og personal nga linya ug priesthood nga linya. Ang tanan kinahanglan makasabut ug magiyahan niining duha ka mahinungdanong mga linya sa komunikasyon.
I. Ang Personal nga Linya
Sa personal nga linya direkta kita nga mag-ampo sa atong Langitnong Amahan, ug Siya motubag pinaagi sa mga agianan nga Iyang giestablisar, nga walay mortal nga tigpataliwala. Kita mag-ampo ngadto sa atong Langitnong Amahan sa pangalan ni Jesukristo, ug Siya motubag kanato pinaagi sa Iyang Balaang Espiritu ug sa uban pang mga paagi. Ang misyon saEspiritu Santo mao ang pagpamatuod sa Amahan ug sa Anak (tan-awa sa Juan 15:26; 2 Ne. 31:18; 3 Ne. 28:11), aron paggiya kanato sa kamatuoran (tan-awa sa Juan 14:26; 16:13), ug sa pagpakita kanato sa tanang butang nga kinahanglan nga atong buhaton (tan-awa sa 2 Ne. 32:5). Kining personal nga linya sa komunikasyon uban sa atong Langitnong Amahan pinaagi sa Iyang Balaang Espiritu mao ang tinubdan sa atong pagpamatuod sa kamatuoran, sa atong kahibalo, ug sa personal nga paggiya kanato gikan sa mahigugmaong Langitnong Amahan. Usa kini ka mahinungdanong bahin sa Iyang kahibulongang plano sa ebanghelyo, nga nagtugot sa matag usa sa Iyang mga anak sa pagdawat og personal nga pagsaksi sa kamatuoran niini.
Ang direkta, personal nga paagi sa komunikasyon ngadto sa atong Langitnong Amahan pinaagi sa Espiritu Santo gibase sa katakus ug hilabihan ka mahinungdanon nga kita gisugo sa pagbag-o sa atong mga pakigsaad pinaagi sa pag-ambit sa sakrament matag adlaw nga Igpapahulay. Sa ingon niana nga paagi kita takus alang sa saad nga kita unta kanunay makabaton sa Iyang Espiritu nga mag-uban kanato, aron sa paggiya kanato.
Kabahin niining personal nga linya sa komunikasyon uban sa Ginoo, ang atong tinuohan ug praktis susama niadtong mga Kristiyanos kinsa namugos nga ang tawhanon nga mga tigpatunga tali sa Dios ug sa tawo wala kinahanglana tungod kay ang tanan direkta nga makasulti sa Dios ubos sa baruganan nga gipasabut ni Martin Luther kanato sama sa “ang priesthood sa tanang mga tumutuo.” Mosulti pa ako unya og daghan kabahin niana.
Ang personal nga linya mao ang hilabihan ka mahinungdanon diha sa personal nga mga desisyon ug sa pagdumala sa pamilya. Ang makapasubo kay, pipila sa mga miyembro sa atong Simbahan ang mipakaminus sa panginahanglan niining direkta, personal nga linya. Pagtubag ngadto sa dili kaduhaduhaang kaimportante sa matagnaon nga pagkapangulo―ang linya sa priesthood, diin naglihok sa kinatibuk-an sa pagdumala sa langitnong mga kumunikasyon kabahin sa mga butang sa Simbahan―ang pipila nagtinguha nga ang ilang mga priesthood lider mohimo og personal nga mga desisyon alang kanila, mga desisyon nga sila ang mohimo alang sa ilang mga kaugalingon pinaagi sa inspirasyon sa ilang personal nga linya. Ang personal nga mga desisyon ug pagdumala sa pamilya mao ang nag-unang butang alang sa personal nga linya.
Gusto nakong idugang ang duha ka laing pasidaan nga kinahanglan natong hinumduman nga may kalabutan niining bililhon direktang personal nga linya sa komunikasyon uban sa atong Langitnong Amahan.
Una, sa kinatibuk-an niini ang personal nga linya dili makalihok nga wala ang linya sa priesthood. Ang gasa sa Espiritu Santo―ang tinubdan sa komunikasyon gikan sa Dios ngadto sa tawo―nga gitugyan pinaagi sa awtoridad sa priesthood, ingon sa gitugot niadtong naghupot sa mga yawe sa priesthood. Kini dili mabatonan pinaagi lang sa tinguha o pagtuo. Ug ang katungod sa makanunayong panag-uban sa Espiritu nagkinahanglan nga mapamatud-an matag Igpapahulay samtang kita takus nga moambit sa sakrament ug sa pagbag-o sa atong mga pakigsaad sa bunyag sa pagkamasulundon ug pagserbisyo.
Sa samang paagi, dili kita makahimo sa pagpakigsulti sa masaligon nga paagi pinaagi sa direktang, personal nga linya kon kita dili masulundon o wala mahiangay sa priesthood nga linya. Ang Ginoo mipahayag nga “ang mga gahum sa langit dili madumala ni madala gawas lamang diha sa mga baruganan sa pagkamatarung” (D&P 121:36). Ang makapasubo kay, kini kasagaran ngadto sa mga tawo nga nakalapas sa mga sugo sa Dios o dili masulundon sa tambag sa ilang mga priesthood lider sa pagpahayag nga ang Dios mipadayag ngadto kanila nga sila dili apil sa pagsunod sa pipila ka sugo o sa pagsunod sa pipila ka tambag. Ang ingon nga mga tawo mahimo nga nakadawat og pagpadayag o inspirasyon, apan dili kini gikan sa tinubdan nga ilang gituohan. Ang yawa mao ang amahan sa mga bakak, ug siya matinguhaon gayud sa pagpugong sa buhat sa Dios pinaagi sa iyang minaro nga mga pagsundog.
II. Ang Linya sa Priesthood
Dili sama sa personal nga linya, diin ang atong Langitnong Amahan direkta nga makigsulti kanato pinaagi sa Espiritu Santo, ang komunikasyon sa linya sa priesthood adunay dugang ug gikinahanglan nga mga tigpataliwala nga mao ang atong Manluluwas, si Jesukristo; Iyang Simbahan; ug ang Iyang gitudlo nga mga lider.
Tungod sa Iyang natuman pinaagi sa Iyang maulaon nga sakripisyo, si Jesukristo adunay gahum sa paghan-ay sa mga lagda nga kinahanglan natong tumanon aron angay sa mga panalangin sa Iyang Pag-ula. Mao nga kita adunay mga sugo ug mga ordinansa. Mao nga kita mohimo og mga pakigsaad. Sa ingon nga paagi kita nahimong takus alang sa gisaad nga mga panalangin. Kining tanan madawat pinaagi sa kalooy ug grasya sa Usa nga Balaan sa Israel, “human sa tanan nga atong nabuhat” (2 Ne. 25:23).
Panahon sa Iyang yutan-on nga pangalagad, si Jesukristo mitugyan sa awtoridad sa priesthood nga nagdala sa Iyang ngalan ug Siya mitukod og simbahan nga nagdala usab sa Iyang ngalan. Niining katapusang dispensasyon, ang Iyang awtoridad sa priesthood gipahiuli ug ang Iyang Simbahan gitukod pag-usab pinaagi sa Langitnong mga mensahero ngadto ni Propeta Joseph Smith. Kining napahiuli nga priesthood ug kining natukod pag-usab nga Simbahan mao ang mahinungdanon nga mga bahin sa linya sa priesthood.
Ang linya sa priesthood mao ang agianan diin ang Dios nakigsulti sa Iyang mga anak pinaagi sa mga kasulatan sa nanglabay nga mga panahon. Ug niini nga linya Siya karon nakigsulti pinaagi sa mga pagtulun-an ug tambag sa buhi nga mga propeta ug mga apostoles ug ubang dinasig nga mga lider. Sa ingon niini nga paagi atong madawat ang gikinahanglan nga mga ordinansa. Sa ingon niini nga paagi atong madawat ang mga call sa pagserbisyo diha sa Iyang Simbahan. Ang Iyang Simbahan mao ang agianan ug ang Iyang priesthood mao ang gahum diin atong pribilehiyo sa pag-apil niadtong nagkahiusa nga mga kalihokan nga mahinungdanon sa pagtuman sa buhat sa Ginoo. Kini naglakip sa pagsangyaw sa ebanghelyo, pagtukod og mga templo ug mga simbahan, ug pagtabang sa mga kabus.
Kabahin niining linya sa priesthood, ang atong tinuohan ug praktis susama sa pagpamugos sa ubang mga Kristiyanos nga ang may pagtugot nga mga ordinansa (mga sakrament) mahinungdanon ug kinahanglan nga ipahigayon pinaagi sa usa ka tawo nga may katungod ug gihatagan og gahum ni Jesukristo (tan-awa sa Juan 15:16). Managsama ang atong pagtuo, apan sa dayag lahi sa ubang mga Kristiyanos kon giunsa nato sa pagsubay niana nga awtoridad.
Pipila ka mga miyembro o kanhi mga miyembro sa atong simbahan napakyas sa pag-ila sa kaimportante sa linya sa priesthood. Gipakaminus nila ang kaimportante sa Simbahan ug sa mga lider ug sa mga programa niini. Nagsalig lang sa hingpit diha sa personal nga linya, sila nagpadayon sa ilang kaugalingon, nangangkon sa paghatag og kahulugan sa doktrina ug nagdani sa ubang nakigkompitensya nga organisasyon nga supak sa mga pagtulun-an sa mga lider nga propeta. Niini nga paagi ilang gipakita ang moderno nga pakigbatok sa mabiaybiayon nga paagi ngadto sa unsay ilang gitawag nga “organisado nga relihiyon.” Kadtong kinsa mosalikway sa panginahanglan sa organisado nga relihiyon misalikway sa buhat sa Magtutudlo, kinsa mitukod sa Iyang Simbahan ug sa mga opisyal niini diha sa tunga-tunga sa kapanahonan ug kinsa mitukod pag-usab niini sa moderno nga kapanahonan.
Ang organisado nga relihiyon, nga gitukod pinaagi sa balaanong pagtugot, mahinungdanon, ingon sa gitudlo ni Apostol Pablo,
“Alang sa pagkasangkap sa mga balaan, alang sa buhat sa pag-alagad, alang sa paglig-on sa lawas ni Kristo:
“Hangtud makakab-ot kitang tanan sa pagkahiniusa sa pagtuo, ug sa kahibalo mahitungod sa Anak sa Dios, ug makakab-ot sa kahamtong sa pagkatawo, sa sukod sa gidak-on sa kahupnganan ni Kristo” (Mga Taga-Efe. 4:12–13).
Kinahanglan nga kitang tanan mohinumdom sa pamahayag sa Ginoo diha sa moderno nga pagpadayag nga ang tingog sa mga sulugoon sa Ginoo mao ang tingog sa Ginoo (tan-awa sa D&P 1:38; 21:5; 68:4).
Ako mibati sa pagdugang og duha ka pasidaan nga kinahanglan natong mahinumduman nga may kalabutan sa pagsalig sa mahinungdanong linya sa priesthood.
Una, ang linya sa priesthood dili molabaw sa panginahanglan alang sa personal nga linya. Kitang tanan nagkinahanglan og usa ka personal nga pagpamatuod sa kamatuoran. Samtang ang atong hugot nga pagtuo naglambo, kita kinahanglan nga mosalig diha sa mga pulong ug sa hugot nga pagtuo sa uban, sama sa atong mga ginikanan, mga magtutudlo, o mga priesthood lider (tan-awa sa D&P 46:14). Apan kon mag-agad lang kita sa usa ka partikular nga priesthood lider o magtutudlo alang sa atong personal nga pagmatuod sa kamatuoran imbis nga makakuha niana nga pagpamatuod pinaagi sa personal nga linya, kita malagmit mawad-an sa hangtud sa hugot nga pagtuo tungod sa binuhatan nianang tawhana. Sa pag-angkon og hingkod nga kahibalo o pagpamatuod sa kamatuoran, kinahanglan nga kita dili mag-agad sa usa ka mortal nga tigpataliwala tali kanato ug sa atong Langitnong Amahan.
Ikaduha, sama sa personal nga linya, ang linya sa priesthood dili hingpit ug tukma nga makalihok alang sa atong kaayohan gawas kon kita takus ug masulundon. Daghang mga kasulatan ang nagtudlo nga kon kita magpadayon sa paghimo og seryoso nga mga kalapasan sa mga sugo sa Dios kita “ipahimulag gikan sa iyang atubangan” (Alma 38:1). Kon kana mahitabo, ang Ginoo ug ang Iyang mga sulugoon dili gayud makahatag kanato sa espirituhanon nga tabang ug kita dili makabaton niini sa atong kaugalingon.
Ang kasaysayan naghatag kanato og klaro nga ehemplo sa kamahinungdanon sa mga sulugoon sa Ginoo nga angay sa Espiritu. Ang batan-ong Propeta nga si Joseph Smith dili makahubad kon siya masuko o maglagot.
Si David Whitmer mihinumdom: “Usa ka buntag sa dihang andam na siya sa pagpadayon og hubad, may problema nga mitunga diha sa balay ug naglagot siya mahitungod niini. Usa ka butang nga nahimo ni Emma, nga iyang asawa. Si Oliver ug ako misaka sa taas, ug wala madugay si Joseph misaka aron sa pagpadayon sa paghubad, apan siya walay bisan unsa nga nahimo. Wala siya makahubad og bisan usa ka pulong. Siya nanaog, migawas ngadto sa prutasan ug nangamuyo ngadto sa Ginoo; nawala og mga usa ka oras―mibalik sa balay, ug nangayo og pasaylo ni Emma ug dayon misaka sa taas diin didto kami ug hapsay nga nagpadayon ang paghubad. Siya walay mahimo gawas kon siya magpaubos ug magmatinud-anon.”1
III. Ang Panginahanglan sa Duha ka mga Linya
Akong tapuson uban sa dugang nga mga ehemplo sa panginahanglan sa duha ka mga linya nga natukod sa atong Langitnong Amahan alang sa komunikasyon sa Iyang mga anak. Ang duha mahinungdanon sa Iyang katuyoan sa pagpahinabo sa pagka-imortal ug sa kinabuhi nga dayon sa Iyang mga anak. Usa ka asoy sa kasulatan nga naghulagway niining panginahanglan mao ang tambag ni Amahang Jetro nga si Moises dili kinahanglan nga motrabaho og maayo. Ang mga tawo naghulat diha sa ilang priesthood lider gikan sa buntag hangtud sa gabii aron sa “pagpangutana mahitungod sa Dios” (Exodo 18:15) ug usab aron “magahukom sa taliwala sa usa ug usa” (b. 16). Kita kasagaran nga makamatngon kon giunsa ni Jetro pagtambag si Moises aron motudlo og mga maghuhukom nga mohusay sa personal nga mga panagbangi (tan-awa sa mga bersikulo 21–22). Apan si Jetro mihatag usab og tambag kang Moises nga naghulagway sa kaimportane sa personal nga linya: “Ug igatudlo mo kanila ang mga tulumanon ug ang mga kasugoan, ug igapahayag kanila ang dalan nga angay nilang pagalaktan, ug ang boluhaton nga angay nilang pagabuhaton” (bersikulo 20; emphasis gidugang).
Sa laing pagkasulti, ang mga Israelita kinsa misunod ni Moises kinahanglan nga pagatudloan nga dili dad-on ang matag pangutana ngadto sa priesthood lider. Kinahanglan nga ilang sabton ang mga sugo ug magtinguha og inspirasyon aron sa pagsulbad sa daghang mga problema diha sa ilang mga kaugalingon.
Bag-o lang nga mga panghitabo sa nasud sa Chile ang naghulagway sa panginahanglan alang sa duha ka mga linya. Ang Chile miantus sa malaglagong linog. Daghan sa atong mga miyembro nawad-an og mga panimalay; ang uban nawad-an og mga sakop sa pamilya. Daghan ang nawad-an og pagsalig. Diha-diha dayon―tungod kay ang atong Simbahan andam nga motubag sa ingon nga mga katalagman―ang pagkaon, kapasilungan, ug ubang hinabang nga materyal nahatag. Ang mga Santos sa Chile nakadungog sa tingog sa Ginoo pinaagi sa Iyang Simbahan ug sa mga lider niini nga nagtubag sa ilang materyal nga mga panginahanglan. Apan bisan unsa pa man ka paigo ang linya sa priesthood, dili pa gayud kini igo. Ang matag miyembro kinahanglan nga magtinguha sa Ginoo diha sa pag-ampo ug modawat sa direktang mensahe sa kahupayan ug paggiya nga moabut pinaagi sa Balaang Espiritu ngadto niadtong kinsa nagtinguha ug naminaw.
Ang atong misyonaryo nga buhat maoy laing ehemplo sa panginahanglan alang sa duha ka mga linya. Ang mga lalaki ug mga babaye kinsa gitawag nga mahimong mga misyonaryo mga takus ug andam tungod sa mga pagtulun-an nga ilang nadawat pinaagi sa linya sa priesthood ug sa pagpamatuod nga ilang nadawat pinaagi sa personal nga linya. Sila gitawag pinaagi sa linya sa priesthood. Dayon, isip mga representante sa Ginoo ug ubos sa direksyon sa Iyang linya sa priesthood, ilang gitudloan ang mga investigator. Ang matinud-anon nga mga nagtinguha sa kamatuoran maminaw, ug ang mga misyonaryo moaghat kanila sa pag-ampo aron masayud sa pagkatinuod sa mensahe diha sa ilang mga kaugalingon pinaagi sa personal nga linya.
Ang katapusang ehemplo nga magamit kining mga baruganan kabahin sa hilisgutang linya sa priesthood diha sa pamilya ug sa Simbahan.2 Ang tanang awtoridad sa priesthood diha sa Simbahan naglihok ubos sa pagdumala sa usa ka tawo kinsa naghupot sa tukma nga mga yawe sa priesthood. Mao kini ang linya sa priesthood. Apan ang tawo nga may awtoridad nga magdumala sa pamilya―bisan kon ang amahan o single-parent nga inahan―naglihok sa mga butang nga hilisgutan diha sa pamilya nga wala na kinahanglana ang pagtugot sa bisan kinsa nga naghupot sa mga yawe sa priesthood. Sama kana sa personal nga linya. Ang duha ka mga linya kinahanglan gayud nga maglihok diha sa atong kinabuhi sa pamilya ug sa atong personal nga mga kinabuhi kon gusto nato nga makabaton og pagtubo ug makab-ut ang kapalaran nga makita diha sa plano sa atong Langitnong Amahan alang sa Iyang mga anak.
Ato gayud nga gamiton ang personal nga linya ug ang linya sa priesthood sa husto nga pagbalanse aron makab-ut ang pag-uswag nga mao ang katuyoan sa mortal nga kinabuhi. Kon ang personal nga praktis sa relihiyon nag-agad pag-ayo sa personal nga linya, ang pagkawalay pagtagad sa uban mao ang makapawala sa kaimportante sa balaanong awtoridad. Kon ang personal nga praktis sa relihiyon nagsalig og maayo sa linya sa priesthood, ang indibidwal nga pag-uswag mapugngan. Ang mga anak sa Dios nagkinahanglan sa duha ka linya aron makab-ut ang ilang mahangturon nga kapalaran. Ang napahiuli nga ebanghelyo nagtudlo sa duha, ug ang napahiuli nga Simbahan naghatag sa duha.
Ako mopamatuod sa propeta sa Ginoo, si Presidente Thomas S. Monson, kinsa naghupot sa mga yawe nga nagdumala sa linya sa priesthood. Ako mopamatuod ni Ginoong Jesukristo, kansang simbahan mao kini. Ug ako mopamatuod sa gipahiuli nga ebanghelyo, kansang kamatuoran mahibaloan sa matag usa kanato pinaagi sa bililhong personal nga linya ngadto sa atong Langitnong Amahan. Sa pangalan ni Jesukristo, amen.